細味名城 葡萄牙(2) – Sintra五彩迷宮Palácio Nacional da Pena

葡萄牙 仙查鎮(Sintra) – 佩納宮(Palácio Nacional da Pena)

佩納宮(Palácio Nacional da Pena) 是葡萄牙七大奇蹟之一，位於里斯本附近的 仙查鎮(Sintra)一個山丘的山頂，極具童話色彩，是我在歐洲見過最靚的宮殿。宮殿的內部和一般歐洲古堡沒有分別，因此她的外圍比宮殿內更值得遊覽。從宮殿沿小徑步行約20mins到達十字架山Cruz Alta，從那裡可以用最佳角度欣賞佩納宮。仙查鎮(Sintra)於1995年被聯合國教科文組織列為世界遺產，包括摩爾人城堡，佩納宮和仙查皇宮。

狂熱時空 西班牙‧細味名城 葡萄牙 – Day 3

<<里斯本>>

今朝06:45起身，07:00便第一個衝入餐廳食早餐。早餐可以嘆45mins，然後乘火車住 仙查鎮(Sintra)。

食早餐的餐廳都像宮殿一樣，胃口都好啲。

食物種類唔算多但味道很好，仲有Cava任飲，難免又食多好多了。

小太熊又話禾晨早又酒又肉，對身體唔好喎！！返到香港要食返麥皮喎！佢好好心機教育禾架。

從酒店行2min便到火車站Rossio Station，每30min一班車往Sintra。

這程火車可以用Viva Viagem Card扣錢，每位 €1.8，車程約30min。

<<仙查鎮(Sintra)>>

仙查鎮(Sintra) 火車站

08:35便到Sintra了，頭班往佩納宮的巴士開10:00，行上去又太熱太甘，小太熊可能會發圍，所以都係坐的士去最穩陣囉。

從火車站乘的士往佩納宮車程約10min，車費 €11.7。去到佩納宮至知要等到09:30至開門，2條友便儍吓儍吓四圍望，等到佢開門為止。

開門了，禾忟立即買飛入場，哇哇！！現場仲靚過啲相呀，不過要成 €13入場。

佩納宮(Palácio Nacional da Pena) 正門口

晨早趁人少少，立即在宮殿的四圍影相，蝗蟲大軍殺到便慘了。

宮殿內部其實冇咩特別，唔入去都唔覺可惜。

行完宮殿，沿小徑往十字架山Cruz Alta，在這裡可以用最佳角度造望佩納宮架。

十字架山Cruz Alta

在佩納宮行30min過對面的小山有產 摩爾人城堡(Castelo dos Mouros)，質素一般，見個個人都去，順路所以去埋。

摩爾人城堡(Castelo dos Mouros)

從摩爾人城堡望去佩納宮的角度只係麻麻，所以趕時開的話可以去呢度。

摩爾人城堡內可以沿城牆行到最高處，沿路亦可以回望向仙查鎮(Sintra)。

摩爾人城堡的這段城牆路感覺幾壯觀。

仙查鎮(Sintra) 的全景，中間那應就係 仙查皇宮(alácio Nacional de Sintra)。

從摩爾人城堡行20min便返落山，慢慢閒逛仙查鎮，細味葡式的花磚街道。

行到小鎮內一開人山人海的人氣餅店“Piriquita”，小太熊叫禾買了2件葡式甜點(每件€1.1)試吓，圓形的芝士撻Queijada是Sintra的特產，葡撻的近親，甜甜哋帶有點肉桂味；長條形的Travesseiro是芝士蛋黃卷，兩款都OK，可以一試。

人氣葡式甜點 芝士撻(Queijada)(左)和 芝士蛋黃卷(Travesseiro)(右)。

小鎮內的露天餐廳Restaurante Alcobaça坐底休息飲杯果汁。

特大 奇異果汁(€6.6)；橙汁(€6.6)

在火車站旁乘這部No.403巴士往 Cabo da Roca(羅卡角)

No.403巴士從Sintra往Cabo da Roca車程40min，車費€4.1，上車買票，不可用Viva Viagem Card。

<<Cabo da Roca(羅卡角)>>

終於來到歐洲的西極盡頭了。

Cabo da Roca(羅卡角) 面向大西洋的十字架

歐洲西極盡頭的燈塔

今日陽光普照，心情都靚啲。

行到盡頭的段崖非常壯觀，在這裡唔太多人行過來，因大部份團都只在十字架那裡影相。

嘆夠後便乘巴士離開，但巴士遲到30min，等到頸都長。No.403巴士從Cabo da Roca往Cascais車程25min，車費€3.25，上車買票，不可用Viva Viagem Card。

