旅居英國 • 動態移民(36) – 蘇格蘭 愛丁堡(Edinburgh)

英國蘇格蘭 愛丁堡城堡(Edinburgh Castle)

愛丁堡市(Edinburgh)是英國蘇格蘭繼 格拉斯哥(Glasgow)後的第二大城市，公元前8500年已經開始有人居住，自15世紀以來就被定為蘇格蘭首府，是英國自倫敦以外最大的金融中心。愛丁堡市屬世界文化遺產，，市內許多歷史悠久的古建築保存完整，包括一所歷史超過400年的英國最古老大學 - 愛丁堡大學。愛丁堡亦是蘇格蘭的旅遊中心，旅客可以把愛丁堡作為中心點，參加不同的旅行團到蘇格蘭其他地區遊覽。

旅居英國 • 動態移民 – Day 46

<<巴斯>>

今日要坐火車離開英格蘭，往蘇格蘭愛丁堡附近的小鎮Dalgety Bay住4晚，寄居一個普通的香港移民家庭。

早餐只有 出前一丁雞容麵和奶茶，每位成本£0.65。

食完早餐便Check out行去Bath Spa Station，今日程火車要轉3次車比較複雜，所以特登自己拆開買票預多了時間轉車，整程車共需9.5hr，持Two Together Railcard 2人行票價£132.1。

10:13 - 11:36  Bath SPA 去 London Paddington

11:36 - 13:30 自己乘地鐵由 London Paddington 去London King Cross，由於怕地鐵又擺工，所以預咗80mins自己行路過去。

13:30-18:30  London King Cross去 Edinburgh Waverley Station

19:10-19:39 Dalgety Bay

<<倫敦>>

London King Cross Station – 無風無險來到這裡轉車，想起個半月前地鐵擺工時要在寒冷雨天從London Paddington揹着大背囊行過來真折墮。

9¾月台 – London King Cross的大景點，任何時間想影相都要排長龍。

<<愛丁堡>>

火車準時從倫敦出發，5hr後到Edinburgh Waverley Station，轉另一支線火車往Dalgety Bay，車程約30min。

可樂(£1.85) – 特然間好想飲可樂，在火車站M&as買，都好貴。

乘這列支線火車往Dalgety Bay

<<Dalgety Bay>>

行出Dalgety Bay Station後要行1km才到今晚住的地方， 是類似元朗加州花園那類社區。

一家四口香港移民家庭就住在這小屋，2個醫護人員加2個小朋友，係典型的香港移民家庭，未來4晚住在這𥚃體驗一下蘇格蘭的生活。

宜傢肉丸美極咖哩麵 – 自已在廚房揾到啲嘢食，煮個麵做晚餐，在後園玻璃屋食。

今晚瞓這間房，是小朋友讓給我們暫住的，佢都好乖。

2個人瞓一張小朋友床原來都好迫，不過只係頂幾日冇乜所謂啦。

沖涼時發現一個情況，就係英國的自來水力很弱，令熱水温度十分不穩定不時斷吓斷下，由最南的Isles of Scilly到這𥚃也是同一情況，相信是英國的生活日常。

旅居英國 • 動態移民 – Day 47

一早起身望出窗烏雲密佈，原來望到海架，都很開揚。

2個小朋友一早起身就話想去遊樂場玩，原來蘇格蘭很少遊樂場的，最近的在Motherwell，都要成個鐘車，要佢哋亞媽揸車至去到。

<<Motherwell>>

M&D's Scotland's Theme Park – 是蘇格蘭最大型的遊樂場，內有室內類似冒險樂園的呃細路錢遊戲，和戶外的過山車、海盜船、飛天鞦韆等等，入場免費。

小朋友話要買£40機動遊戲儲值卡，佢哋真係識玩。

機動遊戲每次£2～4，每次大約玩1min，由於全部遊戲都唔駛排隊，£40不用1hr便報消了。

細佬玩滑浪飛船玩到Under都濕晒，非常之高興，家姐便叫我增值多£40，好啦好啦，又係唔駛1hr就玩晒，要走了，再玩我要提早離開英國了。

<<Dalgety Bay>>

晚餐是典型的英國港式菜，食材全部在大型超級市場買的，有煎三文魚、白酒煮青口、油鹽水雞髀、麻辣青瓜和枸杞菜湯，味道唔錯很啱胃口。

晚上沖涼時好大鑊，沖到一半冇熱水，天寒地凍沖埋另一半，英國人的身體相信一般都幾好。

旅居英國 • 動態移民 – Day 48

今日早餐是傳統英式早餐，即係牛油果醬麵包和奶茶。

今日小朋友們唔駛返學，帶佢哋出 愛丁堡市行街濕平，原來愛丁堡小朋友和老人是免費坐巴士的，所以家姐帶細佬坐巴士出愛丁堡市，我就用Two Together Railcard買即日來回火車票(2位£8)，比巴士平成倍。

