馬來西亞 吞食天地(03) – 檳城冠軍榴槤 黑刺

檳城北海市～廖石乾黑刺榴槤

馬來西亞榴槤 黑刺近年被熱炒，身價已經超越貓山王，成為馬來西亞最貴的榴槤。黑刺榴槤之父 廖石乾從小便跟著父親打理果園並種植榴槤，是本地第一個栽種黑刺的園主。黑刺的品質穩定，外殼底部長有一根黑刺，果肉質感柔軟黏喉味道苦甜中散發陣陣花香，深受老饕喜愛，使得 廖石乾在2013年和2014年蟬聯檳城榴槤大賽冠軍，在馬來西亞「2022年世界榴槤錦標賽」中，廖石乾再以一棵40年樹齡出品的黑刺榴槤擊敗貓山王，並贏得“王中之王”稱號名聲大震。廖石乾說「黑刺榴槤要樹齡10年以上的出品才會比較香，越是老樹味道越香濃，我們園內最老的黑刺榴槤樹已達40年。」要吃40歲的黑刺，絕對可遇不可求，我至今日還未食過。

馬來西亞 吞食天地 – Day 03

<<檳城>>

今日會過對面北海找廖石乾食黑刺，早上因為酒店The Leith包了早餐，所以到餐廳望望。

早餐有煎蛋檔，食物算齊款，火腿芝士煙肉也不缺，不過我哋留肚食最好的，這些普通嘢全部唔食。

食少少水果清一清腸胃，便開始今日的博命行程。

先行去今日第一個目標食早餐，然後才乘Grab去北海食榴槤。

正宗橋頭福建蝦麵 – 營業超過50年的福建蝦麵小店，曾獲得媒體CNNGO評為十大檳城小吃，以新鮮蝦殼熬製的湯底和老闆特製的辣椒醬馳名。

小店內唔多人，相比其他經常會去的福建蝦麵店是欠了點人氣。

豆蔻汁(RM 2)；柑桔冰(RM 2) – 濃縮果汁沖成的，完全沒有誠意的垃圾飲品。

魚丸福建蝦麵(RM 8.5) – 湯底沒有888福建麵咁濃甜鮮美，更加比不上檳城最好食的Ah Koo’s Hokkien Mee。魚蛋很彈牙但欠了魚肉香味，油麵底一般，湯底都算鮮味，食到後段有點跌watt，整體上合格的，但檳城咁多好食福建麵，下次一定唔再來。

包德館 – 檳城的廣東點心味道一向差勁只賣懷舊，今次試試這貴價點心館，價錢比得上陸羽茶室。包德館在2020年6月開業，是米芝蓮入選餐廳之一，點心賣相精緻，店內環境獨特，喜歡精緻點心的話值得一試。

店內的設計古色古香，像參觀博物館的感覺。

再行進店內是個苔蘚花園，周圍滿佈人工霧氣，非常之特別的水池設計，看得出店主的誠意。

樓下已經滿座，我們只好坐在環境次一級的樓上。

竹蔗馬蹄水(左)(RM 18.6) – 入口清潤微甜，充滿竹蔗馬蹄味十分足料，價錢貴但很高質；羚羊麥冬(Antelope Radix)(右)(RM 18.6) – 是一款草本涼茶，主要用羚羊角絲和麥冬煲製，有清熱解毒下火消炎的功效，滋陰潤肺，包德館的飲品質素十分之高。

珍珠糯米雞(RM 18.6) – 賣相好靚估唔到入口很差，糯米有點生，冬菇腩肉等餡料的麻油味太重，唔好食。

包德鮮皇蝦餃(RM 19.8) – 蝦餃的蝦唔夠新鮮，敗筆，太多豬油渣整體的味道太濃，感覺眼高手低，雖然餃皮煙韌餡料充足，但不是好味的蝦餃。

包德燒賣(RM 16.3) – 原本好食的，但估唔到部分豬肉唔新鮮開始變味，大扣分，差點要退貨。

招牌雪綿叉燒包(RM 19.8) – 又靚又美味的叉燒包，白包十分鬆軟又靚仔，餡料很冶味但加了芝麻味道唔係太夾，整體上還是很好食。

飲茶始終係香港最好，來到大馬應該主打叻沙和福建麵。飲完茶直接Call Grab去北海，在包德館上車，36km距離車費RM 43另加RM 5.7過橋費，初時報價RM 82，但15分鐘後降至RM 43，立即直奔往廖石乾的冠軍黑刺。

