細味名城 葡萄牙(3) – 漫步 里斯本(Lisbon)

葡萄牙里斯本 縱橫交錯的電車網

葡萄牙的首都 里斯本(Lisbon)是個奇怪的城市，除了沿海的一段路是平路，幾乎全部都係斜路，不是上斜便是落斜，明明已上了一大段斜路以為已到頂，卻又要落返斜後再行上一段才到埗，里斯本市民的運動量一定非常充足。

U乜加仙介紹 里斯本時說，如果在里斯本時只能做一件事，去坐電車吧，尤其是Tram No.28，這電車路線穿梭城內的Alfama、Bairro Alto、Baixa和Chiado四個社區和高低起伏的街道，坐完一轉確係可以體驗到里斯本與別不同之處，不過，小心扒手，真係有的。

今日有一整日時間在里斯本，禾便帶小太熊走遍市內的小巷斜路，坐電車及食盡葡國菜，唔來過都唔知，原來葡萄牙是沒有葡國雞吃的，亦沒有葡汁焗飯，真係大鄉里。

狂熱時空 西班牙‧細味名城 葡萄牙 – Day 4

<<里斯本>>

今日可以瞓多少少，07:30起床食早餐。

早餐太豐富了，日日食攪到真係有些罪惡感。

返房執好行李，放在酒店大堂，check out後便開始今日 漫步里斯本的一天行程了。今日09:00出發，禾會帶小太熊食海鮮，睇古蹟和坐電車看看這裡的民生。小太熊話喎，里斯本好多扒手的，外出時一定要小心。

從酒店行5min便到Baixa區，係里斯本較有時代感的社區。

Baixa區內有大量餐廳，但是唔供應早餐的。

但都有新鮮麵包賣，朝早唔會餓親。

從酒店開始沿途慢慢行，到達 里斯本主教座堂(Sé de Lisboa)。

教堂內部都係一般西歐式佈置啦，叫做到此一遊。

行過條馬路是另一間教堂 聖安多尼教堂(Santo Antonio de Lisboa)。

裡面平日真係冇咩特別，應該星期日朝早來聽神父吹水就好啲。

沿斜路落行幾分鐘，來到U乜加仙介紹的 神級罐頭店Conserveira De Lisboa。

U乜加仙話，Conserveira De Lisboa於1930年開業便專買罐頭，是葡國人所共知的罐頭足牌，多年來老闆都堅持用最新鮮的魚來制罐頭，是一間良心罐頭店。時至今日，Conserveira De Lisboa出品的復古包裝罐頭已經成為遊里斯本的送禮佳品。

舖頭內仍然像一百年前，有最古早的收銀機。

罐頭放滿牆身，老闆話歡迎大家唔買都來參觀吓。

枱面把每款罐頭都放了一罐，足有差不多50種，全部係海產，主要有沙典魚、吞拿、馬介休、八爪魚和青口等等。

難得來到，禾便放低了€15，拿走了6罐罐頭，有齊沙典魚、吞拿魚、青口等等大路貨，可以在餘下旅程做晚飯，味道OK的，算係好食嘅罐頭。

沿路行出海旁，四處都見像蛛網般的電車䌫。

海旁廣場Praça do Comércio

再沿大路行到一間 U乜加仙介紹的咸魚雜貨店Rei do Bacalhau。

咸魚雜貨店Rei do Bacalhau

店內賣的東西像港式的老牌辨館，有糧油砵酒，各類散娤豆類和乾貨。

還有葡萄牙的國食 馬介休，即係醃咸了的鳕魚。

咸魚可以散賣的，但試過味道完全比不上港式的馬友咸魚。

八爪魚乾，煲湯一流。

就咁行了一個朝早都唔洗坐一程車，所以買24hr票是浪費的。

行到Cais do Sodre碼頭，乘這渡海小䑳過對面Cacilhas食飯行街。

這程船可以用儲值Viva Viagem Card，扣€1.2，但24hr Viva Viagem Card就不適用。

從船上望返里斯本市好靚架，這船值得坐。

<<Cacilhas>>

到達Cacilhas碼頭，有點像工廠區，但係...區內有大量海鮮店架。

在碼頭可以乘No.101巴士往 耶穌像(Cristo Rei)，乘到總站便到，車費€1，上車買票，不可以用Viva Viagem Card。每小時2班車，車程20min。

