金門 慈湖 – 國共內戰時留下的軍事遺跡，防止共產黨戰艦登陸的防衛陣勢。
金門縣是台灣的一個縣，轄區包括金門群島中的金門島、烈嶼及代管的烏坵等島嶼，通行閩南話，首府是 金城鎮。國共內戰期間，國民軍受到總統的「毋忘在莒」訓令而死守金門，得到最後勝利，共產黨始終無法取下這小島，最終令這小島可以保留大量歴史遺跡。
台灣金門 賀新歲 – Day 4
<<金門>>
今天是最後一天留在 金門，中午14:00便要乘船返回 廈門。
今早又係07:30食早餐。
早餐有 燒餅和雜菜湯，味道麻麻哋。
金門雞蛋糕 – 好香蛋味而且質感一流，密度高像海綿一樣咁軟熟，非常好食的蛋糕，連小太熊都大讚。
食完早餐老闆替我們叫了部的士往 慈湖， 跳錶NT 280，附加費只收了我NT 20。
慈湖 位於金門島西北，是一個以 慈堤圍海而成之鹹水湖，與廈門對望，觀景平台前方海灘佈滿反登陸用的陣勢。
慈湖 海灘佈滿反登陸用的陣勢
軍事遺跡 慈湖三角堡
慈湖三角堡 從前是前線基地，防止敵軍從海上入侵。
慈湖三角堡內的圖畫........激似旅行青蛙寄回家的相。
安全守則真攪笑「嚴禁老兵半夜叫新兵起床」，原來啲老兵咁變態。
打不到不打？？咁唔駛打啦，唔怪得打輸。
慈湖三角堡旁有KBike站，在這𥚃借單車到附近遊一遊。
湖下一營區 – 距離慈湖不遠處的另一軍事營區。
接著踩車去 雙鯉湖濕地。
雙鯉湖濕地 – 白色那座是 濕地自然中心，介紹金門地區的自然資源，隔離是一座供奉關公的廟宇。
濕地自然中心內的茶座，面向 雙鯉湖濕地，在這𥚃坐坐休息一會兒。
牛奶雪條(NT 20) ； 鮮奶茶(NT 40) – 味道麻麻，茶很淡奶味亦淡，當買位坐下休息都算幾舒服。
休息完又起行了，往附近的 北山古洋樓進發，沿途會經過一些寺廟。
北山古洋樓 – 是金門最具代表性的戰火遺跡，建築物佈滿密密麻麻的子彈孔。
古寧頭戰史館 – 古寧頭戰役是 金門最慘烈的戰役，1949年10月1日中共國成立後，解放軍大舉攻佔福建及廣東各大城市，三萬多國民黨軍隊唯有退守金門，其後解放軍追殺而至，兩軍在古寧頭展開大戰， 最後解放軍戰敗，3900人被俘。
古寧頭和平紀念公園
李光前將軍廟
最後向 金門大學進發。沿途又要踩出大馬路，雖然車不多，但一般都開得很快，有壓力。
整段路亦有不少上斜位，踩到冇氣要落地推車。
金門大學 – 以前是 金門技術學院，現已升呢為大學。
最後安全回到 金城鎮的巴士站，原來旁邊有個的士站，還完單車便乘的士回民宿，跳錶NT 165，另收了NT 35新年附加費。
回到民宿休息了一會兒，老闆今次車我們去碼頭了，冇上次放飛機咁衰。
乘13:30的船返回廈門 五通碼頭，船費每位NT 750。
<<廈門>>
14:00便回到廈門，剛步出碼頭便見到有的士，二話不說便上車先。Maps.me顯示從由碼頭到「厦門海景千禧大酒店」可以行廈門島中心的公路，只有20km，車費大約￥44，但司機行了沿海的環島公路，行了33km，跳錶￥70， 換了10年前我實小到佢上天，不過現在老了，收晒火，而且就算20km收￥70也很平，所以冇發圍，算了。
雙人房(不包括早餐)每晚HK$1500 – 小太熊話平日只是HK$700左右，新年特別搶錢。
在酒店放下行李後，立即出動，沿著「思明南路」往「中山路」方向行街。
小太熊路過 一品豆花時，突然很有興趣話要試試。
芋圓豆腐花(￥10) – 豆腐花很香滑有豆味，芋圓很煙韌，不過芋頭味唔係咁濃。
廈門市的建築物很洋化，和上海市的南京步行街十分相似。
滿街放滿共享單車，阻住條路。
小太熊另一選擇 廟東排骨
麻辣雞翅(￥12 - 3隻) – 炸得香脆肉嫩，辣味粉幾正，好食。
藍氏鐘樓肉粽 – 見到很多客，便進內試吓。
牛肉麵(￥28) – 麵好好食質感好靚，湯㡳有藥材味有點似肉骨茶，牛肉勁腍但冇乜牛肉味。