由於黑刺的種植歷史短，產量不及貓山王，因此現在黑刺的價格比貓山王高出不少，使近年不少榴槤園加入種植黑刺，包括 寶盛園和昨天去了的 218浮羅山背榴槤園。廖石乾話「人們只懂得貓山王的好，因為他們沒吃過黑刺。」我就覺得紅蝦竹腳蜈蚣等等都一樣咁好食，最緊要老樹和新鮮。廖石乾吹到黑刺好大，希望佢真係好啦，期望好高。

廖石乾黑刺 – 地址是北海Jln Besar 81號，店舖沒有招牌，但店內勁多榴槤。

放在外圍的榴槤品質好像只是一般，懷疑店舖收埋了靚貨。

榴槤名碼實價，但伙記很蠱惑，我買貓山王佢計了RM 45/kg，唔老實。

買了一個黑刺一個貓山王，叫伙記揀個老樹靚貨佢都唔多理，求其揀了2個就話靚，態度麻麻冇乜誠意。

黑刺(左)(RM 143)(RM 70/1kg) ; 貓山王(右)(RM 74)(RM 45/kg) – 應該RM 40/kg，收貴了RM 8。

黑刺(RM 143~2.04kg) – 果肉呈橙黃色，皮乾爽黏喉度同樣達到90%，花香味怡人中帶濃鬱甘苦甜美，口感細膩極度幼滑，味道欠了醇厚明顯樹齡不夠老，值90分，好好食品質高但未達預期。

貓山王(RM 74~1.7kg) – 果肉呈深黃色，外皮乾爽皺紋清晰，果肉的黏度中等，大部份濃甜少部份滲出甘苦味，奶香不足層次感較單薄，只值75分，沒有令人醒神的感覺，早知食多一個黑刺。

買完之後吃了大半廖叔叔才出現吹水，早些出來幫我哋揀個好嘢啦，你來遲了，不過下次可以再比多次機會你，試多一次，小太熊話下次自己揀冇咁嬲，佢話隔離枱的叔叔自己揀了幾個都好靚。

今日戰鬥力強勁，食完榴槤還有Quota，便乘Grab車往北海的另一食店 小旺角飲食中心，車程14km車費RM 18。

小旺角飲食中心 – 位於大山腳百利鎮，內有2023年的炒粿條冠軍店「檳城安娣大蝦炒粿條」。

檳城安娣大蝦炒粿條 – 又冇乜人氣喎，唔駛排隊即叫即炒。

紅毛榴槤冰(RM 4.5) – 真材實料用紅毛榴槤打成，酸酸甜甜好好味；百香果汁(RM 3.5) – 有鮮百香果肉，果核很脆像吃餅乾一樣很特別，味道清新微甜幾好味。

檳城安娣大蝦炒粿條(RM 9) – 河粉超滑，味道少辣偏甜，大蝦很爽口，但欠了鑊氣，唔覺得值得冠軍，George Town好多檔都比佢好食，下次不再來。

天氣太熱了，坐Grab車返酒店沖涼休息一下，車程28km，車費RM 28另加RM 5.7過橋費。

在酒店午睡2小時，黃昏小太熊訂了在Eastern Massage Therapy & SPA按摩，乘Grab車去路程7km車費RM 10。

強益足療養生館(Eastern Massage Therapy & SPA) – 最初以為是地下舖好靚果間店，原來係樓上閣樓勁噏耷果間冇窗舖。

房間其實十分陰暗，做了60分鐘全身按摩，每位RM 75，老闆幫我做，手勢勁正按完背脊真係鬆晒，勁舒服。小太熊的女師傅手勢就一般，而且比較懶成日想慳力，都係老闆最好。

