印尼龍目島(Lombok) 上山下海大作戰(1) – 尋味新加坡(Singapore)

2013年新加坡最新地標 – Garden by the Bay

今年7.1假期前三個月，小太熊問我去印尼 龍目島好唔好。龍目島？我1996年去過一次了，那裡水清沙幼，碧海藍天，價錢超平，遊客罕見，確係處好地方。我記得 龍目島中部有座3726m高的活火山我未行過，山頂有個好靚嘅火山湖，而且我當年未有潛水牌，冇潛過龍目島的水底，於是我舉腳贊成。買晒機票後，撞啱毛記套XX大作戰，令這個响香港冇乜人識的地方忽然人人都識。

印尼龍目島(Lombok) 上山下海大作戰 – 序

今次預算請2日假頭尾去6日，先行上3726m高的活火山，再潛落30m深海，原本行程充實又豐富，但最後都係人算不如天算，第二日就响山上食物中毒，之後乜都玩唔到，而且最後仲比印尼賊頭呃錢，谷住度氣，令今次變成近年最差勁的一次旅程。。。唯一好彩係，小太熊全程都開籠雀一樣，龍精虎猛，上山下海踩單車完全冇難度，食得瞓得，小太熊好勁呀！

吹咗咁耐，究竟龍目島响邊？有咩玩？龍目島其實响峇里島東面，主島上有座同日本富士山一樣高的活火山 – 林賈尼火山Gunung Rinjani，最近一次爆發係2004年，山頂上有火山湖、温泉和瀑布，以前係處世外桃源，但今天已慘變垃圾山。龍目島外島有三個人氣小島Gili Air、Gili Meno和Gili Trawangan，係潛水渡假聖地，我1996年第一次去時相當隱世出塵，但今天已破壞得幾嚴重，珊瑚都死了唔少。除了這3個人氣小島之外，Gili Nanggu是一個唔出名的私人小島，相信仍未被嚴重人為破壞。

印尼 龍目島(Lombok)位置

今次預算6日行程包括 :

Day 1 – 零晨機飛新加坡，早上先去食肉骨茶做早餐，然後遊2013年新加坡 最新地標 – Garden by the Bay。中午去牛車水食大馬榴槤、興記咖哩雞麵和天天海南雞飯。下午15:45乘機去印尼 龍目島。住Senggigi海灘的Qunci Villas Hotel，在酒店晚飯及做1hr SPA，小睡4個鍾。

Day 2 – 零晨04:30起身，05:00乘專車到 林賈尼火山(Gunung Rinjani)山脚Sembalun Lawang (+1150mPD)。早餐後08:30開始起行，從起步點一直上到Pelawangan Crater Rim (+2639mPD)，中途午飯。晚上在高地Pelawangan Crater Rim扎營，野餐，早睡。

Day 3 – 零晨02:00起身，食早餐後02:30起步，用3hr從Pelawangan Crater Rim行上山頂Gunung Rinjani Summit (+3726mPD)。06:30睇完日出落山至起步點，沿途早、午餐。回到起點後，乘專車到Bangsal，轉船到小島Gili Trawangan。晚上住小島上Kokomo Resort，做SPA。

Day 4 – 下潛三次，晚上做SPA，住Kokomo Resort。

Day 5 – 早上踩單車環島遊，午飯後乘船離開小島再轉車去龍目島機場，夜機飛新加坡。

Day 6 – 零晨機飛香港，早上05:10抵香. . . . . . . 返工。

印尼龍目島(Lombok) 上山下海大作戰 – Day 1

今日零晨01:30機飛新加坡，寄行李時收到好消息，我同小太熊張經濟位upgrade咗做商務位呀！！嘩，聽就聽過好多人試過，但我坐咗廿幾年飛機飛行超過二百次，都係第一次upgrade咋，Lucky。

商務客位登機証

坐得國泰商務客位，小太熊提醒我當然要去埋國泰商務客位專用候機室嘆吓啦。係喎係喎，我二話不說便跑去候機室Check-in，點知個亞姐話 :「呀腥，唔好意試，你張upgrade票係唔用得呢個候機室嘅，keikei. . . . .」

