這是最好的 南澳洲(5) – 醉駕南澳酒鄉 Barossa Valley

南澳洲葡萄酒之鄕Barossa酒區內的酒店 – Barossa Shiraz Estate Hotel

Barossa Shiraz Estate Hotel是南澳洲葡萄酒之鄕「Barossa」酒莊區內一間平房式酒店，酒店只有4間平房，位於酒莊Kies Family Wines對面，被葡萄園包圍着。

我今次會住酒店內最古樸的一座平房The Residence，屋內非常之大，而且極有澳洲傳統的氣氛，很值得專程來住一晚。

這是最好的 南澳洲 – Day 6

<<袋鼠島>>

今日好唔開心，因為晨早便要離開袋鼠島了。

早上06:30起床，煮個麵食完後，驅車往附近入返滿啲油，跟著便去機場還車了。今次首次自駕3日算很順利，全無發生特別問題，很幸運。 

袋鼠島機場

泊返架車到出車的位置，都泊得OK啦。

乘10:30-11:05 REX Regional Express回 阿得萊德。

今日行程好趕呀，要去Barossa踩單車遊酒莊。小太熊特別從網上訂了一部車到阿得萊德機場接機，用最快所時間去Barossa。

專車從 阿得萊德機場去Barossa，收費AUD$130。

專車先車我們到Central Bus Station，站內有Locker，放好大行李後，今天可以輕裝上路去踩單車。明晚才回來取回行李。

<<Barossa Valley>>

12:45到達單車店Barossa Bike，位於Barossa的Nuriootpa區。

今天會從單車店開始踩車南行，經過Barossa Visitor Centre後直往澳洲三大紅酒品牌之一的酒莊 Jacob’s Creek食午餐，跟著繼續南下，沿途入酒莊試酒，最後踩到今晚的酒店Barrosa Shiraz Estate Hotel，日落前單車店會到酒店收車。這樣租一日單車每輛AUD$50。

揀好單車，看看地圖，出發。

剛轉出馬路口便是名牌酒莊「Penfolds Wines」，香港大部分超級市場都有賣佢的酒，但今天太趕時間了，只能在外看看，冇時間進內試酒，可惜呀。

沿單車徑行，全部是酒莊和葡萄園。

穿過火車軌道繼續前進。

約40min便踩到Barossa的市中心，這裡開始沒有單車徑，有時行人路多人便要落車推或是出馬路踩。

小鎮內有不少教堂，還有間鬼屋，幾有趣。

Barossa Visitor Centre 這裡也有單車租的，但是沒有收車服務。

過了市中心後全是單車專用徑，而且沿途全是葡萄園和酒莊，比得上法國波爾多。

約14:30到達酒莊Jacob’s Creek，這是區內最大的酒莊，最值得去。

Jacob’s Creek的葡萄園非常壯觀

訪客中心門前種滿不同品種的葡萄樹，亦介紹了每種葡萄的名字和特質，很多在香港都有得賣架。

這座是餐廳和試酒廳，靚到.....太過份。

今日成功避開了蝗蟲，只有少量人在試酒。

餐廳好靚啊，毯廳和小太熊包了場，嘆返餐私人午餐。

先來2杯紅酒，左邊是 2012 Jacob’s Creek Limited Release Semillon(AUS$8) – 果味清純簡單，Menu話用來送燉豬肉最啱；右邊是 2013 Jacob’s Creek St Hugo Barossa Valley GSM(AUD$14) – 層次較為複雜味道亦較濃，Menu話用來襯牛扒的。

禾忟每人要了一款前菜和一款主菜。

前菜 Duck Tortellini(鴨肉意大利餃子)(AUD$16) – 汁㡳加入了蠔肉和蘑菇芝士，又香口又滯，餃子皮夠淋，饀料亦唔錯。

前菜 Braised Keyneton Pork Belly (燜豬腩肉)(AUD$18) – 豬肉味一般，唔算夠淋，過得去。

主菜 Spinach and Chive Potato Dumpling (菠菜香蒽薯仔麵團)(AUD$26) – 味道和口感都很古怪，叫錯了呢味。

主菜 Beef Fillet (烤牛扒)(AUD$38) – 叫medium但佢烤到medium well，肉質偏鞋口，牛味一般，最出色是伴碟的紫菜，我全部食晒。

食完飯再在酒莊內四圍行吓，16:00離開，繼續上路去試酒。

沿著單車徑繼續行，仍然是葡萄園，百看不厭。

沿途還有 教堂呢。

踩呀踩呀，耐唔耐都遇到單車友，都唔係完全冇人踩車的。

16:30來到另一大酒莊Kellermeister Wines

Kellermeister Wines有小食供應，真想買一盤坐在咁靚的花園送酒，但剛食飽真係食唔落了。

酒莊內有十多款餐酒可以免費試飲，試完唔買佢哋都冇所謂的。

求其㨂了4款酒試，味道很好而且價錢幾平，如果有車的話一定買2支。

由於禾杯杯清，午餐時又飲了2大杯，開始有些Wing Wing哋，要醉駕了。

離開時已經17:00，所有酒莊都關門了，於是直飛酒店，早到早享受，遲到就蝕幾舊。

又路經一座小教堂，天主實在無處不在。

17:15到酒店Barossa Shiraz Estate Hotel，外圍的葡萄園巧大呀，巧開仙呀。

今晚住這座獨立屋 The Residence，咁大間屋禾忟2個住晒呀。

獨立屋The Residence(包自煮早餐和雪櫃大量啤酒氣水，每晚AUD$330) – 屋內有1廳1睡房，另有浴室和廚房，全部都非常大。

屋後的自家葡萄園

推開大門便是長走廊，左邊是大廳，右邊是睡房，直行是廚房。

廚房極大，廚具齊備，早餐放了在雪櫃，幾時煮都得。

浴室又係超大，還有個雙人按摩浴缸。

大廳像古宅，今晚在這裡食晚飯。

睡房一樣咁舒服。

呢2隻嘢最喜歡嘆住啤酒小食看日落。

酒店還有其他平房，但就冇咁靚了。

日落葡萄園，嘆住啤酒小食來睇，如果日日都咁樣過就好了。

今日晚餐原本預算出街食，但見到雪櫃內的早餐非常豐富，足夠食2餐，於是決定留在屋內嘆，今晚禾煮，小太熊做大王。

禾煮的All Day Breakfast創意早餐 –  有鮮奶、橙汁、牛油蜜糖新鮮麵包、煙肉，番茄和雞蛋三味(煎蛋、烚蛋和炒蛋)，麵包有質感有麵包味非常好食。

今晚小太熊好開心，因為佢唔駛做。

  

補充資料：

1.     今天入油AUD$33。前後4天在袋鼠島自駕800km，共入油AUD$121。

2.     乘REX Regional Express從 阿得萊德來回袋鼠島Kingscote每位HK$800。

3.     包車由 阿得萊德機場往Barossa，車程90min，收費AUD$130。

4.     在Barossa租單車一天(19:00還車，可以叫單車公司去酒店收車)收費AUD$50。

5.     Barossa有完善的單車徑，踩單車漫遊酒莊試酒十分方便，但小心醉駕。

6.     如果可以10:00出車去多3至4間酒莊試酒便Perfect了。

7.     建議Download Apps - Maps.me，是離線地圖，清楚顯示了Barossa區的單車徑，防止迷路。

-----待續-----