耶穌 站在小山頂上，保護着里斯本呀！

要見耶穌當然要比錢啦，位位€4唔洗四圍望，磅完水坐電梯直上穌穌的腳下。

神聖的耶穌，真係張開雙臂照住我架，比4銀嘢便可以比穌哥照住，抵到爛啦。

穌哥就係日日望住里斯本這個View了，唔知佢悶唔悶呢。

乘No.101巴士返碼頭，時間還早，先行陣街。

碼頭附近有大量餐廳，環境仲唔錯添。

禾忟食呢間Resturant Vale do Rio，U乜加仙介紹的40年老店，環境唔係最好，但佢個2人海鮮餐就最扺食。

House Wine白酒375ml(€3.5) – 平到笑，味道亦清香。麵包(€2.6)、果醬(€1.8)和芝士(€1)自動送上。

白灼蝸牛(€3.5) – 細細隻咸咸哋有少少咬口，最arm送啤酒。

睇落去仲以為係生食添，嚇得禾吖。

全部餸到齊了，2個人食晒佢。

除了上面果啲，禾忟㸃了一份€45的海鮮餐(包括下面的3大碟)，好多嘢食架。

海鮮餐 海鮮冷盆 – 哇哇！法國麵包蟹一大隻，爆晒膏，仲異常地甘香，超級正，蟹肉亦唔錯；龍蝦一隻，不是淡味貨式，算是合格；凍蝦亦有蝦味。

蟹鉗的肉又爽又甜，和House Wine很襯。

海鮮餐 炒蝦肉 – 人口就知係新鮮貨，有蝦味又鮮甜，肉質爽口，估佢唔到咁好食，有驚喜。

海鮮餐 葡萄牙蒜頭橄欖油炒蜆 – 都鮮甜好味，但是有㸃偏咸。

<<里斯本>>

食飽飽就坐船返對面岸，再轉Tram No.28(Viva Viagem Card扣€1.2)往View Point – Miradouro da Senhora do Monte。Tram No.28係遊里斯本市必坐的電車，穿遍城內幾個舊區，但小太熊話車上有很多扒手的。

坐完整程電車，好彩冇遇到扒手，只有個神經佬企响禾後面，不斷炒炒炒鬧鬧，都幾驚嚇。

落車後沿斜路行上10min，便到觀景台Miradouro da Senhora do Monte。

這裡可以見到里斯本市的全景，而且免費的，值得一遊。

跟著沿舊城行去另一人氣景點 聖喬治城堡(Castelo São Jorge)。

Castelo São Jorge要€8.5入場，只是個舊城堡，唔多值，比禾再㨂一次一定唔入去。

從城堡亦可以望見里斯本全景，但剛才免費的觀景台都睇到啦。

唯一分別係這裡可以遠望見Elevator de santa Justa。

最後沿路行返落舊城區Alfama。

穿過Alfama區後慢慢行返酒店，攞返大行李後乘地鐵到Jardim Zoológico站，行8min到今晚住的平酒店Mercure Lisboa Hotel。小太熊貪佢近明早去的巴士站。

Mercure Lisboa Hotel

雙人房(不含早餐) 每晚€81。

天台有泳池，禾自己一個上去游幾轉，小太熊就响房眠一眠义义電先。

眠到18:30又出動，坐地鐵返Restauradores站行街頭影夜景，連續吃了多餐勁嘢，今晩想吃麥記，可惜里斯本市係冇麥記的。

  

求其去這間Café Gelo食

坐在露天座位，環境唔差架。

Sangria(500ml)(€8) – 用紅酒、鮮雜果、果汁和疏打水調出來的特飲，見枱枱都飲，便叫一瓶試試，味道幾得意的。

Pizza Pescatore(€9.5) – 我覺得味道OK，但小太熊唔係好like。

漢堡包(€3.9) – 塊肉好似溝了很多豬肉，怪怪的，只可以話唔難食，小太熊直頭覺得佢衰添。

飯後行夜街，街上都很熱鬧，行吓行吓，小太熊突然大力fing了個身一吓，禾問佢咩事啦，佢就話有人拉佢背包的拉錬，我望向後面….冇人喎，係咪太敏感呀。

小太熊：「幫我check吓先啦」

禾望一望，哇，禾冇用呀，小太熊的背包拉錬被拉開了禾完全唔知添，有彩小太熊及時察覺，小太熊仲話，係後面那個約3米距離載頭巾那條女就係女賊呀，條友仲扮晒嘢在Window Shopping，正衰賊。

比人扒完嘢好鬼驚，快快影完夜景就返酒店了。

  

Elevator de santa Justa夜景

小太熊話要再去一次那情色酒吧探險喎。

又經過陰森的小行

再夜媽媽一邊驚一邊睇樓梯的 色慾迷牆。

今晚係星期一，客人唔多，連拉濶音樂和鋼管舞都冇啊！可以早些返去瞓。

只能小睡6hr，明天一早要乘巴士往南部的海灘了。

補充資料 :

1.        里斯本市內一般可以步行到大部份景點，買儲值Viva Viagem Card比24hr車票實用，因為24hr車票不能乘船到Cacilhas和特價上觀光塔，每日亦很難坐6程以上的電車地鐵。

2.        里斯本真係有扒手，今日便遇到一個，要小心。

3.        Mercure Lisboa Hotel房內有Locker。

---待續---