日本 關西(3) – 温泉醉鄉 白浜

日本和歌山縣 – 白浜温泉酒店 海舟‧浜千鳥の湯

飄櫻幻景•温泉醉鄉 日本關西 – Day 3

<<勝浦>>

今朝06:20起身，乘06:40船離開酒店，要07:00前趕到 勝浦漁港2/F，報名參加導賞團。

和歌山縣 勝浦漁港

06:55到魚市場已見地下放滿黃鰭吞拿魚，好多買手在行來行去揀魚，2/F亦企滿遊客。

我當然唔會慳果一千幾百円啦，立即在2/F報了名參加導賞團，即刻出發。

不斷有大吞拿魚從船上運入魚市場

工人會把新的魚獲清洗，拖到適合位置再平排放好。

除了吞拿魚，市場內還有很多大劍魚和這些不知名大魚。

開始拍賣了，買手們睇完貨後便落價，賣完一Bay再賣另一Bay。

特大的吞拿魚會被切尾，讓買手可睇到不同魚的肉質，再決完落咩價錢。

二個可愛的日本小妹妹，仲細粒過條魚。

導賞團07:50散隊後，還有時間在魚市場旁的足湯浸浸脚。

乘08:07船返酒店食早餐，好多人啊。

只係一般自助早餐，但都改不了死性 狂食。

食完當然係再浸温泉啦，小太熊. . . . . . . . 太可惡了。

10:00要Check-out了，乘10:20船返碼頭，再轉10:46 – 11:18的JR特急去 串本，打算Lock好大行李後租2個鐘單車遊吓串本的名勝。

<<串本>>

今早開始便持續落微雨，去到 串本才停雨。我去到 串本旅客中心想話租單車，果個睇舖的居然做了個「大交义手勢」，話落雨唔租單車. . . . . ，停左雨都唔肯租，乜咁衰架. . . . . 只有行路遊 串本。

由串本駅行足半個鐘，便到  橋杭岩。

只遊了一個景點便要散了，去唔到其他地方。小太熊話：「咁不如食啦」於是求其行入一間壽司店試試。

串本市 黑潮壽司

中拖羅壽司(￥200) – 魚味和油味都平均，唔錯。

三文魚子軍艦(￥200) – 唔夠魚油香，而且太咸，元氣果啲都好過佢。

海胆軍艦(￥200) – 挑. . . 腥的，劣貨，衰到離晒譜。

鰻魚壽司(￥150) – 正常返小小。

章紅魚壽司(￥150) – 以為呢件OK？點知淡到完全冇味，啲根仲大到我吞唔落舊魚，有冇攪X錯呀間野，响自家地方賣啲咁野。。。。差啲激到寫信去安倍進三果度投訴佢。

食完呢餐，我同小太熊都好谷氣，唯有再入另一間，希望食返啲好野消消氣。

今次去串本駛外的 錦壽司

大拖羅壽司(￥378) – 上等貨，好好食，心情即刻靚返。

中拖羅壽司(兩件￥525) – 又係上等貨，和大拖羅各有各好食。

赤身吞拿魚壽司(兩件￥273) – 都係好嘢。

<<白浜>>

乘13:31 – 14:21 JR特急去温泉之鄉 白浜。今晚會在白浜住晚好野，Chech-in前先順路去一去附近景點先。在白浜駅乘巴士在 臨海站落車，即到円月島。

白浜円月島，今日天灰，無緣見到夕陽在島上個円出現了。

影完相沿路行去「白浜站」再乘巴士去「草原の湯」落車，對面就見到温泉酒店 –海舟。

16:00準時到達白浜温泉酒店 海舟

小太熊知我一向鐘意住高層，特登Book了間最頂層的大房比我嘆，間房個View好得，設備都好好，仲有大露台同户外浴缸，剩係留响間房都嘆到夠。

海舟曉の抄(連早、晚餐加宵夜再包酒店內所有温泉)每晚￥57300 – 是頂層的海景雙人房。

房間附送的小食

露台望出的全海景，可借天色還是灰灰的。

放底行李，第一件事係浸温泉。海舟有6個露天温泉，有2個分別位於男浴場和女浴場內，冇乜特別。

其餘4個露天風呂分別係:

1.)  私人露天風呂 岩户の湯

2.)  私人露天風呂 石匠の湯

3.)  私人露天風呂 梅香の湯

4.)  男女混浴公共露天風呂 浜千鳥の湯

私人露天風呂冇得Book時間，只可坐在休息室等人用完後把鎖匙放回原處，有些可遇不可求。

我同小太熊第一時間衝落 浜千鳥の湯，點知返應快絕的小太熊見到啱啱有人從「岩户の湯」行出來，就牛咁眼望住人哋手上條鎖匙，果個人feel到 小太熊的眼神後，主動交條匙比小太熊. . . . . . . 小太熊萬歲

