泰有新意 曼谷(1) – 曼谷唐人街 猛鬼酒店

泰國曼谷鄉郊環保酒店 – Bangkok Tree House

五月份有一日紅假，坐唔定嘅小太熊想唔請假，簡簡單單去曼谷玩個週末。但係，曼谷我已去過7次了，行街買嘢我又唔啱，唯有揾啲另類嘢試吓，盡量唔重複以前去過的地方，唔好浪費大好假期。今次去4日3晚，小太熊話我揀嘅酒店同食店都唔得，要求好高啊！

今次<泰有新意 曼谷>4日行程包括 :

Day 1 – 夜機飛曼谷，住唐人街Shanghai Mansion Boutique Hotel。深夜食魚翅和榴槤做宵夜。

Day 2 – 早上在唐人街興來飯店(Odean)食蟹鉗麵做早餐。然後來個1小時4-Hands SPA。中午到BTS Asok站「爵祿軒」食全體乳豬三味，再去BTS Siam站Magnum Café食雪條。乘的士到Bangkok Tree House，入住純大自然特色房View with a Room。在房間晚飯。

Day 3 – 在酒店早餐後，到附近的Floating Market遊覧。11:00 Check-out，乘的士到曼谷最高的酒店The Baiyoke Sky Hotel，入住73/F房間。中午到Celadon食泰國菜。飯後睇泰拳，再做2小時4-Hands SPA。晚飯到「建興酒家」食海鮮。深夜到曼谷最高的酒吧 – The Baiyoke Sky Hotel 83/F飲嘢。

Day 4 – The Baiyoke Sky Hotel 78/F食早餐，然後返香港。

泰有新意 曼谷 – Day 1

今日要返工，放工乘地車去香港機場，响The Traveler’s Lounge食小小嘢頂吓肚，要留肚今晚食翅。

The Traveler’s Lounge人山人海，第一次要排15min隊攞嘢食，仲爆滿添。要比錢真係啋佢都儍。

乘20:45 – 22:30班機飛曼谷，但Delay了一個鍾。

到機場後，我如常到下層的士站排隊上車，上了架普通的士，講好地點便開車。開車一陣，個司機仍未起錶，我都知又上了壞人架車了，果然. . . . .

條粉葛同我講：「From here to China Town about 50 minutes，you need to pay two way highway fee and airport charge，total Baht 500。」

我答：「Use Taxi meter please，I know just 30 minutes from here to China Town，this is not my first time visit Bangkok，I know your taxi is meter taxi and I also know the price。」

粉葛司機：「Meter?? Not working now。You need to pay Baht 500 taxi fee。」

小太熊：「死啦點算呀，Baht 500即係收多幾多呀？」

我即時起火大聲喝佢：「GO BACK TO AIRPORT！！Or you go to China Town by METER！！」

條粉葛司機仲要死撑，死都唔起錶繼續行，我於是再大聲再講：「GO BACK TO AIRPORT！！」

條粉葛一分鍾後停了駕車响高速公路旁，落車開車尾箱將我個大背包放落地，居然大聲同我講：「You get off！！！！GO BACK TO AIRPORT YOURSELF！！」

小太熊：「死啦點算呀，佢要我哋落車呀。。。呢度點截車呀？」

我請佢食鹵味，我去足廿年旅行就係未怕過無賴。我立即攞返大背包上車，再大聲媽义佢：「GO BACK TO AIRPORT！！You may also call police!!!」

條無賴被我的强橫氣勢同滔天霸氣震攝住，只好死死氣返上車，起錶，開車. . . .

