夢迴長生の島 沖繩八重山(1) – 夢進沖繩 • 那霸市

沖繩 • 那霸市 國際通的民搖居食屋

剛從 怡保返屋企，小太熊又話要帶我去旅行。今次佢揀了有長生の島之稱的 沖繩八重山，即係好近台彎的 石垣島和附近的小島。住在沖繩的日本人個個都天天悠閒過活，食沖繩苦瓜飲玄米茶，睡在天與海之間，唔過 90歲就奇。小太熊話希望我可以吸收多啲長生靈之氣，長多幾年命喎。

今次行程只有 5日，又係趕到暈。

Day 1 – 中午 12:10乘HK Airline直飛那霸市，到埗後即去 那霸魚市場食刺身，再去 第一牧志公設市場食晚飯，然後行 國際通和到傳統民搖居食屋聽民搖。晚上入住 那霸國際通的酒店 Kokusia Plaza。

Day 2 – 晨早 05:00起身，乘內陸機住 石垣島，到埗後即往 川平彎潛 2次水，然後在潛水店午飯。飯後入住 川平彎的民宿 – 前高屋。中午參觀 高領造酒所、川平彎，再向北行1hr到石垣島“Club Med” 和“平離島”，看日落後回川平彎晚飯。晚上住 川平彎的民宿 – 前高屋，面向川平彎的日式房間。

Day 3 – 晨早06:30起身，乘 07:30的巴士返石垣市，在酒店放下行李後，立刻去碼頭乘 08:50的船去 竹富島。遊 竹富島 6小時，坐牛車、遊星砂灘、竹富島紅磚頂屋、食八重山豬肉湯麵、漢堡石垣牛、沖繩海盬雪條、苦瓜雪條。。。15:00乘船返 石垣市。黄昏參觀 “請福泡盛”造酒博物館，然後去 “石垣屋”食世上最美味的炭火燒美崎牛。飯後再去 石垣市的 鄉土居食屋聽民搖。晚上住 石垣市的酒店 Hotel Abiyan Pana。

Day 4 – 晨早06:30起身，在酒店食早餐，再乘 08:00的快船去 黑島。遊 黑島的學校、村庒、牧場，再到 仲本海岸浮潛和到 西海灘尋找海龜蛋，乘13:40班船返石垣島。中午行石垣市，黄昏出海釣魚，釣到魚後回石垣市的居酒屋食魚。晚上再去人氣店“金城燒肉” 食石垣牛。晚上住 石垣市的酒店 Hotel Abiyan Pana。

Day 5 – 晨早06:30起身，在酒店食早餐後乘08:55的航機回 那霸市。早上遊 那霸市古跡 – 首里城。中午在「首里いろは庭」食10道菜的沖繩鄉土料理後，乘機返香港。

