品味‧越南(1) – 重遊 河內(Hanoi)

越南河內(Hanoi)往老街(Lao Cai)的專貴列車 – Sapaly Express

沙霸係越南北部山區的小鎮，接近中國雲南邊境，所以當地的村民都同雲南見到的相類似。去沙霸通常係行吓山，Hea 吓Hea吓又一Day。由河內到沙霸要足10個鐘通宵火車。今次重遊越南北部，只為要在強國人大舉入侵越南之前，試盡越南Number One最豪的夢幻列車「Victoria Express」和精品郵輪「Paradise Peak」，否則強國人一用銀彈進攻越南，炒起晒啲價錢，我就再冇機會體驗越南Number One了。

品味‧越南 – 序

從沙巴返香港只過了4晚，又要出發往沙霸了。

「搞錯呀，又去？今次又去邊呀！！你唔洗做Ga？」同事問。

「交晒野la，學似你咁手脚慢咩？啲假未放晒吖嘛！今次去沙霸。」

「Arm arm唔係至响沙巴返來咩，又去多次？？」

「上次係馬來西亞嘅沙巴，今次係越南北部嘅沙霸，係唔同嘅。」

「曉. . . . . 又去啲未鬼聽過嘅地方. . . . . .」

越南沙霸(Sapa)和老街(Lao Cai)的位置

只係短短5日已玩晒越南Number One，小太熊計劃的行程簡直係完美。

Day 1

乘國泰早機去河內(Hanoi)，展開 河內一天美食之旅。晚上乘豪崋通宵火車Sapaly Express去中越邊境小鎮 老街(Lao Cai)

Day 2

火車早上到 老街(Lao Cai)後，轉小巴往 沙霸(Sapa)，入住Victoria Sapa Resort and SPA。早上和中午逛 沙霸市集和到Cat Cat Village。約15:00返回酒店游水、做SPA和食晚飯。

Day 3

私人包團到山區行山5.5hr，探訪三條村庒。黃昏乘小巴返 老街(Lao Cai)，晚上乘夢幻列車Victoria Express返河內。

Day 4

早上07:00到河內，包車前往下龍灣，12:15登上下龍灣最專貴的精品郵輪Paradise Peak，於船上午晚餐。

Day 5

早餐後，郵輪Paradise Peak於10:00埋岸，落船。從碼頭乘的士去下龍市行3hr連午飯，14:00乘包車前往機場，乘20:00機返香港。

品味‧越南 – Day 1

天未光就飛的去機場，乘國泰08:40 – 09:40班機往河內。

條咸蝦機司臨起飛至話通迅器壞了，要返停機坪修理10min，就這麽一攪，又出又入，Delay了80min。肯定係機司錯啦，出跑道前要check好晒嘛，因為佢失誤而浪費了300人每人70min，如果比Sam哥睇場實Fail爆佢。

<<河內>>

隻機近11:00才到河內，我在機場兌好錢後，乘Mai Linh Taxi直片 河內火車站(劃一收費VND 350,000)。

河內火車站 東面出入口

在火車站Lock好大背包後，開始 河內美食一日遊。2011年12月才到過 河內2日，仲有咩好行呢？當然試些上次未食過的好嘢啦。

從火車站行10min，到第一站Quan Au Ngon (Address : 18 Phan Boi Chau)。

餐廳好大，有好多小食檔，乜越南菜都有。

Quan Au Ngon在河內相當出名，當日爆滿，大部份係當地人。

等了5min才有位，而且像去 澳洲牛奶公司，又迫又趕。

凍咖啡(VND 36750) – 味道OK；可樂(VND 23,100)。

越式蔗蝦Banh Hoi Chao Tom Cuon Banh Trang (VND 110,250) – 幾彈牙，但蝦味唔夠，味一般但價錢非一般。

燒肉濱海Bun Cha(VND 50,400) – 豬肉味濃夠香口，唔錯。

當地人鐘意用米紙和菜包住肉來吃。

Quan Au Ngon食物質素中上，但又貴又迫，只賣名氣。

又行10min，到飲食男女介紹的Quan Com Pho (Address : 29 Le Van Huu)。

食飯時間都冇乜人，難道又中計. . . . . . . . .

