西伯利亞 萬里長征(4) – 太陽追夢 • 俄羅斯001號列車

俄羅斯西伯利亞鐵路上的日落

乘坐整段9288km長的俄羅斯西伯利亞鐵路是不少旅行人的夢想，要達成這夢想，必須要附出很多時間，往往會用盡多年辛苦儲起的假期。由於這旅程實際上真的沒有驚為天人的大自然奇觀，沒有令人回味的美食，沒有令人神往的驚險節目，有的只是平淡枯橾的旅程和難得的悠閒時光，因此每每在計劃初期已經轉軚，選擇其他更精彩好玩的地方。

今次終於有機會走完這條世界最長的鐵路，雖然旅程是相對地枯橾，但是問自己值唔值得時，我會肯定地答「值得」。

西伯利亞 萬里長征 – Day 4

<<伯力(Хабаровск)>>

昨晚都忘記幾點瞓了，返正在火車的71hr旅程中，喜歡幾時瞓便幾時瞓，喜歡食便食，精神上非常自由，可以完全地放鬆。由於天很早便光，07:40已經安樂醒，唔駛返工真係人都特別醒神，覺都可以瞓少好多。

今朝07:55火車會到達「Хабаровск(伯力)」站停30min，又是落車伸展遊覧的時候了，今次可以行遠些少。原來「Хабаровск(伯力)」就是早幾日飛機因為海參崴大雨而轉飛的城市。

伯力(Хабаровск)火車站

Памятник первопроходцу Е.П. Хабарову(哈巴羅夫紀念碑) – Хабаровск站對面一個公園內的紀念銅像，這類銅像在俄羅斯多得像香港的7-11。

軍人都趕上這班火車，唔知佢地坐咩Class呢。

列車08:25準時再開出，上返車不久，見昨天餐卡的亞姨拿著一籃麵包，我以為是頭等車廂派早餐，便主動叫她過來並㨂了2個麵包，㸃知原來要錢的，好彩唔貴。

腸仔包和羊肉包(共RUB 120) – 味道唔錯，新鮮還微暖，只是比較油口，火車上的所有食物也是偏多油，是西伯利亞特色口味。

今朝去廁所時發現地上有一大粒屎好L核凸，都唔知邊個PK整的，正式係無國界世紀賤精，這廁所不能再用了。

小太熊食完麵包又不斷瞓唔肯同我傾計，跟著瞓醒覺又話我變態，鐘意玩西伯利亞鐵路，又貴又悶又污糟，冇涼沖的日子多過去尼泊爾行EBC。小太熊越講越高興，有些少非理性亢奮，特然間話「好Boring呀，去餐卡食啲嘢啦。」難得小太熊都話去餐卡，當然立刻出發啦。

陰公.....成個餐卡只有一個客在發呆，好心改善吓啲食物和屈客的習慣啦。

現在未夠11:00，還是餐牌內的早晨套餐供應時段，但想order早餐亞姨又答我「No」，叫三文魚子Pancake 又話「No」，跟著對住Menu問了幾樣都係「No」，真係比佢吹爆，可能佢根本唔識「Yes」呢個字。

蘋果汁(RUB 165)；無酒精啤酒(RUB 165) – 昨晚只須RUB 150，今朝無啦啦要加一，但Menu冇寫要加一的，都唔知係咪笠遊客水。

洋蔥番茄煎三蛋(RUB 385) – 最後只能叫到呢味，其實係油浸熟的，超多油，碟底浸滿油，好得人驚。

這張單被加了10%，後來知道加幾多%是隨意的，可以是15%，可以是20%，行得入餐卡就唔好講咁多理由，講乜都只會聽到「No」。

<<Облучье>>

食完早餐，火車12:58在「Облучье」站停15min，時間太短只能行落月台伸展一吓，轉個頭又要上返車。跟著下一大站要5hr後了。

開車之後發現已經13:13，到了昨天講好了的派午餐時間，於是便在房內一邊聽歌一邊等，等到14:30都未見有人，網上的評論説俄羅斯都是這樣吧，除了火車埋站之外冇嘢凖時。

悶悶哋泡個從香港帶來的福麵食，開埋支紅酒送零食，車上的熱水已經正常返。

食完麵冇耐，大約15:00過啲，終於有人送飯來了，遲了兩個幾鐘，現在唔湯唔水，午餐剛食完仲好飽，送來把鬼咩，認真攪事。

牛肉飯和雞肉飯 – 71hr頭等車位包的一餐飯，超勁難食，肉又鞋又冇味，飯像沙一樣咁散，小太熊只吃了一口便唔肯再食，我就盡力每碟吃了一半試真有幾難食。沙律和橙都唔係好掂，麵包更加唔新鮮，一個月前包裝的，送比人都冇人要。

