2017年11月4日

西伯利亞 萬里長征(5) – 西伯利亞的巴黎 伊爾庫次克(Irkutsk)

西伯利亞 伊爾庫次克(Irkutsk)市內的特色電車

伊爾庫次克(Irkutsk)是西伯利亞鐵路沿綫的主要大城市和最受歡迎的一站,她鄰近 貝加爾湖(Lake Baikal),很多旅客會選擇在這裏作為西伯利亞旅程的起點或終點。伊爾庫茨克市內規劃完善,市容整潔,街道上滿佈舊式的木製建築物和色彩鮮豔的電車,感覺差點可以比得上歐洲的一線城市。



西伯利亞 萬里長征 – Day 6

<<伊爾庫次克(Irkutsk)>>

繼續上一篇的Day 6行程。

火車遲到了12min到達 伊爾庫次克,正式完結71hr的火車旅程。


正式落車同亞姨講拜拜了,這個站都很多人落車。


伊爾庫次克火車站 外觀設計很有西伯利亞鐵路沿綫車站的特色。


車站內有行李寄存服務(每日RUB 150),也有旅行社可以安排到 貝加爾湖,但唔知咩價錢呢。


火車站外便有電車站往市中心Central MarketTourist Office等地方,看見電線上掛了個「T」字牌便是電車站了

今次乘1號電車往酒店,車次很密,不用10min便有車。


上車後有票務員行過來叫我買票,每位RUB 15


在「130 Kvartal」落車,那是 伊爾庫次克一個重建的舊區,類似上海的新天地,區內保留了西伯利亞地區的舊式木建築,也有把遠處的舊建築物搬過去。今晚住的酒店「Berezka (Берёзка)」便是位處這區內。

Berezka (Берёзка) – 很細的酒店,只有木屋的1/F和頂層閣樓共3間房,樓下是其他商店。


老闆娘替我們Check in時不斷sell我們去Olkhon Island的點對㸃小巴,每位收RUB 1200,從這裡送到去Olkhon Island的酒店門口,我知道價錢應該大約只需要RUB 700900,但如果幫襯其他旅館的話便要自己揹著行李行去其他旅館上車,又見唔係太多錢,便幫襯佢,但比完錢後又話冇收據,講個信字,後來才知那小巴只收RUB 800,有RUB 400被酒店落了格。

Check in後老闆娘主動替我拿小背包上閣樓(大背包要我自己揹),中途她唔小心甩手跌了我的背包在地上,𥚃面的相機個mon給跌爆了,好彩冇影響其他零件。

相機慘被跌爆mon


雙人閣樓房(連及雙人早餐)每晚4200 – 房間有浴室,但是熱水只夠一個人沖涼,冇冷氣冇風扇。


窗外個View很好,望正130號舊區(130 Kvartal)


撞爆了部相機心情極差,但都要出去行街的。

聖十字教堂(Kresto-Vozdvizhenskiy Khram) – 從酒店行5min便是到,建於1758年的 典型的東正教堂。


沿大街向Central Market 方向行,滿街都是色彩繽紛的電車和像蛛網一般的電䌫。


沿路都見 伊爾庫茨克的傳統木屋,這些木屋地下的窗都好古怪,窗口緊貼著地下甚至被地下封了一半,有點千奇百趣。


Central Market – 非常旺的街市,乾濕貨乜都有,最適合體驗當地的民生。


又見到這款小麥和葡萄發酵的飲品,在西伯利亞真是十分流行。


這裡有MTC專門店,小太熊張MTC電話卡要入錢了,否則捱唔得好耐。我幫佢入了RUB 500,但原來RUB 300已經夠用到尾,on9了。

露天市場多數賣些乾貨和日用品。


西伯利亞產的士多啤梨比較細粒和唔甜,唔太吸引。


室內市場就賣魚類肉類麵包豆品乜都有。


找到魚子醬了,還有煙燻魚,幫襯了呢檔,但數日後發現隔離檔平20%


罐頭三文魚子(RUB 550) – 甘香爆油,咸度適中,抵食又好食,但佢冇標價,要問價,5日後在隔離檔發現只賣RUB 420;散裝三文魚子一盒(RUB 900 - 150g) – 冇咁好食,偏咸,但都比元氣壽司好。


