日本關西 三重奏(3) – 伊勢志摩 福寿荘

日本伊勢志摩温泉旅館 – 福寿荘

日本三重縣伊勢志摩國立公園內有一小島 渡鹿野島(わたかのじま)，從高空鳥瞰這個小島呈心心形狀，雖然小島只有270原居民，但每年均吸引3萬名遊客到那裡泡溫泉。要到達這小島必須乘坐3min接駁小艇，離小島碼頭不遠處便是島上最大的溫泉旅館 福寿莊。福寿莊 大部分房間均享有無敵大海景，此外，酒店擁有從1300m深地底湧出的自家溫泉，泉水被引到酒店地下的庭園露天風呂和6/F的展望風呂，供住客們享受人。旅館晚上那席13道菜的會席料理更是令人驚喜：每人一隻伊勢龍蝦刺身，松阪牛鐵板燒，炭烤原隻鮑魚，極品刺身，八爪魚釜飯，醬油煮鯛魚頭…全部均用上時令食材，一絲不苟。




日本關西 三重奏 – Day 3

<<鳥羽>>

今天晨早05:15瞓在地下張開眼，便看見咁靚的日出了。

在房裡睇完日出之後再瞓一陣間，便起床去浸溫泉。

大浴場 – 落水玩前要在這裡沖沖身先

露天風呂 – 朝早都係冇乜人，啲客大部份都幾懶。

浸完溫泉回到房間，07:30已經預備好早餐，食物雖然普通，不過在這麽好的環境享用，我都好滿意了。

之後在房內歎到09:30，乘酒店的Shuttle Bus去10km遠的 神明神社。

<<相差>>

神明神社 – 位於鳥羽「相差」地區，神社供奉的石神さん在當地相當有名，聽說對女性的祈求特別靈驗，吸引不少女性信眾前來參拜，當日都見到不少善信，估唔到這小小的神社這麼有人氣。

雖然唔係排好耐隊，但要在神明神社前參拜都一定要排隊等一會兒架。

神明神社外是一條參拜道，路上有十數間土產店和小食店等等。

海女の家五左屋 – 在神明神社附近一間以海女為主題的土產小賣店，由80年古老民房重新改建而成，樓高兩層，地下售賣海女相關的商品和土產，樓上是咖啡店，有美味的雪糕和自家製甜品。

食品和飲品要在毗鄰這間商店購買，買完可以拿上 海女の家五左屋樓上坐低慢慢食。

大內山牛奶軟雪糕(￥350) – 軟滑得過份，牛奶味道甘香濃郁，極高水準的日本軟雪糕。

黑糖寒天(ところてん)(￥300) – 即係類似台灣的愛玉，入口冰涼滑溜，配上微甜不滯的黑糖，食完個人好舒服。

下一個節目係行1.5km到海邊的 海女小屋食午餐，小太熊早2日上網Book架，由神社行去沿途只有少量景點。

昇龍の松 – 日本人真係多花臣，一棵普通松樹改個名都變成景點。

梵潮禪寺 – 這禪寺冇乜人氣，和神明神社差得遠。

今日太陽非常猛烈，熱到小太熊變晒樣，買了一盒冰凍 大內山牛奶(￥173)一齊歎返陣，真係好鬼香濃好味。

海女小屋はちまんかまど – 就係位於海邊的小屋，裡面好多海女架，想食午餐仲一定要預早2天預定。

「海女」是日本最具傳奇性的行業，雖然韓國濟州島也有海女，但聽講日本三重縣才是海女的起源地。海女初時的工作是潛入水中捉鲍魚，海膽，昆布及海參等食物；後來日本人發明了養殖珍珠的方法，必須依靠海女潛入水中徒手打撈珍珠蚌，令海女這行業更加吃香。

到今天海女已是夕陽行業，只有一些較偏遠的餐廳還有海女會親自落海打撈海鮮給客人吃，位於三重縣相差町漁港旁的「海女小屋はちまんかまど」正是由一眾海女經營的餐廳，她們每天都親自為客人打撈最新鮮的海產，難怪每日也其門如市，還特登請了一名老外用英文和外地客溝通。

海女們都忙碌地預備午餐，一陣會滿座啊。

二人前海鮮拚盤(￥11520) – 包括1隻約300g的伊勢龍蝦，1隻約150g的四頭伊勢黒鮑魚，2隻特大蜆，4隻海螺和6隻扇貝，全部都識郁㗎，只有2條魚係半醃製的一夜乾。

佈置簡約的小木屋展示了海女必備的用具如潛水衣、網籮等，中間是2個炭爐，海女們每天都在這裏為客人炭烤她們親自打撈的時令海產。

我哋隻龍蝦很活潑，仲玩緊口水。

慘！！龍蝦仔好快便被海女們活生生燒死，太殘忍了......

