馬來西亞怡保名物 拖地叉燒@鬼式茶餐廳(The Musuem)
馬來西亞 怡保(Ipoh)名物有三寶，就是 芽菜、白切雞和沙河粉，未食過等於未到過怡保；此外，舊街場是怡保的心臟地帶，街上老店的白咖啡、雞絲河粉、咖央多士和燉蛋同樣是不可錯過的名物。隨着到怡保的次數越來越多，有時間繼續發掘這古城的美味寶藏，包括榴槤、豆腐花、紅豆冰、東泰茶舖、炭爐打邊爐等等，還有令人驚喜的 拖地叉燒。最早的「拖地叉燒」據說是來自香港的元朗，從前元朗的燒臘師傅用肥到拖地的豬腩肉燒製叉燒而命名。拖地又燒使用傳統柴火窯烤製作，半肥瘦豬腩肉在高溫烤焗下發出滋滋聲，肉香四溢，上枱時的蜜糖燶邊和肥肉異常吸引。
馬來西亞 吞食天地 – Day 07
<<怡保>>
昨晚住在Cititel Express Ipoh，早上起來就係揾食，乘Grab到 東泰茶舖食早餐，3km車費RM 4。
東泰茶舖(Dong Tai Kopitiam Pasir Pinji) – 於2021年由2位年輕人創立，志在傳承馬來西亞傳統飲食文化，他們來自有數十年飲食業背景的家庭，製作出非常出色的怡保地道美食，絕不比舊街場的老店遜色，令人驚喜。
店舖裝修設計古式古鄉，工作人員全是年輕人，快手快腳充滿活力。
全店滿座，剛剛剩下最後一張枱，唔駛等位。
香煎蘿蔔糕(RM 5.7) – 網上食評的推介，吹到大一大，滿懷期待地一啖入口，煎得很香脆味道唔錯，但口感太糊口，明顯唔夠蘿蔔，失望；凍東泰白咖啡(RM 5.3) – 超級香濃醇厚，想不到年輕人也能製作出能代表怡保的白咖啡，品質可能比今日的新源隆茶室更高，好好飲。
甜醬豬腸粉(RM 8.7) – 豬腸粉被切成像河粉一條條長型，軟滑煙靭充滿米香，撈埋甜辣醬、酸辣青椒和蝦乾醒胃又重口味，正。
招牌咖椰牛油烤多士(RM 6.4) – 麵包烤得鬆化又能保留原有的軟韌質感，口感正到冇朋友，咖椰醬和雪牛油份量十足味道甘香椰味濃郁，是必點之選；東泰白咖啡(RM 5.3) – 香滑濃郁味道醇厚，和凍咖啡同樣高質，但怡保天氣太濕熱，我喜歡凍咖啡多些。
食完早餐之後步行到附近的大排檔再食 早餐II。
兵如港大樹腳美食軒(Big Tree Foot Hawker Centre) – 怡保的人氣美食地標，內𥚃是個大型Food Court，最出名是「忠記大樹頭炸料粉」和「大樹腳紅豆冰」，也有很多其他小食。
可能時間比較早，完全沒有食客，我們可能是今日第一枱。
40年老字號大樹腳紅豆冰 – 只叫了一杯2個人試吓，我其實冇乜期望。
招牌紅豆冰(RM 4.5) – 紅豆完全打溶了，口感有點像飲紅豆奶昔，味道不是太甜，紅豆味很香濃而且有些糯米香，好飲。
40年大樹腳炸料粉 – 這檔炸料粉沒有忠記的名氣，但也叫了兩件試吓。
炸豆腐2件(RM 3.2) – 凍的，而且味道平平無奇，豆腐不是特別香滑，炸皮有點硬，整體質素是中下，唔應該試。
小雞餅(Crispy Chicken Biscuit) – 雞檔老闆請了一片我們試食，很鬆脆美味帶點南乳味，沒有傳統雞仔餅的豬油，我好喜歡食不過冇買。
兵如港忠記大樹頭炸料粉 – 怡保當地人最喜愛的食店之一，吸引了不少遊客前來朝聖。這小店的歷史可追溯至1950年代，至今已傳承至第三代，主打現炸現賣的釀豆腐和多款釀N寶，聲稱所有食材均由新鮮豆腐魚現場製作，保證新鮮度和口感。店主大大隻字提醒顧客，忠記只此一家，沒有其他分店。
煎釀N寶(每粒RM 1.3) – 首先排隊自己攞個顏色筲箕，喜歡什麼就夾起放落筲箕，最後比錢時揀煎炸或者放湯，然後埋位等食，個個都好似唔駛錢一樣夾幾十件。
煎釀三寶(每粒RM1.3) – 因為見賣相和剛才差不多唔慌好食，所以只要了三件，其中一件跟湯。矮瓜好甜預期之中，苦瓜夠苦但好硬，豆腐剛才那檔仲好食啲，釀頂的魚肉流到嘔，香港求其是但一檔煎釀N寶也好食得多，網上話好食的人認真鳩噏老點，呢檔完全唔掂；甘蔗汁(RM 2.7) – 真材實料清甜好飲。
吃的時候見隔離枱有個亞姐放了5個榴槤在枱上賣，價錢吸引，小太熊眼望望揀來揀去又唔買，點知轉個頭被一個人全部買晒，小太熊便問亞姐仲有冇，亞姐有少少寸地話「今日得咁多咋，有又唔買，聽日睇吓仲有冇啦」唔知點解小太熊過後好想買，我就冇乜所謂。
沿着Jalan Bunga Raya行去食榴槤，也見不少榴槤檔很好生意，不停地開榴槤。
齒榴香 – 今日的Target，剛剛開檔，但見榴槤的價錢比FB的宣傳貴唔少，小太熊覺得佢揾笨，便冇幫襯了。
