印尼龍目島(Lombok) 上山下海大作戰(2) – Gunung Rinjani林賈尼火山 攻頂大作戰

印尼龍目島(Lombok) – 林賈尼火山Gunung Rinjani‧Segara Anak Lake

印尼龍目島(Lombok)位於峇里島東部，與鄰近的印尼東部大島Sumbawa、Komodo(科莫多島)、Flores(佛羅烈斯島)等统稱Nusa Tenggara。Nusa Tenggara的自然環境獨特，有世界聞名的 科莫多龍(Komodo Dragon)，有世上獨一無二的三色火山湖Mt. Kelimutu，亦有龍目島中部的Gunung Rinjani(林賈尼火山)。

Gunung Rinjani(林賈尼火山)高3726m，和日本富士山相約，屬於活火山，最近爆發期是2004年。山上有温泉、瀑布和一個約海拔2000米高的火山湖Segara Anak Lak。很多旅客喜歡到山上行2日1晚至4日3晚登山露營遠足，1日登山費用大約每人USD$100，已包括導遊、Porter、所有必須品、食物和樽裝水。

今次我參加了當地旅行社Rudy Trekker一個2日1晚登山攻頂團，2人包團每位收Rp2,150,000(我冇講價)，包了一個導遊、2個Porter(只負責攞煮食用具、食物、水和露營用品)、全程5餐飯、樽裝水和三程專車接送(i.e. 龍目島機場至Senggigi約75min、Senggigi至Sembalun Village約120min、Sembalun Village至Bangsal約90min)，每個環節都好準時冇遲到，導遊服務亦唔錯，可惜山上食物唔妥，食到我又疴又嘔. . . . . . .

2日1晚登山攻頂行程大致如下:

Day 1

1.)     早上05:00乘1.5hr專車從Senggigi到Senaru Village，在旅行社Rudy Trekker的餐廳食早餐；

2.)     約07:30乘30min專車從Senaru Village到Rinjani Information Centre登記，約08:30開始從Sembalun Lawang (1150m)登山；

3.)     行約2hr從Sembalun Village (1150m)到Pos 1 (Pemantuan Shelter)(1300m)；

4.)     行約30min從Pos 1 (Pemantuan Shelter)(1300m)到Pos 2 (Tengengean Shelter) (1500m)；

5.)     約2hr食中午飯及休息；

6.)     行約1hr從Pos 2 (Tengengean Shelter)(1500m)到Pos 3 (Pada Balong Shelter) (1800m)；

7.)     行約3hr從Pos 3 (Pada Balong Shelter)(1800m)到營地 Pelawangan Crater Rim (2639m)。

8.)     晚飯及扎營休息。

 Day 2

1.)     早上02:00起身食早餐，02:30出發攻頂。

2.)     行約3hr從Pelawangan Crater Rim (2639m)到山頂Gunung Rinjani Summit (3726m)，等日出。

3.)     06:30日出後落山，行約2hr回到Pelawangan Crater Rim (2639m)食早餐。

4.)     約09:30落山，行約4hr回到起點Sembalun Lawang (1150m)，中途食中午飯。

5.)     約16:00回到Senaru Village，乘1.5hr專車到Bangsal，再自行乘船往Gili Trawangan。

印尼龍目島(Lombok) 上山下海大作戰 – Day 1

<<龍目島(Lombok)>>

繼續上一篇Day 1行程。

SilkAir航機18:45降落 龍目島，當地旅行社Rudy Trekker職員準時來接機，Good~~從龍目島機場到Senggigi海灘要1hr15min，今晚小太熊Book了Senggigi海灘的Qunci Villas Hotel最平房，又Book了酒店21:00 ~ 22:00的SPA比我嘆，正呀，但昨晚通宵機冇得瞓又行了半日新加坡，現在已遊緊魂了。

專車剛好20:55到Qunci Villas Hotel，我立即房都唔攞住，跑去做SPA先，費事又比人呃鍾。

Qunci Villas Hotel – SPA Centre

Balinese SPA(每位1hr ~ USD$36) – 價錢合理，SPA房都幾靚，全部用天然風，手勢亦好好，有水準。但始終改唔到印尼人的懶根性，呃了5min。收美金現鈔，比印尼盾會貴2%。