私人露天風呂 岩户の湯 – 係三個私人露天風呂最靚最大的一個。

舒服哋嘆了半個鍾，返房沖身，食17:30開始那場晚飯。晚飯在飯堂食，有窗口位，居然見返個夕陽呀。

海舟 夕陽下的晚飯

晚飯餐單，好豐富，味道亦比昨晚好(因為價錢都貴好多)。

餐前酒 紀州梅酒 – 酸酸咪咪，醒胃又好味。

前菜(1) – 櫻花豆腐。賣相好但味道普通。

前菜(2) – 紀州蒸蛋，又香又滑。

前菜(3) – 醬油墨魚肉、魷魚菜卷加鯛魚小壽司，偏咸。

熱湯 – 龍蝦清湯，蝦肉又大又鮮甜。

刺身(1) – 勝浦產 中拖羅 + 熟八爪魚，高質素之選，好食。

刺身(2) – 鰹魚沙律，又係靚嘢，GOOD。

燒物 – 香草螺肉，OK!

主菜 – 熊野和牛火鍋，每人三大片。

主菜 – 火鍋伴菜

主菜 – 熊野和牛火鍋，牛肉味香濃，肉質都一絕，出色之作。

尾菜 – 凍賴尿蝦肉，幾鮮甜，有騖喜，但小太熊話認唔到係 賴尿蝦喎。

飯麵類 – 冷麵，質感差加太淡口。

甜品(1) – 牛奶布丁，又滑又香甜。

甜品(2) – 鮮果凍，好清甜好好味。

食完飯才19:15，去休息室碰碰運先。嘩！有條 石匠の湯的鎖匙，即攞。

私人露天風呂 石匠の湯 – 唓！個池超細，浸兩個人都迫，而且冇View。

攞返條鎖匙上休息室，居然見到條 梅香の湯的鎖匙，正呀。

私人露天風呂 梅香の湯 – OK啦，叫做試晒三個私人露天風呂了。

最後浸埋男女混浴的公共露天風呂 浜千鳥の湯。男女混浴？？有咁筍？？梗有啦。。。筍到要嬲塊大布添呀。

公共露天風呂 浜千鳥の湯 – 酒店最靚的風呂

浸到周身軟晒，坐在酒店大堂休息一陣。

再返房嘆漢，望吓個夜景。

小太熊一早話左要去白浜的「足湯橫丁」一邊浸脚一邊食拉麵，所以今晚夜媽媽九點三帶了小太熊由酒店行25min過去「足湯橫丁」。沿途鬼影都冇隻，又黑媽媽，小太熊驚到面青青，又開始媽我. . . 做咩唔搭的士啫. . .要行路咁鬼危險. . . 慳果雞碎咁多車錢. . . 仲細咩. . . . 揾啲咁嘢玩. . . 比人劏左都唔知咩事. . . 咁耐都未到架. . . 你有冇行錯路架. . . 你識唔識路架. . . . . . . . . . . . .

其實小太熊未講完已到目的地了，同埋. . . 我都想坐的士，不過真係一架都唔見囉。

白浜 銀座通 – 靜ing ing，令我唸起 千與千尋。

21:45到「足湯橫丁」，關門了，啲書同網明明話深夜23:30至收檔，今次真係「比人揾丁」。

仲趕得切22:08的尾班巴士返酒店，好彩啊。

返到酒店，有免費拉麵做宵夜，味道都好好架。

食完麵，仲要返房浸埋個露台浴缸至肯瞓，住好嘢真係好忙架。

補充資料 :

1.        日本和歌山縣的 勝浦漁港是全球最高吞拿魚獲的魚港，比築地更高。吞拿魚拍賣由每朝約07:15開始，遊客可在市場外或2/F參觀。遊客亦可於07:00前在2/F報名參加45min的導賞團，會穿上水鞋近距離接觸吞拿魚，每位只￥1000，是很特別的體驗。

2.        由勝浦碼頭行去勝浦漁港只需5min。

3.        乘JR特急由勝浦駅去串本駅，車程約32min，可用JR Kansai WIDE Area Pass，散票￥1110。

4.        串本駅有Locker，價錢一樣。

5.        乘JR特急由串本駅去白浜駅，車程約50min，可用JR Kansai WIDE Area Pass，散票￥1890。

6.        白浜市的巴士班次好密，十幾分鐘便有一班車，而且很準時。

7.        從白浜駅乘巴士到 臨海站(円月島)，每位￥330，車程約17min。

8.        從「白浜站」(円月島)乘巴士去「草原の湯」(海舟)，每位￥200，車程約5min。

---待續---