環遊韓國 春光無限(9) – 鎮海櫻花 • 春色無邊

韓國鎮海軍港櫻花節 余佐川(여좌천)

鎮海(진해) 是韓國東南端的港灣城市，距離釜山只有80分鐘的車程。鎮海是韓國櫻花最密集的城市，每逢櫻花盛放期間，鎮海均舉辦「鎮海軍港節(진해군항제)」，原本出入嚴格管制的鎮海士官學校會開放給一般遊客參觀，還可參觀部分艦艇和試穿海軍服。4月的鎮海市是櫻花世界，有 餘左川1.5km櫻花夾道的溪流，慶和站800m櫻花盛放的鐵路和 安民嶺十里櫻花路，也可以登上 帝皇山公園山頂的鎮海塔俯瞰鎮海市。鎮海軍港節 由2018年4月1日至10日舉行，今天正正是4月1日，是櫻花盛放的第一天。

環遊韓國 春光無限 – Day 9

<<釜山>>

今朝06:00便要起床，還是好眼訓呀，唯有一陣在地鐵和巴士上再盡量瞓多些，否則今天由朝行到晚可能會冇精神。

06:32乘地鐵Line 2從 海雲臺(No.203)直接去到 沙上站(사상)(No.227)不是用轉車，車程45min，T-money車費₩1500。

行出 沙上站便是「釜山西部市外巴士客運站」，在這𥚃乘巴士往 鎮海，車費每位₩5100，平時每20min一班車，在 軍港櫻花節期間就一班接一班完全唔駛等。

釜山西部市外巴士客運站(沙上)(Busan West Bus Terminal)(부산서부버스터미널)

<<鎮海>>

乘07:30的巴士，去到「鎮海市外巴士客運站」只是08:40，要開始今天忙碌的旅程了。

鎮海市外巴士客運站(진해시외버스정류장) – 在這𥚃落車，今晚亦會在這裏上車走，所以現在先買定回程票，走時唔駛再排隊買票。

從巴士站行去  余佐川，中途已經見到小食攤開始營業，好多嘢食啊。

中途路過一間夜總會，估唔到鎮海咁細的小鎮都有咸嘢睇的。

余佐川(여좌천) – 全長1.5km的小河，兩岸的櫻花今天滿櫻了，密密麻麻的好靚呀！

小太熊好鐘意櫻花架，佢仲話日本的櫻花靚過呢處喎，佢要求太高了，咁靚櫻花都唔滿意，唯有下次去返日本睇啦。

余佐川兩岸有很多小販賣零食，兔兔綿花糖好得意呀，點捨得食呀。

格仔餅( ₩2000) – 今朝未有時間食早餐，便買給小太熊食，味道都係比唔上腥港咁好。

去到尾段的七彩傘海好壯觀呀，加上滿櫻真係靚到不得了。

韓國女生們就不停自拍

鎮海內水面環境生態公園(진해내수면환경생태공원) – 入口處在七彩傘海旁邊，順便人去行一轉，但冇咩特別，普通公園一個。

行到 余佐川尾段了，在這𥚃右轉不段行上山，預算用2hr經過山頂去到 慶和站。

經過 長福山公園(장복산공원)後繼續不斷往山上行，不久便上到高處，沿途有些寺廟和春花。

寺廟장복산삼말샤

這段山路像是麥理浩徑，都很濶又易行，不過大熱天時都行到標晒大汗。

山上的梅花都是盛放着，比櫻花更加鮮豔。

山頂最高處的觀景台，在這裡可以看到鎮海市的全景，不過距離太遠唔係咁好睇，反而 帝皇山公園那較近的鎮海市全景仲靚。

從觀景台上經小路不停落山，不久便落到十里櫻花公路安民嶺。

安民嶺(안민고개) – 這是一條十里櫻花公路，沿著馬路兩旁都種滿了櫻花樹，現在盛放得像櫻花傘一般連陽光也擋著，人流很少，沒有車經過時十分之寕靜。

櫻花多到連樹身上都長滿。

從 安民嶺直接行到 慶和站，要穿過一間民居的斜坡，從私人斜坡上的石极落山，不過屋主很好人，聽到我們從腥港來便放行，還喝住花園內的惡狗，否則要多走2km才能去到 慶和站了。

