檳城放題 食到跳制(1) – 寶盛園 榴槤放題

檳城寶盛園 – 從樹上新鮮掉下來榴槤

寶盛園(Bao Sheng Durian Farm)是位於檳城羅浮山背的榴槤果園，從 George Town 出發約30km，因路窄多彎和經常塞車，車程要成粒鍾。據老闆說，寶盛園內有百多棵榴槤樹，7成都超過 30歲，每年約五至六月是盛產榴槤的高峰期，是味道最好的季節。園內最靚的品種是 紅蝦(Red Prawn)，第二是 葫蘆(Hor Lor)，這裡出品的榴槤是我吃過的榴槤之中最神級的，令人經常回味。可惜今次雖然在最旺的季節來，但估唔到品質居然下降了，再吃不到之前三次來吃到的神級榴槤香味，而且人山人海不像以往那麼清靜，有點失望。 

檳城放題 食到跳制 – Day 1

今次4天假期不用請假，今天要全日返工，放工立刻乘地鐵去機場，再在機場的大家樂吃了份焗豬扒飯，晚上乘港龍航空到吉隆坡。

航機都算準時，20:40起飛，來回機票每位HK$1593。

檳城放題 食到跳制 – Day 2

<<吉隆坡>>

零晨00:15降落 吉隆坡KLIA Terminal M，極度多人排隊入境，而且海關人員也非常散慢，等了40min才能在01:16成功入境。

今天機場外很冷清，不像數月前的同樣時間那麼人山人海，由於要05:40在KLIA Terminal 2乘Air Asia飛機到 檳城，所以先找交通去到Terminal 2再算。

KLIA的指示牌很差，找了很久也找不到由Terminal M去Terminal 2的24hr Shuttle Bus，火車又已經停駛，等的士時又有人說的士嫌太近唔肯去，正當唔知點算之際，特然看見那Shuttle Bus經過的士站，我們便立即追著部車跑，幸好最後01:45終於上到巴士了，順利去到KLIA2。

還有大約3hr才check in，原本我打算搵個位坐到夠鐘便上機，咁啱落車冇耐便見有機場酒店KLIA2 Capsule Transit，小太熊好想伸直休息，所以便幫襯佢瞓一會。

  

KLIA2 Capsule Transit – 在KLIA2地下位置，提供棺材房，環境尚可，價錢偏貴。

棺材房床位每6hr每位RM84，可以在公共浴室沖涼，不過浴室很窄。

沖完涼都02:15了，只可以瞓大約2hr，一陣便要乘05:40機去 檳城。

一瞓落床就舒服到唔想再起身，話咁快又到了04:30，迫住起床了。快快手Check out後往樓上的Departure Hall，約04:45行到去Air Asia的自助Check in機出登機証，奇怪部機話我已經過鐘，出唔到登機証，嚇到小太熊以為我冇計時差睇錯時間過了鐘仲On99，但吉隆坡和腥港明明牡時差架喎？？？

死火！冇登機証點上機呀，牡辦法下唯有很心急叉驚青地排長龍去Air Asia的Counter問咩事，排了15min，終於問到了，職員話我們班機飛05:40，所以04:40前要出登機証，過了鐘機票便作廢。

真是他媽的，咁都得？坐了幾十年飛機第一次知道有這些規矩，一向在世界各地乘內陸機也是早1hr到機場便可以了，明屈人錢啫....賤得佢。算了，猛虎不及馬拉蟲，今次你威，只好再幫你買張下班飛 檳城的單程機票。最後在Counter用RM512買了2張單程機票去 檳城，仲貴過原本的來回機票，好很賤呀。。。

<<檳城>>

飛機08:05起機，09:05便到 檳城，好彩冇影響到行程。到埗後發現Uber已經完全退出馬來西亞了，想用Grab來Call 車但又失靈，今次又要坐返的士了。

在機場買了Coupon Taxi 出George Town，約18km路程車費RM 44.7，7年都冇加價。上車後直去今天第一站，那裏有檳城最好吃的福建麵。

  

