馬來西亞 榴槤飄香(2) – 貓山王之鄉 福哥榴槤農場

馬來西亞彭亨州 福哥榴槤農場出品 – 貓山王

根據流傳的資料，貓山王榴槤的故鄉位於 馬來西亞彭亨州(Pahang)，是 福哥榴槤農場園主 陳來福研植的品種，第一棵貓山王榴槤樹在1986年開始在福哥榴槤農場種植，7年後第一次有收成，至今樹齡亦只有32歲。福哥榴槤農場會於 貓山王盛產的季節時，在農場外圍的 雙溪吉流新村一間民宿外舉辦 貓山王放題，每位只需RM 106便可以在1hr內任開任食 福哥農場出品的 貓山王，可以完全放任忘情地把貓山王食到見到都驚，從此可以戒掉貓山王。

馬來西亞 榴槤飄香 – Day 3

<<武吉丁宜>>

今天繼續幫襯Alex包車9hr，早上09:00從酒店The Chateau Spa & Organic Wellness Resort出車，約18:00回到吉隆坡，全程行約 210km，收費RM 400。

早上在酒店食早餐，這是酒店唯一的餐廳，格調都相當高檔，在這裡吃一份Set Dinner要RM 198。

早上天氣清爽，我們便坐在户外食。

這酒店乜都話自己有機，連早餐的果汁都係。一坐下職員便問要咩果汁，都幾好服務。

我飲西瓜汁，小太熊飲紅蘿白汁。

有機水果和煙三文魚都OK好味。

主食 煎蛋都煎得很用心，生熟度啱啱好，不像太興那樣鼻涕一般。

小太熊Order的另一主菜 Pancake，很滯呀。

我Order的 咸蛋廋肉粥，晨早食啲粥個胃會舒服啲。

食完早餐去健身室舉幾吓幫助消化先，因為小太熊Book了今朝10:30到 福哥榴槤農場食 貓山王放題，好變態呀，不斷食。


<<勞勿>>

司機準時09:00便來到酒店接我們，從酒店去榴槤園足足75km，要1.5hr車程。

10:30去到勞勿市郊 「雙溪吉流新村」一間民宿，這民宿位於 福哥榴槤農場附近，今年和農場合辦了貓山王放題，每人RM 106便可以在1hr內任食貓山王。

 太早了，連埋我們亦只有2枱客共6人。

10:50左右從果園送來了第一籃榴槤，品質的上落差都唔細。

職員話遲少少會再送來大量 貓山王。現在先開些給我們食，唔滿意可以退回再開另一個，食到滿意和足夠為止。

先開了2個約1kg的細貓，果肉不算深黃，味道很濃郁甘苦外皮亦乾爽新鮮，可惜肉質稀疏欠缺了頂級榴槤肉的綿綿細密黏口感，比昨天果園吃的明顯低一層次。

食了1件，覺得味道雖然很好，但老遠來到這裡，始終希望食到世界上最頂級的貓山王，於是退了一個。

職員於是揀了一會，再開一個，今次這個就正了，有昨天果園95%咁好食。

極品貓山王 – 果肉呈深黃色，外皮乾爽皺紋非常吸引，入口軟滑Creamy，味道苦中帶甜，口感十足，呢個好靚。

儘管如此，始終這不是我食過最靚貓山王，有些失望了。於是再開了幾個，品質再沒有那麼好了，只是似我退了貨的那種品質，又有些比退貨的好些少.......

再退了一個，但開極都是差不多，啲貨本身不是頂級，開晒都冇用啦。

最後開了個約1.5kg，叫做比較好，但也比不上剛才那個最好的。

很快便吃了成粒鐘，滯到返胃，此時才有大量貓山王一車車送到，福哥個仔 福仔亦已經到場親自開榴槤，但我們已經再食唔落了。

福仔親自揀選榴槤，相信應該會比我們剛才那些靚，不過冇我份了，失望。

總括來講，這場貓山王放題吃的不是最頂級的榴槤，極其量也只算是高級榴槤，比不上昨天在Raub Durian Orchard吃到的世上最美味貓山王，下次唔食褔哥了，一定返去Raub Durian Orchard再食。

