星馬布吉 • 動態移民(28) – 布吉島酒店Four Points by Sheraton

布吉島形格酒店Four Points by Sheraton無邊際泳池

芭東海灘(Patong Beach)是布吉島最早發展的旅遊區，沿海灘有大量形格酒店，其中比較新的酒店有由Marriott集團經營的Four Points by Sheraton，酒店有600間房，大部分也沒有景觀，賣點只有在芭東海灘酒店中最特色的無邊際泳池。

星馬布吉 • 動態移民 – Day 26

<<布吉島>>

繼續上一篇Day 26行程。

在Orientala SPA做完Massage之後，行過去Four Points by Sheraton，剛好到Check in時間。

Four Points by Sheraton – 酒店對面便是Patong Beach，泳池和海景觀上連成一線，勁多人游水，不像前幾日那樣可以包場。

Check in大堂很舒適，價錢貴真係唔同啲。

雙人房(不包括早餐)每晚HK$590 – 房間不單沒有景觀，而且對正對面酒店的露台，全無私隱，但裝修極新，佈置有心思，整潔舒適。

浴室又大又乾淨，水淋浴的水力很強。

中午的節目又係游水，小太熊就係貪這酒店的泳池又大又靚，而且比較少中東印度客，來自歐美的比較多。

酒店內的泳池像條河流，方便地下的房間，打開門便可以跳落池，不過這些房很貴，唔捨得住。

行出酒店大門口便是另一個無邊際泳池。

Infinity Pool是打卡熱點，曬太陽和影相的人多，真正游水的只有三兩人。

今日未吃午餐，在池畔浸着水用手機Order了些食物。

Singha啤酒(THB140)

薯條(THB225) – 最平的小食，香脆好味，想要多一份。

晚上出街吃飯，路過這士多又每人買一個椰青，每個THB35平遍宇宙，飲完還括埋椰肉食。

Laimai Courtyard Restaurant & Bar – 沿着海灘行，看到這店環境很好，便坐下來開餐。

Singha Beer(THB176)；可樂(THB105)

泰式素春卷(THB228) – 味道唔錯，夠鬆脆。

菠蘿炒飯(THB375) – 略嫌炒得太乾，配料的雞肉又係嚡到唔想吞，味道是好的。

飯後散步，小太熊話想去Night Market買些衫褲給我，佢話我啲褲差唔多條條都穿窿喎。

Patong OTOP Night Market – 買了幾條褲，開價都唔貴，講完價我也覺得平，可能真係生意難做，買嘢的人很少。

但是食檔今晚就人山人海，好好生意。

這款甜點有點似細個食許留山的海底撈嘢。

Dang Restaurant – 在Number 6 Restaurant旁邊的餐廳，自稱自己的芒果糯米飯全布吉最好食，即管試吓。

芒果糯米飯(THB120) – 糯米有少少生，失敗。味道都算好的，糯米飯撈埋椰漿好正，芒果很甜，但是品質算是目前為止試過三間中最差的。

又Hea過一日，在布吉島的生活費很低，日子過得很開心。

星馬布吉 • 動態移民 – Day 27

<<布吉島>>

今朝冇早餐食，打算餓到中午才吃東西，要收收個肚腩。今日又係沒有節目，只係玩搬酒店。

08:30起身到無邊際泳池游水，原來早上沒有人的，可惜今日天陰有微雨，景色和昨天差得遠。

再去酒店內的泳池游多幾轉，早上真係完全冇人游水，可能個個都未起身。

Hea到12:00退房，又再揹起大行李行10min去今晚的酒店Mövenpick Myth Hotel。

補充資料 :

1.     泰珠THB4.48 = HK$1，HSBC網上兌換價。

2.     布吉島的士全部公價，議價空間不大，從機場往芭東海灘THB800，需要入境之後在Agent先買Coupon。

3.     從布吉島機場可以乘小巴到島上各處，往芭東海灘每位THB180，要等夠8個人才開車，可能等到天黑也未夠人。

4.     從芭東海灘有私營巴士(兩排車)前往布吉市，每位THB40，每小時約一班車，但不準時，要等夠人才開車。

5.     從芭東海灘有公營巴士往Rawai Beach，每位THB100，每小時約一班車，大致準時。Google Map可以查到班次。

 

---待續---