無名茶室 – 位於George Town的Jalan Perak 126號，內有檳城最好味的 福建麵。

今日是星期六，所以人山人海，等了好耐至有位有得食。

豆蔻冰(左)(RM 1.5) ; 薏米水(右)(RM 1.5) – 兩杯的味道也很普通。

大福建麵(RM6) – 4年前只是RM5，今次是第3次幫襯了，今次同樣咁好味，完全冇跣Watt，湯底仍是帶有鮮甜的蝦頭鮮味，又濃又鮮，正到暈。吃過很多檔福建麵，仍然覺得佢最好食，下次再來。

食完麺想截的士，但是完全冇車，迫住要行30min去下一站 愉園茶室。

KOMTAR Tower(光大大廈) – 檳城最高的大廈，是政府行政中心和購物商場，高250m，第五次來檳城都冇入過去，亦冇乜興趣。

愉園茶室 – 檳城的老牌茶室，每次都要來吃碗 亞参叻沙。

第4次幫襯「愉園茶室」了，每次都爆滿，但卻又每次都有位。

愉園茶室招牌 亞参叻沙(RM5.5) – 湯底的沙典魚味很香濃，另加入大量香料和菠蘿肉，帶㸃微酸，瀨粉很滑，好好味道。兩年前只是RM4.5。

檳榔律馳名潮州煎蕊紅豆霜 – 愉園茶室外是檳城極有人氣的甜品檔，4次來都係排長龍，但去得極快，唔駛10min便買到，買完可以攞入愉園茶室食。小太熊話老細很寸，和他講廣東話佢唔聽，迫人疏㷛東瓜。

潮州煎蕊(RM3) – 冰涼消暑，有珍多冰用的綠色粉仔加埋少量紅豆和粟米粒，奶味夠香，而且麥精味非常濃郁，幾過癮的。下次一定要記得食 紅豆霜。

吃完之後在門口等的士，等了15min才有車，記憶中以前這處很多的士，今天好像特別少。下一站去2km遠的1926 Heritage Hotel Penang，司機開價RM 10，成交。

的士很快便去到今天吃午餐的地方1926 Heritage Hotel Penang。

到埗後覺得這位馬拉司機很老實，便問他包車的價錢，他表示每小時RM 30，最少3hr，亦可以按錶收費，於是約他個半鐘後回來接我們去下一站，今天逐程計錢。

  

1926 Heritage Hotel Penang – 古宅改建成的酒店，內有一間海南菜的名餐館 懷鄉居，小太熊話葉Sir都話正喎。

懷鄉居 – 在檳城幾有名的 海南菜館，但今天有乜人氣。

夏枯草(RM3.3) – 冰涼消暑，多多都飲得晒。

海南蟹肉春卷(RM 6.6) – 外皮太厚不夠鬆脆，餡料味道偏淡一般，冇乜蟹肉，大條到2個人都食唔落，吃剩了一半，早知唔叫。

海南亞參石斑魚(RM 54.6) – 魚肉重350g，肉質脆嫩幾鮮味，亞參汁底勁香沙典魚味，酸酸微辣十分冶味，正。

海南雞飯(RM 17.85) – 雞肉很滑雞味也足，油飯亦幾香，雞油中有點班蘭味，很有特色的一味菜。

吃完飯的士司機準時來接我們去下一站G Hotel Gurney，4km路程收費RM 10，都很合理。

DANAI SPA – 位於G Hotel Gurney的平台，今天Book了在這裡做1.5hr SPA。

這裡的格局幾高檔，環境令人很舒適，做SPA前先送一杯薑茶。

1.5hr推油按摩每位RM 260，價錢在檳城算是貴了，按摩的力道和手勢都好，下次可以再來。

接著司機又準時在門口等我們，今次去 寶盛園的路程約28km，司機話車費RM 70，也可以按錶收費(首1km - RM 6，然後毎100m或等21s - RM 0.2，00:00 - 06:00再加50%)，我㨂了按錶收費，忘記了今天是星期六會大塞車，15:42 - 16:45超過1hr才入到 寶盛園，咪錶車費剛好RM 70。

