緬甸的天與地(5) – 日出萬塔之城 蒲甘(Bagan)

日出緬甸萬塔之城 蒲甘(Bagan)

蒲甘(Bagan)是緬甸一個具有悠久歷史的古城，大約1000年前這裡曾經有一個蒲甘王國，蒲甘平原上從前有4000多座佛塔，因比亦有萬塔之城之稱，但大地震後只餘二千幾座，雖然佛塔數量沒有上萬，但從高處望下，係仍會感到那份難以形容的壯觀。

緬甸的天與地 – Day 4

<<蒲甘>>

今日04:30起身，諗住行半粒鐘去最高的佛塔Shwesandaw Paya睇日出。出了酒店Bagan Thiripyitsays Sanctuary門口行唔夠 2分鐘，一個馬車伕行過來問我租唔租馬車，開價Kyat 18,000一日，日出另計，講了一陣價，最後佢開Kyat 17,000一日加埋睇日出，OK啦，成交，即刻上車。

原本打算去佛塔Shwesandaw Paya，但車伕話那裡看日落最靚，但日出就在 Minnyinkon睇最靚，我當然信車伕啦。Minnyinkon是一座小佛塔，離酒店10分鐘路程，但個景真係唔錯。我和小太熊05:25上到塔頂，已見到有2個强國來的朋友站在最佳位置Set好脚架同大炮等日出。

强國朋友來自首都，佢話昨天來時這位置被一老外佔了，所以今早05:00便來到霸位。我就在他們旁邊睇，差唔多啫。

未開始日出，影吓星星先。

大約06:10開始天光了，其間不斷有人上塔，8成係强國人，他們總是不斷在我身邊推推撞撞(我一早企定冇郁過喎)，盡顯強國人本色。

推推撞撞下，太陽要07:00才從2座佛塔中間走出來。

太陽越昇越高，個感覺又真係好迷幻呀。。。

約07:20看見6隻熱氣球昇空。嘩!!!! 靚喎靚喎. . . .

蒲甘(Bagan)日出真係好迷幻啊! ! !

07:45離開返酒店，就係坐呢架馬車了，好正好有Feel架，價錢仲平到笑。

返酒店沿途都見到大大小小佛塔，好鬼正。

08:00返到酒店了，這間Bagan Thiripyitsays Sanctuary Resort都幾靚幾平，仲有泳池加河畔景送早餐。

我住最平的冇view房

自助早餐乜都有，味道都好，可食當Lunch食埋。 

食完早餐08:45又出發，因為時間緊迫，所以我決定唔食中午飯直踩，把3個鐘Lunch Break cut掉，馬車伕15:30送我返酒店便放車。今次馬車遊城總共去了10個佛塔，圍繞着Old Bagan，車伕話係Best of Bagan。

第1站 – Gu-byauk-gyi，廟內部好殘舊，外邊很多人賣畫。

第2站 – 正正隔離果間Mya-zedi，很多當地善信入內參拜。

第3站 – Nage-yon，外觀像教堂，幾特別。

裡面就坐着大小佛像，有特色喎。

第4站 – Abbe-yada-nar，同對上果間差不多。

第5站 – Ma-nu-ha，呢間寺廟有樽大卧佛在一窄窄的洞內，又唔同其他廟。

車伕跟住順道帶了我們去參觀一間制杯碟茶壺的舖，全人手制，但我買來冇乜用，看一會便走了，緬甸人亦從不Hard Sell。

第6站 – Law-ka-ouk-shung，個塔外觀平平，主要係上塔頂看看個view，感受一吓萬塔之城的壯觀。

間廟有幾個小朋友駐場，會用電筒帶吓路，介紹吓附近啲塔，剛有些散紙，每人醒了佢地幾百。

馬車馬不停蹄繼續前進

車伕帶我們到一個市集逛逛。

街邊的野食香噴噴，但小太熊唔準我試。

呢兩底像鬆糕的物體真係我都唔敢試。

賣零食的檔口。佢做緊乜？？？趕烏蠅囉。

這些一舊舊木唔係用泥燒嘅，係美容用品，叫Thanakha，加水磨成漿之後搽在面上可防曬、護膚、保濕、去色斑、清潔毛孔防暗瘡. . . . . . 總之乜都得，緬甸人(尤其女人)不論老、中、青、小孩和BB都日日用架，我買了2件。

2件Thanakha加個石磨Kyat 2000，其實買來冇乜用，當幫吓當地人啦。

今日行程都幾正，日出靚，坐馬車夠爽時廟又唔錯，對蒲甘印象好好。

補充資料 :

1.    在蒲甘租馬車遊古城，由日出至日落每天(有3個鐘Lunch Break) Kyat 17,000，只可坐 2人。

2.    不計日出，租一天馬車大約可遊10間佛廟。

---待續---