沖繩日誌(完) – 戀戰沖繩

日本沖繩萬座酒店(ANA Manza Beach & Resort) ～ 艾葵露雀教堂

沖繩萬座酒店(ANA Manza Beach & Resort)是電影 戀戰沖繩的拍攝場地，擁有私家海灘和臨海教堂～艾葵露雀教堂，毗鄰原始的國家公園，四周海岸被珊瑚環繞，環境優美，是沖繩頂級的度假酒店。

沖繩日誌 – Day 4

今日會到 沖繩海洋博公園(Ocean Expo Park)玩一日，出發前在酒店附近搵早餐食，但原來附近早上係乜舖頭都唔開架，連便利店都冇，要空肚出門口。

先乘這架巴士出路口，再轉往北部名護市的巴士。

在名護市落巴士之後，要等1hr才有巴士去海洋博公園，有時間去對面的便利店買些飯團、雞髀和牛奶做早餐。

08:00出門口，攪足3hr才去到目的地，2個人坐巴士的價錢都要的士一半，日本的巴士真貴。

沖繩海洋博公園(¥1600入場費)

海洋博水族館的海豚表演，和香港海洋公園差不多。

The Coral Sea水族館 – 海洋生物和海洋公園的海洋館差唔多。

走過The Coral Sea水族館後，到達全球最大的水族館，內有很多巨型魚類，包括鯨鯊和魔鬼魚。

水族館餐廳好正呀，仲好好彩啱啱有檯窗邊位離開，給我們啱啱霸到，可以一邊食一邊欣賞大魚。

食物只係普通的平價炒飯麵和啤酒，不過對住咁多魚食乜都冇所謂啦。

跟著到有導賞團到水族館的頂層參觀，介紹這個大型水族館的運作。

小太熊話我成日都鐘意同啲小朋友爭位，佢屈我咋，我都冇爭，只係我影緊相嗰陣時個小朋友自己行埋嚟。

海豚表演冇乜新意，只看了半場。

海龜池正在清潔換水中。

水族館內養了三隻 肥海牛，佢哋的食相好趣怪。

玩夠之後由 海洋博水族館乘的士到人氣茶寮 花人蓬 嘆下午茶食Pizza。

花人蓬 – 沖繩古民居改建的海景Pizza店，以招牌炭火Pizza馳名，位於半山腰，可眺望沖繩一望無際的海景。

咖啡和橙汁都嘛嘛哋，但是Pizza卻出奇地好食，薄批底配上勁多芝士和蕃茄蓉，再加些少肉腸和青椒絲，勝在夠新鮮香口。

嘆完茶之後，埋單時請店員代Call的士，等了15min便有車，先到名護市，再轉巴士返去 讀谷村，天黑才返到去。

小太熊在巴士上睇到Mook介紹了一間餐廳 讀谷海產物，話佢的墨汁定食好有特色，又在酒店附近2km，食完可以步行回酒店，於是落巴士之後乘¥800的士直接到 讀谷海產物。

