樂活 • 怡保(完) – 吞食天地 怡保 • 吉隆坡

馬來西亞怡保 隱世酒店The Banjaran Hotsprings Retreat – 温泉湖

樂活‧怡保 – Day 4(完)

<<怡保>>

今日係最後一日，爭取時間食盡怡保和吉隆坡。原本打算乘10:00的火車離開怡保，點知今日係冇十點車嘅，只好改乘11:15那班車，吉隆坡唐人街的1hr行程要取消了。

早上07:00起身，07:30 Check-out。今次酒店Call的士等了 50min才有車到，因為今日怡保市封路大塞車，從酒店出怡保市又用了55min，前後所用的時間可回到吉隆坡了。

的士於09:25去到舊城的白咖啡街Jalan Bandar Timah，落車第一時間走去間出名食咖喱麵的「新成發咖喱麵」。“飲食男女”話這裡「咖喱麵」的湯底用大量雞殼、蝦頭、乾貝、馬來西亞江魚仔熬足5粒鐘，鮮味無比，真係唔試就笨。

怡保白咖啡街Jalan Bandar Timah「新成發咖喱麵」

今日大塞車，所以食客唔多，正呀。

凍白咖啡(左)(RM 1.2) – 香滑濃郁，和Pokka Café的凍咖啡各有千秋，但價錢平十幾倍；凍薏米水(右)(RM 1.2) – 清潤少甜，唔錯。

咖喱湯麵(RM 4) – 咖喱微辣濃香，湯底果然好鮮甜，好好味，十個贊。

亁咖喱麵(RM 4) – 咖喱微辣濃香，好好食，但冇咗湯底，始終差了少少。

下一站係隔幾間舖，開業 60年的「新源隆茶室」，飲食男女話這裡的白Kopi全城最好。

怡保白咖啡街Jalan Bandar Timah 新源隆茶室

新源隆茶室 內有餅食和豬腸粉賣

到茶室的大部份係熟客，飲杯白Kopi吹水幾個鍾。

極品熱白咖啡(RM 1.2) – 香滑濃郁，怡保人喜歡加煉奶，甜甜哋吊出白咖啡味更香，不可不試。

豬腸粉(RM 2.5) – 夠軟滑又有米香，把粉切成像河粉一條條長型，撈埋甜蝦醬蝦亁好味又新奇。

時間緊迫，快步行12分鍾去到位於「老黃芽菜雞沙河粉」隔離街果間「黎記豆品店」食冇加石膏的豆腐花。

怡保市 黎記豆品店

豆腐花(RM 1.3) – 勁滑，但豆味唔夠；黑豆漿(右)(RM 0.9)和白豆漿(左)(RM 0.9) – 奶味較濃，豆味不足。

怡保最後一擊，重返 天津飲冰室，試埋前日賣晒的「招牌雞蛋布甸」。

招牌雞蛋布甸(RM 2.5) – 幼滑有蛋香；沙梨冰(RM 1.6) – 酸咪咪好醒胃。

食完晒行8分鐘去火車站，剛好立即上火車。

怡保火車站

怡保去吉隆坡的火車

<<吉隆坡>>

火車很準時11:15出發，13:27到吉隆坡總站。到站後立即買Taxi Coupon，乘RM 18的士去Jalan SS2食榴槤。

吉隆坡Jalan SS2的榴槤檔

榴槤季尾了，好多品種都缺貨，而且近一年大馬榴槤開始出口到中國，令本土的榴槤價格大漲。

返正自已唔識，便叫老細揀三個最靚嘅。老細話今日最靚有「D101」、「黑剌」和「XO」，全部一律1 kg~RM 20。揀了三個榴槤共RM 77。

榴槤D101 – 口感最濃，最重奶味，食極都唔夠。

榴槤 黑剌 – 第一次食，有點紅蝦的花香，比紅蝦甜，好正。

榴槤 XO – 味道最唔甜、最香口和最甘苦，三個之中最好食。

食完榴槤要走了，坐的士到機場，乘17:40班機離開吉隆坡。

飛機上看日落。。。。

又玩完了，原本以為最少要等到明年 2月才會再出門，想不到只 21日後，便有機會再踏足長生の島 沖繩。。。。。。

補充資料 :

1.    從吉隆坡火車總站上的士要去Counter買票，去Jalan SS2收了我RM 18。

2.    從Jalan SS2乘的士到KLIA機場跳錶RM 58，連RM 12機場附加費和RM 4公路費共約RM 74。

-----樂活‧怡保(完)-----