慶和站 只是鎮海市慶和洞的簡陋車站，已經沒有火車會駛過，現時鐵道兩旁長滿延續不斷的櫻花樹，於 櫻花節期間成為一個大景點。

慶和站櫻花路(경화역벚꽃길) – 鐵路兩旁除了開滿櫻花，還有很小食亭。

小太熊話行了半日山只是今朝吃了半件格仔餅和飲了些我帶去的水，想餓死佢咩喎。今天行程豐富吖嘛，決定一陣行完 慶和站才正式坐底食飯，現在飲杯嘢先。

櫻花特飲(₩3000) – 季節限定的櫻花飲品，真係有2朶櫻花的，酸酸哋溝了梳打水，味道OK架。

慶和站 – 路軌上放了一列火車頭做裝飾，超級無敵勁多人啊，真的插針都唔人。

現在決定到 鎮海火車站對面的韓式餐廳吃 鱈魚湯，約有3km距離，幸運的在 慶和站外看見有免費接駁巴士，便走了上車，點知櫻花節期間大塞車，短短路程塞足1hr，慢過行路，真係吹到啤一聲。

韓式餐廳 – 今早路過鎮海火車站時見佢很多人，是鱈魚湯的專門店，決定試試。

鱈魚湯(동래탕)(Pollack Soup )(₩14000) – 價錢很貴，只有2小塊鱈魚，味道不見特出，呃錢，早知唔食呢間。

食飽飯便慢慢行路去 海軍士官學校。

海軍士官學校 – 多人又多車，櫻花樹種滿路上，不過唔靚，早知唔去呢處。

排長龍上了這戰艦看看，都冇咩睇，行到隻狗咁有些on9。

在 戰艦旁邊上了架巴士出返大門口(每位₩1000)，諗住可以行少2km，點知架巴又兜大圈又塞車，攪了足足45min才行到果2km，真係唔得佢死。出返大門口之後便行去附近的 帝皇山公園。

帝皇山公園(제황산공원)於1998年建成，9層高的鎮海塔屹立在174m高的帝皇山山頂傲視整個鎮海市，遊客可選擇行樓梯上山頂或是乘搭登山䌫車。

帝皇山公園(제황산공원) – 山頂便是9層高的鎮海塔。

登山䌫車 – 今天超級多人排隊，因為趕時間唔坐了，行樓梯上山。

從  鎮海塔頂欣賞 鎮海市，靚過中午在山頂多多，小太熊話我安排得唔好，帶佢去些又辛苦又唔靚的地方。

差不多日落了，行返去 余佐川等開燈飾睇夜櫻。

鎮海火車站(진해역) – 今天已經第三次經過了。

回到 余佐川，趁著有時間又吃些小食先。

烤雞肉串( ₩4000) – 大大串不過雞味較淡，反而啲醬汁有辣有唔辣幾好味。

辣醬炸雞(₩5000) – 味道唔錯但粉太厚，同樣是雞味較淡，用來頂肚餓還可以。

有些情侶就幫襯街頭藝術人像畫，想人畫到佢地好似劉時鎮同姜醫生咁正囉。

18:45余佐川夜櫻正式開始了，七彩傘海首先亮燈，靚到暈呀。

七彩的燈飾不斷在河上閃動，影照櫻花變成不是同顔色，好正呀。

小太熊很喜歡這些 星星燈飾和鹿仔燈飾。

接近鎮海火車站的一段路上的櫻花非常茂密，加上彩燈仲靚過日頭。

行到20:10左右，快步行返工巴士站，回釜山的巴士一班接一班，等了10min便上到20:40班車回 沙上了，再轉地鐵，回到海雲臺差不多23:00。

今天揀了在酒店對面的40年老店吃 豬肉湯泡飯。

豬肉湯泡飯専門店밀양순대돼지국밥 – 1978年已經開業，豬肉湯泡飯是韓戰時期發明的美食，因為當時糧食不足，韓國人就利用美國軍隊烹調時扔掉的豬骨來熬湯泡飯，補充營養。時至今日，這道食物演變成釜山獨有的傳統美食。

豬肉湯飯(돼지국밥)(₩8000) – 便宜又美味的湯飯，豬肉味幾濃，好食。

土豆豬骨煲(감자탕)(₩27000) – 超大煲，豬骨味道和豬肉差不多，好味但唔抵食，這該每人一碗豬肉湯飯就最Perfect。

補充資料 :

1.  ₩1000 兌 HK$7.38 (永恆找換公司)。

2. 釜山的公共交通都可以使用T-money，在所有梗有一間喺左近的便利店7-11或GS25都可以增值。

3. 從 釜山西部市外巴士客運站(沙上)開往 鎮海的巴士，在軍港節期間會一班接一班地開出，車費₩5100，車程70min。

---待續---