德國 • 豪情 • 生活(1) – 豪情暢飲慕尼黑啤酒節(München Oktoberfest) 2012

豪情暢飲 德國慕尼黑啤酒節(Oktoberfest)

10月又有紅假了，請3日可以放足9日假，今次小太熊帶我去德國飲啤酒同埋浸温泉，等我可以Relax一吓唔駛咁辛苦。今次行程共10日，夜機出發，機票又平，算係好抵玩。可惜，在歐洲的 8天只有 2日見藍天，其餘日日天陰微雨，有2日仲大雨添，黑到呢. . . . . . . . . 雖然今次係我第3次去德國，但除了首站慕尼黑，其餘地方都仲係第一次去，整個旅程雖然比不上舊年去意大利咁精彩，但都OK架。

德國‧豪情‧生活 – 序

德國‧豪情‧生活10天預算行程包括 :

Day 1 – 放工後去香港機場The Traveler’s Lounge沖涼加晚飯，然後乘Air China 20:00從香港飛北京，在北京機場 Business Travelers Lounge休息45分鐘再轉機。

Day 2 – 零晨01: 10從北京飛德國慕尼黑，預計05: 30到埗後，立即往酒店放低行季，直往啤酒節會場玩一日。黄昏逛慕尼黑舊城區兩粒鐘，20:30到人氣食店Haxnbauer im Scholastikahaus晚飯。住啤酒節會場隔離間GHOTEL hotel & Living München。

Day 3 – 早上乘火車往奧地利小鎮Hallstatt，中午遊小鎮、Ice Cave和Five Fingers，晚上住Hallstatt位置最靚的酒店Seehotel Grüner Baum內位置最好的房間。

Day 4 – 酒店早餐後乘08: 15船離開，再轉火車去德國 國王湖(Konigssee)。12:30~18:30遊湖，午餐在湖邊食鱒魚。晚上乘車直去小鎮Garmisch Partenkirchen，入住火車站旁的酒店Quality Hotel Konigshof。

Day 5 – 酒店早餐後，乘火車上德國最高峰 楚格峰(Zugspitze)，15:00乘吊車落山，入住Garmisch Partenkirchen特色酒店Staudacherhof Hotel，在酒店游水加晚飯。

Day 6 – 酒店早餐後，到附近山頭行 9個鐘山，遊覽大峽谷Partnachklamm和行上King Ludwig II的守獵行宮Schachen Konigs Hs，晚上住Garmisch Partenkirchen市內酒店Hotel Edelweiss Garni，晚餐於Werdenfelser Hof， 餐廳有LIVE和德國舞表演。

Day 7 – 酒店早餐後，乘火車到黑森林小鎮，大學之城Tübingen。中午乘大學生撑的木船遊小鎮，晚上住Hotel Am Schloss，全Tübingen位置最高的房間。

Day 8 – 酒店早餐後，乘火車到黑森林小鎮 巴登巴登(Baden-Baden)，住全城最貴的酒店Brenners Park-Hotel and Spa。黄昏到歐洲唯一男女混浴的古羅馬温泉Friedrichsbad嘆四粒鐘。

Day 9 – 06:00起身行山，去Altes Schloss，預算120min來回。在酒店早餐後，嘆酒店內的蒸氣浴和泳池至11: 00。中午乘火車到法蘭克福(Frankfurt)，在舊城區逛3個鐘後乘地鐵去機場。Check-in後往Luxx Lounge沖涼及晚飯，20:15乘Air China班機往北京。

Day 10 – 11: 35到北京機場，在Air China First Class Lounge午餐及休息，最後乘 13:50班機回港。

德國‧豪情‧生活 – Day 1

今日要返足一日工，早上先揹埋行李返Office，今次又係我揹埋小太熊的行李，足足15.2kg，佢全個行程都係揹個平日出街的小背囊咋。

收工後入禁區內的Traveler’s Lounge晚餐先，今日勁少人，I like！！

第一次响度沖涼，估唔到浴室都唔細呢。

<<北京>>

今次坐Air China，要在北京轉機，原本飛20:00(HK) ~ 23:25(北京)，預了45min在北京的候機室Business Travelers Lounge休息，但隻機Delay了足足半個鐘，攪到只可以在北京的候機室飲杯嘢、影張相就要走。好彩個候機室流到嘔，深夜仲乜都冇得食，只有杯麵和餅乾，都冇咁可惜。

北京的候機室Business Travelers Lounge(Terminal 3)

