韓國慶州 櫻花馬拉松(1) – 藍天 • 櫻花 • 慶州行

藍天櫻花樹下的韓國慶州市

剛從日本回來7日，小太熊又安排了我出征 韓國慶州的櫻花馬拉松，今年冇乜時間練咋，年頭的渣打馬拉松又冇跑，不如今次報 半馬拉松算啦！！！「乜你咁懶架，越來越肥了，要減肥呀，跑兩步都脚軟，點揹我上大佛呀？。。。」好啦好啦，跑就跑，不過跑全馬實冇命，一口價，半馬啦。就這樣，參加了4月13日的 慶州櫻花馬拉松，又再到一別四年的 韓國慶州市。

 

今次韓國慶州旅程只有3日，計劃行程包括 :

 

Day 1 – 零晨飛韓國釜山，在釜山機場乘巴士去 慶州市。早上到佛國寺外探一位好勤力的韓國婆婆和在她的食店食早餐，之後遊世界文化遺產 佛國寺和石窟庵。中午遊慶州市，晚飯於400年古宅餐館 – 瑤石宮。住普門湖區Hotel Gyeongju Kyoyuk Munhwa Heokwan。

 

Day 2 – 早上跑 櫻花半馬拉松，午餐於普門湖區食 石磨水豆腐。中午在普門湖區踩單車，晚飯於普門湖區 巨龜庒食韓牛。

 

Day 3 – 早上乘巴士到釜山市，食東萊婆婆煎葱餅。跟住去台彎書介紹的「白鹿潭火汗蒸幕」，樂天百貨買嘢，扎嘎其市場晚飯。最後坐的士到釜山機場，乘22:05 – 00:30班機回港。

韓國慶州 櫻花馬拉松 – Day 1

今日01:55坐大韓航空零晨機，起機前先去香港機場The Traveler’s Lounge宵夜。The Traveler’s Lounge近年越來越多人，但嘢食就越來越少，及越來越低檔，以前有蝦蛟燒賣、出前一丁碗麵、名牌雪糕等等. . . . 現在乜都冇了，只有啲唔好味的飯菜。。