食完飯去隔離車卡沖個涼，水力都好夠，但熱水就剛夠一個人，應該是電熱水爐來的，RUB 150一位又唔貴，因為沖完真係舒服好多。這樣行吓又食吓，時間都過得幾快。 

晚上18:29到達另一大站「Белогорск」，會停30min，可以離開火車站行遠少少。

<<Белогорск>>

「Белогорск」站外觀冇乜特別，西伯利亞鐵路沿綫車站都是差不多樣的。

一出車站便有很多小販，果菜烤魚麵包飲料乜都有，想餓親都難，連餐卡的亞姨都來這裡買菜。

火車站對面有間大型超級市場，薯片啤酒汽水杯麵零食又平又齊貨，連紅魚子醬都有。

車站廣場上有檔很特別的飲品，見好多人排隊買便過去買杯來試，原來是發酵了的葡萄汁。後來發現這款飲品在俄羅斯很流行，而且唔只一款味道。

發酵葡萄汁(RUB 10) – 些少甜中帶點發酵的酸味和極輕微氣泡，少許葡萄味又帶點小麥味，味道又像我買上火車的俄羅斯紅酒溝淡幾倍，似未製成的紅酒，怪怪的幾過癮。

行了20min便返去月台了，始終都驚架車發神經早幾分鐘開便大鑊。

開車後在房內發了一陣呆，呆醒後原來已經夜晚20:00，開始日落了，便決定到餐卡坐一陣消磨一下時間。

晚餐時段的餐卡、全盛時期連同我們2人總共有6個客。

日落西山了，天色其實都幾橙紅，只是個View永遠都有電線桿，彷彿成為了生活上的一部分。

飲開的無酒精啤酒已經被我飲晒，較平的啤酒亦冇貨，㨂了幾樣主食又話「NO」，只能㸃亞姨的推介，不如索性做Omakase算吧啦。

正常啤酒500ml (RUB 330)；蘋果汁150ml (RUB 165)；再自己偷偷帶埋支紅酒去飲。

煙燻雞翼伴蒜香多士(RUB 880) – 雞翼好味，唔算肥，像煙火雞的味道，多士炸得很脆口，蒜香味濃，加埋些Sour Cream都幾好食，只是實在太多油，簡直是啖啖油，吃了3件已經頂唔順。

洋蔥磨菇炒薯仔(RUB 418) – 味道幾好，但又係衰在極多油，㸃食呀。

這張單又被加了10%，最初以為早午晚正餐時段便加10%，都算合理，㸃知跟著會被加15～20%，慘被屈水。

食完飯太陽已經落晒了，今日天色好靚，是粉紅色拼紫藍色。

很快又過了一天，定算係好唔容易才挨過了一天呢？只要不是返工，我唔覺得有咩係挨。

西伯利亞 萬里長征 – Day 5

<<Ерофей Павлович>>

今日繼續一整天在火車上的旅程，早上停站比較密，只是停留時間比較短。

07:15在「Ерофей Павлович」站停21min，但火車少有地遲了5min埋站，更早了1min離開，所以我一向預鬆10min返上車是對的。

Ерофей Павлович站 – 時間緊迫，只能在月台上影張相。

<<Амазар>>

返上車瞓一陣，很快09:17到達「Амазар」站，停留18min。

「Амазар」站沒有大樓，只有月台和小賣部，三等車廂的旅客都爭取時間買早餐。我也買了杯地道的即食薯容試一試。

月台上還有油炸麵包賣，非常類似我昨天在火車上買的麵包。

火車繼續前進，窗外的景色都是大同小異，最靚是這個View了，天氣時睛時灰。

<<Могоча >>

11:04到達「Могоча」停15min，三等廂的旅客立即聯羣結黨落車㷛返支煙。

我就買包薯片食，小太熊嫌我帶唔夠零食啊。

成朝未正經食嘢，開車後便來2個福麵，仲好食過餐卡的貴嘢。

即食薯容(RUB 50) – 剛才買的，唔難食，味精味重了些，質感像KFC的薯容。

又在火車上發了一陣子呆，小太熊覺得好悶想搵啲嘢做，於是又走去餐卡坐一會兒，相信我哋係幫襯得佢最多的乘客了。今次只想飲杯嘢坐一陣，所以只叫了份小食來送酒。

罐裝啤酒500ml(RUB 322) ; 番茄汁(RUB 173)

