馬來西亞 • 沙巴(完) – 亞庇(Kota Kinabalu) • 山打根(Sandakan) 雙城記

小太熊响沙巴‧山打根的英國茶室嘆緊佢最愛的High Tea

馬來西亞‧沙巴的亞庇(Kota Kinabalu)和山打根(Sandakan)分別係沙巴的第一大和第二大城市，在這兩個舊城閒逛，感覺好似分別返反20年前和40年前的老香港，人情味濃厚。

馬來西亞•沙巴 – Day 4

<<山打根>>

繼續第4日行程。在 海上皇餐廳食完飯，返回山打根市已15:40了。約了的士司機17:30在街市門口等，我同小太熊就用110分鐘時間，感受一吓山打根市的懷舊感。

在這山打根街市落車，先入去行行，視察吓當地的物價和民生。

發現榴槤，每1kg只賣RM 6，當然要試啦。

和中午路邊吃的那個同種的，味道都好好，但這個應放多了1~2日，質感差了少少，但勝在超平。

行完街市，沿海旁繼續行。

行到山打根的古積 百步梯，足有一百級摟梯，風景真係流到嘔，慈雲山上沙田坳條梯仲正過佢。

百步梯的盡頭行多3分鍾就係 英國茶室(English Tea House Restaurant)，好High架，靚過香港從前的 雍雅山房。



英國茶室有一座古建築物，可以坐入面。

又可以坐在大花園

High Tea Set(RM 44 ~ 2人) – 味道就很一般，但格調優雅，抵食。

食完Tea行20min返到街市，司機已準時等緊我吔。由街市門口去機場只用了25min。今晚乘馬航 19:00 – 19:45機返 亞庇。今日天兔到訪香港，好多機delay了，麻煩。

<<亞庇(Kota Kinabalu)>>

Hotel Sixty 3 – 位於亞庇市Gaya Street，食嘢好方便。

雙人淨房每晚HK$ 478，幾乾淨。

涼都唔沖就落Gaya Street食嘢先，第一站係 佑記茶室。

佑記茶室的肉骨茶响亞庇都好出名

排骨肉骨茶(RM 6)；三層肉(RM 6.5)；豆腐(RM 1)；油炸鬼(RM 1) – 排骨肉骨茶和三層肉就幾得，但豆腐只係中下，油炸鬼好難食。整體上味道就一般好食啦，冇乜意慾食第二次果隻。

生菜(RM 8) – 唔抵食，而且勁多油。

行過2個街口，再跟住旅遊書介紹，試試這間 馮業。

話梅桔仔冰Kit Chai (RM 2.7)；三層咖啡Three Layers Kopi (RM 3.7) – 兩杯都好味。

咖哩海鮮啦沙麵(RM 13) – 小店最出名的食品，有齊魚蝦蟹但唔鮮甜，咖哩太濃但唔夠咖哩香，小太熊話佢「唔得掂」囉。

食完麵向海邊方向行過大馬路，使到一熟食市集。

燒雞翼香噴噴好正，但冇試了。

穿過市集轉左，便返到3日前來過的Segama天橋底榴槤檔。

貓山王今日冇貨，成RM 60 ~ 1kg都被强國團掃清了。老細介紹了呢個RM 35 ~ 1kg，話好正喎，但佢up唔出咩名，信佢啦，這個賣RM 48。

好正呀，唔比貓山王差，皮亁肉夠cream，甜度適中，帶點甘苦，幾個部位都唔同味，高水準呀，老細冇介紹錯。

食完榴槤行返酒店休息了，香港正在打風，明早要04:45起身去機場碰碰運。

馬來西亞•沙巴 – Day 5(完)

晨早坐RM 45的士去機場，Air Asia話因香港有颱風，所以班機要改期至中午12:00才起飛，死火，check-out了添，唯有坐返RM 30的士返酒店，放低行李再四圍行吓啦。