Com Pho Spring Roll (VND 24,000) – 以為用自己店名實係好嘢，可惜只係條 沙律海鮮卷，仲要味道中下，害我又比小太熊寸. . . . .

小太熊：「話咗唔好叫呢味架啦，又叫啲唔好食嘅嘢，肥到死，你冇Quota架啦. . . 仲食喎仲食喎. . . .」

翠綠卷Bo Nuong La Lot (VND 60,000) – 飲食男女的推介。飲食男女話，以蒟醬葉包着牛肉碎來燒，入口肉汁豐腴，還帶陣陣獨特的香氣，唯一美中不足，是肉餡分量頗多，吃一兩條已有點滯。

真係男女多大話，我只認同最後兩句。碟嘢係幾古怪，但味道只係唔難食囉。

行多5min，返到人氣河粉店Pho Thin (Address : 13 Lo Duc Street)了。想話嘆返碗頂級的越式燒牛肉湯河，點知佢裝修呀。。。。好彩2年前食過，呢間真係好嘢來的。

行25min回到Quan Au Ngon附近的 河內希爾頓(Hoa Lo Prison)。

呢間唔係希爾頓酒店，係越戰時北越用來關押戰俘的地方。

越戰的監房

做戰俘實在慘過做契弟

資料話當年的戰俘逃獄就係穿過呢條渠，走了幾十人話喎。咁窄都過到，勁過莫斯科馬戲團。

部份被嚴刑拷問至死的戰俘遺照，好可悲。

又行10min，去到 還劍湖。

再入 古城36街，睇睇今日河內的民生。

古城36街和2年前分別不大，還是滿街櫈仔和電單車，只係價錢貴了好多。

上次幫襯過的Café Kam，味一般，今次唔飲了。

今次睇15:30開場的 水上木偶戲，人山人海。

全場滿座，前座每位VND 100,000，另加相機VND 20,000。

水上木偶戲幾特別，只有60min唔算好長，唔怕悶親。

小太熊出發前已話要吃返2年前的榴槤了，我用超強記譩在36街狂揾，終於比我揾返當日買榴槤位置的咖啡店，但榴槤小販檔就冇咗了。

小太熊食唔到越南榴槤好失望，唯有坐低飲杯貓屎咖啡回味吓。

越南凍貓屎咖啡Weasel(每杯VND 20,000) – 味道香滑濃厚，係我响越南飲過最好味的咖啡。飲完再買了250gWeasel咖啡豆(VND 60,000 per 100g)外賣。

夠鐘晚飯，又係 飲食男女推介，燒牛肉檬粉店Bun Bo Nam Bo (Address : 67 Hang Dieu)。

間鋪唔係幾好坐，非常熱。

Ga Tan (VND 55,000) – 店內名菜，唔知係乜便叫來試吓。原來係藥材春雞，苦苦哋唔好味的，我只食了4啖。

燒牛肉檬粉Bun Bo(VND 55,000) – 檬粉店另一名菜，飲食男女話，牛肉係即叫即燒，嫩滑得來又帶濃濃的牛味，配上滑嘟嘟的檬粉，炸蒜片、芽菜、椰菜絲、香草等配料和魚露同吃，味道複雜誘人。

又一男女多大話的鐵證，我試完後，評語係“唔覺牛肉係燒的，牛味只係一般唔太差，檬粉夠滑，加埋乜乜物物同吃，味道亦不見特出。”

