旅居英國 • 動態移民(34) – 德魯納酒店The Duke of Cornwall Hotel

英國Plymouth古宅酒店 – The Duke of Cornwall Hotel

The Duke of Cornwall Hotel由一幢1863年落成的古宅改建而成，是Plymouth第一家豪華酒店，在酒店周圍的建築物已在兩次世界大戰之中被摧毀，使這座古宅的倖存更有價值。酒店現時共有 72間客房，內部裝飾古舊，當每次推動吱吱作響的旋轉木門進入酒店時，也彷彿回到百多年前的世界。住在酒店的18小時期間，我們沒有碰到一個其他住客，感覺很靈異，像住進了 德魯納酒店 (位於韓國鬧市的古宅酒店，招待剛離世又未夠鐘離開人間的靈魂，一般情形下普通人看不見其存在)。

旅居英國 • 動態移民 – Day 42

<<Plymouth>>

從Crowne Plaza Plymouth行700m來到一座外觀令人驚嘆的古宅，就係今晚住的酒店The Duke of Cornwall Hotel。

The Duke of Cornwall Hotel – 近看原來外部已經十分殘舊，外牆很多地方也見破損。

走過吱吱聲的旋轉木門時，有點兒陰風陣陣。

大大的酒店大堂只有一位職員為我們登記，完全沒有其他住客，定係我哋見唔到呢….

懷舊的酒吧氣氛唔錯，但係一個人都冇，有古怪….

乘升降機上到頂層，穿過長長的走廊便到今晚住的地方。

雙人房(包括早餐和三道菜晚餐)每晚HK$1060 – 晚餐自己Walk in都要每位£32.5，加埋早餐，即係房間只收HK$200左右，雖然房間很殘舊又冇景觀，但都好抵啊。

八八卦卦在酒店四圍行，始終碰不到一個住客。

因為怕今晚餐廳冇乜客，太夜食飯怕會阻人收工，所以18:00準時去吃飯，小太熊話阻人收到猶如殺人父母。

大大的餐廳只有我們一枱客，攪乜呀……

廚師和侍應就只招待我們一枱，巧驚呀。晚餐包了頭盆、主菜和甜品，飲品另計，食牛扒要加£6。

紅酒250ml (£6.4) – 好似吸血鬼飲的血呀。

Torched Mackerel – 燒鯖魚柳的味道普通，和罐頭差唔多味。

法式雞肉香草凍 – 味道和在超級市場買的肉凍差唔多，Ok的。

Sirloin of Beef (加£6) – 小太熊叫我試西冷牛扒，我叫Medium 但明顯已經Well Done，鞋口又冇肉味，劣。

Pork Belly – 小太熊試這味 五花腩肉，有少少肉味，都還可以。

Vanilla Panna Cotta – 香草奶凍完全正常，香滑少甜，加了木槺脆脆哋幾好食。

Dark Chocolate Delice – 朱古力味特濃，全餐飯呢件最好食，但好滯的。

全完飯仍然冇一個客行入餐廳，街外人客都冇。

酒店地下的宴會廳，應該已經坐滿晒……..

走過旋轉門回到人間，睇睇外邊的夜景。

The Duke of Cornwall Hotel的四圍依然好多車喎，只係酒店內冇人啫。

早點回房瞓覺了……

旅居英國 • 動態移民 – Day 43

昨晚無風無險，平安起身食早餐。

早餐只有我們2人，當然冇自助餐了，全部食物都要Order。

乳酪牛角包多士橙汁

加埋Full English Breakfast，午餐都唔駛食了。

早上會坐10:50-13:41 班次火車從Plymouth去肥彭的鄉下Bath Spa，持有Two Together Railcard 2人票價£48.1。

今日倫敦火車又有工業行動，連累埋我這班火車也遲了48min，駁唔到原訂的火車，

順延一班車遲咗 1hr到Bath。

<<巴斯>>

14:40到達Bath Spa Station。

行1km到今日的酒店，Bath這個城市的建築物全部都很古舊。

雅芳河(River Avon) – 過埋條河行多5min便到酒店。

Student Castle – 在這細細的古城Bath連續住3晚，可以慢慢玩當休息一吓。

雙人房Studio Apartments(不包早餐)每晚HK$860 – 房間又大又乾淨，有個小型廚房可以煮麵煮菜，浴室都好大。

趁天氣好，快快出古城兜個圈影些靚相先。

雅芳河(River Avon)

普爾特尼橋(Pulteney Bridge)

