日本 關西(1) – 飄櫻幻景 • 和歌山城

開滿櫻花的 紀三井寺@和歌山市

農歴年假期在北歐過了10日，幾乎日日在冰天雪地由早玩到晚，寒毒攻心。小太熊唔想我的寒毒積响五臟太耐，於是復活節假又帶了我去日本7日，日日浸温泉把寒毒迫出體外，佢話可以順便睇埋櫻花添. . . 正呀。

去之前明明講好話玩Hea啲，7日剩去和歌山，點知小太熊諗諗吓又嫌悶，又要去埋 有馬、神户、京郡、大阪. . . . . . 噏得出的都要去，最後又係將休養生息的行程改成日日朝六晚十一，博到盡。

飄櫻幻景•温泉醉鄉 日本關西 – 序

今次日本關西7天計劃行程包括 :

Day 1 – 零晨飛日本關西，再轉JR火車去和歌山市。早上乘 貓電車去 貴志市摘士多啤梨。中午返和歌山市，去 紀三井寺賞櫻花。然後去 黑潮市場BBQ和睇劏吞拿魚表演。晚上遊和歌山城賞夜櫻。晚上到「井出商店」食拉麵。晚上住 紀州の湯ドーミーインPremium和歌山(Dormy Inn Premium Wakayama)。

Day 2 – 酒店自助早餐後，乘JR往 勝浦。在勝浦市 桂成金槍魚食午餐。餐後往 熊野那智大社。黃昏Check-in勝浦 中之島，在酒店浸温泉加晚飯。

Day 3 – 晨早乘船返回 勝浦魚市場，參觀吞拿魚拍賣。返酒店早餐後check-out。乘JR到 串本市，踩單車2小時。然後順道去 白浜市，check-in白浜温泉　浜千鳥の湯海舟。在酒店浸温泉加晚飯。

Day 4 – 朝早浸温泉，酒店自助早餐後check-out。上午浸 崎之湯，中午遊 三段壁和平草原公園賞櫻。黃昏乘JR返大阪市，夜遊 大阪城賞夜櫻。晚上住大阪市 日航大阪酒店。

Day 5 – 朝早遊 大阪城賞夜櫻，中午乘 阪急電車去京都。遊円山公園、白川河、清水寺和三年坂，午餐於名豆腐店 奧丹。晚上再遊清水寺、白川河、花見小路。晚上住 知恩院和順會館。

Day 6 – 朝早遊京都 哲學之道和櫻花鐵路，中午乘 阪急電車往神户，在名店「ビフテキのカワムラ(Beef Steak Kawamura)」食神户牛午餐。餐後乘有馬線至 有馬温泉。入住 竹取亭円山，在酒店浸温泉加神户牛晚飯。

Day 7 – 朝早浸温泉，酒店食早餐後check-out。上午遊 有馬，中午乘火車回神户，在 三田牛飛苑食炭燒神户牛。餐後乘 阪急電車回大阪。在黑門市場食 全河豚晚餐後，乘南海電鐵去機場，21:15機返香港。

飄櫻幻景•温泉醉鄉 日本關西 – Day 1

零晨乘01:15 – 05:45樂桃航空至日本關西機場，但班機Delay至06:30才到埗，令今日極趕的行程更趕了。

樂桃航空的飛機要在 關西機場Terminal 2上落，由Terminal 2又要乘10min接駁巴士才到Terminal 1的出入境大樓，十足Air Asia咁麻煩。落機後即刻分秒必爭跑出去，在機場火車站外買完張4日JR Kansai WIDE Area Pass後，趕得切乘07:27 – 08:17班JR由機場去和歌山駅。

<<和歌山>>

在和歌山駅外Lock好大行季，行返入和歌山駅9號月台，便是Tama號貓電車的專用月台了。

趕及08:54的貓電車，走了呢班要等個幾鐘才再有貓車了。

貓電車好靚呀，小太熊勁開心，不斷要我四圍影相。

呢班早車得幾丁客，我地包了整卡車坐。

車內有貓坐位啦、貓圖書啦，連小玉站長個friend多啦A夢都有。

影吓影吓，一陣就到中途站 伊太祈曾駅，被車長叫了落車，因為呢班車在這裡總站，唔到貴志駅啊！

在伊太祈曾駅落車，要等30min才有下一班普通車去貴志。

順道行吓 伊太祈曾神社，只有少量櫻花樹。

貴志川線的 草莓電車，明顯冇貓車咁靚。

貴志川線的 玩貝電車，始終係貓車靚啲。

十點幾終於到貴志駅了，去探 貓貓小玉站長呀. . . . . .

唔係吓話，小玉站長比玻璃櫃鎖住，完全冇活動空間，見佢冇晒心機郁都唔郁就心痛了。。。。。。。

其實. . . . 放些靚裝飾咪算囉，應該放返隻貓貓。

在貴志駅外，便會見到 士多啤梨園的廣告。

由貴志駅行到士多啤梨園途中，見到好多櫻花樹都開滿花了。

由貴志駅行15min便到士多啤梨園的接待處。

我行埋去比錢啦，點知問我有冇Reserve，No reserve就“大交义手勢”， 唔係嘛，山長水遠來到你話唔受我玩？？？小太熊當堂O咀唔知點算，我立刻死Lur唔肯走，繼續死Lur，終於隔離有個善良嬸嬸過來收我錢。

