沙巴 • 砂勞越 婆羅乃雙週(完) – 砂勞越森林 越野飛車

	婆羅州砂勞越森林 ～ ATV越野四驅車 姆魯國家公園(Mulu National Park) 的原始熱帶雨林面積超過500平方公里，大約是香港面積的10%，區內盡是巨型岩洞和茂密雨森。駕駛ATV越野四驅車穿越森林探險險，絕對是遊姆魯的一個必備的驚險節目。

 

沙巴‧砂勞越 婆羅乃雙週 – Day 11

今日租了駕ATV越野四驅車，5hr租金RM 500，包括2位導遊前後夾着我行，我冇車牌都可以租，而且要載埋小太熊，在森林的泥路駕駛，係咪好激呢。

食完早餐便去報到，先換上戰衣，因為一陣會有濕泥彈到一面都係架。

由於我完全唔識揸，導遊便帶我到附近一處平地練習，其實都唔難揸，操作和電單車差唔多，我練了十幾分鐘便上手，可以出發了。

部車行唔夠15min便遇到大水浸，因為近期日日都落傾盆大雨，水深足足有1.3m，浸到上頸啊，點算？

導遊一馬當先駛進水中，一陣就死火了，真係大鑊。

最後決定熄了引擎，人手拉架車過去。因為車身是浮的，所以都唔難拉動架車，只是全身都被泥水濕透了。

我們平安穿過水浸區之後，剛才行先那部車死火了。導遊們攪了十多分鐘才撻返着個引擎，再出發。

再行了一會兒最尾一部車被濕泥啜實了車呔行唔郁，真係多災多難喎。

今次我要幫手，導遊用粗麻繩磅上兩部車，我就開動自己的ATV拉返郁後面架車，幾好玩喎。

這麼多阻滯，已經花了兩個多小時，原本諗住去瀑布的，現在去唔到了，不過在森林區穿越已經覺得好好玩了。

最後去到一個泥漿區，可以玩泥漿啊，玩到一褲都係。

玩完之後要回程了，順便去一去附近的村莊。

村內的長屋已經差不多被浸到上地面了，村民出入自己屋企都要坐接駁小艇，生活環境很差啊。

玩完之後回房沖涼時，發現因為剛才控車時右手手腕太用力，現在手掌的肌肉腫晒，揸筆揸筷子都冇力，休息了足足一個星期才復原。

黃昏時再自己去一次Deer Cave睇蝙蝠出洞，今晚很壯觀呀，大量蝙蝠不停飛出山洞，條蝙蝠龍飛了10分鐘才停止，睇到個個都O晒咀。

今日超級滿足，夜晚在自己房間食福麵，慳返啲錢啦。原本晚上Book了小艇遊船河，但係晚上又開始落大雨，船河取消了，改為明天出發。

沙巴‧砂勞越 婆羅乃雙週 – Day 12

今日中午要離開姆魯，早上吃完早餐之後便遊船河，每船RM150 ～ 2小時)。

小艇在森林內的河流穿插，都很新鮮好玩啊。

附近的村民正在河上沖涼，佢哋仲很友善和我們打招呼啊。

河流的風景十分之原始，多條分支河流也被倒塌的枯樹擋住去路，被迫回頭。

回頭後駛出大河又遇上急流，迫住回到起點了，玩完都只係1.5hr，呃了30min啊。

臨Check our 冇乜嘢做，便去泳池游水，跟著在餐廳午餐。

自助午餐(RM 35) – 呃錢嘅，乜食物都比人清晒唔Re-fill，收足錢但冇乜嘢食，臨尾也給人一個唔好的印象。

下午乘機離開姆魯，到砂勞越的 美里市(Miri)住一晚。在美里機場的Agent搵了間平價酒店住一晚，乘Coupon Taxi出市區。

美里大酒店 雙人房(連早餐)每晚RM 87.4 – 位置很方便，房間極重煙味令人好唔舒服，入房後立即開窗通風，但吹了幾個鐘仍然好L嗅。

下午在美里市行街搵榴槤，不過街市都收檔了。

紅豆冰(RM 1.5)和前律滲完(RM 1.5) – 在街邊吃刨冰，味道一般啦。

新美宾茶室 – 在這間試吓婆羅州的肉骨茶。

肉骨茶 – 味道都OK啦，豬骨有肉味又夠腍而且湯底的藥材味幾濃。

行街行到天黑，經過一間海鮮酒家很旺，便坐低幫襯一下。

海霸王海鮮酒家 – 在街邊食飯都好熱鬧好氣氛。

蒜子炒芥蘭 – 味道好但菜太硬，炒耐些一定好食好多。

炒螄蚶 – 幾鮮甜，不過血淋淋都幾核凸。

黑椒炒肉蟹 – 蟹肉鮮甜汁底微辣黑椒味濃，好食到成碟清底。

因為間房煙味太濃入晒家俬，這晚瞓得很差。

沙巴‧砂勞越 婆羅乃雙週 – Day 13

今天早上會乘機返回沙巴 亞庇市(Kota Kinabalu)，臨走都想行一行街市看看有沒有砂勞越榴槤賣，所以05:30便起床。

沒有榴槤賣啊，只見到有種類似榴槤的熱帶水果，買了幾個，味道酸酸甜甜像台灣的釋迦。

回酒店吃早餐，食完之後坐的士去機場，走了。

早上回到亞庇市，乘的士直接到今個行程最靚的酒店Shangri-la Tanjung Aru Resort住一晚，酒店可以提早Check in，今天全日留在酒店歎世界了。

Shangri-la Tanjung Aru Resort雙人房(連早餐)每晚USD 177 – 地下房間外是小花園，環境好靚喎。

首先去海邊餐廳歎份Holiday Lunch先。

熱狗薯條和魚柳包薯條都好正呀。

 跟住在酒店游水，做Gym和做1hr SPA，嘆了一天。

黃昏去Sunset Bar飲嘢，不過下午開始便落大雨，今日天灰呀，不過一場來到都飲了杯紅酒。

晚餐選擇了酒店的中餐廳 香宮。

中式套餐有 甜酸咕嚕雞、蒜蓉炒羊肉和蒜蓉炒露筍，還有紫菜豆腐羹和楊州炒飯，甜品有芒草布甸，味道都好好。

沙巴‧砂勞越 婆羅乃雙週 – Day 14(完)

 今日早上會乘機返香港，所以早啲起身，06:30開始食早餐。

揀了露天位食自助早餐，食物好味道種類亦很多。

游多一個鐘頭水，跟著要Check out去機場。

乘早上機返香港，完成了新奇、驚險、刺激的 婆羅乃雙週。

 

 

 

-----沙巴‧砂勞越 婆羅乃雙週(完)-----