價錢全部都平，立即訂了下次來做腳，好耐未試過按腳按得到位了。

乘Grab車往 舊關仔角美食廣場，路程7km車費RM 7。

舊關仔角美食廣場 – 內有很多地道美食，人氣旺盛。

義蓮魚頭米粉(Ghee Lian Green Tomyam) – 在Lot No.39舖位，要排隊等半個鐘，不過值得的，十分好食，好到想餐餐都食。

柑桔冰(RM 8)(左)；沙梨冰(RM 8)(右) – 在Lot 47的新鮮水果Buah Potong買，又濃又新鮮酸酸甜甜勁好飲，雖然貴了些，不過又大杯啲。

鮮石斑魚頭青東炎米粉(RM 16) – 石斑魚頭肉脆嫩鮮美，米粉幼細好食，冬陰功湯底微辣中帶少少青咖哩香，和酸味異常均衡，好食到不得了，明天再來。

食完之後天黑晒，人亦多了，要等位。

行返入George Town行多一陣間夜街。

檳城大會堂(Penang City Hall) – 喬治市內一座建於1903年的建築，曾經是喬治市的市議會，1982年被列為國家文物。

檳城市政廳(Penang Town Hall) – 位於Town Hall旁邊的舊建築，建於1880年，具有大路的歐洲建築風格。

Lebuh Light – Town Hall旁邊的這條大街佈置了大量樹燈飾，像聖誕節一樣咁靚。

唐人厝(China House) – 是檳城最長的咖啡廳，建築風格古色古香，坐落在古城內區，店舖打通了三間檳城古厝，從入口行到另一個入口可以跨越多個不同風格設計的咖啡室，分別有售賣手工蛋糕的甜品室，吃正餐的餐廳，和朋友吹水的酒館和駐有Live Band的酒廊，處處有驚喜。

走進門口便是歐陸風格的咖啡館，蛋糕櫃放了多個手工蛋糕任你選擇，令人難以抗拒。

再入是圖書館，很多人喜歡坐在這空間靜靜地吹水。

有DJ打碟的Disco反而冇乜人，奇怪。

長長的圖書館卻坐滿食客，旅客們都幾有文化。

繼續向前行開始冇客，始終地方太大人客沒有那麼多。

行到最後是一間懷舊酒吧。

有歌手駐場唱歌，人客沒有另一邊入口的咖啡館那麼多，都係返去坐。

咖啡館內的蛋糕種類繁多，口味鹹甜都有，小太熊話佢哋的Tiramisu好出名架，一定要食一件。Tiramisu共分為兩種，包括含有酒精和不含酒精，梗有一款啱口味。

Tiramisu Alcohol (RM 25.2) – 滲滿冧酒的意大利咖啡蛋糕企唔穩在碟上，只能橫臥着，蛋糕有濃鬱的咖啡香，中間一層芝士忌廉更是香口，頂層的焦糖杏仁鬆脆香口，高質美味的蛋糕 ; 黑咖啡(Iced Long Black)(RM 16.5) ; Iced Latte (RM 17.5) – 兩杯咖啡也很淡口，這裡的咖啡很差，不值一試。

食完宵夜慢慢行回酒店，順道遊覽市內夜景。

武帝廟 – 寺廟有超過100年歷史，是由第一代華人移民來到喬治市時候建立的。

福德祠 – 建於1845年的神廟，祭祀着保佑平安、健康、財富的大伯公。

檳州南陽堂葉氏宗祠 – 2024年正式踏進100週年的社團，在檳州十分活躍。

除了神廟，還有大量壁畫。

檳城壁畫 姊弟騎乘 – 兩姐弟坐在一輛真的舊單車上，車尾座位已經破了，細佬也正在消失之中。

檳城壁畫 追風少年 – 少年已正在消失，慘慘。

檳城壁畫 腳踢肥貓 – Bruce Lee李小龍已經消失了一半，是時候說再見。

檳城壁畫 寵物恐龍 – 希望下一次到檳城仍然可以看到這位小朋友。

一個馬來西亞的足球球員

本頭公巷(Armenian Street) – 平凡的橫街開滿彩傘，立時充滿生氣。

紅園美食坊(Red Garden Cafe) – 酒店The Leith對面的夜市，十年前曾經試過這裡的福建麵，非常垃圾，以後也冇再幫襯。

The Leith – 今晚繼續住多一晚，明天一早搬屋。

補充資料 :