車我地去附近一個士多啤梨園，裡面已有人摘緊來食了。

其實士多啤梨園根本冇Full，園內的士多啤梨又大又甜又多汁又新鮮，真係人間極品。

好彩今朝未食早餐大把Quota，我不停狂摘狂食，至少食了60粒大士多啤梨，真係好香，好甜。這裡士多啤梨的品質比幾年前我在澳洲搭斯曼尼亞摘到的更靚，係我食過最好味的士多啤梨，￥1500位實在值得。

摘完士多啤梨，乘11:55的貓電車回和歌山駅，順利駁到12:45的JR，搭兩個站到 紀三井寺。

從火車站要上好多級樓梯才上到 紀三井寺，行到標晒汗。今日剛好是 紀三井寺開滿櫻花的日子，全寺及附近山頭都佈滿盛放的櫻花，可惜欠了一片藍天。

櫻花盛放的紀三井寺

由於要趕下一場，15:00前到黑潮市場睇劏大魚，只能在紀三井寺停留40分鐘，實在唔多夠喉。由山上行返落山脚，趕得切乘13:58的No.42巴士直接到 黑潮市場，過了呢班車要等成粒鐘了。

按照預算時間，14:20已到 黑潮市場。

黑潮市場只係個面積不大的街市，行半個鐘乜都睇晒。

師傅準時15:00表演劏吞拿魚，見佢一刀一件又快又爽，都幾有工架。

好快已劏成數件，部份即刻攞去賣。

在檔口已放滿大拖羅、中拖羅和赤身壽司，我揀了盒￥2000的大拖羅，抵食。

雖然只係黃鰭吞拿，唔係最頂級的藍鰭吞拿，但味道都好好，充滿魚油香。

在附近檔口買了碗 北海道海胆三文魚子飯(￥2300)，價錢唔平，但海胆居然有腥味，三文魚子得個咸字，香港元氣都有過佢多多，很難估到在日本食到如此劣貨。

再買些海產出外BBQ

今日個BBQ場只有幾枱客，可以坐海邊窗口位。

北海道元貝(每隻￥350)；生蠔(每4隻￥1000)；細螺(每4隻￥1000)；死中蝦(每隻￥450)；鰻魚(每串￥500)；牛舌(每串￥450) – 全部都係好普通，完全講唔上鮮甜，更加唔好望有騖喜，旺角街市賣的貨一定好過呢度。

食完飯，坐No.116巴士返和歌山城。到達和歌山城已經差不多18:00了，天灰灰但又未入夜開燈，唔多夠Colour，好彩櫻花開到爆滿，一陣風吹過，櫻花像雪一樣飄落. . . . . . 好靚啊！

櫻花樹下的和歌山城

終於有時間慢慢行，離開時開始著燈了。

從和歌山城行返今晚住的酒店只需20min，酒店位於和歌山駅附近，又有免費天然温泉浴場，幾好。

紀州の湯ドーミーインPremium和歌山(Dormy Inn Premium Wakayama)

雙人房(連自助早餐和温泉浴場)每晚￥9500

還有時間，於是迫小太熊行20min返去和歌山城賞夜櫻。

和歌山城公園入口

公園門口就係呢棵 櫻花樹王

夜晚好多本地人喜歡在櫻花樹下吹水飲酒賞櫻

夜晚的和歌山城，比天黑前靚得多了。

賞完夜櫻，又要行20min到今晚食飯的地方，名拉麵店 – 井出商店。這裡的拉麵公認是全日本最好味的，怎可不試試。

名拉麵店 – 井出商店

這裡只賣一款豬骨湯拉麵，分大(￥800)、中(￥700)和小(￥600)，我食大碗啱啱好，叫了碗細的給小太熊，佢話唔夠食呀，仲屈我話我蝦佢. . . . . .

大豬骨湯拉麵(￥800) – 湯底豬骨味又濃又香，麵質亦上成，豬肉夠腍，話佢係全世界最好食的拉麵，我到今日都唔會返對。

夜晚返温店嘆温泉，這間 紀州の湯位於酒店2/F內，免費供住客使用。

23:30終於可瞓覺了，今日好眼瞓. . . . . 實在好眼瞓。

補充資料 :

1.        ￥100兌HK$ 8.256。

2.        樂桃航空 香港去 日本關西來回機票HK$ 5032。

3.        樂桃航空的飛機要在 關西機場Terminal 2上落，由Terminal 2又要乘10min接駁巴士才到Terminal 1的出入境大樓，十足Air Asia咁麻煩。

4.        4日JR Kansai WIDE Area Pass(可在和歌山至勝浦便用) 每位￥7000，在機場火車站外有售。只可乘搭關西地區的JR，如非去和歌山線，散買或乘其他私營鐵路較化算。

5.        由 關西機場乘 JR特急到 和歌山駅，車程約45min，可用JR Kansai WIDE Area Pass。

6.        貴志線貓電車在 和歌山駅9號月台上車，全日票每位￥650，去到月台才有票賣。由和歌山駅到貴志駅，全程約35min，值得玩。

7.        貴志線電車有分 貓、草莓、玩具和普通車4種，記住上網check好班次才Plan行程。

8.        貴志市的士多啤梨園入場每位￥1500，可在園內任摘超甜新鮮士多啤梨食，但唔可以攞走，必須預約。

9.        關西的 火車站和大地鐵站外都有Locker，大￥400，中￥300。

10.    和歌山市的 巴士平均1個籦只有一班車，而且非常貴，可考慮買一日票。

11.    紀三井寺入場費每位￥200。

12.    從 紀三井寺到 黑潮市場可乘No.42巴士，車費￥250，約1個籦一班車。

13.    從 黑潮市場到 和歌山城可乘No.116巴士，車費￥510，約1個籦一班車。

---待續---