極地追蹤(10) – 芬蘭 赫爾辛基(Helsinki)

赫爾辛基(Helsinki)正宗柴火芬蘭浴場Kotiharjun Sauna

極地追蹤 挪威•芬蘭•愛沙尼亞 – Day 9

<<塔林(Tallinn)>>

今日晨早乘船由塔林返赫爾辛基，05:45起床執行李，再行25min出Terminal D。今日唔係太凍，應有-1℃左右。

06:45行到Terminal D，仲未天光。

07:30準時開船，我們一上船即刻去自助餐廳攞個窗口位先。

自助早餐每位€ 11，幾抵食。但煙三文魚唔太新鮮，麻麻。

食完早餐四圍參觀吓，先去船尾，好靚好開揚。

船頭都幾好坐，我們便在這裡坐到落船。

<<赫爾辛基>>

落船後即刻有架Tram No.9開車，票都買唔切又上車了。目的地返火車站，今晚Book了火車站附近的酒店 – Radisson Blu Plaza。

Radisson Blu Plaza

雙人房(連自助早餐)每晚€ 96，房間好靚。

放低行李便開始赫爾辛基一日遊。

三聖教堂(Cathedral) – 赫爾辛基地標，比不上東西歐或俄羅斯的大教堂。

露天市場，賣普通雜貨，冇乜睇頭。

跟住在碼頭買了張One Day Travel Pass，坐船去 芬蘭堡(Suomenlinna Sveaborg)。

小船在碎冰塊中航行10min，有少少破冰船感覺。

見到 芬蘭堡(Suomenlinna Sveaborg)了

其實 芬蘭堡都幾悶，無無聊聊在島上用個幾鐘行了個圈。

落船先穿過這鐘塔，再沿指示路牌行。

沿途就係睇這些小屋、炮台、城牆. . . . . .

好快行完一個圈，又返到碼頭了。

坐船返赫爾辛基，天色依然灰暗。

奥班斯基教堂(Uspendki Cathedral)，都係普通。

舊農貿市場(Market Hall)，冇開門。

在舊農貿市場旁乘Tram No.3T去石室教堂。

石室教堂(Temppeliaukio Church)入口

石室教堂(Temppeliaukio Church) – 比較特別，是赫爾辛基最值得這覽的教堂。

見到神聖的氣芬，當然要跪低認罪悔改啦。

點知認完罪悔完改之後，小太熊話我根本就係想洗乾淨D罪之後又可以犯更多的罪，話我好古惑. . . . . . . 咁都比佢踢爆

跟住又乘Tram No.3T去 西貝流斯紀念碑(Sibelius Monument)

西貝流斯紀念碑(Sibelius Monument)

悶了半天，終於到今日戲肉了，就係來個 正宗芬蘭浴啦，一場來到芬蘭都唔試地道芬蘭浴，又點算來過芬蘭呢。

這間公共芬蘭浴場Kotiharjun Sauna始創於1928年，是市內少數燒柴火的Sauna浴場，場內只有Sauna浴室、沖涼房和更衣室，沒有水池。Sauna浴室內的濕度較一般的Sauna高，溫度亦高至100℃，好激。

浴場有分男賓和女賓部，男賓就人山人海，女賓就小貓三、四隻。

二樓的女更衣室

Kotiharjun Sauna的Sauna房的現場環境就係咁樣，完全一樣，得人驚。

(借用浴場網址 http://www.kotiharjunsauna.fi/ 的相片)