另一檔有多幾款魚子醬,花多眼亂,求其㨂了盒細的中價黑色魚子醬。


黑魚子醬(RUB 550) – 非常細盒,唔知係咩魚的魚子,味道非常古怪,有些藥水味,口感像啫厘怪怪的,好難食,比人𠱓錢。


跟著在街市買了RUB 160桃駁季和扁水蜜桃,又甜又多汁,比得上日本水果。

從街市繼續向北行,沿途見到很多有趣的銅像、木屋和教堂。


Roman-Catholic Church


救世主教堂(Saviour’s Church) – 建於1706年,是西伯利亞東部最古老用石頭建造的教堂。


安加拉河(Angara River) – 伊爾庫次克市內的主要河道,河流始於東南方的 貝加爾湖,是貝加爾湖唯一向外流出的河道。沿著河岸散步很舒服,很像香港的海賓公園。


Monument Yakovu Pohabovu – 河岸上眾多紀念銅像之一。


主顯靈教堂(Bogoyavlensky Cathedral) – 像是童話世界中的古堡,在蘇聯時代曾被用作宿舍和麵包房。


行完教堂,沿著市內的公園行返去「130 Kvartal」行街食飯。

市政廳(Dom Sovetov)


這一座好像是銀行


烈寧像


神獸Babr – 130 Kvartal街口的伊爾庫茨克神獸。


130號區內的木屋全都改建成餐廳、酒吧和商店,連棉花糖都有得賣,非常旅遊化,不過外地遊客真係唔多。


Rassolnik (Рассольник) – 今晚㨂的餐廳,位於區内一座建築物的地窖,很隱閉。Lonely Planet話係區內最好的餐廳,服務員都穿著60年代蘇聯的服飾,供應高級的蘇聯菜式。


今天有一大團人佔了1/3座位,全店滿座,等了5min才有一枱埋單。


店員都幾靚女,笑容滿面。


免費餐前麵包配南瓜醬,好味。


俄羅斯紅梅汁(RUB 60) – 酸酸甜甜有點似利賓納,是俄羅斯的傳統飲品,後來差不多入親餐廳都叫,因為佢最平又好飮;紅酒150ml(RUB 150) – 俄羅斯的紅酒都幾貴,而且品質算差,味道偏甜。


俄羅斯牛肉湯(Traditional Rassolnik with beef)(RUB 270) – 味道很港式,似西餐廳的牛尾湯,好味。


羅宋湯(Borsch with Prune)(RUB 270) – 傳統俄羅斯口味,有大量紅菜頭和小量紅蘿白及牛肉,酸酸哋好好飲。


沙律Olivier - Just Like Mum’s(RUB 320) – 普通火腿煙肉沙律。


Tender Salmon Fillet(RUB 620) – 三文魚扒煎得太乾,肉唔夠嫩,魚肉味道太淡,芝士醬汁太滯,唔掂。


Homemade Pasta with Beef(RUB 390) – Pasta夠腍,味道唔錯。


芝麻雪糕Homemade Halva Ice-cream(RUB 180) – 味道像奶茶雪糕多些,質感密度高較鞋口有食糕的感覺,有特色。


蘇聯雪糕Soviet Ice-cream(RUB 180) – 雪糕又滑又重牛奶香,是傳統俄羅斯雪糕,正。


食完飯都日落了,區內的商店開始關門,只餘下酒吧。


回到房間了,房間的夜景幾靚的。

小太熊沖完涼表示水只係微暖,越沖越凍,我便落樓下問老闆娘攪乜春冇熱水,佢叫我等多30min左右便可以了。

30min後我去沖涼,水和剛才一樣凍,只是唔冰凍的水,微暖都講唔上,真差勁,唯有沖凍水了。

這酒店房價貴,冇熱水,Book車呃人錢,仲跌爆我部相機,很後悔來這裡住。







補充資料 :

