寫意遊踪 意大利(1) – 為食 新加坡(Singapore)

意大利 Cinque Terre  –  Manarola

這次“意大利 –  Eataly”之旅共 12天，除了 米蘭這來回必經之城市外，到的都是自已出發前翕極都翕唔出口的地區，有北部的 Bologna、Cinque Terre (五漁村) 和 鞋踭的多個小市鎮，包括 Bari、Polignano a Mare、Alberobello、Martina Franca、Lecce、Matera、Altamura、Ostuni 和 Gallipoli。因為夏天日照時間長，今次行程之緊密比得上舊年的越南和莫斯科旅程，每日最多只瞓六個鍾，由天光行到天黑，睇完星星又睇日出，更要由朝食到晚，試盡所有 意大利美食。

今次用盡儲了 4年的 Asia Mile里數，只能換到張單程的意大利回程機票，只好自已比錢買張去程機票，順道經 新加坡停 6個鐘食個夠。小太熊近年愛上了榴槤，在香港常常買 亁腰、D24、紅蝦….回來嘆，今次機會要去食返個在香港貴到唔捨得買嘅“貓山王”。 近年 馬來西亞榴槤被傳媒吹到大一大，那些“D24”、“紅蝦”、 “貓山王”被講到天上有地下冇，神一般美味，“貓山王”在九龍城更被賣到每磅 HK$158，買一個要成千蚊，真係人都癲。

意大利 Eataly 12天之旅 :

Day 1 –  中午乘機飛往 新加坡，晚上 19:05p.m.到。到埗後往 榴槤街Geylang Road食“貓山王”，再往金沙酒店 (Marina Bay Sands)的船頂參觀，跟住去新加坡河伴 食2.7kg 重的黑椒炒斯里蘭卡肉蟹。回機場等上機去意大利。

Day 2 –  01: 35a .m.起機直飛意大利 米蘭，08: 20a .m.到埗。在市內露天茶座早餐後乘火車往Cinque Terre (五漁村) – Manarola。

在Manarola行街、食飯、睇日落、睇星星. . . . 至深夜。

晚上住Manarola懸崖上一間向海的民宿 – Vandiris B & B。

Day 3 –  07: 00a .m.起身，由 Manarola 經“情人之路Via dell’Amore”步行到 Riomaggiore食早餐，再漫步Riomaggiore。行“情人之路Via dell’Amore”返回Manarola，在Lagoon游水。

沿山路行去山中漁村Corniglia，漫遊Corniglia 1小時。沿山路行1小時20分鍾去崖上的漁村 Vernazza，於中途的懸崖餐廳午飯。在Vernazza行街、游水. . . .從Vernazza坐火車到最後一條村 Monterosso a Mare行街。

19:00p.m.坐火車回到 Manarola 海邊的餐廳，一邊睇日落一邊食晚飯。晚飯後坐火車到Vernazza，行上半山看懸崖小鎮的夜景。再坐火車返回 Riomaggiore 睇夜景。

乘最後一班 23:15 的火車返回 Manarola，住Vandiris B & B。

Day 4 –  早上在Manarola 食完早餐，乘船往 Portovenere行街、遊船河. . . 中午在小島 Palmaria上的名餐廳 Locanda Lorena午餐，餐後再行街。乘 17:00p.m.的船回航返 Manarola 攞行李，轉火車往La Spezia，在小鎮漫步 1小時。晚上乘20:02p.m. 頭等火車落意大利南部 Puglia省，在火車上過夜。

Day 5 –  06: 45a .m.起身，在頭等房食早餐，08: 00a .m.到達Puglia省內一個世界文化遺產古城 – Ostuni。在Ostuni古城遊覧3小時。

12:15p.m. 從Ostuni古城乘巴士到小鎮 Polignano a Mare，入住小鎮最靚的懸崖古堡酒店Covo dei Saraceni Hotel海景露台房。中午在Polignano a Mare行街、游水、食Gelato . . . . 晚上在懸崖餐廳 – Gonna Gina食晚餐睇日落。

Day 6 –  04: 30a .m.起身睇日出，然後在酒店餐廳食自助早餐。中午 12:00乘30分鐘的士 到鄰近的小鎮 Alberobello。中午遊覧Alberobello的蘑菇屋後，乘火車往小鎮Martina Franca幫襯隱世水牛芝士店 – Caseificio Pioggia，食世上最美味的新鮮水牛芝士。

乘火車返Alberobello睇日落，在蘑菇屋食晚飯。晚上住Alberobello一間由 Trulli (蘑菇屋) 改建的酒店 – Le Alcove特色豪華房。

Day 7 –  早上在酒店“Le Alcove” 食自助早餐，然後行Open Market。12:20p.m.乘火車到漁港 Gallipoli。在Gallipoli行街、食海鮮，晚上住古城內的酒店Relais Corte Palmieri Hotel覆式房。

Day 8 –  06: 30a .m.起身在酒店的天台食自助早餐，然後到海灘游水曬太陽。

乘 12:29p.m.火車由 Gallipoli 到有南意佛羅輪斯之稱的Lecce遊覧2個鍾。在Lecce市內的名餐廳 “Alexbar Ristorante” 食午餐。