蟹黃湯包(￥28) – 包皮唔夠煙韌很易令包內的湯漏晒出來，有蟹味味道唔錯，整體來說可以合格。
在中國的大城市差不多都有一條華洋文化交雜的老街，如北京的王府井大街，上海的南京步行街，廣州的北京路，而廈門也有一條類似的老街 - 中山路，大街上滿佈華麗的歐陸建築，而內街則是貧窮的強國舊樓。
小街內很多食店售賣海產，大蟹龍蝦乜都有，不過賣相唔多新鮮。
中山路內街 – 和香港的舊區一樣，樓又破又舊而且佈滿加建物。
中山路大街 – 又闊又乾淨，兩旁全是商店，有很多試食，試完都食飽了。
行完中山路，沿著 思明北路行10min，來到小太熊今晚的目標「醉壹號海鮮大排檔」，小太熊話佢在網上的評分巧鳩，啲大陸仔對佢讚口不絕，所以今晚要來嘆返餐好嘢。
去到時大約17:00，還未滿座唔駛等位。先上樓上坐底，再落返地下點菜。
炒麵線(￥20) – 味道過得去，冇咩話特別好食唔好食。
廈門薑母鴨(￥58) – 加了很多薑但薑味唔重，鴨像是雪藏貨冇乜肉味，唔值得試。
清蒸黃臘倉(￥98) – 游水貨，魚肉嫩且有油香，是條靚倉魚，不過蒸過火，豉油淡而無味，廚功差劣，浪費了條靚魚。
蒜容蒸象拔蚌(￥56) – 蚌肉完全淡而無味，原隻蒸完全冇清走那些核凸的黑色內藏，油和蒜頭都好差，不知所謂。
小太熊話我點的菜全部都唔好食，十分不滿，但唔關我事喎，根本廚功又差醬油配料又流，實難食啦，仲收咁貴，在腥港實等摺埋，大陸仔在大陸原來吃這些已經是最好了，難怪離開大陸便發晒癲搶購物資。
小太熊在街上買了個大芒果，我就買了廈門地道小食 土筍凍，帶回酒店食。
廈門有一種地道小食叫「土筍凍」，土筍是一種生長在海邊的軟體動物，學名叫「星蟲」的環節軟體動物(貌似肥胖的蚯蚓)，土筍經過熬煮後蟲身上的膠質融化於水中，冷卻後就成了啫喱狀的「凍」，在廈門市四處都有得賣。
今晚又可以早些瞓了，明天晨早機回香港。
台灣金門 賀新歲 – Day 5(完)
今朝05:15起床，05:45 check out之後，酒店職員出外幫忙截的士去機場，16km距離的士跳錶￥43，真平。
回程機07:30起機飛，又再衝上雲霄。
08:50回到香港了，可以休息一天明天才返工。
補充資料 :
1.) 港龍航空 廈門來回香港機票每位HK$1800。
2.) NT 3.68 = HK$1 ; HK$100=￥80.9 (永恆找換公司)。
3.) 廈門的士按錶收費，￥10起跳(包括首3km)，之後每1km跳￥2，超平。
4.) 金門的士分大細車，七人的士NT 120起跳(只包括首1km)，之後每1km約NT 25；四人的士NT 100起跳(只包括首1km)，之後每1km約NT 20。所有的士要收新年附加費，每程NT 50。
5.) 遊金門可以乘巴士/的士再配合KBike單車，單車在主要景點都可以借車和還車，地點可以參考KBike的Apps，借用時輸入11位數字的電話(我輸入了852XXXXXXXX)，再加信用卡資料便可以借用，每卡最多借4輛車，但要Check清楚每個站仲有冇車或還車位。
6.) KBike單車質素唔算差，而且有車頭燈和車鎖，十分方便。
7.) 在金門踩單車主要是踩出馬路，在大馬路踩車都幾驚，但一般的台灣司機對單車也十分禮讓，盡量會保持一定距離。
8.) 金門的水頭每30min一班船來住廈門五通碼頭，船程30min，每位NT 750。
土筍凍我唔夠膽食
回覆刪除望落係幾核凸，不過食落口感都OK。但好奇怪，完全唔見有人買卻四圍都有得賣。
刪除全厦門最正係小眼鏡大排檔，老店最好，海鮮小炒平靚正，每日排大隊，早D到。
回覆刪除謝謝你的資料，下次試呢間😃
刪除這裡也行咗一陣, 太商業味, D 野貴又唔太好食; 正如你講, 來過香港台灣掃街, 才知乜野係好味
回覆刪除大陸的地方都係銅臭重了些，欠了些美味和人情味。
刪除