啊耀榴槤專賣店 – 正正在齒榴香對面，也是怡保出名的榴槤檔，由耀哥 周良耀主理，售賣來自各地及怡保的榴槤，包括貓山王、黒刺、D24、五指果等名種榴槤，主要做街坊生意。
榴槤明碼實價，價錢和檳城差不多。
耀哥介紹我哋食今日的靚貨 S17苦王(RM 35/kg)，佢話唔係經常有貨，好好食，我們先要一個。
秤一秤，圓圓的苦王重2.2kg，賣RM 77，耀哥手起刀落很快便把苦王砍開。
S17榴槤 苦王(RM 77) – 薄殼厚肉，乾爽皺皮的白色果肉異常吸引，入口黏喉度達到100%極點，口感軟滑細緻味道醇厚濃郁，大苦之中滲出濃甜，有令舌尖上發麻的反應，水準很高的榴槤，值90分冇介紹錯，下次再食。
食完靚榴槤很開心，約定耀哥明天早上再來，千萬不要唔開檔。乘Grab前往下一站 鬼式茶餐廳，5km車程收費RM 7。
鬼式茶餐廳(The Museum) – 由一間酒吧改建的當地特色Fusion Bar Restaurant，以一款「拖地叉燒」馳名大馬，可惜除了拖地叉燒，其餘菜式也是垃圾。
餐廳裝修很有懷舊感，保留了原本酒吧的吧枱。
八寶檸檬茶(6.3) – 味道像冇汽的玉泉忌廉溝檸檬 ; 瓦煲生魚湯(RM 40.3) – 魚肉又腥又霉超級唔新鮮，魚湯底是味精濃湯，用了超級重胡椒也驅不去死魚的腥味，不知所謂，食唔到，浪費金錢也浪費食物。
拖地叉燒(RM 27.6) – 义燒散發出濃濃的焦香和蜜汁香味，肉味不夠濃，但廚工一流蜜汁冶味，外皮燶邊十分香口，内部柔嫩多汁，义燒肥瘦各一半口感一流，咬下去像玻璃糖感覺，令人驚喜。
食完不滿意的一餐，慢慢行回市中心，路過些餐廳外牆發現有趣的壁畫。
MBI
Clock Tower – 位於怡保市政廣場Dataran Bandaraya的地標鐘樓。
黎記豆腐花 – 名氣比不上奇峰，特色是這裡的豆腐花不用石膏粉來做。
豆腐花(RM 2.7) – 分別點了椰糖豆腐花(左)和薑汁腐豆花(右)，豆味不夠濃但口感超滑，加入文冬薑汁和椰糖更加好味。
奇峰豆腐花(Funny Mountain Tau Fu Far)
– 在怡保經營了超過60年的人氣小店，以前經常排了幾十人的，現在旅客少了，只排了幾個人。
豆腐花(RM 3) – 用怡保地下礦泉水製造，不加石膏粉便能凝固，幼滑可口豆味香濃，小太熊勁鐘意食，佢話黎記唔好食；凍豆漿(RM 3) – 豆漿的豆味十足濃度啱啱好，好飲。
再在隔離街買了一個 打門柚(RM 10)回酒店食，好過飲水。
余合香餅總店 – 是怡保的老店，出品的炭燒香餅十分好吃，大馬各地也有得賣，但當然不及在這總店買到的新鮮好食。
店舖的外牆有特色壁畫，是製作香餅的過程。
買了2包 余合炭燒香餅(8個獨立包裝)，炭燒香餅是以麥芽糖、炸蔥頭加芝麻作餡料的福建傳统小食，外脆內軟煙韌十分好味有咬口。
宴瓊林鹽焗雞(Ayam Garam Aun Kheng Lim)
– 怡保名物，沒有堂食只可以外賣，肉質鮮嫩肉汁豐富，很有雞味鹹度適中，加了花旗蔘和藥材一起焗，非常之冶味好食。不過好慘呀，今日竟然賣晒，真離普。
永成茶樓(Restoran Weng Seng) – 1893年開業的炭火煲之家，今晚在這裡晚餐。
餐牌已經寫着百年老店，點都要值得一試啦。
古法原味羊腩煲(RM 45.6) – 味道很濃的羊腩煲，是必食之選。羊腩煲用炭火爐加熱，三十度氣温食炭火煲係咩玩法呢，好過癮囉。
咸蛋魚皮(RM 19.1) – 加落炭火煲內吃都相當好味，淨食亦鬆脆邪惡。
大嘉士伯啤酒(RM 19.1)；100Plus (RM 2.9)；自家煲涼茶(RM 3.2) – 飲品最緊要有冰，真係好熱架。
食完之後天色全黑，但是人客更多。
沿着 怡保舊街場行返酒店，穿過古老的建築物，真係好Feel。
黑夜 大奶巷竟然有啲人打卡。
二奶行晚上比日間靜得多，商店都已經關門。
三奶巷晚上原來很旺，擺滿了小販食檔。
細奶巷就同樣靜ing ing。
今日由朝食到晚，有點過份，不過好彩差不多到旅程的尾聲了。
補充資料 :
1. 尖沙咀永恆找換店
HK$1.72 = RM 1
2. 怡保現在市面上已經沒有的士。馬來西亞雖然有幾個叫車Apps，但只有Grab可以真正叫到車，其他Apps次次都話冇車。
3. 在怡保用Grab叫車的價錢比較檳城穩定，最高和最低價錢只相差1倍，每1km的價錢RM 1~2。
---待續---
馬來西亞 吞食天地09天路線和行程重點(詳細行程可點擊到相關文章)
沒有留言:
張貼留言