煙三文魚Pancake(RUB 460) – 幾好味道又唔算肥膩，難得。

埋單時無啦啦要加15%，昨天只是加10%，前一晚唔駛加，真係加幾多任佢噏，覺得被屈錢。

天色漸漸變暗，開始落雨了。

<<Чернышевск-Забайкальский>>

16:43來到「Чернышевск-Забайкальский」站停30min，但因為落雨行唔得遠，只能在月台附近買些東西。

「Чернышевск-Забайкальский」站 – 因為落雨，排隊買零食的人都少啲。

每個站都是這些小食，見到都唔開胃啦。

天色持續地差，鐵路沿線就時不時見到些廢棄的古堡。

呆呆地過了很多小時後，有些微感覺肚餓了，又去餐卡開飯，連我都開始有一點沉悶的感覺。

啤酒500ml(RUB 322)；番茄汁(RUB 173) – 飲開的啤酒都給我飲晒了，剩下這樽最平的，其餘的都要四百幾。

今次落單的亞姨十分進取，不停主動Sell嘢，又話佢哋啲湯好正，又話啲Pork Very Good，咁就信佢啦，食豐富啲。

羅宋湯(RUB 483) – 又真係幾好飲，湯內有粒牛肉都有肉味，夠多紅菜頭，酸中帶點辣，唔錯。

跟著亞姨無啦啦放低了4個包裝麵包(Menu有價錢的，標價4個麵包RUB 120)，和早2日送的幾個一樣咁唔新鮮，我便話唔要，叫佢攞走，㸃知佢答話「No，乜乜物物.......」死都唔肯攞走，麵包就這樣放在檯面郁都冇郁，最後居然收了我RUB 138，咁屈錢真離普，如果佢放過期魚子醬我咪好L大鑊？我想妖爆佢，但小太熊話算。

三文魚扒伴沙律薯條(RUB 1070) – 好古怪，唔知係咩魚但肯定不是三文魚，淡淡的又硬又冇味，沙律還可以，薯條成碟油。

豬肉伴沙律薯條(RUB 863) – 豬肉冇乜味，算是難食。

太陽差不多落山，看到些少彩虹啊，都算是幸運啦。

亞姨拿來的單寫著「3500」，嚇死禾，禾計過就算加15%也只是RUB 2900左右，做乜加15%後又無啦啦收多六舊，不如攞支俄羅斯鎗老笠我吖笨，我立即同佢亞吱亞咗理論，佢就續個數同我Break Down，原來那4個過期麵包計了錢，但是最後加晒所有嘢乘埋15%也只是RUB 3047.5，亞姨當堂口啞啞改返張單做「3050」，但就死都要收麵包錢，賤得佢。

單據上清楚見到原本寫著3500。

餐卡的亞姨實在一餐比一餐離譜，又貴又難食，明天決定唔再去了。

沖埋個熱水澡又一天，今次小太熊唔沖了，佢話慳錢，其實我知道佢係懶去沖。

西伯利亞 萬里長征 – Day 6

今天又係安樂醒，起床便見天晴，人都醒神啲，下午會到目的地「伊爾庫次克」。

今天的風景是整段西伯利亞鐵路最靚的，加上藍天白雲，心情特別開朗。

<<烏蘭烏德(Улан Удэ)>>

08:49來到「烏蘭烏德(Улан Удэ)」，這裡位處蒙古國的邊境附近，會停22min，因為早到了5min，所以夠時間跑出火車站附近去2處景點。

烏蘭烏德(Улан Удэ)火車站

聖尼古拉斯教堂(Church of St. Nicholas)(церковь Николая Чудотворца)

火車博物館паровоз Л – 展出的舊款火車頭仲多過 海參崴。

快快影完相便要跑回火車，還有8min剩，都跑得好快，但小太熊唔讚成去咁遠的，只適宜在月台鬆一鬆，望住架火車才覺安心。

離開「烏蘭烏德(Улан Удэ)」之後，火車很快便駛到 西伯利亞的明珠 貝加爾湖(Lake Baikal)，接著火車會沿湖邊駛到 伊爾庫次克(Irkutsk)，這段路的風景是整段西伯利亞鐵路最靚的。

在火車上觀賞 貝加爾湖(Lake Baikal)

沿著湖邊行了2hr後，火車再次進入陸地，冇咩睇，個個都返房再發呆。這時，Conductor亞姨開始賣雪糕，價錢唔貴啊，買了一支給小太熊食。

 俄羅斯脆皮雪糕條(RUB 80) – 皮好脆雪糕好夠凍，正。

火車預計在15:46到達 伊爾庫次克(Irkutsk)，終於完成首段71hr的西伯利亞鐵路，要展開西伯利亞之旅的另一章了。

補充資料 :

1.)      USD 1 兌 RUB 58.6 (當地銀行現金兌換價)，即太約 HK$1 = RUB 7.48。

2.)      乘001號車次西伯利亞鐵路從 海參崴(Vladivostok)到 伊爾庫次克(Irkutsk)，車程71hr，頭等房每位RUB 24903，包1餐午飯。

3.)      建議帶備整段火車的時間表，方便在中途站落車遊覧，因為我這卡車沒有貼出傳説中的火車到站和離站的時間表。

4.)      在火車上消費宜用散紙，因為有些亞姨喜歡唔找錢。

---待續---