布吉島天然養生保健酒店 Amity Wellness Retreats
Amity Wellness Retreats是一間專門為住客提供排毒療程的小型酒店，位於布吉島南部Rawai Beach，只有11間房，最多容納22人。酒店會為每位入住的客人安排不同的饍食排毒療程，包括有全份量素食(Amity Raw Cleanse)，半份量素食加果汁(Amity Intermittent Fasting)，全流質健康飲料(Amity Juice Cleanse)或清水辟穀(Amity Full Fast)等療程，配合每日洗腸、瑜伽、冥想和按摩，達致身心淨化的境界。
素食養生•布吉修行 – Day 3
繼續上一篇Day 3行程。
從Banyan Tree乘的士去Amity Wellness Retreats，37km收費THB 1000。路上遇到大塞車，短短路程用了足足1.5hr，去到已經14:00，有房check in。
職員帶我們去房間放下行李後，便帶我們行一圈，介紹酒店的設施。
全天候泳池可以隨時落水浸個夠，90%時間都是冇人的，大部分客人只喜歡曬太陽。圍繞著泳池有6間房，私隱度較差，要長期落窗簾。
按摩房 – 每次只可以容納2人，共3位按摩師輪著由朝按到晚，其中一位按摩師的手勢比得上Banyan Tree，力度適中按位準繩，另一位也算很好，只是有一位嘛嘛哋，只有死力沒有技巧。
紅外線桑拿房(FAR Infrared Sauna)，每日15:00～18:00開放。
活動室 – 毎日的瑜伽、冥想和講座也在這𥚃進行，使用率很高。
閲讀圖書閣 – 使用率甚低，住客多數會在池伴睇書。
泳池背後另有2間客房。
按摩房後面有3間園景房，我住在中間那間房。
房間面積幾大，而且每日也有人清潔，感覺很乾淨。
職員跟著送來今天的午餐 ～ 雜菜沙律和椰青，好健康啊，由這餐開始之後5日都係食呢啲。
食完午餐，15:00便由酒店的經理為我們度三圍磅重量血壓，並講解今次的療程選擇。小太熊話經理個樣好似泰國朱千雪。
今次決定選擇全份量素食療程(Amity Raw Cleanse)，因為小太熊話全部療程都係一個價，梗係多嘢食抵啲啦，最戇居係辟穀，自己响屋企辟咪得囉，比咁多錢人但冇嘢食，on9 。
今次5-Days Program由星期六中午14:00開始到星期四11:30完，食足15餐Raw Food，洗了5次腸，療程中段時排的便便已經冇乜臭味，感覺清新脫俗。
接著就去比錢，2個人5日5晚Amity Raw Cleanse Program共THB 53550，我比現金再有3%折扣，即係THB 51940，包括每人5次洗腸、4次Inflammation Pod、4次60min按摩、12個椰青、8杯五青汁、4壺熱湯、15餐素食正餐和每天早午晚的活動，另外每天中午也有免費車去附近的沙灘Nai Harn Beach或Ya Nui Beach游水，基本上毎日由早上07:00至晚上20:00也可以十分充實，亦可以不參加活動自己Hea吓。
17:00～18:00是毎日的晚餐時間，今天有「泰式素青咖哩雜菜」，素青咖哩汁底用檸檬草、金不換、薑片、青燈籠椒、椰青水、岩鹽、黑椒制成，卻沒有咖哩成份，但味道真的很像普通青咖哩，味道是比預期美味的。
Nidra Meditation – 18:00的活動，是瑜伽睡眠的一種，導師會像帶令同學們進入半夢半醒的狀態，放鬆地神遊物外，有同學話有料到，但我和小太熊悟性差冇乜反應，覺得都係吹水嘢。
上完堂只是晚上七點幾，但已經開始肚餓了......點算......唯有死頂啦。沖完涼上陣網都差不多21:00了，今晚早些睡覺。
晚上派了明天的活動安排，每晚也會派的。
素食養生•布吉修行 – Day 4
今朝07:10出發Mountain Walk，所以06:40起身，放低2磅才出發。
出發前在Juice Bar飲杯花茶先。
Mountain Walk的起點在距離酒店3km遠的Nai Harn Lake湖伴。
落車後沿著馬路向山上行1.5km，段路都幾斜，行足25min。
Windmill Viewpoint – 山頂上的觀景庭，在這𥚃休息10min看看風景。
接著繼續向前行600m落山下的小沙灘Ya Nui Beach。
08:10回到酒店，返房鬆一鬆又要Morning Meeting了。
今天的飲品是薑茶和奇亞籽椰青水。
自己再飲多杯花茶和果醋，不斷飲嘢，等個人冇咁餓。
每日09:00左右大廚便會把早餐和2杯五青汁送到房間。
跟著又去Juice Bar歎個冰凍椰青，這裡的椰青全部都又甜又多水又夠凍，仲可以食埋啲肉幫補一吓，飽肚少少。
10:00開始做30min – Inflammation Pod，這是紅外線熱力治療，用紅外線滲透身體內令熱力從內至外幫助身體排毒並消除炎症，每日最多做30min，做完之後最少4hr才可以洗腸。