做完SPA，返Reception飲Welcome Drink檸雜，好味。

Qunci Villas Hotel最平雙人房(連早餐)每晚HK$584，抵住。

門口有個小露台，但冇時間坐了。

房內都幾靚，冷氣好足。

浴室係露天的，比得上馬爾代夫的Angsana Ihuru。

Qunci Villas Hotel的Infinity Pool，呢個價錢都有咁靚泳池，真抵住。

酒店的24hr餐廳，夜媽媽22:30仲有幾枱客。

印尼綠咖喱雞(任食白飯)Rp97,600，過得去。

印尼海鮮炒麵Mie Goreng Seafood (Rp91,500)，油淋琳但唔難食。

食完飯沖埋涼執好明天的攻山用品，攪到00: 30才有得瞓，慘，又瞓得4粒鍾，連續兩晚勁唔夠瞓，可能唔夠精神行山啊。

印尼 龍目島Lombok – Day 2

04: 30起身，酒店把預備好的外賣早餐送來(只有一盒果汁、2隻蕉和2個硬包)，旅行社職員準時05: 00 接我們走。

專車1.5hr送我們到旅行社於Senaru Village的餐廳，然後食早餐(旅行社都包了早餐)，再交團費。科水後，導遊便車我們去Rinjani Information Centre登記，等埋另外兩Pair人，08: 50開始從Sembalun Village ( 1150m )出發，登山。

08: 50開始從Sembalun Village ( 1150m )出發，出發時陽光普照。預計行2小時上升150m。

沿途經過很多農田

遠望到3726m高的山項了，心情大好。

今日共見到約三十個旅客登山，連埋導遊和Porter，算係好多人。

成班Porter在樹下休息。

中途遇上一羣牛，似去了西貢行山。

沿途經過火山灰地帶

上呢段斜坡時冇乜力，狀態麻麻地。

10: 27行到Pos 1 (Pemantuan Shelter)( 1300m )，比預定時間快了20分鍾，呢段路好易行。

Pemantuan Shelter人山人海，而且，成地垃圾無人清理，甚差。

飲啖水又起行，天色開始變陰了。

10: 56行到Pos 2 (Tengengean Shelter) ( 1500m )了，呢段路好易行。

好多野猴子在揾食

可能導遊們預見會落雨，所以全部團隊都在Pos 2食午飯。

導遊和Porter們就地生火煮食，又炒又炸，攪到啲地方好dirty。此外，橋下條河好多垃圾，Porter用河水煮食勁唔衞生。

每人有張私家櫈，好高檔。

呢味好核凸綠色一Pat係薯容，味道OK的，但望見啲煮食河水，真係唔想食。

主菜好豐富，味道亦OK，不過如果可以揀，我會叫佢正正經經用樽裝水浸個杯麵好過，至少夠衞生啊。

飯後果，我只吃了一片菠蘿。

食完飯休息一陣，12:17起程。預算用 1hr上升300m，段路開始難行。

行唔夠10分鍾，開始落雨了，雨勢時大時細，必須開傘，令段路更難行。

好快就望見Pos 3 (Pada Balong Shelter)( 1800m )了。

又穿過火山灰地帶

特然開積霧了，乜都睇唔到。

13:09行到Pos 3 (Pada Balong Shelter)( 1800m )，快了8分鍾，雨還是下不停，而且越落越大，雨勢比得上舊年行 台灣玉山。

Pos 3 (Pada Balong Shelter)( 1800m )，又係勁多垃圾，好臭，唔想坐。

13:21再起行，預算用 3hr上升840m，呢段路開始便不斷上、上、上、上，行到脚軟。沿途很大雨，乜景都見唔到，行到個人懵懵吔。

16:15終於到營地 Pelawangan Crater Rim ( 2639m )了，營已扎好，雨比先前更大，冇野好做，無耐地入營瞓陣先。

導遊好快送來一碟炸香蕉餅，入得口的，每人5件，但我食了一件便唔想再食。

導遊好快再送來一碟沙律，賣相好好，但小太熊唔準我食，最後我唔聽話試了一口，唔差的。(後來先知道，處事保守隱妥的小太熊是對的，我錯了。)

差不多18:00終於停雨了，旅客們都走出來鬆一鬆。

營地外其實佈滿垃圾，十分唔衞生，早知唔來行山啦，原來係行垃圾山。

停雨了，天都清返。

今日晚飯係咖哩雞飯，味道OK，我食了一半。怎估到，食完呢碗咖哩雞，就係整個旅程惡夢的開始。

食完飯，大約19:00瞓覺，預備明天02: 00早起。

約20:00左右，我覺得啲咖哩雞完全冇被消化，頂住個胃有些作嘔，心諗可能係咖哩雞唔乾淨，於是自己反胃嘔了啲咖哩雞出來，食2樽保濟丸再加些保礦力，估計嘔晒啲嘢又食埋藥，休息吓便冇事了，再瞓。

約22:00特然肚瀉，疴了好多水，大鑊了，肯定係食物中毒，立即攞自備的抗生素出來救命。再飲保礦力補一補。

約23:00又再肚瀉，又係疴了好多水，担心死小太熊了，好彩只有我中招，體魄强健、抵抗力强的小太熊冇事。疴完水，又隊2支保濟丸和飲些保礦力。

印尼 龍目島Lombok – Day 3

約00: 30又再起身疴水，疴少好多了，因為已經冇乜水，但今次唔止疴，仲嘔了幾口胃酸. . . . . 頂，啲咖哩雞毒到爆。

02: 00導遊問我掂唔掂，仲攻唔攻頂，我得半條人命唔上了，原本小太熊可以上的，但佢話要睇住我，唔上了，又唔係啲咩非上不可嘅山頂，佢話尼泊爾EBC、神山、富士山都上過啦。