生啤500ml(￥550) – 套餐唔包飲品的，不過可以飲水茶。

烤扇貝比較昨天駅前商店街的大隻和鮮甜，幾好食，大蜆同海螺就普通啦，唔係好甜。

鮑魚加了海鹽一起燒，吊出了鮑魚獨有的鮮甜味，口感彈牙鮮美，估佢唔到咁好味；條半醃製的咸魚就一般啦，幾啱送啤酒。

伊勢龍蝦冇昨天駅前商店街咁甜，蝦膏亦少好多，有點兒失望。

最後送上湯、飯和水果，一定夠飽了。

食完飯之後老闆在老外翻譯的帶領之下，逐台客人打招呼，她已經85歲了，做了一世海女，現在還很健壯啊。

最後是海女歌舞表演，整餐飯吃了80min，貴了一點點，不過整體上都值得來支持吓海女們的。

免費接駁巴士13:25開往 近鐵鳥羽駅，中途會在一個景點停10min，要足50min才回到鳥羽駅。

原本冇預架車會停中途站，諗住上到14:10 的火車，現在遲了10min，上唔到14:10的火車，要乘下一班近鉄去 鵜方駅(￥430)，去到已經15:02，約了旅館 福寿荘14:45接送的，現在架車都走了。

唯有自己坐的士去啦，8km路程的士費￥2310，好彩有限錢啫。去到碼頭要剩船過對面的渡鹿野島(わたかのじま)，船費每程￥200，3min便到。

<<渡鹿野島>>

福寿荘 – 三重縣伊勢志摩國立公園渡鹿野島上最大的溫泉酒店，在碼頭旁邊。

大門口感覺好高檔啊！

渡鹿野島(わたかのじま)是個心形的小島，福寿荘位於南部的尖尖位，有單車免費給住客借用。由島頭踩到島尾都唔夠1km，可以預留90min左右慢慢踩車在這小島探探險都幾有趣的。

Welcome Drink是杯梅酒，好醒胃架。

雙人海景露台房(包早晚餐)每晚￥35420 – 晚餐又係有三重縣三寶，伊勢龍蝦、鮑魚和松阪牛，不過仲未食嫌啊。

酒店送了些小食，沖杯茶坐喺海邊歎完先。

福寿荘分別有2個溫泉，包括6/F的海景展望風呂和G/F的庭園露天風呂「風待ちの港」，首先上6/F先。

6/F休息間有2張向海的按摩椅，正到呢！而且唔係好多人爭咋。

俯瞰大海的6/F展望風呂

從6/F望向下，看到 福寿荘的小泳池和花園。

浸完溫泉之後坐了30min按摩椅，超級舒服，跟著落G/F浸埋庭園露天風呂。

庭園露天風呂「風待ちの港」– 浸到太陽落山便返房食飯。

今晚的菜單「三大味覚！伊勢海老造り・あわび踊り焼・和牛石焼 で贅沢三昧」由總料理長「丸田 繁」主理，足有13道菜啊，全是時令食材，非常豐富。

職員很快便送來大部份食物，睇頭十足。

前菜隻凍蝦好鮮甜，件紫薯都好好味道。

鯛かぶと煮 – 汁煮鯛魚頭又係勁正，魚肉鮮甜脆口配埋個少甜的魚汁更加正；茶碗蒸し – 雖然冇龍蝦一齊蒸，不過好有蛋香架。

一人前刺身盛 – 每人一隻伊勢海老，還有鯛魚，油甘魚腩和吞拿魚赤身，全部口感新鮮味美，極高水準啊。

鯛しゃぶ鍋(鯛魚片野菜火鍋) – 生灼的鯛魚肉伴點淡口醬油吃，十分鮮甜味美。

雜錦天婦羅 – 天婦羅蝦好正，食得出係新鮮蝦，肉質夠實又鮮甜，差點比得上稻菊的天婦羅蝦。

炭火烤伊勢黑鮑魚 – 每人一隻生猛四頭黑鮑，放在炭火上烤熟，鮑魚入口煙韌帶甜，加一少點海鹽更能吊出鮮甜味。

松阪牛石頭燒 – 霜降的雪花松阪牛肉肥口到不得了啊！雖然香口，但實在肥到頂唔順，要煎好耐煎乾啲牛油才吃，香口得利害，但小太熊嫌太肥唔肯食。另留了一片鮑魚煎一煎，更加好味啊。

八爪魚釜飯 – 以上湯煮成的飯，粒粒晶瑩飽滿，跟爽口彈牙的八爪魚同吃更顯鮮味，雖然已經好飽，不過我都食晒。

魚蛋清湯和甜點就普通啲。

食飽後落大堂坐一陣，便去正式沖涼浸多浸溫泉。

浸完上6/F坐按摩椅，攰到瞓着咗。

補充資料 :

1.) ￥100兌HK$7.30(永恆找換公司)。

2.)     儲值咭Kamsai One Pass類似香港八達通，適用於關西地區所有JR和私鐵，及大部份巴士，無須次次買票，方便轉車。出卡每張￥5000，內含￥4500儲值，即係張卡要￥500，冇得像八達通扣到負數，又唔知可否退卡，之後可以在站內增值機入幾多錢部得。這次旅程所有交通也可以使用這卡，但只能乘普通車，特急列車的自由席和指定席都要補票。

3.)     新八屋 有免費接駁巴士來往 鳥羽駅，車程30min，回程時亦可以安排車到 神明神社。

4.) 海女小屋はちまんかまど 每日供應三場午餐，每場75min，價錢視乎食物種類，包來回鳥羽駅接送。

5.)  福寿荘 有免費接駁巴士來往 近鐵鵜方駅，車程15min，另要自己比￥200坐船上島，船費於Check out時比酒店。

6.) 福寿荘有單車免費給住客借用。由島頭踩到島尾都唔夠1km，可以預留90min左右慢慢踩車在這 渡鹿野島探探險都幾有趣的。

---待續---