馬來西亞 榴槤飄香(完) – 魚米之鄉 適耕莊

馬來西亞魚米之鄉 適耕莊 街頭壁畫

適耕莊 是馬本西亞一條盛產稻米和海產的村莊，有魚米之鄉的稱號，距離吉隆坡只有100km，適合即日來回一天遊，再順道去 雪蘭莪河睇埋螢火蟲。無線以前套 單戀雙城也有在這𥚃取景。

馬來西亞 榴槤飄香 – Day 4

繼續上一篇Day 4行程。

<<適耕莊>>

食飽飯之後去海邊的 熱浪沙灘(Pantai Redang Sekinchan)行吓。

熱浪沙灘(Pantai Redang Sekinchan) – 單戀雙城的場景，陳展鵬在戲裡面把這塊牌改了做「我❤適式」。

這沙灘其實好流，水唔清沙唔幼天唔藍，不過就有很多小食，還有些特色木棚屋。

熱浪沙灘旁邊的 許願樹，是這裡最著名的景點。

行完沙灘返市中心逛逛，在郵局附近有些特色的壁畫，當然冇檳城咁靚啦。

跟著去稻米田又行吓，稻田內有幾個景點，司機都很熟路，帶我們逐處去。

稻米展覽館 – 展出稻米由種植至收割整個程序，每位入場費RM 5，送一包米。

每位入場者都送一細包米，不過小太熊話一定唔好食唔肯煮。

參觀完稻米館後有禮品部，有些小食可以試試。

白豆蔻汁(RM 3)；糙米紅豆粥(RM 2) – 2樣都幾好味道。

華仔芒果園(Mango King) – 稻米館附近的芒果園，種了幾棵芒果樹，出產馬拉青芒果，可以坐底食。

這種青芒果熟了之後依然是青色的，不過好甜。

買完芒果之後，可以叫老闆切開即食。

樹上熟青芒果(RM 7.5) – 750g重的大芒果，好香好甜，不過梗係呂宋芒香甜啲啦。

芒果沙冰(RM 5) – 消暑解渴的特飲，用了大量芒果肉攪成。

南天宮 – 位於稻田中古廟，門口又是一棵許願樹。

阿嬤的家 – 是一間懷舊雜貨手信店，內𥚃的裝飾懷舊，唔幫襯都可以入去參觀。

大量懷舊零食，好多年冇見過了，有山楂餅、復活蛋糖、白兔糖.......每一款都係細個時成日食的。

眼鏡朱古力2排(RM 1)；印水紙吹波糖(RM 1) – 忍唔住買了這2樣，當懷舊一吓啦。

阿嬤的家對面是 阿公的家，可能佢哋離婚了，要分開住。

<<瓜拉雪蘭莪>>

時間差不多了，先回到 天空之鏡附近食飯，然後再睇螢火蟲。今晚棟了 瓜拉雪蘭莪的餐廳 港尾海鮮樓。

港尾海鮮樓隔離有一間 古廟，食飯前順便行一行。

港尾海鮮樓(Restoran Makanan Laut Bagan)

揀了河邊位，View係唔錯，但入黑後激多蚊，針到我變豬頭。

小太熊想試海鮮，佢話呢度近海，海鮮應該又平又靚喎，可惜事實唔係咁樣，這𥚃的海鮮唔算很平，亦冇咩靚貨。

今天沒有大蟹，只有些約9兩重一隻的細蟹，另有些本地魚，求其叫了2味餸。

黑椒炒肉蟹仔(RM 98) – 共有3隻，1kg重，即是大約7蚊港紙一兩，蟹肉普通甜，黑椒汁本來很好味，但廚師重手落了太多糖，攪到太甜味道怪怪的。

非州魚(Ikan Talapia)(RM 21.1) – 游水貨，大約400g重，魚肉很甜，豉油亦很好味，呢味算是平靚正。

今晚19:00便天黑了，食完飯便立即去睇螢火蟲，今次會到 雪蘭莪河伴的Kampung Kuantan Fireflies上船，那裡是由馬拉人營運的，比較接近大自然，不過時間只有25min，而且超級多蚊。