<<文冬>>

食完榴槤之後，坐40km車去到 文冬(Bentong)，在文東市逛逛街食啲特色地道嘢。

文冬(Bentong)市內又係典型的馬拉小鎮Look，兩層高的建築物加些地道小食。

陳雪糕店(T.A.K. Ice Cream Corner) – 吃雪糕和鉋冰的專門店，在文冬都算有名氣，經常滿座。

鉋冰ABC (RM 4.5) – 名字古怪不過幾好食，雪糕很幼滑而且帶有班蘭味，紅豆粟米和涼粉都正，可惜天氣太熱鉋冰溶得極快。

鉋冰T.A.K. Special (RM 5) – 牛奶雪糕很香甜濃味，伴上的生果幾清甜，食落好味又冇咁滯。

小太熊的戰鬥力確係無窮，食完雪糕再食文東的 人龍豆花店。

全新文冬豆腐店 – 是區內的人氣豆漿豆花店，經常要大排長龍。

阿姐已經算快手快腳，不過都唔夠行來排隊的客人快。

豆漿(RM 2) – 豆味香濃唔係太甜，唔錯 ; 豆腐花(RM 1.6) – 豆味幾香但密度嫌太高，欠了頂級豆腐花那種入口細嫩幼滑感覺。

文冬姜糖(RM 2) – 在豆腐店隔離舖有得賣，文冬盛產姜，這款姜糖是硬糖，姜味濃度適中不十分辣。

接著逛逛文冬的街市

最受歡迎的竟然是榴槤檔，檔檔都圍滿人。

貓山王1kg 賣RM 35，抵食喎，而且見佢開了幾個都很深黃色和新鮮，剛才在福哥㫓的有七成冇佢咁靚，早知在這𥚃任食算了。

只是中午時份，大部分商店都關門了，只剩下街上的小販，不知道是否因為今天是星期日呢。

行完文冬之後，驅車23km到另一榴槤果園Jimmy's Durian Orchard，是區內另一盛產貓山王的果園。

Jimmy's Durian Orchard

果園內的榴槤樹掛滿了貓山王。

小太熊話，Jimmy's Durian Orchard的Facebook寫了營業時間每天11:30至17:00，之前問過Jimmy話旺季時星期六日不需預約，Walk in便有貓山王食，昨天小太熊再Whatsapp了Jimmy再confirm佢時間，但Jimmy睇完Message之後冇回覆。

我們下午約14:30入到榴槤園，但見唔到有榴槤賣，亦冇人招呼，另有一車從星加坡自駕來的遊客見冇榴槤便離開了。我們坐著等了20min，終於見到果園內有人，便問他為什麼今天唔見賣榴槤。

職員話：「榴槤？冇啦。今朝一早08:00便開始，唔駛12:00就賣晒啦，明天再來睇睇有冇啦。」

嘩！呢個Jimmy真係大L支嘢，明明網上話11:30至開始，現在改了08:00又冇update資料，WhatsApp confirm 佢又唔出聲，不知所謂，佢出聲便今早順路先來這裡，下午才去食福哥榴槤。

今次冇得食又唔覺得失望喎，返正今朝已經食到怕了，慳返。接著再坐車35km到今天最後一個景點 山中茶原，是 文冬附近山區內的一座小木屋餐廳。

  

山中茶原Tea Restaurant Janda Baik

餐廳位處山中，旁邊是樹林和一個小湖。

人氣都算旺盛，好彩剛剛有幾枱埋單，否則都要等位。

普洱 (RM 5.8)；陳年普洱 (RM 17.4) – 茶葉超流，同平日茶樓的Cheap茶葉一樣流，而且普洱和陳年普洱的味道完全冇分別，呃錢。手工五穀烏龍茶饅頭3個 (RM 8.1) – 饅頭很軟熟好食，不過沒有茶味，只是普通饅頭。