可能因為得我一個遊客，焗的過程都不斷有芬蘭人同我吹水，又教我用 樺樹枝葉打身，佢哋都很友善好客。

不過芬蘭人就唔係好衞生，個個用籮柚唔鋪毛巾坐到濕tat tat，第二個又坐落去，個個都係咁，攪到我都要入鄉隨俗。

Kotiharjun Sauna的大門口經常坐滿麻甩佬，在Sauna房焗完即刻在室外–5℃氣溫下吹風，可達到過冷河的工效。

焗完個幾鐘，小太熊玩完行出大門仍見我同芬蘭人吹緊水。Oh！夠鐘要走了，今晚Book了間赫爾辛基Number One的餐廳食餐好嘢。

赫爾辛基Number One的餐廳 – OLO

出發前看Lonely Planet，佢話在OLO食個Set Dinner每人要 € 59，我就預了這個數目行入去啦。入到餐廳，感覺不算特別高檔，坐位距離都幾迫，但招呼就唔錯，當時已9成滿坐。

同一般高檔嘢一樣，一坐底Drink List都冇便問我飲乜(大佬，雖然我唔係冇銀用，但都唔係種銀紙架，唔知價亂叫嘢肯定唔係我杯茶)，我隨口答佢Water囉。佢下一句就(果然不出我所料)問我要Sparkling定Mineral Water，頂，又要我熟練地答“Tap Water”得啦，差點想加句 --- 唔駛錢果D水呀！！！

叫完水，看見枱面只放了這張紙Menu. . . . . .

嘩！最平要€ 89，加埋酒要€ 161添，雖然唔係食唔起，但冇諗過咁貴喎！我便問Waiter有冇其他Menu，佢就話只得呢張紙，€ 89個餐有6道菜另廚師加送幾道前菜，€ 161個餐就每款菜都伴一杯House Wine，我見全店每枱都有酒，於是乎. . . . . . . . . . . . 都係要份冇酒Set Dinner啦，太貴了。Waiter話Set Dinner菜式日日唔同，視乎當日的食材，每日由廚師決定。

第1道菜(廚師送的) – 有粟米味的. . . . 像cream又像湯，得三啖飲完，上枱時已係咁樣，唔係我飲剩了才影相。味道都幾特別。

第2道菜(廚師送的) – 眼睇像香腸切粒，但我食到有紅蘿白和白蘿白味，爽爽哋. . . .

第3道菜(廚師送的) – 上面係脆薯仔絲，下面係蘿白薄切，用雲石盛着上枱的一味豪華小食。

第4道菜(任食的) – 新鮮麵包伴牛油，暫時最好食呢味。

第5道菜(Set Menu的Course 1頭盆) – 好細份，講真食完都唔知佢係乜，左邊係芝士味但冇芝士質感，中間話係羊奶芝士但入口就起泡然後消失，右邊又係蘿白. . . . . . . . . 真係好特別，但我開始覺得平嘢好味D。

第6道菜(Set Menu的Course 2頭盆) – 又係主打蘿白？？這是蘿白餐嗎？？？

第7道菜(Set Menu的Course 3主菜) – 終於似樣了，三款生牛肉共三小啖，OK啦。

第8道菜(Waiter話係Set Menu的Course 3主菜，連牛肉一起食的) – 頂級黑魚子醬，二人有一盒，完全唔脆的，但油香入口歴久不散，好嘢來的，比莫斯科同價的更好食，小太熊食得好開心。

第9道菜(Set Menu的Course 4主菜) – 細細舊魚肉，冇乜特別。

第10道菜(Set Menu的Course 5主菜) – 細細舊鹿肉，又係冇乜特別。

第11道菜(廚師送的甜品) – 怪味刨冰，味道好怪。

第12道菜(廚師送的甜品) – 果仁雪糕條，好味。

第13道菜(Set Menu的Course 6甜品) – Snowman綿花糖，又cute又好味。

由19:30食到22:45，小太熊差點瞓着了。明天最後一日，去大人同小朋友都籦意的姆明村。

補充資料 :

1.    赫爾辛基一日交通票€ 8，可乘巴士、電車、地鐵和去芬蘭堡的船，抵買。

2.    赫爾辛基公共芬蘭浴場Kotiharjun Sauna有分男賓和女賓部，入場每位€ 12，要毛巾另加€ 3。這浴場是赫爾辛基最值得去的地方。

---待續---