緬甸的天與地(7) – 騎馬探訪Kalaw鎮山區村莊

在緬甸Kalaw鎮附近的山區騎馬，探訪山上的村莊，可感受緬甸最真的一面。

到緬甸旅遊，一般最受歡迎的景點包抬有仰光、曼德勒、茵萊湖和蒲甘。除此之外，在茵萊湖與Kalaw鎮之間的山區之中有很多佛廟和村莊也很值得遊覽，從Kalaw鎮騎馬出發，須時3日可到達茵萊湖，沿途可以瞓佛廟和探訪山上的村莊，感受緬甸最純真的一面。

緬甸的天與地 – Day 5

<<蒲甘>>

昨日完成了蒲甘完美的行程，今日晨早05:30起身，乘07:50班機去Heho。前日約好了那架送我來嘅的士今早06:45在酒店等，可以食埋個早餐先走。

06:00準時有自助早餐食

司機好準時，送我們到達機場只係07:00，見到日出呀。

Nyaung U機場的日出

<<Heho>>

飛機好準時09:15到達Heho機場，小太熊一早用e-mail約了個導遊帶我們到 Kalaw鎮附近的山區騎馬行山，導遊話會Call定的士在機場接我們，點知出了禁區見好多酒店在接客人但我們就冇人接機，等多15分鐘都唔見人，以為佢放飛機啦，唯有自已行出車站找車去Kalaw。剛行出機場外圍的鐵閘，那導遊便即時走過來相認了，原來佢話佢唔入得鐵閘架。

上了這輛的士，由Heho去Kalaw收Kyat 22,000，車程70min。

中途有個市場，落車行了半個鐘，睇下當地的民生，都好多嘢睇。

緬甸的街市都好多嘢賣，街上又冇乞兒，感覺佢地生活唔算太差，最起碼夠食夠暖。

馬車係當地好普通的交通工具，連街市都見到幾輛。

用頭運貨，原來全個東至南亞都興。

好似返回幾十年前既香港，仲見到散裝米、散裝味精、散裝片糖、散裝大香皂和散裝食油。

散裝米

散裝味精

散裝片糖

散裝大香皂

散裝食油

好似係雞毛掃

滿地洋葱

這些樹葉用來包住啲檳榔一齊食的

這些一舊舊木係緬甸人的美容用品，叫Tha-na-kha，係緬甸北部獨有的樹，加水磨成漿之後搽在面上可防曬、護膚、保濕、令皮膚特別柔軟、去色斑、清潔毛孔防暗瘡. . . . . . 總之乜都得。

呢D係曬亁了的糯米飯餅，用新鮮糯米飯曬亁，我上個月在寮國都見過。

<<Kalaw>>

行完街市，的士直駛去Kalaw，在鎮內食完午餐便出發。今次參加的Kalaw山區騎馬1天半旅程，2人共USD 150，包兩隻馬、兩個馬伕、一個响導、一晚佛寺住宿(瞓大殿的地下)、第1天的午晚餐和第2天早餐。所以今餐團費已包。

雜錦湯麵 – 味OK。

齋菜炒飯 – 小小辣很開胃。

花生醬炒菜苗 – 幾特別。

食完飯，導遊先介紹今次行程，今日12:30出發，總共會騎 4個鐘馬行14km，由Kalaw鎮行到海拔1200m高的火車站Myin Dike Train Station，途經山區幾條村莊，再行半個鐘去一間山中佛廟Pyin Thar Monastery留宿，黄昏可自已到佛廟附近的村莊逛逛，夜晚19:00開飯。明日07:30早餐，08:00出發返回Kalaw鎮，約10:00到達Kalaw鎮，散隊。

好，上馬。。。。。。

剛起步便穿過Kalaw火車站的路軌

行了30分鐘車路之後轉入山區

今日個天藍爆，非常靚。

沿途都見到很多山上的村民播種、水牛耕田。。。

風景就一般啦，勝在天氣好。

行了2個鐘，在一棵菩提樹(Banyan Tree)下休息，緬甸真係佛國，四處都見超大菩提樹。

中途入去一家原居民屋企飲杯茶，探吓佢地，等2隻馬可以吃些草休息吓。

再起行，今次見到牛耕田了。

15:30到火車站Myin Dike Train Station，勁有山區小鎮Feel，正。

火車站D字完全唔明

在火車站旁的小鎮逛逛，十分寫意。

在一間士多坐底飲枝嘢，一罐可樂要Kyat 700，這款緬甸Star Cola就Kyat 300，我當然試新嘢啦，味道有D似百事，唔錯架。

飲完嘢繼續上路

終於16:45到今晚的落脚地方 – 佛廟Pyin Thar Monastery

這座係佛廟大樓，樓上係大殿，即係我今晚瞓的地方。

就係瞓呢度了，夜晚得4℃咋，冷到病。

大殿的佛爺們陪我們瞓，黑媽媽時都咪話唔驚。

左邊間係飯堂，今晚和明早就係在這裡食。

飯堂內乜都冇，凍冰冰，只有張枱仔。

放下行李後，出外邊條村逛逛先。見到輛牛車。

村女們黄昏時都會走到我住果間廟個水井處打水煮飯，小朋友們就四圍玩。

行行吓有一户人家請我同小太熊入屋坐

這家人很客氣，又茶又小食招呼我們，我就講廣東話，佢地就講緬甸話，大家九唔塔八哈哈哈一論，我又請返佢地食自已珍藏的美珍香肉乾，開開心心坐了一陣。在緬甸真係放心，如果在印度我打死都唔敢入去坐，更加唔敢食佢地啲嘢。

行完村已好累，小睡一會才食飯。

只係小睡半個鐘，凍醒來時已天黑了，才19:00啊。行過去飯堂，大廚已為我們預備好燭光晚餐(因為冇電)。

晚餐比預期中富豐同好味，有蝦片、4碟菜同1碟雞，仲有綠豆湯和白飯，假假地都係二人包廳燭光晚餐啊。

食完飯出外面影星星，因為太凍，冷到咳了，依家都未好返。

今日行程都很特別啊，騎馬瞓和尚寺探村又食燭光晚餐，夜晚睇埋星星，今次旅程真順利。

補充資料 :

1.    由Old Bagan去Nyaung U機場，乘的士要Kyat 6000，車程15分鐘。

2.    由Nyaung U飛去Heho乘Air Mandalay，機票每位USD 75，我那班機要中途停站，共飛了80分鐘。

3.    由Heho機場去Kalaw鎮包的士單程Kyat 22,000，車程約70分鐘。

4.    Kalaw山區騎馬1天半旅程 2人共USD 150，包兩隻馬、兩個馬伕、一個响導、一晚佛寺住宿(瞓大殿的地下)、第一天的午晚餐和第二天早餐，如果有足3日時間，可由Kalaw行到Inle Lake，不用走回頭路。

---待續---