1.     尖沙咀永恆找換店 HK$1.72 = RM 1

2.     今日檳城很多地方也收信用卡和ApplePay，可以少帶現金。

3.     檳城現在市面上已經沒有的士，連George Town也沒有，只在機場還有Coupon Taxi。馬來西亞雖然有幾個叫車Apps，但只有Grab可以真正叫到車，其他Apps次次都話冇車。

4.     在檳城用Grab叫車的價錢像買股票一樣，不斷升升跌跌，最高和最低價錢可以相差3倍，全馬來西亞也是這樣。每1km的價錢RM 1~3。

5.     檳城的巴士班次不太疏，每小時也有1～3班車，而且可以用Google查到巴士時間表。

 

 

---待續---

馬來西亞 吞食天地09天路線和行程重點(詳細行程可點擊到相關文章)

日數	行程路線	日程重點
Day 01	香港 → 檳城	住 : The Granite Luxury Hotel Penang 食 : 檳榔律馳名叻沙(Penang Road Famous Laksa) ; 檳城三條路888福建蝦麵 ; Joez Coconut ; 帝一榴 ; DUAN二杬
Day 02	檳城	住 : The Leith 食 : 龍鳳茶室(Loong Fong Café) ; 多春茶座(Toh Soon Cafe) ; 218浮羅山背榴槤園(218 Dusun Durian Balik Pulau) ; 南光茶室(Nan Guang) ; 白糖糕鹹煎餅攤檔 ; 海鮮朱(Seafood Choo)
Day 03	檳城	住 : The Leith 食 : 正宗橋頭福建蝦麵 ; 包德館 ; 廖石乾黑刺 ; 檳城安娣大蝦炒粿條 ; 義蓮魚頭米粉(Ghee Lian Green Tomyam) ; 唐人厝(China House)
Day 04	檳城	住 : Jazz Hotel Penang 食 : 姚氏姊妹炒粿角 ; Joez Coconut ; Ah Koo’s Hokkien Mee ; 羅記鴨肉棵條湯 ; Aneka Thai ; Nyonya Palazzo ; 義蓮魚頭米粉(Ghee Lian Green Tomyam)
Day 05	檳城	住 : Jazz Hotel Penang 食 : Roti Bakar Hutton Lane ; My Own Café ; Rasa Rasa 回味 ; 218浮羅山背榴槤園 ; 101浮羅山背榴槤 ; 長成榴槤水果(Chang Cheng Durian & Fruits) ; 巴生老街肉骨茶
Day 06	檳城 → 怡保	住 : Cititel Express Ipoh 食 : 寶麗鴨肉粿條湯 ; My Own Café ; 靚媽豆花店(Big Mom Beancurd) ; 新榮輝花生糖餅家 ; 南方餅家(Lam Fong Biscuit) ; 老黃芽菜雞沙河粉
Day 07	怡保	住 : Cititel Express Ipoh 食 : 東泰茶舖(Dong Tai Kopitiam Pasir Pinji) ; 40年老字號大樹腳紅豆冰 ; 兵如港忠記大樹頭炸料粉 ; 啊耀榴槤專賣店 ; 鬼式茶餐廳(The Museum) ; 黎記豆腐花 ; 奇峰豆腐花 ; 余合香餅 ; 永成茶樓(Restoran Weng Seng)
Day 08	怡保 → 吉隆坡	住 : Sleeping Lion Suites 食 : 南香茶餐室(Dai Makanan Nam Heong) ; 天津茶室(Restoran Thean Chun) ; 啊耀榴槤專賣店 ; 黃亞華小食店(Wong Ah Wah Restaurant)
Day 09	吉隆坡 → 香港	食 : Old Town White Coffee