茉莉茶葉煮鄉村走地雞半隻 (RM 58) – 是招牌菜，又係冇茶葉香，而且食雞冇雞味，只有醬油和雞油香，肉又鞋，同雪藏雞有得揮。

<<吉隆坡>>

最後坐39km車回 吉隆坡的酒店Hotel Stripes Kuala Lumpur，會連續住2晚，輕鬆啲。

今天17:00放車，約了司機明早07:30在酒店接我們，包車玩都幾舒服，如果有4個人Share就平很多了。

  

Hotel Stripes Kuala Lumpur – 是今年開的新酒店，在電視塔附近，價錢很平，日間每小時都有免費接駁巴士來往 阿羅街附近。

酒店的地下餐廳都幾High，小太熊棟酒店真係叻。

雙人房(連早餐)每晚HK$568

房間內送了些零食，有山楂餅和陳皮梅，正呀，而且雪櫃有免費汽水啤酒供應。

天台的泳池酒吧 – 在雪櫃攞了些飲品上來一邊游水一邊飲，歎到19:00日落才走。不過這泳池只有10個位，時常爆滿。

游完水沖個涼換件衫又再外出搵食，記得多年前在「大樹頭蘇記」吃過超級好食的 牛肉炒河和生蝦麵，一直記住想再食，就今晚去啦。

在酒店門口Call Uber，但Call了成20min都冇車接單，於是出大馬路截的士，㸃知第一架就截正架黑的，上車講好了目的地後便開車又唔起錶，我叫佢起錶佢才說車費收RM 25。嘩！搶咩，收貴幾倍，on9，我即刻叫停落車。

截下一架便遇上正常的士，上車講了目的地便自動起錶開車，根本唔駛我叫，去到目的地都只是RM 7，剛才那部係黑的。

臨出發前睇旅遊書，話「大樹頭蘇記」對面開了間「「蘇記仔」，那裡的 牛肉炒河做得和「大樹頭蘇記」一樣咁出色，所以今天決定食晒2間

蘇記仔 – 是「大樹頭蘇記」細佬開的，當地人都多數推介這裡的牛河。

店內人氣並不頂盛，唔通已經大跌Watt?

開放式廚房，可以睇住師傅炒粉，都好香噴噴。

吉仔話梅冰(每杯RM 5.3) – 酸酸咪咪勁好飲，正過黃亞華那杯。

牛肉炒河(RM 15) – 河粉質感煙韌順滑完全保持水準，但牛肉冇味，汁底油口而且勁重味精，整體上已經不算是一碟會令人回頭再幫襯的牛河，失望。

在「蘇記仔」只吃了牛河，留肚過對面「大樹頭蘇記」吃 生蝦炒麵。

大樹頭蘇記 – 今天是星期日晚都冇乜人，比對面的「蘇記仔」更少客，有古怪，上次平日晚上來也人山人海的。

日本細啤(RM 13) ; 意米水(RM 2.5)

生煆炒麵(RM 50) – 中蝦是雪藏貨，完全冇味肉質亦硬實，麵底又硬又斷碎又油口完全冇味，從前那無敵的蝦汁底也沒有了，換來味精汁底，完全是垃圾一碟，比剛才的牛河更差10倍，可以正式De-list這裡了。

失望的一餐，世上又少一檔令人回味的餐廳，真可惜。

Call Uber 回酒店，車費只是RM 5.8，比正常的士更平。

補充資料 :

1.)      RM 1 = HK$1.885 (永恆找換公司)。

2.)      09:00從「武吉丁宜」的酒店The Chateau Spa & Organic Wellness Resort作起點，包車9hr，約18:00回到吉隆坡，全程行約 210km，收費RM 400。可用Line聯絡Alex : alexkam216。

3.)      福哥榴槤農場會於 貓山王盛產的季節時，在農場外圍的 雙溪吉流新村一間民宿外舉辦 貓山王放題，每位只需RM 106便可以在1hr內任食 貓山王，不過質素上落差很大。必須電話預約。

4.)      吉隆坡的士按錶收費，但現在還會遇上黑的開天殺價，遇上的話落車便可以。Uber一般比的士平20%，但經常會加價或冇車，但總算多個選擇，是好事。

---待續---