德國‧豪情‧生活 – Day 2

<<慕尼黑(München)>>

今日慕尼黑天陰微雨，16:00後落大雨至21:00。

原本飛01: 10(北京) ~ 05: 30(München)，但今次隻機遲足一個鐘至到，攪到差D入唔到啤酒館，因為今日係星期六，超多人。

06: 30落機後即刻乘S1地鐵到Hauptbahnhof中央火車站，去兩個月前已Full Paid Book了的酒店，位於啤酒節會場Theresienwiese旁的GHOTEL hotel & Living München放低行李，點知間死嘢去到至話我知冇房，只可以安排我入住距離兩個地鐵遠的同系同名酒店，仲話送程的士比我添喎，又話唔剩只我一個係咁，又話可以退返房錢比我。。。。。佢亞爺 X媽%#@@，呢排啤酒節，慕尼黑D酒店由最下價至最天價的都Full到爆，冇可能自己嘥時間揾了，但. . . . . . . 遠的那間同系同名酒店遠離啤酒節會場Theresienwiese，肯定平好多，GHOTEL hotel & Living München分明揾老襯，真係小哪吧，德國佬好很唔掂。但始終時間就係金錢，所以我冇同佢鬥氣，立即Confirm佢並放低行李，直奔啤酒節會場。

由於飛機遲到，同酒店條咸蝦又嘈了幾分鐘，去到Theresienwiese的盧雲堡館已08: 30了(原本預了08: 00前一定要去到排隊)，雖然場館話09: 00至開門，但門口已聚集好多人等入場，大鑊，唔知入唔入到去添？？？其它場館都一樣人山人海，唯有沿住條隊排最後。

08: 30已聚隻幾千人在盧雲堡館外

我沿住條隊排最後

排隊時冇乜野做四圍望，發現德國女生們好似真係唔怕凍咁，個個打出個大心口周圍走，唔通德國治安真係那麽GOOD？？

場館09: 15才放人入場，因今日星期六，館內一半座位被人預定了，我又排得後，只能坐露天花園或入館內坐個幾鐘便要交返個位出來。如果再遲15分鐘到，可能連啤酒館都入唔到，只能坐花園。

幾經辛苦，終於09: 50入到啤酒館坐低，場內氣氛非常熱鬧啊，雖然只係朝早，但酒客們的情緒已異常高漲。

上層的座位全被Reserve了，直情唔放人入來，費事個個飲大兩杯趕唔走。

剛坐低阿姐便送來每人一杯1-Liter裝的生啤，唔駛Order，亦冇得棟，每杯€ 9.5，放低即磅即找咪兩頭望。

阿姐一人攞8杯都貌甚輕鬆，我攞一杯都覺得重呀。

德國麵包Pretzel(€ 5) – 比街賣貴一倍，買了一塊試吓，好多粗鹽粒响面，咸到苦，最啱送啤酒。

慕尼黑白香腸Weißwurst(一對€ 5.8) – 送酒唔錯。

飲勝 . . . . . . . . 豪情德國遊的節目正式開始

場內時不時都有人企上木櫈單挑其他人吹喇叭。

呢位哥仔冇人夠膽同佢鬥吹，佢唯有自隊，都贏得全場喝采，威到爆。

隊Band開始起樂，成班友兩杯到肚開始High High哋。

又有一個企上櫈自隊，佢D Friend仲High過佢。

場內女生們都穿上傳统德國民族谷胸裙Dirndl，又係幾好睇嘅。

飲吓睇吓影吓，好快又11: 00了，有幾位工作人員叫我哋坐多十分鐘就要交返個位比人. . . . . . . . 吓. . . . . 啱啱至Warm up，仲想坐多幾粒鐘喎！！

有幾位人兄立即手快脚快跳過欄杆走入人潮中，工作人員捉佢哋唔住。但其餘好多人就好似我咁On99比人趕離場館了. . . . . . . 坐左個幾鐘咋。早知我又跳欄啦. . . .

