越南 越戰三晝夜(1) – 胡志明市 Le Bordeaux

越南胡志明市 – 西貢聖母大教堂

今年聖誕假只有3日紅假，小太熊話決定盡用有限的銀彈向越南進攻，打場轟轟烈烈的越戰，在短短三晝夜間要攻佔越南「胡志明市」和「大叻(DaLat)」。今次幫襯國泰假期，3日2夜Package包括來回胡志明市機票加兩晚最平的酒店要HK$3755，自己向越南航空買 胡志明市來回 大叻的內陸機票(HK$800)，再訂了一睌 大叻市最貴的酒店 DaLat Palace Hotel(HK$2110)，由於要在平安夜出發，大叻市間靚酒店又正正是聖誕節正日，價錢比平日貴得多，未出發已耗用大半銀彈了。

越南 越戰三晝夜 – 序

Day 1 –  中午從香港出發，睌上18:15到達胡志明市。先到胡志明市最出名的法國餐廳Le Bordeaux食USD100一位的聖誕大餐。晚上入住胡志明市第五區“安東廣場”旁的Windsor Plaza Hotel頂層的Executive Room。

Day 2 –  乘07: 00的內陸飛機往越南山區歐陸式小鎮 大叻(DaLat)，到埗後即往法國式酒店DaLat Palace Hotel。然後到大叻鎮 小火車站參觀，乘09: 50小火車往小鎮“Trai Mat”遊覽半小時，再乘10: 50火車回到起點大叻。中午到Nam Phan Restaurant午餐，該餐廳與胡志明市的法國餐廳Au Manoir de Khai屬同一集團。午餐後遊Du Sinh Church及大叻市場，然後回酒店休息。晚餐於春香湖伴Mia Restaurant，飯後回酒店Lounge聽拉濶音樂。

Day 3 –  早上在法國餐廳Le Café de la Poste食早餐，然後遊覽大叻花園、大叻天主教堂、Crazy House、大叻竹林禪院、大叻吊車站及乘吊車到泉林湖，下午回到DaLat Palace Hotel食High Tea。黄昏乘機返胡志明市，在胡志明市 鳳偉海鮮餐廳食海鮮晚飯，夜遊胡志明市。晚上入住Windsor Plaza Hotel頂層的Executive Room。

Day 4 –  早上到“Pho 24”食越式河粉早餐，然後遊覽西貢聖母大教堂、胡志明市中央郵政局、胡志明市博物館及濱城市場，到法式Café La Fenetre Soleil食甜品、雪糕店Kem Bach Dang食榴槤雪糕，Breeze Sky Bar飲嘢欣賞西貢河，最後到Tib Restaurant食順化菜，乘19:10航班回香港。

越南 越戰三晝夜 – Day 1

上午要返工，中午到香港機場的候機室The Travelers Lounge食免費午餐。

<<胡志明市>>

16:05起機，晚上18:15到達胡志明市機瑒，過了海關後第一件事係換錢，機場內有差不多10間找換店，九成的官方兌換牌價都係USD 1兌VND 19,500，由於網友話機場換錢要收3%手續費，而且兌換價不及市內的金舖，所以決定先在機場換一小部份。正當我望住幾間找換店，考慮幫襯那一間的時候，期中一間找換店職員用計算機按了20,300這數字比我睇，我行埋去問佢是否USD 1兌VND 20,300，佢細細聲話係，於是先同佢換了百幾多拿。

VND 500只係值兩毫子港幣，真係跌咗都冇人執。

我見佢個兌換價都OK，以為佢好老實，於是想同佢買的士coupon出市區Le Bordeaux，佢居然當我係儍瓜話要USD 16，我Thank You都冇聲轉身便走。

換錢後行出機場，估唔到好多人在接我們機啊，大人物係受歡迎嘅。

轉左一直行到的士站，見有4部的士停在站位吊水魚，但冇人上車。

的士站旁又站了十多個穿上不同的士公司制服的職員，但我找不到Mai Linh Group和Vinasun這兩間公司，其間有人主動問我目的地，有個開價USD 12，有個開價USD 10，最後我問警察Mai Linh Group的職員是那位，警察指住對面馬路一個穿錄色制服的職員，於是我走過馬路和Mai Linh Group的職員說要車，他才call一輛的士來接我，在胡志明市找的士的過程都幾新鮮有趣。

胡志明市的路面交通極度非常之繁忙，電單車多到嚇親人。

Mai Linh Group的士沒有兜我路，咪錶跳了VND 120,000 (約HK$46)，於19:30送我到達目的地，越戰三晝夜 第1個進攻地點 – 法國餐廳Le Bordeaux。