香港機場禁區The Traveler’s Lounge

最好味只有呢碗 粟米湯

<<釜山>>

上機了，01:55起飛，立即在飛機瞓三個鍾，06:20準時到釜山機場，唔駛十分鍾就出了禁區。仲有半個鍾才有巴士，夠時間在機場食小小早餐。

釜山機場快餐店POPEYES

點了一份 蝦漢堡餐(W6200) – 味道幾好

<<慶州>>

07:00乘這高速巴士由釜山機場直達慶州市高速巴士站，車程只1hr。

行過對面馬路，立即又見有巴士去普門湖，唔駛等啊。

去到普門湖都未夠09:00，一片藍天，可惜櫻花已落了五成以上，來不逢時。

酒店未有房，於是放低行李，先坐的士去世界文化遺產 佛國寺。

世界文化遺產 佛國寺正門

佛國寺 紫霞門

唔知今日咩日子，人山人海，超多小學雞，好煩。

由於4年前來過了，我就興高彩列，話呢處我記得呀，果處冇變過呀，但小太熊就覺得好悶，冇乜心機睇。

唯有在寺內揾個位坐底同小太熊休息吓食啲嘢啦

二人份 菊花茶(W10000) – 像水咁淡，簡直搶錢。

20件慶州特產 豆沙餅(W14000) – 幾好味道，試一件真係好好，但一大盒就唔值得買了，不過老細唔肯散賣，小太熊又想試，只好買晒一盒。

行了一陣，便沿這條櫻花路行到佛國寺後門。

佛國寺後門過馬路之後有很多排食店，第二排有一間食店由一位婆婆主理，小太熊四年前幫襯完非常鍾意。今次專程再去幫襯吓呢位婆婆，再感受吓韓式的人情味。

由韓國婆婆主理的食店

和四年前一樣，婆婆一早又在門外兜生意，見到我們便請了我們入去，不過佢唔話得我地lur。

小店一枱一木完全冇變過，Home Feel依然。

我們剛坐底，菜都未點，婆婆便立即為我們弄制那免費前菜。

韓式海鮮蔥餅 – 勁大碟的免費前菜，大蔥和魷魚都好甜，餅底又靚，在香港試過HK$120一餅的韓式海鮮蔥餅都完全冇得比，我比呢碟煎餅85分。

免費伴菜 – 每碟食一啖都飽了

婆婆再送一碟沙律

佢再送我一碟韓式米酒，我唯一食晒呢碗。

雜錦石頭鍋飯伴豆腐鍋 – 好味架

婆婆又送來兩條煎黃花魚

韓式牛肉鍋(W12000) – 雖沒有頂級牛味，但粉絲配菜和汁底都很美味，這價錢覺得好抵食。

真係食唔晒，只能盡力食。埋單真係只收W22,000，乜什費都冇，又平又抵食又充滿韓風味，如果你都去開佛國寺就幫襯吓呢位婆婆啦。

食完飯啱啱走了班去石窟庵的巴士，於是再由4年前走過的舊路，行一個鍾上石窟庵。

行到標晒汗，終於上到世界文化遺產 石窟庵。

世界文化遺產 石窟庵

石窟庵 – 庵內是原庒石山開鑿的如來佛像。

好快行完 石窟庵，坐巴士返落山下的 佛國寺，再轉No.11巴士返普門湖區的酒店。

今晚和明晚住的酒店Hotel Gyeongju Kyoyuk Munhwa Heokwan

雙人淨房每晚W140,000

Check-in後乘No.11巴士返去 慶州市中心，途經一片黃花田，即刻落車。

櫻花樹下的黃花田，好靚呀。

行15min再到另一名勝 雁鴨池

再遊 慶州古墳群

慶州 石冰庫

慶州 雞林

慶州 瞻星台

最後一站係 四百年古宅餐館 – 瑤石宮

原本打算在瑤石宮晚飯，點知今日和明日都Fully Book了，慘情。4年前又因為農歴年初一冇開門而食唔到，今次又. . . . . . . 好彩特然有把國語聲，問小太熊「獅bull獅鐘果奶打」我反應超快答「獅呀獅呀」 

果然有著數，呢位中國待應即刻入房同老細講，話不如比我地明晚17:00 – 18:00 Zip一個鍾啦，老細初初唔係好想，但比位待應lur吓lur吓又OK了，真唔該晒呢位遠方的中國朋友。 

今晚未有得食瑤石宮，便坐No.10巴士返4年前幫襯過的普門湖 巨龜庒食燒韓牛。 

普門湖巨龜庒，原來已變了另一間 炭燒韓牛店。

裡面也全新裝修過了。

入到去要先到肉櫃前比錢買生牛肉，再加每人頭W5,000開爐費和伴菜費。

韓牛肉(左W9,000 – 100g；右W12,000 – 100g) – 牛味香濃，而且冇和日本和牛咁油口，勁好食。

韓國燒酒(W4,000)

炭燒韓牛肉 – 香濃味美，睇返都想再食。

韓國人的韓式食牛法，冇咁滯。

唔夠喉，加多件西泠(W12000 – 100g)，超正。

夜晚在酒店隔離座的 大浴場沖涼，街客每位W10,000，酒店住客就每位W6,000。

酒店 大浴場

今晚早啲瞓，明早06:00起身，08:00起跑。

 

 

補充資料 :

 

1.         韓圜W10,000兌HK$ 71.69。

 

2.         大韓航空 香港來回釜山機票HK$ 4331。

 

3.         慶州櫻花馬拉松報名費W30,000，但只收滙款，銀行收了四舊幾港紙手續費，只可e-mail報名，確認報名後，在比賽當日才可開跑前一粒鍾到現場攞號碼布，但效率甚差。

 

4.         釜山金海國際機場有高速巴士直達慶州市高速巴士站，每位W9,000，車程約 1hr，每日16班車，最早07:00，尾班開22:00。

 

5.         慶州市高速巴士站可乘No.10巴士到普門湖區，每位W1500。

 

6.         普門湖區乘 黑色優質的士到佛國寺要W11,000。

 

7.         佛國寺後門前有巴士來回石窟庵，每小時一班，每位W1500。如行路由佛國寺到石窟庵約須一小時。

 

8.         佛國寺和石窟庵各收每位W4,000入場費。

 

9.         佛國寺可乘No.11巴士到普門湖區或慶州火車站(即瞻星台附近)，每位W1500。

 

10.    佛國寺後門過馬路之後有很多排食店，第二排有一間食店由一位婆婆主理，小太熊四年前去完今次又要去，非常鍾意。如果你都去開就幫襯吓呢位婆婆啦。

---待續---