<<Cascais>>

Cascais火車站

Cascais是里斯本附近一個小鎮，鎮內有完美的海灘和人氣雪糕店，沿海岸有無數靚位食嘢，值得預留半日以上游水食飯。

65年老牌人氣雪糕店“Santini”，要排半個鐘至買到雪糕食。

4球雪糕(€5.5) – 芒果、士多啤梨、果仁和拖肥，味係唔錯，但水準唔算係最頂級，唔值得排咁耐隊買。

沙灘上非常多人，Cascais的海岸線相當靚，比得上法國南部。

海鳥們都十分寫意

泳客們都玩得很狂野啊。

從Cascais乘火車回里斯本車程30min，可用Viva Viagem Card，車費扣 €1.8。

<<里斯本>>

火車經過Belem站，落車後沿海旁行20min便可到里斯本地標 發現者紀念碑，沿途亦可以望見4月25日大橋和耶蘇像。

4月25日大橋(Ponte 25 de Abril)和耶蘇像(Cristo Rei)

Padrão dos Descobrimentos(發現者紀念碑)

去到紀念碑時已經關門上唔到去，只能在外圍行吓。

正當禾忙於四處影相時，在發現紀念碑前發現了大近事，就係小太熊目光呆滯，動作援慢，好似隻冇乜電池的兔兔一樣，大鑊了，因為行程太充實，小太熊的電池用盡了. . . . . .

儘管已經冇晒Power，但堅毅不屈的小太熊堅持唔肯返酒店义電，要繼續完成今日行程，小太熊真係叻。 

再沿海行15min，來到 貝倫塔旁一個廣場，氣氛有些像波爾多紅酒節。

貝倫塔(Belém Tower)

哲羅姆派修道院(Jerónimos Monastery)

修道院位於里斯本貝倫區，單睇外觀已可以說是在里斯本最為突出的古蹟，與附近的貝倫塔搭檔被織列為世界文化遺產，可惜禾冇時間，兩古蹟都入唔到場。

沿 哲羅姆派修道院慢行一會，便到 里斯本的必到之地，葡撻的起源地Pastéis de Belém。

聽講話 葡撻的葡名叫Pastel de Belém，係Jerónimos Monastery的修女研發的。好耐以前，葡國仔鍾意用蛋白來釀砵酒，葡國女就鍾意用蛋白來造燙衣服的 衣漿，蛋黃就沒有人要。修女細個時日日唸經敬拜完天父之後便冇乜世藝，介吓仔都唔準，於是修女便用空餘時間，把沒有人要的蛋黃研發成在康江曾風靡一時的 葡式蛋撻。

來到葡萄牙，亦只有在Pastéis de Belém才可吃到澳門安德魯餅店水準的葡撻，其餘地方吃到的全是Rubbish，不管是高檔地方還是地道café。

葡撻的起源地Pastéis de Belém

店內員工雖然快手，但仍然長期Keep住條小人龍。

元祖葡撻(Pastel de Belém)(€1.2) – 熱辣辣，酥皮香脆鬆化有層次，蛋漿香濃味美甜度適中，比得上澳門安德魯餅店的出品，好味。

食完撻，在對面馬路乘 Tram No.15(Viva Viagem Card扣€1.2) 回Bairro Alto區食晚飯。今晚想去間有Fado表演的餐廳，但未有Target。

Bairro Alto區晚上很多食店，十分旺場。

行到21:00已行片成個區了，感覺呢間最好，入去問問，剛好剩有張2人枱。

Bairro Alto區的90年老店Fado餐廳 – Café Luso

全場爆滿，全部個Look都係可以坐關愛坐都唔會比人上網嘅富貴長昔。

一邊吃飯一邊欣賞Fado，貴些都值得。

先來支375ml最Cheap的細白酒(€14.5)，都好清香架。

Loins of Braised Dry Codfish(燒馬介休)(€32) – 燒咸鱈魚，魚肉風乾了一半，肉質較實，保留了鱈魚的油香，整體上偏咸，唔係好慣食。

另加了個€41三道菜的晚餐，散點要€60的。

頭盆 香草煎蝦 – 廚功一流，肉質彈牙香口，好味。

主菜 廚師精選是日大西洋鮮魚 – 魚肉很鮮嫩，味道唔錯，比馬介休好食。

食到22:00，Fado節目完了，只欣賞了45min，早知Book定位19:00準時入場啦，小太熊話我功課做唔足，佢真係好啱好有道理呀。

甜品 雲呢拿雪糕 – 吃完咸魚後最arm食

食完慢慢沿昨日行過的路行返酒店。

補充資料 :

1.        從里斯本到Sintra，可在火車站Rossio Station乘火車，每30min一班車，這程火車可以用Viva Viagem Card扣錢，每位 €1.8，車程約30min。

2.        從Sintra火車站乘的士往佩納宮(Palácio Nacional da Pena)車程約10min，車費 €11.7。

3.        從Sintra火車站旁可乘No.403巴士往Cabo da Roca(羅卡角)，車程40min，車費€4.1，上車買票，不可用Viva Viagem Card。

4.        No.403巴士從Cabo da Roca往Cascais車程25min，車費€3.25，上車買票，不可用Viva Viagem Card。

5.        從Cascais乘火車回里斯本車程30min，可用Viva Viagem Card，車費扣 €1.8。

---待續---