日本 關西(2) – 忘憂温泉 勝浦 • 中之島

日本和歌山縣 勝浦中之島 – 紀州潮聞之湯

飄櫻幻景•温泉醉鄉 日本關西 – Day 2

<<和歌山>>

瞓足一晚，今早陽光普照，人都精神啲，07:00已經起身了，執好行李落酒店地下食早餐。

Dormy Inn Premium Wakayama的自助餐廳

早餐的份量和味道都唔錯嘅

<<勝浦>>

食完嘢，乘08:53 JR特急去日本和歌山縣的 勝浦市，11:32到埗。到勝浦駅先Lock好大行李，再去名店「桂成金槍魚」食午餐。

勝浦駅外的購物街

名店「桂成金槍魚」

師傅cool到爆，唔係幾鐘意人影佢相。

細清酒(￥400)

Kama Toro(￥2650 ~ 5片) – 這是黃鰭吞拿大拖羅以上的魚鮫肉，每條吞拿魚只有少量，唔係日日有貨。呢五片Kama Toro魚油香樸鼻，齒甲留香，係上等貨，抵食。

黃鰭吞拿魚套餐(￥2500) – 有齊吞拿魚刺身、炸吞拿魚、即煎吞拿魚、汁煮吞拿魚、沙律、麵豉湯和醬油吞拿魚飯，全部都味道平庸，唔食都唔覺可惜。

食完飯，返勝浦駅外買巴士票，往熊野那智大社。

乘13:05巴士從勝浦駅出發，在 大門坂站落車。

沿大門坂直上行半個鐘山路便到 熊野那智大社。

沿途會見到啲冇人睇檔的舖頭，可自己放低錢後攞袋橙走。又有錢又有橙冇人睇檔？放响强國多多都唔見晒，日本人真係好自律。

在大門坂茶屋外，偶然可以遇到啲遊客穿上平安時代參拜服，體驗吓日本傳统。

行到身水身汗，終於到 世界文化遺產 – 熊野那智大社，冇乜特別啫，這世界太多遺產了。

世界文化遺產 – 熊野那智大社

世界文化遺產 – 青岸渡寺

那智山 – 三重塔 + 那智大瀑布

整個 那智山的景點都很普通，大門坂一段熊野古道和麥理浩徑分別唔大，留多些時間在温泉酒店仲好。不過，未親身去過真係唔知會咁流。

等車時小太熊又話要食 黑糖雪糕(￥250)，嘛嘛地，唔抵食。

乘巴士返到勝浦駅，攞返大行李便行去碼頭等船，過對面的 中之島。

船來了，每15min一班船免費接送 中之島，船程只係4min，好方便。

下午三點半，終於到酒店嘆世界了。

勝浦中之島雙人房(連早、晚飯及温泉)每晚￥30500，價錢唔貴。

放低行李，第一件事就係浸温泉。勝浦中之島的温泉叫 紀州潮聞之湯，分男女室外池，全部面向大海，環境一流。男士室外温泉非常開揚，不論是海上經過的船、部分酒店房的露台、女生2/F的室外温泉或是酒店頂層，都可一目了然，相當攪野。小太熊仲話，女生大浴場都附設一個户外細池，經過的船同樣睇到晒，所以冇乜女生去浸。

附設在女生大浴場的户外細池，經過的船可以睇晒。

位於2/F女生專用的 紀州潮聞之湯，欄杆下就係男賓浴池。

男生專用的 紀州潮聞之湯，開揚度100%。

男賓部個池大好多，仲有個忘憂洞。

嘩！開揚到呢. . . . 小太熊响2/F係咁昅，太過份了！！！我冇得昅返上去。

浸到開始甩皮至走，跟住行上 中之島最高處望吓，其實冇乜特別，不過叫做行晒個島囉。

中之島中心，有個非常正的 温泉足底按摩池，池水很熱，石春的排法都好到位，好正。

天黑了，行返酒店食飯。你睇，全部房都望到個男浴場啦. . . . .

夜晚19:00到飯廳開餐，今晚房租包了 懷石料理，有私人房但冇窗(可能因為只Book了平房平餐)，餐飯的整體水準唔錯，收呢個價錢都好滿意。

懷石料理 包了兩杯白酒和餐前甜酒，雖然白酒只係惠康賣HK$19細細支的貨式，和餐前甜酒好似药水咁味，不過. . . . . 好過冇啦。

前菜有 熟蝦、冷豆腐、青魚壽司、蛋卷等等. . . . . 我的要求只要普通，佢完全達到我要求。

再來 清湯一碗，清清腸胃。

關東煮 – 平平無奇

日式蒸蛋一般水準，唔差啦。

一人份 什錦刺身，比想像中好喎。

魚肉鍋，都食唔落了。

什錦天婦羅，中上水準。

加多碗飯，飽了飽了。

甜品(一) 生果牛奶布丁，好味。

甜品(二) 櫻花蛋糕卷，小太熊話好有櫻花香味喎，但我未食過櫻花，唔知櫻花有咩香味，我只係食到甜蛋糕卷味囉。

食飽飯返房瞓，今日仍然很累啊！

明天要07:00前去到對面個魚市場，睇吞拿魚拍賣。

補充資料 :

1.        乘JR特急由和歌山駅去勝浦駅，車程約2hr 40min，可用JR Kansai WIDE Area Pass，散票￥4940。

2.        勝浦駅外有巴士票往返熊野那智大社，來回票每位￥1000，約一個鐘一班車，車程約35min。

3.        勝浦駅有Locker，大￥400，小￥300。

---待續---