旅居英國 • 動態移民(32) – Isles of Scilly第二大島嶼 Tresco

英國Isles of Scilly第二大島嶼 – 特雷斯科(Tresco)

特雷斯科(Tresco)是英國西南部群島Isles of Scilly的第二大島嶼，為私人家族擁有的無車小島，居住人口少於200人，遊客可以步行或租用單車遊覧。Tresco的經濟以旅遊業為主，小島上有郵局、餐廳酒吧和酒店，也有青銅時代的墓地和17世紀城堡遺址，南部有一個種植亞熱帶植物的Tresco Abbey Garden，值得花上一天時間遊覽。

旅居英國 • 動態移民 – Day 38

<<Tresco>>

繼續上一篇行程，來到Tresco的大型花園Tresco Abbey Garden。

特雷斯科修道院花園(Tresco Abbey Garden) – 建立於19世紀的花園，種植了來自80多個國家的植物，估計約有20,000株。入場費每位£18，不過售票處冇人賣票，見個個都唔買票直入。

走的時候發現原來係售票職員要睇埋小賣部，有人買嘢便要行開唔可以賣票，所以經常冇人賣票，慳返£18。

門口介紹了花園的景點

Tresco Abbey Garden確係幾多不同品種的花，但大部份也可以在Isles of Scilly其他地方看見，唔值得比£18入場。

花園這個藝術銅像設計十分生動有創意。

修道院原來出產毯酒，在花園的紀念品店有售。

回程時間潮退，要在花園附近的碼頭Carn Near Quay上船。

回程時海上括起列風，白頭浪成米高，艘船拋到PK，海水一盤一盤地淋落嚟，全船人都像沖海水浴一樣，好L凍呀。

大風浪令全身濕透，最好環境的時候也像落雨一般。

<<St Mary’s>>

好困難才捱到返St Mary’s，全船人都若無其事處之泰然，英國人都見慣這種風浪，沒什麼特別。

原本今朝病好了不少，但淋完海水冷親了，令病情惡化，早點返房食完飯休息了。。

青提子(£2) – 又甜又脆又多汁，好食；車厘茄(£1) – 香港買歐洲車厘茄要幾倍價錢，所以一定要食多啲。

油鹽水西生菜(£0.89) – 餐餐都食生菜，唔通餐餐都想食生菜咩～只係冇乜選擇，其他菜一係貴到儍一係唔啱食，所以迫住餐餐食。

蜜糖焗雞髀(£0.4) – 英國的雞確係又平又好食；白酒(£5.75) - 飲埋昨天飲剩的半支。

午餐肉雞湯意大利粉(£0.4) – 我煮的意粉好腍好好食，唔知點解小太熊唔肯煮意粉的。

乳酪(£0.6)；香蕉(£0.2)；吉百利熱朱古力(房間送的免費飲品)

全餐晚飯2個人共£10。

旅居英國 • 動態移民 – Day 39

早上起床時仍有少少咳和鼻涕，決定吃些藥繼續休息，補充元氣。

瞓到中午才起身煮早餐，感覺又好了很多。

早餐每位成本£2.1，有午餐肉原味一丁，巴瑪火腿煎雙蛋和奶茶。

下午小太熊決定繼續休息，我自己一個出外行吓，今日揀了St Mary’s另一條山徑Holy Vale Lane。

Holy Vale Lane – 小徑沿途有村莊、葡萄園、濕地和古蹟，遍地開滿野花。

Holy Vale – 島上的小村莊，內有一個小型葡萄園，出產自己釀製的紅酒。

Holy Vale Vineyard – 葡萄園未開門啊，連葡萄樹上的葡萄都米咁細粒，估計最少遲2個月才有收成。

繼續沿小徑Holy Vale Lane行，見到鬼枯樹、三葉草和小野菊花。

Carn Vean Tearoom – 無意之中行到這間Tearoom，靚到冇可能唔坐底飲杯茶打個卡。

熱奶茶(£2.5)；朱古力蛋糕(£3.95) – 太甜口感又散，唔好食的，不過冇乜選擇，當買位坐吓都Ok的。

飲完茶之後向南行，山徑長滿了咖哩香味的有刺小黃花。

Porth Hellick Down Burial Chamber – 建於公元前2500～800年的古墓，這遺址至少六個墳墓入口。

海灘Porth Hellick

Higher Moors – 行到這濕地時特然落了30min狂風暴雨，迫住在這𥚃睇雀。

野雀的數量很少，主要係鴨類。

白鴨(Common Shelduck) – 主要在淡水湖泊、河流、鹽池、鹽田及海灣等處等濕地活動。

綠頭鴨(Mallard)