小太熊：「咁即係點呀，佢肯用咪錶？hehe…..估唔到你啲火仲好勁喎. . . . 唔知第啲香港人會點架呢？. . . . . . . . . . . ..」

以為條PK會安安份份駛駕車去唐人街，點知咪錶跳到Baht 93時，駕車突然震了幾吓，跟住停了响高速公路旁，死埋火。。。。我挑，有冇咁迫真呀，扮死火真係震幾吓先停。。。。

死PK落車打開車頭蓋check了一陣，話個engine有問題，要幫我截第二駕車，但要比返Baht 93車錢佢，機場附加費Baht 50就唔收。

好，費事再同你勞氣，當捐比你全家買四塊半. . . . . .

好彩，唔洗10分鍾就有駕無人的士經過，仲肯停車載客，好嘢！由死火位置去唐人街，又跳了Baht 140，全程冇行過收費公路。

攪完一大輪，去到唐人街已00:30了，唔Check-in住，去食宵夜先，因為好多鋪都收01:00。今晚Target了“飲食男女”介紹，話好抵食的魚翅酒家「和成豐」。

唐人街魚翅酒家 – 和成豐

差不多收工，但仍有我和另一枱客。

出去個魚翅櫃揀梳靚翅先

啲翅全部都好大梳，價錢由Baht 2500 ~ 6000，我點了排Baht 2500的貨。

紅燒蟹肉大排翅(Baht 2500) – 大大窩夠2 ~ 3人份量，蟹肉係生拆的非常鮮甜，魚翅都好彈牙，可惜湯底普通，小太熊有啲不滿。

紅燒蟹肉翅(Baht 300) – 翅同蟹肉都係頭頭尾尾，同上面果窩有明顯距離，但係同一個湯底，算抵食。

食完翅行過附近酒店Check-in，今晚住唐人街Shanghai Mansion Boutique Hotel。

酒店外觀麻麻，但大堂都幾有特色。

裝飾都古式古鄉

客房門口，幾攪嘢。

雙人淨房每晚HK$430，幾亁淨，冷氣亦夠。

放好行李，落樓下繼續食。原本想試金手指榴槤，但未夠熟，只有金枕頭啱熟，可惜。

本本旅遊書都話呢檔最老實，唔靚唔賣喎。

老細揀了個3kg的金枕頭，只得很少肉，卻收Baht 600。嘩！即係每磅成25銀港紙，貴過香港一倍，靚係靚少少，但味道分別不大，試一次算了。下次都係返馬拉或越南食，人地啲榴槤又平又好食。

今日03:00才有覺瞓，明早08:00又要起身了。

泰有新意 曼谷 – Day 2

朝早瞓醒，見小太熊佢捉實我唔放，我問佢做乜咁乖，佢話禽晚見到有個鬼佬企响我地張床邊好耐，所以驚到震喎，嚇到小太熊唔敢望，但又見佢企咗好耐都唔走。嘩！乜呢間嘢咁猛架，真係猛鬼酒店，下次咪住唐人街了。

猛鬼酒店Shanghai Mansion Boutique Hotel

今朝早餐揀了唐人街 興來飯店(Odean)

呢間食店好出名，好多當地傳媒同香港旅遊書都有介紹，但啲嘢食都好貴。

最出名係 蟹鉗麵。

炸蝦雲吞(Baht 60) – 好好食，鬆脆又有蝦鮮味。

芥蘭(Baht 70) – 唔錯

炸青蟹丸(Baht 120) – 幾特別，值得一試。

蝦肉燒賣(Baht 70) – 蝦好爽脆，有驚喜。

大蟹鉗水餃麵(Baht 500) – 貴到儍，但用料幾靚，係鮮蟹鉗，蟹肉又甜又爽口。

食完早餐，坐MTR再轉BTS，由Hua Lamphong站去Phrom Phong站(MTR Baht 27 + BTS Baht 15)。

約了Oasis SPA 10:30在Phrom Phong站 pick up，但部車遲到15分鍾，太差了，我Book了11:00 SPA仲Full paid埋架，以後一定唔幫襯呢間。