放低行李後，先去Gaya Street的 新中華茶室食早餐。旅遊書話，來沙巴若未食過呢度啲 斗亞蘭麵，就等如冇食過本地菜喎，試吓囉。

新中華茶室

可能剛開門，唔係太旺。

要了一碟斗亞蘭麵，大廚立即開鑊炒，落了巧多豬油啊！

釀五寶(RM 7.5) – 我覺得味一般，小太熊叫的，但佢叫完唔肯食，又唔準我食。

豬肉粥(RM 6) – 杰Tat Tat，味道算入得口嘅。

斗亞蘭麵(Tuaran Fried Noodle) (RM 6) – 即係雜肉豬油炒麵，勁重豬油，年過三十的人我就唔建議佢去試了。

新中華茶室唔多掂，又比旅遊書老點了。

下一站去 京那巴魯咖啡店

冇乜人，又驚比旅遊書老點。

牛什米粉(RM 6.8) – 都一般好味嘅。牛肉牛肚夠腍，米粉算香滑，湯底都OK。

食完嘢沿 咖啡博物館後面這條小徑行上 訊號山瞭望台

5min便行到上頂

再沿馬路向上行多5min便到 訊號山瞭望台

風景只係一般，唔係zip時間都唔來。

落返山想入 咖啡博物館坐坐

嘩！咖啡成RM 6一杯，貴一倍，又冇泠氣，最後冇飲了。

繼續無無聊聊四圍走，見呢間 成興茶室人多，入去試吓。

三色奶茶(RM 3) – 好味。

啦沙Laksa(RM 6) – 味OK。

無無聊聊行返酒店Hotel Sixty 3，去對面間 富源茶室嘆多件多士。

羅漢果冰(RM 2.5)；甘蔗桔仔冰(RM 2.8)；牛油咖吷包(RM 1.5) – 全部都好好味。

極無聊地行到10:30，返酒店Hotel Sixty 3攞行李坐的士去機場。

的士司機識廣東話的，佢話近三幾年亞庇的樓價升了成倍了，攪到佢地啲Local人都買唔起樓。估唔到，不單止香港，連遠在沙巴的亞庇都已靜俏俏被强國的黑錢炒起了. . . . . . . . .

11:00入到候機室，Air Asia又話原定12:00起飛的期又因香港颱風延誤到15:45了，唯有再呆等啦。

Air Asia又OK喎，唔駛錢每人派了2件雞、一杯薯容、一杯菜絲沙律同一杯可樂。

終於15:45起飛了，飛到香港仲見到天空的日落好靚添。

飛到香港上空，再在空中排了30min隊，才有位降落。今日行李出得比人更快，真係要讚一讚。

三日後又要出發去越南了，小太熊安排的節目實在太豐富。

補充資料 :

1.        RM 1兌 HK$ 2.44，百年價。

2.        Air Asia 香港來回 亞庇機票HK$ 2119。

3.        馬航內陸機由 亞庇來回山打根，票RM 115。

4.        在山打根作一日遊必需有車，我在Sepilok門口包了駕的士7.5hr去晒我Plan好的地方(Labuk Bay – Kampung Buli Sim Sim – 普濟寺 – 海上皇餐廳 – 山打根街市 – 機場)，司機開價RM 200，價錢合理，我冇講價就成交。

5.        由山打根市到機場約 25min。

6.        亞庇機場乘的士出 亞庇市只需10 – 15min，收RM30。如在00:00 – 06:00乘車，收RM 45。

7.        西必洛人猿保護中心 (Sepilok Orang Utan Rehabilitation Centre) 入場費RM 30，另加相機RM 10。售票處旁有免費大Locker。

8.        的士司機話“和生園” 是個黃昏市集，檔口約黃昏16:30開檔至20:00左右，由亞庇市行10min車便到。

9.        由於航機Delay了超過6hr，按我買的藍十字保險條文，我可獲HK$250賠償。Oh….. 幫襯見了藍十字保險足廿年，才第一次claim佢。我於是把登機証、颱風資料和機管局於網上公佈的航機延誤資料連同Claim Form寄給藍十字，表示飛機因颱風Delay了超過6hr，那知藍十字回信比我，話除非我能在60日內交出Air Asia的信件，內容必須註明Delay原因，否則我的索償無效。小那巴，明玩嘢，我嬲到立即寫信去佢總公司CEO度投訴果位玩嘢Manager，最後佢至死死氣賠返HK$250比我. . . . 挑，正賤種，人工錢都補唔返。

-----沙巴山打根 悠晴假期(完)-----