細味名城 葡萄牙(6) – 波圖(Porto) 之日與夜

葡萄牙波圖(Porto) 斗羅河(Rio Douro)

葡萄牙波圖市被 斗羅河(Rio Douro)分成南北兩岸，主要由 路易一世大橋(Luís I Bridge)串連，南岸是酒莊雲集之地，北岸是世界遺產Ribeiria舊城區，主要景點都藏於斗羅河畔，可徙步前往，基本上用2天是間便可以悠閒地遊遍整個波圖市，感受波圖(Porto)之日與夜。

狂熱時空 西班牙‧細味名城 葡萄牙 – Day 7

<<波圖(Porto)>>

今天07:00起床，開始波圖市內一日遊。

禾忟住的酒店位於Ribeiria區，附近全是民居和舊街窄巷，甚有本土特色。

由酒店樓下開始已經係景點，不斷穿梭窄巷往上行。

沿途盡見當地的民生

沿小巷行到上最處，望見佈滿紅屋頂波圖市全景，最高那座是波圖觀光塔Torre dos Clérigos。

今天第一個目的地會到餐廳“Santiago”食葡式三文治Francesinha做早餐。飲食男女話，波圖有4大名物一定要試的，就係”Santiago”的葡萄牙特色三文治Francesinha、餐廳“Conga”的葡式豬扒包Bifana、“Café Âncora d'Ouro”的波圖椰菜湯Caldo Verde和“Café do Carmo”的葡式碟頭飯Pratos。

飲食男女話又話，雖然Fancesinha在波圖很多餐廳都有得賣，但Santiago制的Francesinha最正宗和最好味，而且得獎無數添，所以今日第一餐便選擇從這裡開始。

Café Santiago

㸃解冇開門嘅? 飲食男女明明話開07:00的，成9日老點禾，現在開中午12:00，唯有食其他正嘢先，遲些再來。

跟著在波圖市閒逛，四圍食吓嘢Shop吓ping。

藍磚教堂Capela das Almas

這麵包店有新鮮麵包，買了一大個今晚做晚飯。

小太熊在街市買了些車厘子食，又大粒又多汁，香港很少買到咁靚。

全波圖市最美味的豬扒包店Conga

飲食男女話，Conga制的葡式豬扒包全城最好味，一定要試咁話喎。

葡式豬扒包“Bifana em Pao”(€2) – 豬扒其實係豬成肉片，以啤酒和辣椒煮成的醬汁熬煮，香辣味美，豬仔包索滿味汁非常好味，算是禾在葡萄牙吃過數一數二的美食。

芝士豬扒包(Sande de Lombo Assado com Queijo)(€2.5) – 包身和豬扒都較乾，味道OK，但和上邊那個差好遠。

歐洲十大Café之一“Majestic Café”，剛剛開門客人唔多。

室內裝飾古樸又高檔，天花和牆身部雕晒花，櫈是皮制的，坐得人好舒服。

橙汁250ml(€3.5) – 罐頭貨，唔掂；咖啡(€3) – 只係行貨；葡撻(每件€2) – 剛開舖已經是凍的，淨睇賣相已經衰到冇朋友，食落冇蛋香冇奶味，皮又硬，只有甜味，流到漚，是葡萄牙的國恥。

呢間Café完全係食個環境，只適宜求其飲杯嘢坐佢大半個鐘。

繼續無聊四處逛~波圖的街頭藝術

波圖的復古電車，上高落斜穿梭於古城舊街。

波圖大會堂Câmara Municipal do Porto

教士教堂(Clérigos Church)和波圖觀光塔(Torre dos Clérigos)

觀光塔附建在教堂旁邊，用同一個出入口。

上觀光塔要比€3，行樓梯上，可以見到波圖市全景，值得去看看。

觀光塔頂上，可以望見 粉紅色的波圖市全景。

遠望見 波圖大教堂(Porto Cathedral)