小太熊直頭話：「食兩啖試吓算啦，咪浪費肚皮的空間呀，仲有幾檔未食。喂！仲食？唔準再食！」

放棄碗牛檬後，又行去飲食男女推介的另一檔 炭燒豬肉檬粉店Bun Cha Dac Kim (Address : 1 Hang Manh)。 

呢間人山人海，共有三層。

炭燒豬肉 – 內有炭燒豬肉丸和炭燒豬扒，有炭火香，肉味亦夠，好好味。

越式豬肉春卷 – 非常鬆脆，夠肉汁，豬肉味濃，係我在越南食過最好的春卷。

二人份量豬肉春卷檬粉(VND 180,000)；啤酒(VND 20,000)；可樂(VND 15,000) – 好食但好很貴。

還有2hr時間，繼續行街。

河內 聖若瑟教堂

最後一擊，去2年前來過的河內Number 2牛河店Pho Gia Trungu (Address : 49 Bat Dan Street)。

依然係人山人海

清湯牛腩河Tai Nam(VND 50,000) – 比2年前貴了25%，加幅驚人。我2年前的評語係「湯底清香鮮美牛腩味又香濃，同九記有得揮」， 今日明顯跌Watt了，味道淡口了些少，但仍然好好味。

仲夠時間，我記得河內只有這檔生果店有榴槤賣，過來買個還小太熊一個心願。

越南榴槤(VND187,000) – 每1kg賣VND 85,000，冇價講。味道都好好，比得上馬拉榴槤，但唔係太多肉，上火車食。

小太熊在網上和一間Agent買了今晚火車票，Agent話20:30至21:00去Hanoi Rendezvous Hotel (Address : 31 Hang Dieu)接我們去火車站，我就20:35去到等，點知個死Agent 21:10才蒲頭，害我打了幾個電話吹佢。

Agent帶了我們到西面大樓上車，攪到要同我跑返去東面大樓攞返今早Lock好的行李，死Agent最衰遲到，21:35才上到車，攪到差啲攞唔到行李，劣。。。

這列火車有很多卡，Sapaly Express只佔其中2卡。

Sapaly Express窄窄的走廊

客房唔大，但裝飾古雅，唔比Victoria Express差，有齊啤酒、氣水、清水和小食，車廂整潔，但廁所用亞公，唔太乾淨。

21:50準時開車了，當晚好好瞓。

  

補充資料 :

1.        USD 1兌VND 21,065(河內機場價)。

2.        國泰 香港來回河內機票HK$3275。

3.        越南單次入境簽証己加價到HK$500，香港的越南領使館攞。

4.        河內機場乘的士出 河內市，約32km，需時45~60min。可選乘Mai Linh Taxi，33km以下劃一收費VND 350,000，之後每 1km – VND 10,000，價錢貼了在車身。

5.        越南有好多的士公司，價錢架架唔同，一般4人的士每1km約收VND 11,200 ~ 13,200，我去了三次越南坐過2X次的士，暫時未遇過唔肯按錶收費的司機，85%司機都識路，情況比泰國、印尼、菲律賓、甚至吉隆坡更好。Mai Linh Taxi係值得推介的公司。

6.        從河內乘通宵火車往 老街，Scheduled車程係8.5hr，開車準時，但例遲1.5hr到埗。通常係一個火車頭拖住唔同公司的車卡行，較出名豪華的有Victoria Express (一定要係Victoria Sapa Resort and SPA的住客才可以坐，而且佢有乘客專用餐卡，特顯專貴)和Sapaly Express(房和Victoria Express差不多，但冇餐卡)。

7.        Victoria Express雙人房 河內來回老街，每位USD 336。單程每位都收USD 273，小太熊早2個月Book都買唔到去程票，只能買單程回程票，傷到入肉。

8.        Victoria Express唔係晚晚有餐卡，如果冇餐卡單程票每位減USD 23，雙程票每位減USD 40。預訂 4道菜Set Dinner每位VND 539,000，餐卡好靚，值得一試。

9.        Sapaly Express河內去老街，雙人房每位單程收USD 90，包一程河內市酒店到火車站接送及專人協助上火車。小太熊幫襯呢間Agent <resa@sapalytrain.com>，算OK有交帶。

10.    小太熊再幫襯<resa@sapalytrain.com>訂了私家車從 河內火車站到下龍灣及下龍灣到河內機場，兩程車共收了USD 145，收費合理。

11.    河內火車站有 東西2面出入口，2面都可出入，約人小心攪錯。

12.    河內火車站內士多有Locker出租，VND 20,000 for 4hr，VND 30,000 for 8hr，8hr以上另議。

13.    河內的物價比2年前又貴了十幾巴仙，和香港一樣，生活迫人。

---待續---