<<愛丁堡>>

約好了小朋友在Scott Monument等，佢哋都準時到喎，果然唔係一般港孩咁廢。

愛丁堡城堡(Edinburgh Castle) – 今日天色幾差，間中有微雨，和我上次1999年來愛丁堡時一樣。

和小朋友濕平之後再同佢哋食啲嘢，佢哋話來到英國之後好少出街食，揾了間日本野比佢哋歎吓。

Itsu – 英國大型日式連鎖店，專賣幾款壽司，全國很多大城市也有分店，很好生意的，水準一般合格可以入口，比爭鮮好些少。

三文魚壽司 + 三文魚小卷 + 牛油果小卷餐盒(£7.19) – 價錢和味道也和Aeon買的差不多，所以在英國而言是屬於高質壽司。

三文魚壽司 + 三文魚小卷 +  加州反卷餐盒 (£6.79)

食完野送小朋友們到巴士站等車返屋企，我哋自己蛇去四圍行吓街。

Victoria Street – 建於1829年的老城區，是一條狹窄陡峭的小街，兩旁建築物和店舖都色彩繽紛。

The Elephant House – 1995年開業的咖啡，因為是哈利波特作者 羅琳的靈感創作之地而聞名，成為了愛丁堡最受歡迎的咖啡店之一。由於大樓曾經發生大火災，現在已經關閉。

忠犬雕像(Greyfriars Bobby Statue) – 紀念忠犬Bobby的青銅像，牠生於19世紀，在主人去世後守護著其墳墓整整14年直至於1872年去世為止。傳聞摩摩雕像的鼻子會帶來好運，所以相信早前成為傳播細菌的主要源頭。

Bedlam Theatre – 愛丁堡舊城區一座1848年建成的劇院。

Alandas Gelato – 路過見到這雪糕店勁多人排隊，便趁熱鬧買杯試吓。

三球雪糕(£5.5) – 揀了Creme Egg、Sea Salt Caramel和Rum & Raisin，係有水準，香滑好食，小太熊話咁多人排隊實差極有限喎。

Meadow Lane

在Meadow Lane附近的 亞洲超市 美麒麟(Maycheelin) Forrest Road 見到在上次的美心 蝦餃(£4)和 燒賣(£3.2)，雖然貴了少少，都買了幾包返去歎。

High Street – 愛丁堡市最旺的一條舊街，街內全是舊建築，令人驚嘆。

Tron Kirk Market – 1647年建成的古建築，從前是一座蘇格蘭教會教堂，近年轉營為藝術表演場地。

High Street Hostel – 我上次來愛丁堡便是住這間Hostel的大房床位，每位£8.5，估唔到仲未摺埋。

<<Dalgety Bay>>

返到屋企家姐話等了粒幾鍾才有巴士，剛才明明Check過很快有車才留低佢哋的，應該係有班巴士又失場，英國巴士都經常這樣了。

今晚要在樓下的另一浴室沖涼，因為樓上的Gas爐原來因為供水管氣壓問題影響到熱水，今晚用電熱水爐沖住先，小朋友爸爸要上YouTube睇睇片學吓點整，在英國生活乜都要靠自己了，唔可以郁郁就揾人整，人工好貴架，而且唔一定有錢就揾到人整。

旅居英國 • 動態移民 – Day 49

早上冇乜節目，煮個自備的 出前一丁嘆吓先。

午餐好豐富，有西蘭花炒帶子和西芹炒牛肉，好食。

<<Dunfermline>>

午飯後車2個小朋友去附近Dunfermline的古堡Dunimarle Castle玩，佢哋唔鐘意玩舊城古堡架，只係鐘意食嘢濕平和去遊樂場，不過古堡今日有復活節特別節目Easter Egg Hunt，所以帶佢哋去八吓。

Dunimarle Castle – 平日要比£10入場費的，今日有復活節特別節目Easter Egg Hunt，所以小朋友入場免費，大人亦只係收£3，而且小朋友有很多禮物。