16:45來到 寶盛園，門口冇乜變，只是泊在這裡的車多了很多，而且超多強國客。

在外面已經見到大量榴槤掛在老樹上，老闆話今年豐收啊。

客廳還是和2年前差不多，這裡還是有很多老外食客幫手，來過Working Holiday。

現在是豐收的旺季，今日人山人海住了約三十人，果園內的客房全Full了，來了這裡4次，第一次遇上這麽迫人。

今次幫襯了 寶盛園的榴槤放題套餐，包一晚日式清水房(公共厠所浴室)、早午晚三餐榴槤放題和早晚正餐，每位RM 300。

原來我和小太熊最遲到，很多強國客15:00已經準時到，食完第一場放題了，只剩下我們和另外兩母女日本客，老闆仔便過來用英文招呼我們，他的廣東話、國語、馬拉話和英文都好掂。

老闆娘揀了5個榴槤給我們4個人試，佢話味道要由左至右淡至濃地食，像試酒一樣。

從左至右的品種分別是 1.)Ganja ; 2)30年老樹D15 ; 3)50年老樹D15 ; 4)青皮 ; 5)紅蝦。

榴槤長帝(Ganjau) – 外皮乾爽，肉厚creamy，果肉甜度中等再微微帶點奶油甘香，適合初學人士，好食。

榴槤D15(30年老樹) – 口感綿密略帶粘性，味道甜中帶微微甘苦， 唔錯的一個榴槤。

榴槤D15(50年老樹) – 口感明顯比30年老樹的出品更加綿密和粘喉，味道濃甜迴甘，層次感分明，是個高品質的榴槤，老闆娘特登給我們比較不同樹齡出產相同品種榴槤的分別。

榴槤 青皮 – 爽脆外皮包着軟滑如綿的果肉，入口即溶，濃甜中帶點點輕微酒香，部分位置略帶甘苦味，令人滿意。

榴槤 紅蝦 – 果肉呈橙紅色，細核，味道獨特香氣十足，甘苦濃甜中帶點鮮花清香，屬寶盛園出產的榴槤之皇，可借那陣花香味完全比不上以往3次在這裡吃的紅蝦。

4個人吃了5個榴槤都足夠了，今晚還要吃，要留肚。平心而論這5個榴槤的品質也很高，只是不屬神級榴槤，比以往在這裡吃的榴槤明顯低一級。

吃完榴槤之後老闆開始帶著30名今晚留宿的客人參觀果園。

其實我都聽佢講過幾次了，行了一陣便自己返房先。

寶盛園現在已經有很多客房了，客人亦多，遲Book真係會冇房的。

這兩間是最舊的房，Share一個小泳池，2011年第一次來已經存在。

左邊小屋是5年前建成的大房，我2014年住過，原本有獨立大泳池，現在常常有其他客走落去玩，變了公用泳池 ； 右邊是10間日式清水房，共用厠所和浴室，近年才建成的，2016年來時還未有。

我住上層的 日式清水房，景觀比下層差很多，房內只有一張床褥，冷氣很夠強，私隱度甚低。

沖完涼在房內休息了一會兒，很快又到19:30晚飯時間了。

廿多個住客加埋老闆一家人便在大廳吃飯。

寶盛園自製的 荳蔻汁，味道很特別，好好味架。

晚飯是自助形式，有雞有魚有菜味道都唔錯，但吃少少算了，留肚吃榴槤。

飯後老闆就用國語招乎強國客，老闆仔就用英文招乎我們和2位日本客。

因為榴槤通常是早上從樹上掉下來的，今天吃到現在已經冇乜好嘢留低了，今次首先揀了2個相對較靚的貨先食。

榴槤 D15 – 口感和味道都和早前吃的30年老樹出品差不多，好食但已沒有驚喜了，因為好多都好過佢，日本客吃了一小件便冇食了，全部差不多我食晒。

榴槤 白玉油 – 第一次吃這品種，果肉奶白甜度較低口感幼滑，奶酥和甘苦味交替夾雜，味道香濃醇厚，十分之正。

食完之後問仲有冇好嘢，老闆娘說只剩下D15，要就開多個。我們都冇乜興趣了，食來食去都係D15，又唔係頂級貨，明天才再吃。

老闆這時侯拿著個榴槤不斷撞到地上，佢話撞多幾次榴槤的味道便會更佳。

老闆介紹這個 D15表面的白點是種寄生蟲，想入侵進榴槤內但失敗，證明這榴槤很健康抵抗力強，果肉必靚，點知一開下來，有一件肉爛了，其餘部分都冇乜人肯食，就這樣便散場，明天07:30繼續食。