乘小木船睇螢火蟲(每船RM 53) – 最多可以坐4人，沿河觀賞螢火蟲，整個過程只有25min，非常多蚊。

小艇沒有摩打，河上十分寧靜，螢火蟲不算十分多，全部停在樹上像聖誕燈飾那樣閃吓閃吓，其實都幾流，而且被蚊針到豬頭咁，有些後悔來這裡。

睇完螢火蟲，司機車我們到附近一座印度廟 Sri Shakti Devasthanam Temple參觀。

Sri Shakti Devasthanam Temple – 非常華麗的印度廟，很值得一到，內部不準影相。

要回程了，因為今天唔算食了太多嘢，還有Quota，於是叫司機車我們去吉隆坡SS2的榴槤檔，然後放車。

<<吉隆坡>>

SS2榴槤店 – 上個月來時很少人，但今晚就全店滿座，因為現在是榴槤旺季，價錢比上個月平了一倍。

彭亨 貓山王只賣1kg - RM50，上個月仲賣緊RM 98，所以上次冇食。上次吃XO要RM50，今天只賣RM28。

由於幾抵食，於是又眼寛肚窄，叫了2個。

XO榴槤1.4kg (RM 39.2) – 夠新鮮，帶微苦和微甜，質感夠Cream，但欠了濃醇的味覺，不及上個月在這𥚃吃的XO好食。

貓山王1.6kg (RM 80) – 苦味和甜味明顯比XO濃烈，口感黏喉細密，比福哥榴槤園一般的貓山王更佳，好好食但不算是最頂級。

太飽了，盡了全力也吃盡了四份一。

食完Call Uber 回酒店，車費RM 18 距離14km。

馬來西亞 榴槤飄香 – Day 5(完)

今天Last Day冇乜節目，原本打算朝早上天台泳池游水都取消了改為瞓覺，因為早2日已經游過了。

瞓夠便起身在酒店餐廳食早餐，這𥚃的早餐不過不失，勝在夠平

食完早餐後小太熊臨時加了個節目，就係行過隔離的「鎰記中西菜館」食早餐......又食？早知唔買酒店份早餐啦。

鎰記中西菜館 – 位於一幢舊建築物，裝修較懷舊，早餐時段都係食傳統馬拉早餐，小太熊話佢好高分的，不過很多人都話佢的食物已經跌Watt。

咖啡(RM 2.12) – 算幾有水準，香滑濃郁，肯定比香港的貴咖啡好飮；奶茶(RM 2.12) – 品質算上成，茶香及奶香味道均𧗾，夠香滑；牛油咖央多士(RM 3.18) – 咖央醬不夠椰香，牛油只是行貨，好彩片麵包都好食，整體上都OK，只是不算高水準。

魚片粥 (RM 6.89) – 粥底OK，但魚片很流，魚肉完全冇味，唔係好掂。

食完嘢返酒店休息一會，10:45 check out，小太熊Book了11:30做SPA，SPA店距離酒店11km，Call Uber去車費RM 11.5。

Urban Retreat Spa – 做了90min Aromatherapy Massage，每位RM 134，手勢都幾好，不過間舗太細冇得沖身只是用濕毛巾替你抹身，做完有少少油淋。

吉隆坡最後一擊，又返去Alor Street附近食，今次試「海外天大飯店」。乘Uber約12km，收費RM 16。

海外天大飯店 – 是中式飯店，伙記全部講廣東話，啱晒我。

筍殼魚 – 每1kg - RM 280，非常大條，每條大約800g，是這𥚃的名菜。

清蒸筍殼魚(800g) (RM 223) – 魚肉脆口又嫩滑，味道有些像石頭魚，廚功一流，豉油好靚，好食。美中不足是魚味始終偏淡，沒有了從前筍殼魚獨有的味道。

义燒 (RM 30) – 是這𥚃的另一名菜，少年食神形容這义燒是死前必吃，我就話佢係吉隆坡必食，覺得佢外皮非常香口而且肉質很腍，味道有點像臘肉，很冶味，是另類的極品义燒，下次一定再來食。

吃完飯夠鐘去機場了，又Call Uber，60km路程車費RM 75。

去到機場小太熊又話要食，行入了這間麵店，佢真係戰鬥力驚人。

檳城亞參叻沙(RM 22.9) – 算是幾好味，湯底有沙典魚香粉亦很滑溜，不過太貴唔抵食囉。

Latta (RM 13.9) – 普通咖啡，當買個位坐。

17:55乘港龍機回香港了。

今餐又有Häagen-Dazs雪糕食，係港龍至有。

補充資料 :

1.)      RM 1 = HK$1.885 (永恆找換公司)。

2.)      07:30從吉隆坡作起點，先去瓜拉雪蘭莪「天空之鏡」，中午到「適耕莊」，晚上回到 瓜拉雪蘭莪的 雪蘭莪河睇螢火蟲，約21:30回到吉隆坡，包車14hr行220km收費RM550，可用Line聯絡Alex : alexkam216。

3.)      吉隆坡的士按錶收費，但現在還會遇上黑的開天殺價，遇上的話落車便可以。Uber一般比的士平20%，但經常會加價或冇車，但總算多個選擇，是好事。

4.)      從吉隆坡市中心乘Uber去KLIA 1，60km路程車費RM 75。

-----馬來西亞 榴槤飄香(完)-----