超樣衰呀！！！國泰太小氣了. . . . . 唔Like

國泰商務客位專用候機 寰宇堂

唯有樣衰衰地返過去The Traveler’s Lounge食小小嘢頂吓肚

夜媽媽乜都冇，剩得春卷和少量甜點，不過幾好味。

上機了，小太熊自己一隻坐一個商務客位。

我就order杯法國香檳Billecart-Salmon Brut Champagne先，正嘢黎。

原本諗住唔食餐，上機即瞓，但難得upgrade做商務，又點舍得唔試吓啲商務餐呢。

我食牛肉意粉餐，唔好食。

小太熊食魚飯，又係差字一個。

估唔到現在國泰的商務餐差成咁，早兩年試的頭等餐又係差，自己比錢坐就正儍仔了。2007年坐國泰頭等和商務去澳洲時，啲嘢好好味的。

食完飯，半夢半醒瞓2個鍾，05:00就到新加坡了。

<<新加坡>>

今次停新加坡10個鍾，揀了幾處新食店和Garden by the Bay，試試新嘢。

到埗後先去Silkair寄好大行李，再乘地鐵到Tiong Bahru (EW17站)，試一間“飲食男女”介紹的隱世小店 – 老字號中峇魯肉骨茶。

老字號中峇魯肉骨茶

“飲食男女” 話，你去你的黃亞細，我有我食中峇魯白肉骨茶。中峇魯白肉骨茶唔落药材，只用重白胡椒加豬骨，味道不及黃亞細濃烈，但清淡中別有一番風味，講到呢檔嘢正到冇朋友咁話，點可以唔試呢。

蜂蜜愛玉冰S$2.2(左)；意米水S$1(右) – 清潤涼透心。

招牌白肉骨茶(S$8) – 湯底超正，好重白胡椒和豬骨香味，配油炸鬼(S$1.2)一流。我第一次食肉骨茶飲晒啲湯，豬骨亦新鮮，我就覺得好味過黃亞細，但小太熊就喜歡食黃亞細多啲；鹵豬手(S$6.5) – 唔太咸又夠淋，豬皮膠質重有咬口，唔錯。

食完早餐坐S$1.2地鐵去Bayfront(CE1站)，平係平，但短短路程要轉3~4次車，次次都行鑊金，攪足一個鍾至去到Garden by the Bay，應該坐的士。

Garden by the Bay

Garden by the Bay招牌，人造巨樹。

09:00先遊室內展館Cloud Forest，我第一個入場。Cloud Forest的設計像雨林一樣，幾有特色創意。

Garden by the Bay – Cloud Forest

Cloud Forest介紹全球暖化，小太熊自己一隻霸晒成個場。

跟住去另一間室內展館Flower Dome，這裡種了好多品種植物，較特別係有非洲馬達加斯加的怪樹。

行完展館，上巨樹行天橋Skyway。

條天橋只用幾條鋼纜吊住，up吓up吓好鬼刺激。

行完花園，坐S$5.85的士到牛車水的美食廣場Hong Lim食午飯。美食廣場Hong Lim 地下有檔 興記咖喱雞麵，本本書都贊，咪試吓囉。

興記咖喱雞麵，只早上11:00，所以未見人龍。

肥仔好專心地煮咖喱雞麵

咖喱雞麵(S$6.5) – 湯底一流，咖喱濃香樸鼻，麵質亦上品，可惜隻雞普通，而且唔係幾夠熟。

美食廣場Hong Lim地下 源昌甘蔗汁

源昌甘蔗汁(S$1.5) – 真材實料，唔飲就笨。

唐人街 胡振隆買肉乾 – 我始終覺得新加坡美珍香的炭火燒肉乾最好味，但小太熊個同事就話呢間好啲。

牛車水 佛牙寺

佛牙寺對面係Maxwell Food Centre，今次要食「天天海南雞飯」，2010年來的時候冇開檔啊。

星洲名菜「天天海南雞飯」，好彩早到，遲多15min排了幾十人。

天天海南雞髀飯(S$4.2) – 雞肉嫩油飯香口，幾好味，只係雞味唔夠濃。另加意米水S$1.5。

食完行返美食廣場Hong Lim買貓山王。貓山王又加價了，每1kg ~ S$14，比兩年前貴了S$2，而且啲貨唔夠靚，只屬三流貨式。

2kg貓山王(S$28) – 價錢就收足，但質感味道只係普通，始終唔夠新鮮，唔似係樹上熟。

算啦，比起在九龍城榮記買的已是又平又靚的極品，呢個榴槤响榮記最少收七舊，仲要雪到壞晒果隻，最頂佢唔順係當你儍仔，開完個垃圾榴槤仲猛話正，吹到味道如何有層次，On9，都唔知佢真儍定假懵，食過好嘢未。

新加坡節目完畢，乘地鐵返機場。

今次去Terminal 2的 Ambassador Transit Lounge休息。

沖個涼上吓網飲啲嘢，好快又上機。

乘SilkAir 15:45班機直飛印尼龍目島。

黃昏18:45又到一別17年的老地方 印尼龍目島了. . . . . . . .

補充資料 :

1.        S$ 1兌HK$6.13。

2.        HK$ 1兌印尼盾Rp1230。

3.        國泰 香港來回新加坡機票HK$ 2064。

4.        SilkAir新加坡來回龍目島機票HK$ 2122。

5.        新加坡機場乘地鐵到Tiong Bahru (EW17站)，車程40min，車費S$2.2。出站後行10 ~ 15min便到“飲食男女”介紹的隱世小店 – 老字號中峇魯肉骨茶。

6.        Garden by the Bay有2間室內展館Cloud Forest和Flower Dome，入場聯票S$28，出示星航或SilkAir登機証有9折。另上天橋Skyway S$5。

---待續---