好彩Oasis SPA都幾靚，而且價錢唔太貴。

去到剛好11:00，飲杯冰凍花茶涼吓先。

1小時4 Hands Message (每位Baht 2070) – 4手SPA水準唔錯，節奏好齊又夠力，價錢唔貴，又冇呃鍾，前後時間可以沖身。

做完SPA，有兔費車去BTS Asok站，今日Lunch就响Asok站附近嘅Time Square 4/F的中菜館「爵綠軒」食。胡慧沖話喎，爵綠軒 係曼谷知名的中菜館，攞過「全曼谷最佳餐廳」同「全泰國最佳餐廳」大獎，連泰皇、成龍、李嘉欣都來幫襯，最出名係「乳豬三味」。講到咁正，今次專程帶小太熊來嘆吓。

Time Square中菜館 爵綠軒

普通酒樓一間，唔似吹得咁正喎。

凍菊花荼(Baht 40)；菠蘿特飲(Baht 80) – 普普通通。

蟹肉腸粉(Baht 150) – 睇Menu見收咁貴，仲以為係用生拆蟹肉，點知原來係用超市啲蟹柳，曉. . . . . 明揾笨。

乳豬全體三味(Baht 2340) – 外皮好鬆脆，好似片皮鴨咁伴埋蒸餅一齊食，都OK，但呢個價錢在曼谷算好很貴，响香港比咁多可以在新斗記、東海或鴻星食到更靚的乳豬了。

食完皮，伙記會收返隻豬入廚房弄埋另外兩味。

乳豬全體第二味 BBQ乳豬肉，味道OK啦。

乳豬全體第三味 乳豬頭手耳，都飽到食唔落Lur。

呢餐質素普通但又貴到死，小太熊有啲不滿。不滿都冇計啦，要趕下一站，坐BTS (Baht 15)去Siam Centre的Magnum Cafe食自選口味雪條。

Siam Centre的Magnum Cafe，幾時都人山人海。

自選口味雪糕條(每條Baht 80) – 小太熊就勁鍾意，我就覺得同超市買到的差唔多。

食完雪係，要出發去今次行程的重點酒店Bangkok Tree House了。Bangkok Tree House位於曼谷市內最後一片農地內，四圍都係農田和河流，要响Bang Na Pier(泰文讀“岑怕Wood”)坐一程船過河才去得到。

在Siam Centre外截的士話要去“岑怕Wood”，一係唔識路、一係開價Baht 300，問到第五架才肯用咪錶又識路。上車後遇上大塞車，上埋收費公路都塞塞吔，攪足65min才由Siam Centre去到“岑怕Wood”，車費共Baht 220。

Bang Na Pier “岑怕Wood”碼頭

渡河小輪，每20min一班船，每位Baht 4，設找續。

車都可以上船，收費會貴啲。

船程約5min，上船後即向左轉行 8 ~ 10min便到Bangkok Tree House了。見到今晚住的環保自然套房，一間冇水冇電冇門鎖冇瓦遮頭，近年經常被雜誌介紹的View with a Room。

Bangkok Tree House – View with a Room

補充資料 :

1.        HK$ 1兌泰銖Baht 3.72。

2.        泰航 香港來回曼谷機票HK$ 2490。

3.        在曼谷機場用美元兌換泰銖比用港幣兌換泰銖更着數，全曼谷機場的兌換價一樣。但最好價都係香港嘅百年找換店。

4.        全曼谷的士都係睇咪錶計車費，但十個司機七個都唔識路或開天殺價或拒載。

5.        曼谷機場出市區乘的士跳錶大約Baht 250，但要再加Baht 50機場附加費(回程唔駛)和1段公路費Baht 45。

6.        由Siam乘的士去Bangkok Tree House對面岸碼頭(泰文續“岑怕Wood”，英文叫Bang Na Pier)大約跳錶Baht 171+ 1段公路費Baht 45，塞埋車車程足65min。

7.        由“岑怕Wood”坐船過Bangkok Tree House只Baht 4，每20min一班船。

---待續---