夢迴長生の島 沖繩八重山 – Day 1

今日中午12:10機，晨早出發去機場，今日天陰陰很灰。

在香港兌了￥150000，點知都係洗凸咗。

今日機場異常多人，是我在新機場見過最多人的一次。

The Travelers Lounge – 食些免費小食至上機。

飛機原定 15:20 到那霸，最後只係遲了 20分鐘，HK Airline算係好準時。

見到那霸市，很快要降落了。

<<那霸>>

由於飛機比預期早了到，於是臨時加個行程，快快坐的士去 那霸魚市場看一看，可惜去到有一半鋪已關門。

那霸魚市場

那霸魚市場內的零售商店，全部都售賣海產。

估唔到只有我們兩個人包場。

賣的貨式和超級市場差不多。

刺身價錢係平，但賣相只係一般，冇特別吸引。

揀了些本地刺身，試吓地道風味。

章紅魚(左 ￥450)；吞拿魚(右 ￥500) - 夠鮮味但魚味偏淡，麻麻地。

黃昏的 那霸魚市場已經冇魚賣，相信早上好多野睇。

食完刺身坐的士去國際通的酒店Kokusia Plaza，酒店位置唔錯，行十分鐘便到 第一牧志公設市場。

Kokusia Plaza – 外觀和內部都很殘舊，勝在夠平。

雙人淨房每晚￥5800 – 房間又細又殘舊，而且有煙味。

那霸市國際通 – 應該是沖繩最旺的街道了，開始行街濕平。2006年第一次來那霸市，今日舊地重遊，感覺特別親切。

笫一牧志公設市場外的商鋪

笫一牧志公設市場 – 石垣牛店

第一牧志公設市場 – 豬肉雜貨店

沖繩特產 – 豬頭皮

海鮮很吸引，有點花多眼亂。

上次幫襯近門囗那一檔，今次試市場中間這一檔。

金目鯛(￥1400～約12兩) – 檔主介紹我們做 刺身加盬燒兩味。

夜光貝(￥1500) – 又係整刺身加油泡兩味。

再買了一板海膽(￥800)，找數後檔主帶我們上樓上食店。

第一牧志公設市場樓上有六檔大排檔，和樓下不同的海鮮檔掛單，像鯉魚門。大排檔一般每位收 ￥500廚費，煮三至四味海鮮。

第一牧志公設市場樓上大排檔，我們這邊檔比較多人。

隔離就淡好多。

烏龍茶(￥200)；Sake(￥400) – 自己加些飲品，另外再叫些小菜。

什錦刺身拚盆 – 剛才買的 金目鯛和夜光貝刺身，海鮮檔送三文魚、吞拿魚、青衣刺身和海葡萄，除了夜光貝鮮甜爽口，其它刺身唔係好得，比 5年前差好遠好遠，大失所望呀….

苦瓜炒蛋(￥600) – 沖繩必吃鄉土料理，味道OK，但都係上次角落頭那檔好食啲。

海膽刺身(￥800) – 檔主話係外省貨。妖………有腥味唔好食，未試過在日本食這麼差的海膽。

五花豬腩肉(￥800) – 又係沖繩必吃鄉土料理，豬肉味香濃又夠淋，好食。

油泡夜光貝 – 爽口鮮甜，好味。

盬燒金目鯛(半條) – 好淡口，冇魚味，唔掂。

失望的晚餐，食完後到隔離買乳酪雪糕食。

沖繩菠蘿乳酪雪糕(￥300) – 同阿菠蘿差不多，唔食都唔可惜。

開始在市場繼續掃街。

松原屋製果 – 認得5年前幫襯過這檔的，要再食。

白糯米餅(￥80) – 完全淡味又勁有咬口的糯米餅，好食。

Blue Seal雪糕店 – 又係 5年前幫襯過，記得上次的竽頭雪糕球勁正，今次試第二款。

軟雪糕(￥270) – 唔夠軟滑，只係二流貨式，失望。

沖繩菠蘿(￥100一件) – 和5年前一樣又甜又多汁，好似冇乜新店睇得上眼，有些問題。

沖繩牛奶(￥68) – 濃滑甘香到冇朋友。

沖繩鹽屋 – 過百款食鹽眼花撩亂，內有海鹽雪糕賣。

海鹽軟雪糕(￥250) – 其實係自已在面頭加海鹽的軟雪糕，有多款海鹽任揀，很特別值得試試。

離開市場已經天黑，人流稀少。

在國際通行完街，走上樓上一間傳統民搖居食屋聽民搖。

初時客人唔多，但後期就越來越多人，氣氛也不錯。

入場費每位￥2000，另加稅和什費，兩個人只飲了兩杯野都要成￥6000找數。

歌后成個「索腿天后」咁靚女，把聲又甜，真係貴得有道理。

唱到尾聲，全場一齊跳舞攪氣氛，後來才知原來沖繩的民搖居食屋全部都係咁架。

聽完歌返酒店Kokusia Plaza休息。

沖完涼都零晨了，明早 05:00又要起身乘早機，每次旅程都如此匆忙。

 

補充資料 :

1.   香港航空 香港來回那霸市直航機票(連所有附加費及稅，冇特價)每位 HK$5390。

2.   日圓兌換價￥100兌HK$ 10.2。

3.   由那霸機場 乘的士到 那霸魚市場￥1400。

4.   由那霸魚市場 乘的士到 國際通約￥650。

 

---待續---