入場之後每位小朋友派一張紙，要四圍去揾復活蛋然後猜迷話，估到便有復活蛋朱古力做獎品。

古堡旁邊草地也有親子活動，全部都係好細的小朋友。

Culross Pier – Dunimarle Castle山腳下一個很特別的碼頭。

<<Dalgety Bay>>

晚餐有煎豬扒和牛油果醬雞蛋火腿沙律，好食。

今日Gas熱水爐整好了，話打開閣樓個水管生口揾支野督一督平衡返水管的氣壓便可以，YouTube真係偉大的發明，相信幾十年前的移民應該會幾唔慣。

旅居英國 • 動態移民 – Day 50

今日小朋友要返學了，我們都要離開繼續行程，不過大行李要留在這𥚃，13日後來攞返，輕裝上路方便跟着的West Highland Way 10天高蘇格蘭原遠足旅程。

早餐又係 宜傢肉丸原味出前一丁和奶茶。

從Dalgety Bay乘火車到Edinburgh，持Two Together Railcard雙人單程票£8.1，雙人即日來回票£6.4，我冇寫錯呀，來回票平過單程票£1.7，梗係買來回票啦。

<<愛丁堡>>

小太熊經Airbnb Book了愛丁堡古城區一座300年古宅民宿，連續住3晚，接着出發行10日山。

North Bridge – 步出愛丁堡火車站的North Bridge直行轉右上斜行500m便到民宿。

民宿位於North Bank Street，在最左一幢大廈的頂樓，大廈建於1727年。

大廳平時唔可以用的，只在早餐時段可用。

雙人房(連早餐)每晚HK$792 – 房間整潔舒適，面積唔細，房間有私人浴室。

窗外勉強可以望到 王子街。

大廈樓梯的窗就正向望到 王子街花園，不過唔關我間房事。

終於可以自由自在行吓愛丁堡古城，今日天氣放晴，很適合行街。

司各特紀念塔(Scott Monument) – 位於愛丁堡的王子街花園，紀念蘇格蘭作家Walter Scott的紀念塔，是愛丁堡市的地標建築。

王子街花園(Princes Street Gardens) – 愛丁堡市中心的一座大型公園，建於1770年代，原本是一個湖泊，園內種了櫻花樹，周邊也種植了大量梅花樹，在開花的季節差點可以媲美日本。

梅花已經盛開了，今日來得合時，梅花碰上太陽，靚到不得了。

補充資料 :

 

1.     £1兌HK$10.66 (HSBC網上兌換)

2.     英國電話卡Giffgaff可以網上預訂，出發前寄到屋企，再Download 官方Apps，到埗後可以立即開卡用。有1個月£10 (包15GB上網加超平打長途電話和Local call)的Plan十分抵用。

3.     在英國餐廳食飯不可以主動揮手叫職員過來，會被視為不禮貌，只能乖乖坐定定等職員主動上前才落Order，或者用眼睛望住佢哋，等佢哋注意到再自己行過嚟。之後在全英國食過很多餐廳，留意到又真係冇人主動揮手叫職員落Order的，真係佢唔講都唔知。

4.     在英國生活基本上可以完全唔帶現金，99%的消費也可以用信用卡或Applepay附款，包括所有交通工具、餐廳和超級市場。

5.     英國火車優惠證Two Together Railcard 年費£30，可於一年內以優惠價買火車票，但必須二人同行，可於網上購買並存於手機內，購買時需要提供相片，乘車查票時可能會被要求出示。

6.     英國所有的無限次火車證都好貴，性價比低，最平火車票應該是用手機Apps : Trainline 或者TrC /TfW ，再以Two Together Railcard優惠購買。兩個Apps的票價可能不一樣，Trainline 有時會收少少Commission，所以每次買票時都要比較兩個Apps。買火車票一般係越早買越平，但又未必一定越早買越巴閉，有時優惠票會很遲才出現，完全冇路捉。

7.     乘火車從Bath SPA去蘇格蘭Dalgety Bay，持Two Together Railcard 2人行票價£132.1，整程車共需9.5hr，最少轉3次車。

8.     從Dalgety Bay乘火車到Edinburgh，持Two Together Railcard雙人單程票£8.1，雙人即日來回票£6.4，來回票平過單程票£1.7。

9.     英國全國已經無紙化，所有車票和入場門票也可以上網購買，而且有時比買實體票平30%。

 

---待續---