Empire Hotel

Thai Weir – 在Pulteney Bridge下發現這間很靚的泰國餐廳，陣間一定要坐低食少少野。

Pulteney Bridge – 古橋建於1773年，是英國一級建築遺產。

巴斯修道院(Bath Abbey) – 創建於7世紀的英國聖公會教堂，每年吸引成千上萬的遊客到訪。

The Pump Room Bath – 巴斯一座建於1789年的歷史建築，部分已經被改建為餐廳，內有鋼琴家演奏。

The Friends Meeting House, York Street – 建於1818 年的古建築，現在開了一間型格書店。

Thai Weir – 霸到靚位了，全場最靚的河景單邊位，幸運地剛剛有人走我哋又行過。

蝦片(£4.62)；啤酒(£4.35)；Americano咖啡 (£3.25) – 坐靚位食少少野嘆吓真係抵。

飲完嘢去 馬莎M&S買晚餐返酒店食。

燒雞一隻(£5) – 加了香料來燒，算幾好味，雞肉都有肉味；紅酒(£6.66)

油鹽水生菜(£0.43)

芝士漢堡(£0.99)

今餐每人£3.9，抵食。食完飯出去行夜街。

Bath Street

皇家劇院(The Theatre Royal) – 建於1805年的英國II級歴史建築，可以容納900人觀眾。

Pulteney Bridge

Bath Abbey

羅馬浴場(The Roman Baths) – 巴斯一座保存完好的歷史名勝，每年到訪旅客超過一百萬，浴場設施包括 聖泉(Sacred Spring)、羅馬神廟和羅馬澡堂的水平也低於現存的街道，遊客可以參觀浴場和博物館，但不可以入浴。由於客人太多，即場買票近乎不可能，必須早最少1日訂票入場，今日訂了明天中午入場。

The Pump Room Restaurant – 人氣旺盛的古建築餐廳，必須訂位，今日訂了後日食早餐。

巴斯溫泉水療中心(Thermae Bath Spa) – 巴斯市內的公共温泉浴場，這裡是英國唯一處富含礦物質的天然熱水溫泉，目前設有兩座浴場建築，一座是21世紀的現代玻璃立方建築New Royal Bath，另一座是較小型的18世紀建築。

The Hot Bath – 歷史悠久的格魯吉亞水療建築，位於Thermae Bath Spa旁邊。

The Cross Bath – 是一座復古風格的橢圓形露天溫泉浴池，可容納12人，必須預約。

The Little Theatre – 接近90年歴史的劇院。

The Circus – 設計師靈感源自於羅馬競技場，1768年建成，現為一般民居，已被列為英國一級建築The Little Theatre – 接近90年歴史的劇院。

Sally Lunn’s – 大樓建於1483年，是巴斯歷史最悠久的建築物；此外，Sally Lunn’s是巴斯著名的茶館，供應早餐、午餐、下午茶、和晚餐，菜單以原始Sally Lunn麵包為主。明日要來食早餐。

補充資料 :

 

1.     £1兌HK$10.66 (HSBC網上兌換)

2.     英國火車優惠證Two Together Railcard 年費£30，可於一年內以優惠價買火車票，但必須二人同行，可於網上購買並存於手機內，購買時需要提供相片，乘車查票時可能會被要求出示。

3.     英國電話卡Giffgaff可以網上預訂，出發前寄到屋企，再Download 官方Apps，到埗後可以立即開卡用。有1個月£10 (包15GB上網加超平打長途電話和Local call)的Plan十分抵用。

4.     英國所有的無限次火車證都好貴，性價比低，最平火車票應該是用手機Apps : Trainline 或者TrC /TfW ，再以Two Together Railcard優惠購買。兩個Apps的票價可能不一樣，Trainline 有時會收少少Commission，所以每次買票時都要比較兩個Apps。買火車票一般係越早買越平，但又未必一定越早買越巴閉，有時優惠票會很遲才出現，完全冇路捉。

5.     火車從Plymouth去Bath Spa車程3hr，持有Two Together Railcard 2人票價£48.1。

6.     在英國餐廳食飯不可以主動揮手叫職員過來，會被視為不禮貌，只能乖乖坐定定等職員主動上前才落Order，或者用眼睛望住佢哋，等佢哋注意到再自己行過嚟。之後在全英國食過很多餐廳，留意到又真係冇人主動揮手叫職員落Order的，真係佢唔講都唔知。

7.     在英國生活基本上可以完全唔帶現金，99%的消費也可以用信用卡或Applepay附款，包括所有交通工具、餐廳和超級市場。

8.     在Tesco買嘢最好先做會員，問其他人Cap張圖借個會員QR Code用也可以，次次都可以慳幾磅。

9.     Bath的面積不大，步行已經足夠行遍全市主要景點。

 

 

---待續---