1.)      USD 1 RUB 58.6 (當地銀行現金兌換價),即太約 HK$1 = RUB 7.48

2.)      伊爾庫次克(Irkutsk) 市內有幾條主要電車線No.1, 24a穿梭火車站、Central Market、喀山教堂等主要地㸃,Google MapMaps.me可以找到電車站位置。

3.)      從伊爾庫次克到Olkhon Island的點對㸃小巴每位RUB 800,從伊爾庫次克的酒店直接送到Olkhon Island的酒店,早上09:0010:00出車,16:00左右到Olkhon Island的酒店,上車後才比錢,有些酒店免費代住客Call車,有些就另收RUB 150手續費,有些像我住這間Berezka (Берёзка)咁衰,狼吞RUB 400差價,而且唔肯比收據。

4.)      在伊爾庫次克Tourist Office大約500m外的巴士站Avtovokzal(Автовокзал)有小巴往 奧爾洪島 胡日爾(Khuzhir)市中心,車費RUB 527,大行李另收RUB 100,早上每小時一班車。






---待續---

14 則留言:

  1. 你去Olkhon Island 俾人落格,都算好啦! 我地個旅館職員竟然忘記預約,唯有坐公車,最後俾人買豬仔。不過,這就是自由行的樂趣。
    你住的區域都好旺啊!

    回覆刪除
    回覆
    1. 我記得你講過啊,所以和酒店Book車時也再三confirm。我當天乘船去Olkhon Island時冇你果日多人得咁緊要,順利很多。
      住的區就好正,可惜間酒店就好衰😢

      刪除
  2. The buildings and wooden houses are quite beautiful.

    回覆刪除
    回覆
    1. 這城市的木建築真係很趣怪,在俄羅斯的其他城市都見唔返。

      刪除
  3. 這城市好多野睇,晚餐豐富又有特色。相機跌爆mon旅遊保險有無得陪?

    回覆刪除
    回覆
    1. 伊爾庫次克是西伯利亞最受歡迎的城市,很多人遊西伯利亞也是只去這裡,真係幾多野睇的。
      叫了酒店寫返封信證明係佢跌爛,維修用了$1300,最後保險都賠足,第一次買保險有錢賺。

      刪除
  4. 建築物好有特色 唔怪得係熱門旅遊點

    回覆刪除
    回覆
    1. 這是西伯利亞最近北京的城市啊,所以很多人選擇在這𥚃作為遊西伯利亞鐵路的起點或終點,或是只到這城市當係去了西伯利亞。不過這城市確係西伯利亞最精彩的一站。

      刪除
  5. 呢處的建築物好有特色同好靚。

    回覆刪除
    回覆
    1. 這𥚃的木屋很特別和有趣,尢其是啲窗,在西伯利亞其他地方也見不到。

      刪除
  6. 咁好彩保險都賠足,無咁傷,但影響心情:P
    啲窗咁貼地或者插入地底,係咪因為冬天好大雪,將間屋地基壓低咗,日積月累變咗咁?

    回覆刪除
    回覆
    1. 係囉,冇心機了幾日😢
      我諗又唔似喎,冇理由間間都沉降得咁平均🤔

      刪除
  7. 伊爾庫茨克好靚,貝加爾湖更靚,我剛去完,一個值得去既地方,冬天遊貝加爾湖非常靚,可睇到不同冰及雪的景象。

    回覆刪除
    回覆
    1. 冬天去好激啊!我都見過湖面結冰的相好靚。很多人也說冬天乘西伯利亞鐵路,看着外面冰天雪地更加好Feel。

      刪除