讀谷海產物 – 位於讀谷村海邊的日式食堂，可惜老闆話今日冇墨汁定食啊，只可以食其他。

刺身炸魚定食(￥1400) – 普通到暈的定食，只可以用平平無奇來形容，刺身是未食過的白身魚，肉質新鮮味道不過不失。

魚汁定食(￥1400) – 呢味唔掂，魚肉有少許腥腥地，好彩仲算係有魚味，否則唔食了。

食完呢餐之後心情麻麻地，因為好像浪費了一餐Quota，於是決定回到酒店隔離的居酒屋食多餐好嘢，前日試了一間，今日試埋另外一間。

因為都好飽，只要了清酒、馬肉刺身和沙律，好彩都好味道，心情好返了。

沖繩日誌 – Day 5

今日冇乜特別節目，所以瞓晏啲。

早餐在房內食碗麵和牛奶。

早上Check out後乘的士去 沖繩萬座酒店住一晚。因為係貴酒店，所以預計會留在酒店附近玩。

沖繩萬座酒店 - 沿岸碧海藍天，被原始叢林包圍着，對岸便是沖繩明勝 萬座毛。

沖繩萬座酒店的大堂很有氣派。

雙人海景房(連早餐) 每晚¥30,000 – 房間的露台可以望到酒店內的 艾葵露雀教堂，久唔久便有人行禮，都幾多人在這裡結婚啊。

在房內嘆夠了之後，開始出去行街，從酒店開始行到萬座毛，沿路慢慢睇吓風景影吓相。

艾葵露雀教堂 – 剛好這段時間冇人行禮，可以靜靜地影吓相。

沖繩萬座酒店水上活動中心 – 拍攝戀戰沖繩的時候這裏被改裝成酒吧，我仲以為真係酒吧，仲想飲杯嘢添，來到至知原來係水上活動中心。

繼續沿着這方向去 萬座毛。

在路邊一間雜貨店買了一杯Blue Seal雪糕(￥100)，奶味香濃質感幼滑，是頂級的雪糕。

沖繩島名勝 – 萬座毛

萬座毛附近有很多菠蘿樹。

離開時在路邊的郵局寄了張Post Card返屋企。

回到酒店之後，在日本餐廳 雲海日本料理吃午飯，每人叫了一份￥1900定食，水準只係中上。

跟著出沙灘游泳，游到中途突然間落大雨，沖繩的天氣都很變幻莫測。

游完水之後到酒店內的大浴場沖涼，住客免費外來人要收費，我們就這樣在酒店嘆了整個下午。

又回房休息到天黑，原來打算在酒店食晚飯，不過小太熊睇書時發現附近的 富着市有好嘢食，於是又坐的士直接去餐廳。

酒店大堂晚上有人拉小提琴，好高檔啊。

富着市食石垣牛的餐廳，小太熊話要試石垣牛喎。

坐喺戶外坐位，可惜今日石垣牛扒冇貨賣，只係有石垣牛刺身沙律。

石垣牛刺身沙律 – 牛肉味十分之香濃，而且很夠油香，伴著醋沙律同吃仲冇咁滯添，好正。

海苔薄餅 – 店內的名物，餅底超薄又煙韌，加埋海苔咸咸哋好好食。

魚生片沙律 – 魚生非常之鮮味，加上海葡萄卜卜脆，滿晒分。

這餐非常之滿意，埋單共￥4400，不過就未夠飽，可以過隔離食多餐 燒肉。

焼肉琉球の牛 恩納本館 - 這燒肉店外觀冇乜特別，不過價錢好平但牛肉超級好食。

千幾円一碟和牛燒肉，水準卻是超高。

最有驚喜是這碟香腸￥600有5款共5條，全部超級好食，從未食過這麼好味的香腸。

好滿足的一晚，食完飯剛好有尾班巴士返酒店。

 

沖繩日誌 – Day 6(完)

今日下午乘機回港，早上在酒店嘆夠才Check out。

晨早起身第一個入餐廳揀位食早餐，可以坐到窗口位望住全海景食。

早上Check out之後坐巴士返 那霸市，因為還有時間剩，所以在巴士上臨時決定再到 第一牧志公設市場食墨汁。

快步跑進市場內往2/F食店，好趕時間呀。

問了這一檔有 墨汁菜式，便坐下來。

墨汁煮墨魚 – 沖繩特色料理，墨汁原來有很濃的墨魚味，又真係好特別喎，唔知點解在香港街市劏墨魚的時候都會浪費晒啲墨汁。

沖繩苦瓜炒蛋 – 每餐必食的一味。

食完之後在市場外面接截了一架的士，同司機講話去「Airport」，但佢連這英文都唔識，於是乎只好用地圖指出機場的位置，但佢連地圖都唔識睇，實在估佢唔到，只好落車上第二架的士，這個司機溝通又冇問題喎。

離開沖繩了，在飛機上望見沖繩的珊瑚島，真係處處世外桃源。

-----沖繩日誌(完)-----