旅居英國 • 動態移民(62) – 蘇格蘭天涯海角Duncansby Head

英國蘇格蘭天涯海角 ～ Duncansby Head

Duncansby Head位於蘇格蘭東北端小鎮John O’Groats東邊的懸崖上，是蘇格蘭大陸真正的最東北端，比有天涯海角之稱的John O’Groats更加天涯海角，其自然景色美得令人驚嘆。懸崖上的Duncansby Head Lighthouse建於1924年，是區內著名的舊建築，此外，沿海岸線行便可以看到著名的海蝕柱Duncansby Stacks。幸運的話，可以在懸崖上看到各類海鳥，包括Fulmars(暴風鹱)、Guillemots(海鳩)、Kittiwakes(三趾鷗)和海鸚鵡(Puffins)等等。

旅居英國 • 動態移民 – Day 91

<<John O’Groats>>

今日早餐我煮，是午餐肉蘑菇通心粉，加了家樂牌雞湯寶，好好食，每人成本£1。

昨晚上網訂了今早11:00出海遊Duncansby Head，在岸上買票每位£20，上網訂位特價£15。

乘這艘船從酒店外的碼頭出發，Tour大約2hr，會到Duncansby Head兜個圈，再出海駛一陣看看有冇鯨魚。

The Inn at John O’Groats – 開船了，在船上清楚望見自己間房啊。

Duncansby Head Lighthouse – 很快便去到燈塔位置。

沿海的地貌景觀多變，崖上聚居了大量海鳥，景觀和在陸地觀看截然不同。

刀嘴海雀(Razorbill)

海鳩(Guillemot)

Geo of Sclaites – 昨天在陸地上經過，不知為何這𥚃的雀仔唔多。

Duncansby Stacks – 不同的海蝕柱有不同的型態，從陸地觀看比較壯觀。

<<Thurso>>

13:00回到起點之後冇乜節目，便駕車25km再到Dunnet Head碰碰運氣，看看有冇野睇。

Dunnet Head – 第二次來了，天氣依然又濕又冷又大風，幸好只是毛毛細雨。

今日有幾隻Puffins，好近距離好得意啊。

擘大個口好似想鬧人咁，好惡啫。

特然有隻 刀嘴海雀(Razorbill)走來想和Puffin搭訕，Puffin就好Cool完全唔理佢，識唔到新朋友啊。

Puffin飛走埋，攪到Razorbill好冇癮。

大風吹到雀毛都飄飄下。

Puffin都係鍾意同自己人玩嘅。

雖然來來去去只有幾隻Puffin，不過今日牠們好活潑好好睇，仲成日飛來飛去。

<<John O’Groats>>

駕車25km回到酒店，今日總共駕車50km。

16:15參加了一個出海觀鯨Tour，上網訂位特價每人只係£8，原來隻船是去Orkney Islands接返今早出發的一日團，一來一回Orkney Islands看看有沒有鯨魚。

個個企在上層金睛火眼望住過海，今日食白果，不過睇這個Tour的Facebook，真係平均每星期也會遇上鯨魚的，機會大約是廿八份之一。

The Inn at John O’Groats – 又回到酒店，無無聊聊又過一日，其實留在酒店已經好好玩好舒服。

今日晚餐每人£3.2。

水果拼盤(£1.3)

餐肉蘑菇通心粉(£2)；白酒(£6.5)