被人趕了出花園後，好多人都想博大霧入返去，但每個門口都有D惡到生小腸氣的大漢守門，邊個嘗試博大霧就妖邊個，有個女士差D比佢推跌呀。

守門的大漢個個都惡到生小腸氣

冇計，唯有去第間啤酒館博吓，但都只能入到露天位置，場館內都係Full晒唔比入。

行了一陣，都係走返去 盧雲堡營的花園，貪佢個場夠大。

阿姐們永遠揸住8杯巨啤，見邊個飲得七七八八就質多杯佢嘆。

又過了一陣，連花園都Full爆了，工作人員唔再放人入場。

場內個個飲大兩杯，對我呢位亞洲人都好鬼Friend。

呢位老兄High到爆，企上櫈度大發偉論。

呢個麻甩佬唔知邊度攞到條女裝Under出來威威，唓，都唔知係咪自已新買但又吹水話係亞邊個靚女除給佢的。

天開始下微雨了，玩埋呢個摩天輪先，每位€ 6.5。

從摩天輪望到整個啤酒節場地。

約14:00離開時，每個啤酒館門外也擠滿人，連花園都入唔到，仲要濕着微雨，慘情。

返今朝間酒店攞返行李，佢幫我Call了架的士，免費車我去那間近地鐵Fraunhoferstr站的同系酒店 GHOTEL hotel & Living München。

雙人房(不包早餐)每晚HK$2014 – 因為啤酒節關係，房價起了一倍有多，真搶錢。

洗個面休息了一陣，約16:00出發去舊城區行街食飯，可惜剛出門口就開始落大雨，落到個人都冇乜心機。

聖彼得教堂(St. Peter Church) – 頂部是全市最好景的地方，可看見慕尼黑市全景。

聖母教堂(Church of Our Lady)

慕尼黑市政廳(Townhall)

雨勢越來越大，有遮都淋濕身，行了一陣就唔想行了，早D去食飯。

Haxnbauer im Scholastikahaus – 今次Target慕尼黑出名食咸豬手的人氣店，未夠18:00去到已天黑了。

炭燒德國咸豬手 – 最人氣的國菜，飲食男女贊到佢上天，又話「炭火烤到外皮脆卜卜，肉質不乾不嚡不硬，吃了一塊後，休想停口. . . . . 下冊三百字」，睇吓點？

這麽早就全店滿坐，令我滿帶希望，相信佢D豬手有西班牙間Restaurant Sobrino de Botin的乳豬咁正。

德國巴登白酒Deutschland, Baden(200ml ~ € 5.1) – 果味清香。

牛肝清湯(Beef Consomme with liver dumplings)(€ 5.7) – 飲食男女强烈推介，將牛肝打碎搓成球狀，加上牛骨清湯，肝味極濃郁，味道係OK，值得一試，但吃了半粒已好滯。

蘑菇忌廉湯(Mushroom Soup with fresh garden herbs)( €5.7) – 好味，係碗冇乜特色但高水準的西餐湯。

什錦凍肉盤(Haxnbauer Cold Platter)(€ 14.2) – 有齊芝士、火腿、煙腸、辣腸、香葱包、生籮蔔片、咸菜. . . . . 全部都勁難食，火腿得個咸字，芝士又硬又咸又唔香，個包似石頭，兩條腸咸咸臭臭，全部都係咬一啖就想吐，最正常只有生籮蔔片入得口. . . . . . . 呢盤嘢簡直悔辱了德國。

炭燒德國成豬手(Pork Knuckle)(半隻 ~ € 17.2) – 期望極高的一度國菜，可惜，名不符實，外皮被烤過了火，硬得差點刀也切不開，只有約五分一的外皮硬硬脆脆咬得開，附近每枱人都係食剩晒D皮；肉就烤得太乾，有一半肉像吃豬肉乾，味道只係一般，攪乜呀？？？？飲食男女老點囉。

伴豬手送的菜沙律，仲好味過主菜。

原本打算食完飯再入啤酒園逛逛，但雨下不停，早點返酒店瞓算了，明天還要早起。

補充資料 :

1.   Air China香港經北京來回德國機票(連所有附加費及稅)每位HK$5754。

2.   € 1兌HK$10.02

3.   申請返張Priority Pass，可免費到全世界機場的候機室，好抵玩。

4.   從慕尼黑機場可乘地鐵 S1線或S8線出市中心Hauptbahnhof站，約45min車程，單程每位€ 9.2，但買一張2~5人全日票只係€ 20便可全日任搭及包埋呢程，我只有兩個人都有着數。

5.   慕尼黑地鐵從冇人查票，自由出入。

6.   啤酒節期間慕尼黑的房價起了一倍多，而且好快Full，我預早兩個月Book房都比間黑店GHOTEL hotel & Living München揾丁，建議瞓少個鐘住遠十幾個站好過。

7.   星期五、六和假日啤酒場都超多人，而且好多位被人預定了，有心去的話必須08: 00前到達啤酒館外排隊，否則可能衰過我。

---待續---