約02: 30又起身疴少少水，再隊2支保濟丸，慘情。

約03: 30和04: 30分別起身疴多2次，再隊2支保濟丸和飲些保礦力，終於止瀉了。整晚都見滿天星，如果冇病上到山頂就好了。

06: 30日出了，起身，04: 30疴完後都冇再瀉了。

營地上原來好多營，而且望到火山湖Segara Anak Lake。

導遊見我好返些，便開椅比我地食早餐。

日出了，雖然唔係响山頂睇，但有命睇都算唔錯了。

早餐有餐肉蛋漢堡加薯條，我只食了三分一個漢堡，勁冇胃口。

火山湖Segara Anak Lake

Gunung Rinjani Summit，肯定呢世都唔會行上去了。

07: 30起行，想盡快離開這裡。

09: 50落到Pos 3 (Pada Balong Shelter)( 1800m )

約10: 30在中途停下煮午飯

午飯有印尼炒麵，但我一啖都吃唔落了，小太熊食了少少。我又頂唔住疴多一次。

之後導遊幫我揹埋個背曩，讓我輕鬆啲。行到13:23終於回到起點了，散隊。繼上年台灣玉山後，又一次攻頂失敗。

旅行社安排了專車送我們到Bangsal，車程90min，司機替我們買了2張Public Boat船票。

Bangsal的公衆船售票處

公衆船售票處，職員係兩隻賤格嘅印尼雞，專門偷呃拐騙，行為無恥。

司機替我們買了2張Public Boat船票(每張Rp10,000，團費包埋)後，叫我地跟住呢條更無恥的印尼賊頭，話佢會通知我吔上船。

無恥的印尼賊頭，請你全家食鹵味。。。。。

印尼賊頭和另一條叫“Aly (電話 : (62) 087 865 881264)”的印尼屎蟲keep住我張船票，呃我話要等個幾鍾才有船，又不斷sell我同佢買 快艇+的士 套票從Gili Trawangan返機場，又話如果我同佢買就可安排我立即上船去Gili Trawangan，唔駛等個幾鍾 (實情係根本好快有船開，但兩隻賤格嘅印尼雞唔出聲，分明係串謀)。小太熊好心急，好想快啲走。

印尼屎蟲Aly開價Rp750,000 (後來發現，公價約Rp500,000)，包我快艇+的士，佢話快艇要Rp400,000，的士就Rp350,000，我還佢價Rp400,000全包，鐵價不二，因為我想去到島至買票，平貴唔緊要，最緊要係人人都一樣嘅公價。印尼屎蟲Aly最後話OK，兩隻印尼雞比了本單部比印尼屎蟲Aly開單，我比錢後印尼屎蟲Aly叫我到時早10min攞張單去Gili Trawangan的快船碼頭，果度有職員安排快艇和的士。最後印尼賊頭帶了我們上船，其實已睇住走了一班船，成班賤精。真神阿啦實打“救”你班人渣落地獄。

嚴重超載的公共船

終於離開龍目主島，到Gili Trawangan，可以沖涼了。

補充資料 :

1.   HK$ 1兌 印尼盾Rp1230。

2.   SilkAir新加坡 來回 龍目島機票每位HK$ 2122。

3.   2日1晚Gunung Rinjani登山攻頂團，2人包團每位收Rp2,150,000(我冇講價)，包了一個導遊、2個Porter(只負責攞煮食用具、食物、水和露營用品)、全程5餐飯、樽裝水和三程專車接送。

4.   營地溫度( 2639m )約5至10度，導遊話山頂約2度，一定要帶夠衫。

5.   龍目島機場距離島上主要景點相當遠，從機場到Senggigi約60km，車程約1hr 15m in。

6.   從機場到Bangsal約75km，車程約1hr 45m in，包泠氣車Rp250,000(議價後價錢，通常開價Rp400,000)。

7.   從Bangsal乘Public Boat到Gili Trawangan每位Rp10,000，船程約20min，航班不定期，上落船都要澗水，在票櫃賣夠30位便開船。但船伕又會自行收現金(應該係收平啲)放人上船，所以一隻船起碼上50人，嚴重超載，我親身試過都覺隻船坐晒好危險。背包攻略話早兩年仲試過沈船添。

8.   另從Teluk Nare (Bangsal附近的碼頭) 有出租快艇來回Gili，每船坐可3人，單程開價由每船Rp300,000至Rp450,000不等，船程話約7min。

9.   江湖規矩，如果覺得導遊和Porter服務好，應於散隊時比約10%小費佢地，始終佢地都好窮好辛苦吓。當然，如果衰就一定唔好比啦。

---待續---