焗完Inflammation Pod排汗排到個人乾晒，立即返房沖個身之後飲埋杯冰凍五青汁，吸收都好啲。
12:00開始在廚房有活動Salad Dressing Demonstration，由酒店大廚介紹怎樣做3款不同的Salad Dressing，我們每日都有機會吃到的。
Thai Spicy Dressing – 材料有橄欖油、果醋、岩鹽、辣椒粉、胡椒、檸檬汁和荽茜，溝埋便製成，伴沙律菜很好味的，昨天第一餐午餐沙律便是吃這款Dressing。
Carrot Ginger Herbs Dressing – 材料有紅蘿蔔、新鮮紅辣椒、岩鹽、蒜頭、薑、檸檬汁、青蔥、牛油果和水，用攪拌機攪埋便製成。
這款Dressing香濃中帶點辛辣刺激，好味又過癮。
Green Onion Dip – 材料有用水浸泡了4～6hr的果仁、檸檬汁、洋蔥粉、香蔥、岩鹽、橄欖油和水，用攪拌機攪埋便製成。味道帶有香濃果仁味，伴青瓜脆餅很好味的。
整個過程都不斷試食，份量和正餐都差不多，其實份量都唔少，只是冇肉落肚始終感覺還是怪怪的。
14:00-15:00是按摩時間，今天是一位最大份的按摩師替我按，力度十足卻只有死力，唔太到位，技術較差，唔係太Enjoy。
15:00要洗腸了，好緊張呀，因為是第一次洗，9年前在菲律賓的The Farm住了四天也唔肯試洗腸，今次本來也決定唔洗的，因為小太熊昨天和一位新加坡來的女士吹水，新加坡女士大贊洗腸功效好而且這裡比其他地方安全衛生，所以最後決定試一試，唔鐘意明天便唔做。
洗腸室很簡單，大水壺裝滿了咖啡，用來灌入大腸內淸洗腸道。
首先把黑色的幼膠管駁上咖啡喉，再途上潤滑劑，然後放鬆全身慢慢插入大腸內至少三分二長度，再打開水制便開始洗腸，過程大約15～20min。
可能因為我唔係基佬，在潛藏的意識形態上有些抗拒呢味嘢，所以最後都係隊唔入，洗腸失敗。
雖然我失敗，但小太熊成功洗出大腸內毒物喎，真係叻。洗完腸之後再同朱千雪和新加坡女士交流了一會，小太熊決定明天再洗，我也試多一次，反正已經比錢，唔洗就笨了。
17:00才有晚餐吃，現在還在差不多1hr，便自己出酒店附近行個圈。
沿途都冇行人路，又冇乜嘢睇，多數是餐廳和按摩店，唔係太好行。
Rawai Muay Thai Boxing Camp – 這拳館我們2012年住過2晚了，原來和今次的酒店只相隔1km，今天是星期日，拳館休息。
17:00左右回到酒店，大廚已經送來熱湯和晚餐。
今天晚餐是 素煙肉意粉，煙肉是乾磨菇意粉是木瓜絲和青瓜絲，加上中午教整的Dressing ~ Green Onion Dip，好味道的。
今天是星期日，布吉島有很多Sunday Market，酒店晚上便車我們去布吉市附近的Naka Market。
夜市非常熱鬧，大部分都是本地人，可以看看今日布吉島的真正物價。
乾貨熟食乜都有，賣的東西也很地道。
發現有榴槤，而且賣得相當貴，小小一件便要THB 220，比香港貴一倍以上，不過都買了來試一試味。
一啖咬落......Rubbish，真離普，果肉淡的，完全唔掂。後來看見有幾檔榴槤也是賣咁貴，品質亦一樣咁差。
樜汁和魚蛋也很吸引，但是已經破戒了，要忍口呀。
奶昔好平，五顏六色都幾鮮艶。
鵪鶉蛋又平又靚，不過勁高膽固醇的。
壽司非常之受當地年輕人歡迎，見到好多人買。
假金莎朱古力都有，唔知咩味呢。
細個成日見的肚臍餅和啫喱糖，很懷舊呢。
港式燒賣和蒸包的賣相十分吸引，行完個肚餓得好緊要呀，好似好耐冇食肉了。
21:00回到酒店，沖完涼感覺十分肚餓，便飲晒整壺熱湯，係就係成功瞓著了，不過成晚要起身放水。
補充資料 :
1.) 百年換現金價HK$ 1兌THB 3.95。
2.) 在布吉島用Grab叫車一般會比的士公價貴20~50%，但很多車好易Call。
3.) 從布吉Banyan Tree乘的士到布吉南部Rawai Beach ~ Amity Wellness Retreats，車程37km收費THB 1000。
4.) Amity Wellness Retreats 2個人5日5晚Amity Raw Cleanse Program共THB 53550，比現金再有3%折扣，即係THB 51940，包括每人5次洗腸、4次Inflammation Pod、4次60min按摩、每日2個椰青、8杯五青汁、4壺熱湯、15餐素食正餐和每天早午晚的活動。
---待續---
冇人幫手插條喉去大腸度，好難wo
回覆刪除冇架，要自己來，所以我都唔係次次成功😫
刪除感覺男士會唔慣, 女士會好D; 不過你好叻, 出去7-11 都無亂食野
回覆刪除可能係啦，不過冇同其他男士交流過；講真忍得好辛苦架😅
刪除