感受 澳洲(1) – 悉尼(Sydney)日與夜

澳洲 悉尼(Sydney)歌劇院

悉尼市(Sydney)位於澳洲東南部，是澳洲人口最多的城市，也是歐洲首個罪犯流放地，以悉尼歌劇院(Sydney Opera House)和悉尼海港大橋(Sydney Harbour Bridge)等建設聞名，經常躋身世界十大最宜居城市之列。聽講澳洲原居民在悉尼地區已居住了30000年。2007年11月的 感受澳洲之旅17天，由2006年尾開始計劃，用盡儲了多年的所有里數換了一程頭等機位由香港至澳悉尼，全程8小時，非常舒適。

 

感受 澳洲 – Day 1

今朝晨早到機場check-in，要在候機室停留耐一點。

頭等的Check in counter 很開放的，唔駛排隊啊，行埋去就立即有專人登記。

先在頭等侯機室歎2個鐘，食埋早餐才上機。

頭等侯機室 休息室 – 今日候機室很少人，十分清靜。

頭等侯機室 餐廳 – 環境都好好，早上供應自助餐。

點心和粥都有翠園或鴻星的水準，好味。

頭等侯機室 浴室 – 食完早餐再沖個涼再上機，浸完浴之後可以在床上休息一會兒。

上機了，這班機有8個頭等位，4個是窗口位，我座在其中一個。

上機坐底之後服務員立即送上一張心意卡，服務都幾窩心。

飛機上到高空之後，服務員便幫我整好張枱，並送上早餐。

水果碟 – 水果又新鮮又甜，估唔到在飛機也可以食到這樣新鮮的水果；朱古力蛋糕 - 很香濃味美。

點心拼盤水準很高，和剛才候機室的差不多，蝦餃燒賣好好味。

食完早餐睇場戲，再瞓一會兒，很快又食午飯。

三文魚刺身伴黑魚子醬 – 用料一流，好食過酒店餐廳的貨，叫了一杯香檳來伴餐，Perfect。

黑松露忌廉湯 – 菌味香濃，高水準的餐湯。

都未落格，又來一碟新鮮的 雜菜沙律，不過唔係太好味。

烤羊鞍配紅酒 – 主菜賣相一流，而且廚功很好，表面微焦裡面細嫩，羊肉味香濃，真不明白在飛機上如何可以煮出這高水準食物。

甜品 蓮容西米布典 – 好似鳳城那杯咁好食。

榮華杏仁餅配綠茶

<<悉尼>>

食飽就瞓，瞓醒又食，8小時一陣就過，晚上到達Sydney上空。

估唔到一到澳洲便落雨。從機場坐小巴(AUD$10)直接去到酒店Park Regis Hotel 。

Park Regis Hotel – 位於Sydney市中心，今晚和明夜住這中價酒店。

雙人房(連輕盈早餐)每晚AUD 139 – 面積細小，不過基本設備都齊全，亦乾淨企理。早餐每人只有一包果汁和一條Cereal Bar。

飛機餐仲未落格，所以沖完涼便休息了，明天一早起床開始節目。

 

感受 澳洲 – Day 2

早上落大雨，今日首先從酒店行半小時去 悉尼魚市場(Sydney Fish Market)食早餐，途經 Darling Habour。

Darling Habour – 感覺很似屯門黃金海岸，應該係黃金海岸抄佢。

Sydney Fish Market – 約09:00行到這南半球最大的魚市場，早餐之前先四圍參觀一吓。

魚市場的冰鮮海產有生有熟，價錢有平有貴。

龍蝦、海蝦、加菲蟹和藍花蟹都已經烚熟。

東星班唔見有游水貨，上水即冷藏咁樣處理好像有點浪費。

魚市場內有很多食店，今日食生嘢做早餐。

即開即食生蠔有大有細，價錢和香港比較就勁平，一隻唔駛HK$10，買來打邊爐都抵。

生蠔一打(AUD 14) – 味道新鮮爽口超鮮甜，香港的貴價貨都不能比較；海胆(AUD 12) – 同樣鮮美完全冇腥味，幾乎有日本吃到的咁好食。豉油要自己另外買。

因為天氣幾凍，空肚食完生嘢個胃有點寒，便找些熟的東西吃。

芝士焗蠔(每隻AUD1.8)；煙肉焗蠔(每隻AUD1.8)；蒜蓉焗扇貝(每隻AUD1.5)；炸鱈魚(AUD 1.3) – 全部味道味道一般，都係生嘢好食好多。

中午到 悉尼歌劇院附近行吓，可惜下午天色依然灰暗。

悉尼歌劇院(Sydney Opera House) – 世界文化遺產泥架，外觀似蜆殼夠晒特別，今日大把時間可以慢慢欣賞。

悉尼海港大橋(Sydney Harbour Bridge) – 悉尼另一地標，見到有人參加導賞團上了橋最頂部。

歌劇院附近都有唔少人粗聲粗氣古惑仔樣，好討厭。

遊歌劇院是今日的重點節目，所以行完外圍之後，要再入裡面睇套歌劇。

門票要先在網上預訂，開場之前才到Counter出票，即場一定買唔到飛架。

The Gondoliers (最平門票AUD 67) – 只係一套很悶三流歌劇，舞台設計和音樂的質素也只是中下，今日沒有其他選擇了。歌劇院內唔比影相，裝修就很普通，和倫敦和維也納的歌劇院完全冇得比，很像香港文化中心大劇院，應該又係香港抄佢了。

看完歌劇，17:00會上船吃了一餐1.5hr的三道菜 船河晚餐Sunset Dinner，可以一邊吃飯一邊欣賞悉尼的黃昏日落。

夠鐘遊船埋岸，隻船都幾靚。

上船了，今晚全船滿坐，好多人排隊啊。

Sunset Dinner(每位AUD 100) – 坐窗口位所以收貴啲，送了一支細紅酒。

牛扒味道嘛嘛，煎得太熟，肉質鞋口牛肉味普通。

食物就差了一點點，不過沿途風景都很好。

甜品是檸檬芝士餅，味道香濃之餘又幾清新。

飯後再遊歌劇院，由日落行到天黑睇埋夜景，天氣開始好轉。

悉尼海港大橋(Sydney Harbour Bridge)

晚上乘悉尼市鐵路到唐人街宵夜。

夜晚的唐人街十分之旺場，揀了一間較多人的粥店「大可以中餐廳」。

鮑魚雞粥 都煮得幾綿，味道唔錯，食完個胃都舒服啲，都係唐餐比較啱食。

今天的行程都幾豐富。

 

---待續---