從塔上落返地下，到旁邊的教堂Clérigos Church行吓。

睇見耶穌真係死得幾慘，但佢啲雞肉真係有王小虎咁近。

古典書店Livraria Lello

樓高2層的書店裝潢華麗，如中世紀的宮廷，尤其中間的旋轉木梯最搶，比巴黎的莎士比亞書更加浮跨。

藍磚教堂“Igreja da Nossa Senhora das Carmelitas” – 內部冇咩特別，但外牆的花磚壁畫卻令人驚嘆。

在教堂對面，有飲食男女推介的波圖另一名物 椰菜湯(Caldo Verde)。

飲食男女介紹Café Âncora d'Ouro的椰菜湯，找了很久，Google Map明明顯示在教堂對面，對地址亦冇錯，但就揾唔到呢個名，地址上的餐廳改了名做“Café Piolho D'ouro”，但見室內和本書張相完全一樣，便入去一試。

Café Piolho D'ouro內有波圖獨有的餐湯Caldo Verde。

中午時候都冇客人，只得禾忟幫襯。

波圖椰菜湯(Caldo Verde)(€1.3) – 只係普通菜湯一碗，湯底加了薯容，椰菜切得很幼細，加上一片風乾肉腸，味道其實唔錯的，作為地道名物，值得一試。

<< Matosinhos >>

飲完湯，乘地鐵往波圖市郊的漁港“Matosinhos”(€1.5 Zones1-3票價，車程30min)。在“Mercado”站下車，那邊有平價新鮮的海鮮，而且滿街都係食店，甚有地道風味。

海鮮食店佈滿街道，但食客唔太多。

飲食男女推介的BBQ海鮮餐廳“Restaurante Rei Da Sardinha Assada”，全區只有這裡爆滿，等了20min才有位。

House White Wine(750ml)(€9.5) – 清香帶微果味，餐廳的推介，最啱送BBQ海鮮；番茄沙律(€1.5)和青椒沙律(€1.5) – 番茄和青椒都又甜又多汁，勁開胃，必吃。

炭燒沙甸魚(€7.5) – 話係當日捕獲的好嘢，沙甸魚味道很濃，肉厚有肉汁，火候到家，好正。

炭燒魷魚(€8) – 魷魚味濃帶炭火香，肉厚又有咬口，送白酒冇得頂。

呢餐好正，值得專程乘車來食。

<<波圖(Porto)>>

乘地鐵返São Bento站，行路返酒店，路過波圖大教堂(Porto Cathedral)，順便參觀一下。

波圖大教堂(Porto Cathedral) 外觀都幾宏偉

內部又係冇咩特別，唔入都冇所謂。

回酒店前又在河邊行一陣，真係巧靚架。

結婚相都有人專程到河畔影

Ribeiria區求其一間Café都好靚，飲杯嘢只係€2至€3，其實好平。

時間尚早，在 里貝拉廣場(Praça da Ribeira)食埋個Tea才返房，這廣場都係世界文化遺產的一部分，黃昏時會有人不斷拉濶表演。

Ribeiria區 里貝拉廣場(Praça da Ribeira)

煙火腿(€6) – 偏咸且肉味不夠香；麵包(€1) – 唔駛order自動送上；橙汁(€1.5) – 罐頭貨；生啤200ml(€2) – 幾抵飲

今晚唔出街食飯了，返房一邊欣賞日落一邊食今早買的麵包和車厘子。

天黑之後又落樓下行陣夜街，波圖夜景實在百看不厭。

在房間內就係望住呢個夜景，㸃捨得瞓呀。

今晚瞓6hr，明天一早乘火車到 斗羅河的上遊，在河上揚帆傲航三日。

補充資料 :

1.        波圖市內一般可乘地鐵和市郊火車，車票共用，共分11個Zones，穿過越多Zone收費越高，但主要景點集中在斗羅河(Rio Douro)兩岸的C1和S8兩個Zones，一般買最平的Zones 1-2 (€1.2)便可。

2.        火車/地鐵票每張€0.6，不適用於 市內電車(和里斯本唔同)。車票只可以按不同車程的全費儲值，例如儲2程(Zones 1-2) 加1程(Zones 1-4)，但只24hr內有效。拍Card時會自動扣最後入數的那一程車費。

3.        波圖市的地鐵冇人查票，但火車一定有查票。

4.        從波圖市乘地鐵往市郊的漁港“Matosinhos”車程30min，要買Zones1-3票，每位 €1.5。

---待續---