檳城放題 食到跳制 – Day 2

今朝06:30起身，自己到榴槤園內行吓，看看今朝多唔多貨。

榴槤樹下都織了繩網，接着從天而降的 榴星錘，否則很容易命都牡。

在榴槤園四處行，沿路見地上和繩網都有樹上掉下來的榴槤，非常驚險。

這個榴槤跌在地上，在這𥚃行街街十分兇險呀。

越行越驚，不如散水算了，返上去大廳食早餐先。

07:30開始有嘢食，早餐是工人在附近茶室買的外賣，毎人一份，但好多人都唔食，小太熊就揀了2份。

魚蛋湯河 – 湯㡳很鮮甜，河粉差點比得上怡保的出品，又滑又有米味，魚蛋都幾彈牙，有水準。

福建麵 – 湯底帶有鮮甜的蝦頭鮮味，又濃又鮮帶點微辣，比檳城很多地方都好食。

雖然很好食，但每碗只吃了一半便停了，等食榴槤。

大約08:00左右工人在榴槤園執了百多個榴槤車上來，所有人都出來了，老闆一家人便揀榴槤，開些今日最好的貨給一衆客人品嚐。

榴槤 小紅 – 奶酥味道特出，大甜中帶點微苦，略嫌質感稀疏水份較重，但整體上也屬上品。

接著老闆介紹這個D15，他說榴槤最佳的食用時間是剛從樹上掉下來，這些榴槤人口之後會令舌頭有一些“麻”的感覺，而且味道會最濃郁，隨著掉下來的時間越長味道便會冇咁頂級。

榴槤 D15 – 比昨天的50年老樹出品更佳，不論口感或味道層次均更勝一籌，濃甜中帶點牛奶酒香，而且令舌頭有小陣“麻”的感覺，這一口榴槤是這次行程最好食的，可惜半分鐘已被搶清，手慢些一啖都食唔到。

榴槤 D18 – 超熟透的果肉看似稀質其實黏喉十足，外皮爽脆彈牙口感一流，甘苦微甜味道濃郁，大口咬下再慢慢細味令人齒甲留香，又係手慢些已被搶清光。

榴槤 長柄 – 皮薄肉厚金黃，奶味濃郁，口感軟滑，適合初學人士的靚嘢。

榴槤 紅蝦 – 果肉呈橙紅色，細核，乾脆外皮包着軟滑如綿的果肉，味道甘苦濃甜中帶有濃濃花香味及輕微酒味，味道獨特香氣十足，層次感豐富。

試完這幾款便只剩下次一等的D15，冇乜人食，老闆娘見食剩晒都唔再開了。平心而論，以上幾個榴槤雖然未屬以往的神級，但也算是最頂級了，只是頂級貨就只有那麼幾個，廿多人分食得實在很不爽，未夠的話只有次一等的D15任食。

記得以前來的時候吃神級榴槤吃得飽到投降，今次有些失望，小太熊都話下次可能不再來了，去返 榴槤德食得仲過癮。

約了的士司機11:00來接我們，我們10:50行出大門口已見司機在等，可以早些離開，今天會包車6hr，每小時RM 30。

補充資料 :

1.    港龍航空香港來回 吉隆坡機票每位HK$1593。

2.    Air Asia吉隆坡來回檳城機票(不包行李)每位HK$560。

3.    Air Asia吉隆坡去檳城單程機票(不包行李)，即場買飛每位RM 256。

4.    永垣找換店RM1=HK$2.02。

5.    藍十字保險2人共HK$197。

6.    檳城包的士RM30/hr (3小時起)。

7.    檳城的士大多數不肯按錶收費，在George Town極短途的叫價都要RM10至RM20，成交價多次來都未試過低於RM10。

8.    檳城的士按錶收費價 :

首1km - RM 6；100m or wait 21s - RM 0.2；00:00 - 06:00加50%

9.    檳城機場乘Coupon Taxi到George Town RM44.7，00:00 - 06:00 add 50%，7年冇加價。

10. Uber已全面退出馬來西亞，在大馬call車現在只可以用Grab。

11.寶盛園的榴槤終於跌Watt了，今年雖然大造，但品質整體上比以往3次幫襯(2011、2014和2016年)時差了，吃不到最頂級的榴槤。

---待續---