夜晚遊客全部離開了，John O’Groats變得寧靜出塵，可惜烏雲密佈，不像2個月前Lands End那樣滿天星。

旅居英國 • 動態移民 – Day 92

今日早上會駕車離開John O’Groats，繼續NC500逆時針旅程。

早餐每人£1.2，有餐肉出前一丁，番茄和蘋果。

臨走終於見到太陽了，出去影些靚相先。

John O’Groats Signpost

The Inn at John O’Groats

Check out之後見仲有太陽，決定駕車4km去多一次Duncansby Head望望。

今日有人約埋一齊在Duncansby Head揾鯨魚，好似都係食西北風多。

Duncansby Head Lighthouse

Duncansby Stacks

今日天氣唔錯，可以沿着海岸線繼續行。

在岸上欣賞Duncansby Stacks，比昨天在船上看更加有氣勢。

行到最後始終還是要落雨，好彩想行的地方已經行完，趕快回頭上車走了。

三隻羊仔攔住我部車唔比我走呀，佢哋叫我23年之後一定要再回來，知啦知啦。

<<Wick>>

下一站駕車17km到古堡Keiss Castle，又係冇位泊車，只能偷雞泊在避車處，快快脆脆去影張相就散。

未行到古堡已經有牛擋路，咪咁惡啦，影張相啫。

Keiss Castle – 蘇格蘭一座矗立在懸崖上的城堡廢墟，建於1582～1643年，屬於法定受保護古蹟。

駕車12km到小鎮Wick的TESCO入油和買食物，今日無鉛每公升£1.649，今次入油£39.86。

<<Whaligo>>

繼續駕車14km到另一景點Whaligo Steps，泊車位只有幾個，經常冇位但免費。

Whaligo Steps是蘇格蘭一個特別的景點，是一條從76m高懸崖頂部直落至海邊Whaligoe Haven的石塊梯級。Whaligoe Haven曾經是蘇格蘭一個魚獲很豐富的港灣，1792年當地漁民建造了Whaligo Steps，然後每天把魚獲從Whaligoe Haven拖上這365塊石級上到懸崖頂，再步行十數公里到Wick附近出售。

Whaligo Steps的懸崖頂起點。

沿着石級行落海灣，峽灣海岸線的風景相當優美。

Whaligoe Haven – 懸崖底部的地貌很天然，想像不到從前是個漁港。

<<Golspie>>

再駕車71km到古堡Dunrobin Castle，原本明天才去的，因為過了酒店都唔知，行多了廿多Kilo去到Dunrobin Castle才發現，便順便入去睇埋才返去酒店。

Dunrobin Castle建於1835～1845年間，位於英國蘇格蘭NC500東岸沿海的大型古堡，聽說擁有房間多達189間，是Sutherland伯爵Earl及其家族的居所，現時對公眾開放，可以免費參觀花園，但進入古堡每位收費£12.5。

Dunrobin Castle的外觀宏偉卻陰森，甚有吸血彊屍古堡Feel。

古堡外是超大的花園。

在花園已經可以看到古堡最靚的角度，相信好睇過入場內啊。

離開之後駕車回頭26km回到剛才路過的小鎮Helmsdale，今晚住一間位處山上的民宿The Stroops。

補充資料 :

 

1.     這次在蘇格蘭自駕21日，選擇了租車公司Arnold Clark，再經租車網站Rentalcars租最平的自動波車種Kia Ceed，在Dundee出車，21日車租 £1147 再加買全保£82。在愛丁堡出車貴大約£200。Arnold Clark是扎根蘇格蘭專賣二手車的公司，租車相對其他大車行的收費較便宜。

2.     21日後還車時被發現車門位置有非常之輕微的碰撞痕跡，估計是泊車時被旁邊的車門撞過已引致。負責的職員很好人，不用我去Claim保險，無條件收回部車。選擇Arnold Clark是正確的決定。

3.     蘇格蘭大城市以外的所有地區公路也是又窄又多彎，而且很多大貨車行走，此外英國人揸車大部份也很快，開正常車速比較大壓力，不像我在日本經常超車。

4.     在英國入油全部要自助，入完油之後自行到收費處比錢。通常大型超級市場如TESCO 和Morrison等等外邊也設有油站，油價相對比較低。

5.     在超級市場通常可以免費泊車2hr，而且一定大把位又夠濶，唔怕被隔離車門撞花部車。

6.     £1兌HK$10.66 (HSBC網上兌換)

7.     英國電話卡Giffgaff可以網上預訂，出發前寄到屋企，再Download 官方Apps，到埗後可以立即開卡用。有1個月£10 (包15GB上網加超平打長途電話和Local call)的Plan十分抵用。

8.     在英國餐廳食飯不可以主動揮手叫職員過來，會被視為不禮貌，只能乖乖坐定定等職員主動上前才落Order，或者用眼睛望住佢哋，等佢哋注意到再自己行過嚟。之後在全英國食過很多餐廳，留意到又真係冇人主動揮手叫職員落Order的，真係佢唔講都唔知。

9.     在英國生活基本上可以完全唔帶現金，99%的消費也可以用信用卡或Applepay附款，包括所有交通工具、餐廳和超級市場。

10.        英國天氣變化極大，經常落雨，而且不時會括狂風，所以不方便用雨傘，最好全身夜物都要防水。

11.        行車記錄：第16日行車50km。

 

---待續---