午餐後乘 16:27p.m. 的特快火車由 Lecce 到 Bari。晚上在Bari古城晚飯、行街和在廣場上聽音樂會。晚上住Bari火車站附近的酒店 – Costa Hotel。

Day 9 –  早上首先入 Bari舊城區行街，再乘09: 42a .m.火車去小鎮Matera，在Matera遊覧古城Sassi 區及在古城午飯。飯後乘 16:09p.m.火車往麵包之城 Altamura，幫襯全城最古老麵包名店 – Forno Antico S.Chiara食世上最好食的麵包。

夜晚乘 19:01p.m.火車返 Bari，再轉乘 22:59p.m.通宵火車北上 Bologna， 正式終結Puglia省的旅程。

Day 10 –  火車05: 40a .m.到達 Bologna，先遊覧城內40km 長的拱廊。08: 00a .m.去全城最古老的咖啡店“Gamberini’食早餐。在市內行街、食Gelato、行上古塔、食火腿. . . . . 午飯後乘16:18p.m.火車回到米籣。

遊覧米籣大教堂，在大教堂旁的 Piazza Duomo天台餐廳“MAIO” 近距離對住大教堂食晚飯。晚上住米籣Stazione Centrale附近的酒店 – Hotel Florida。

Day 11 – 早上在酒店食完早餐，乘巴士往機場 Check-in，乘機返香港。

Day 12 – 早上回到香港。

寫意遊踪 意大利 – Day 1

今日要返半日工，早兩日打完風，朝早出門口時烏雲密佈。

揹着 17kg的大背囊返工，D人個個以為我去幾個月歐洲，其實係因為我要揹理 小太熊 D行李，方便我趕車趕船嘛。。。。

<<新加坡>>

無風無險，準時 19:05 到新加坡，天氣算 OK，看見日落。

落機即乘地鐵到 Aljunied Station (S$ 1.8)，行五分鐘便到 榴槤街 Geylang Road，街上有大量水果檔，勁多人買榴槤即開即食。

時間緊迫，看見第一檔便立即上前幫襯。

乜都想食，但肚只有一個，唯有只選一樣最想試的 ---- 馬來西亞榴槤。

馬來亞榴槤 近年在香港越來越貴，連新加坡都一樣，散買都唔平。

最後決定叫老細揀個最貴最靚嘅“貓山王”慢慢嘆，貪佢未食過，“貓山王”1kg要 S$12，但已比九龍城平 4至5倍。

這個“貓山王”重 3.2kg，樹上熟，香濃中帶少少甘苦味，食完一啖後個口腔同D牙都留香好耐，確係正嘢，雪凍食相信更正，但更正都只係個靚嘅榴槤啫，味道和其它品種只係各有千秋，不分高下，跟本不值香港賣的瘋癲價錢。

兩個人只能食半個，另半個要打包先。20:20 乘 S$ 8 的士去下一站 – 金沙酒店 (Marina Bay Sands)，上頂層的飛船見識吓。榴槤街非常煩忙，截了15分鍾才有架吉車。

金沙酒店 (Marina Bay Sands)

在飛船頂可望到全 新加坡的夜景，附近地盤多已完工，景觀比舊年好好多。

這個住客專用按摩池太Open，人人行過都影張相，好唔掂，扣晒分。

頂部的 Infinity Pool 確係靚到冇朋友，可惜只招待住客。如果要住這間酒店，唯一原因只有這泳池，因為D房實在普通，但價錢偏貴。

行完金沙酒店，乘S$6的士到 Fullerton 酒店附近食飯，始終覺得這間酒店最值得一試再試。

被困幾個月的獅子魚又再重生了。

行了一陣，去 新加坡河伴 食晚飯。

上年在Clarke Quay附近食的那隻蟹麻麻地，今次返 Merlion 附近的中國菜館食 - 富興海鮮，由於已經 22:00了，有大量河景位任揀。

蒜容炒白菜 (S$12)，油略多，一般水準。

黑椒炒斯里蘭卡肉蟹，足 2.7kg，大特價每 1kg 只賣 S$35 (幾年前食都要 1kg S$48)。兩隻鉗像食雞髀一樣大到得人驚，肉質又爽又鮮甜又彈牙，黑椒味濃但只帶點微辣，沒有奪走蟹肉的甜味，終於在星州食返隻似樣的蟹了，正呀…… 下次再幫襯這間舖。

23:30 乘 S$17 的士回機場，食埋半個“貓山王”後，01:35 起機直飛意大利 米蘭…….又再到一別 17年的 意大利 了……..

 

 

補充資料 :

1.   S$ 1 兌 HK$ 6.33

2.   星航單程香港去米蘭連附加費和稅 HK$ 6037

15:20 - 19:05 A380 HK to Singapore

01:35 - 08:20 Singapore to Milan

3.   非住客上金沙酒店 (Marina Bay Sands)頂層的飛船要 S$20入場費。

 

---待續---