胡志明市  法國餐廳Le Bordeaux

Le Bordeaux位於大馬路旁，四圍環境都很差，門口泊滿了電單車，但一進內便感覺進入另一天地。

由於今晚係平安夜，小太熊2星期前已訂定位。這間餐廳很多書介紹，話價錢比Au Manoir de Khai較平，但食物全由法國入口，質素更高、又有米芝蓮二星級大廚坐鎮。。。乜乜物物，小太熊決定暫時放過Au Manoir de Khai，先進攻Le Bordeaux。

Le Bordeaux地下的酒吧

從地下經這條樓梯上1/F

Le Bordeaux 1/F

1/F用餐的地方 – 原來餐廳都幾細，只有10張細枱和1張大枱。

波爾多紅酒375ml(VND 550,000)；有氣礦泉水750ml(VND 90,000)

聖誕晚餐每位USD 75，也可以按餐牌散叫。

開餐……

這件免費法包新鮮出爐外脆內軟，伴上蜜糖和牛油同吃，口感和味道都一流。

餐廳先送上三款免費小食及前菜，全部都高水準。

免費小食 三文魚包和奄春蛋包，唔錯。

免費前菜 三文魚刺身卷，又鮮味又夠油香，上等貨。

2個人order了一份聖誕晚餐再在Menu內自選幾味，試多幾款菜。

聖誕晚餐頭盆 鴨肝醬 – 賣相一般，但入口即溶肝味濃郁可比美鵝肝醬，屬極品之作，而且份量大，最少80g，足夠2個人食。

聖誕晚餐主菜(1) 焗鱈魚肉 – 大大份，魚肉滑但冇乜味，開始跌Watt。

中段送了一客檸檬雪芭，普通貨式。

聖誕晚餐主菜(2) 乳鴿 – 味道又係一般，得個靚字。

聖誕晚餐甜品 冰凍奶油杏仁 – 唔錯，杏仁很鬆脆香口。

聖誕晚餐餐飲 咖啡 – 都係很普通。

都係散叫的菜式水準好些。

法國生蠔(VDN 600,000) – 細細隻蠔味夠濃，鮮甜爽脆中帶點海水咸，高質素，有驚喜。

燒和牛柳(VDN 800,000) – 約有200g，雖然廚功一流，但件貨普通，這個價錢可在香港吃到更好味的美國安格斯牛。

蘋果批(VDN 220,000) – 香脆好味。

再散叫了一杯咖啡 (VDN 80,000)，2個人全張單連稅共VDN 3,765,000，比美金就要USD 198，即係VDN 19000兌USD 1，明顯比越南盾着數好多，但身上唔夠越盾，唯有簽Card。簽名時看見張過數單印着USD 198，吓，咁都得???乜在越南簽Card唔係應該收越南盾嘅咩???早知在機場換多USD 200，現在一來一回要比多15多拿。

餐飯食足3粒鐘，整體上都算滿意，22:30才離開。

離開時叫餐廳職員幫我同門口架Vinasun Taxi講話去酒店Windsor Plaza Hotel。從Lonely Planet的地圖估計距離頂多7~8km，的士費應少於VDN 100,000。但架車行吓行吓，跳到VDN 120,000才在一間XXXX Plaza Hotel門口停低，唔係吓話，去錯地方??小太陽正想發圍跳車，個司機大佬好認真再看清楚酒店的街名，開車一個 U-Turn回頭再行，行了一陣我望到“安東廣場”，上面間酒店便是Windsor Plaza Hotel，我即刻指比佢睇，最後咪錶跳了VDN 146,000。如果10年前我肯定比VDN 90,000佢就落車，但現在冇乜火了，比了VDN 150,000佢找，佢都找返VDN 10,000比我，叫做收少我VDN 6,000。最後都唔知佢真儍定假蠢。

23:15到達目的地 越戰三晝夜 第2個進攻地點 – 胡志明市Windsor Plaza Hotel，酒店位於胡志明市第五區“安東廣場(AN DONG PLAZA)”上，行10至15分鐘便到名食店“Pho Le”，行15至20分鐘便到“鳳偉海鮮餐廳”，附近很多金鋪，方便換錢，兌換價又高，USD 1可兌VDN 21070，比官價VDN 19500高出 8%。

胡志明市Windsor Plaza Hotel

夜了，快快入酒店Check in。

今晚酒店很Full，酒店upgrade了間經濟房做頂層的Executive Room，但原來Executive Room都係一般Size，分別可能只係高低層。

原本打算乘夜進攻附近的名食店“Pho Le”，但想到明早要04:30起身乘機去大叻，今晚只可睡4小時，如果食埋“Pho Le”就只可睡3小時，最後都係選擇瞓覺。

第一天越戰成功攻佔了 胡志明市兩個地點，明天要進攻大叻市。

 

 

 

--待績--