Higher Moors – 這片沼澤的景色多變，野花多得出奇，金黃稻草也有一大片。

回到Huge Town，暴雨後的天色特別藍。

Parade Park – 休鎮中心的小公園

Town Beach – 休鎮的長沙灘，盡頭便是碼頭。

Lower Strand – 休鎮的大街，部分彩色民居已經改作民宿供遊客租住，通常租期要最少7日。

Buzza Tower – 我們的民宿行5min便可以上到山頂位置這位置。

今日風勢相對冇咁強勁，可以慢慢欣賞Huge Town全景。

落山一段路也充滿原始感覺。

近Tourist Information Centre位置有部快餐車賣炸魚薯條，小太熊早幾日已經話想試吓，今晚順路買比佢食。

炸魚薯條(£8.8) – 味道質素一般，唔試都冇乜損失，而且2日前才賣£7.8，今日加價了，好唔抵；白酒昨天飲剩一杯，今晚飲埋佢。

簡簡單單又一餐，早點休息希望快啲好返。

旅居英國 • 動態移民 – Day 40

病情反反覆覆，今朝起身時感覺好了8成左右，始終有一兩聲咳和很少量痰頂住喉嚨，其餘証狀就消失了。今日係留在Isles of Scilly的最後一晚，想行的地方已經行晒了，所以決定全日瞓覺，希望明天一早可以完全康復。

休息都要食啲嘢的，煮完早餐食完再瞓。

巴瑪火腿煎雙蛋 + 午餐肉原味一丁 + 奶茶(每人成本£2.3) – 始終係這些早餐啱口味啲，好過出街食三文治或者Full English Breakfast。

食完之後再瞓8hr，黃昏日落前才出去買些晚餐。

Mike Benney Butchers – 碼頭附近的小店，有新鮮的蔬果如肉類，有本地產的牛扒，買一塊試吓。

Cornish Sirlion Steak – 康瓦爾西冷牛扒每1kg~£27.5，買一塊試吓英國的鄉土食材。

澳洲紅酒(£5.25)

今餐我煮，小太熊歎。

Cornish Sirlion Steak 275g (£7.6) – 五成熟的肉質算唔錯，牛味唔濃只可以算僅僅合格，英國真係難買靚牛扒；St Martin’s農場鮮雞蛋(£0.3) – 前日在Honesty Shop買的，價錢貴50%味道和Size都差唔多，食埋佢。

午餐肉吞拿魚番茄意大利粉(£2.5) – 我煮的，味道調較得夠適中，意大利粉都好腍，好好食。

晚餐每人吃了£6.9。

食完飯之後好精神，上後山睇日落鬆一鬆個人。

今晚照舊早瞓，已經係病發第6日了，希望明早可以徹底打敗病菌。

補充資料 :

 

1.     £1兌HK$10.66 (HSBC網上兌換)

2.     Isles of Scilly每年4～10月也有客貨船往返Penzance，單程每位£63，包括20kg行李寄艙。

3.     Isles of Scilly由5個有人居住島嶼(St Mary’s, St Agnes, Tresco, St Martin’s, Bryher)和多個無人小島組成，旅客多數以St Mary’s為中心，每日乘船到外島作一日遊。每年由4月至10月St Mary’s Boatmen’s Association由當地漁民經營開往其他島嶼的船，來回St Mary’s收費£12，如果玩埋Wildlife Safari收費£18。遇着大風或大雨的天氣會停航，旅客必須每日早上留意他們的公佈。

 

---待續---