越南 越Hea(3) – 世界遺產 古城會安(Hội An)

世界遺產 越南古城 – 會安(Hội An)的黃昏 

會安(Hội An)是位於越南中部臨海的小市鎮，數百年前是當時重要的經貿中心，金城武陳慧琳細個時曾經在這裡拍過一部電影「安娜瑪德蓮娜」。1999年會安古城被選為世界遺產，古城內滿佈古宅和廟宇，和檳城George Town及馬六甲等古城十分相似。

現時越南政府已經在進出 會安古城的多條通道加設了售票處(但仍有多條可以進出古城的通道不設售票處)，每當有遊客行過便有職員要求佢買入場卷，每張VND120,000，包無限次出入古城和5張散票，可以自選古城內5處古宅、廟宇或日本橋參觀。

越南 越Hea – Day 3

<<會安>>

繼續上一篇行程。

峴港洲際酒店的專車準時10:00出發，11:00到達 會安古城，慢慢行去酒店Check in先。

路過 會安古城其中一個進出口，這理都有售票處的。

今晚住的酒店Hotel Royal Hoi An MGallery Collection

酒店的大當和Check in的地方

雙人房(連早餐) 每晚HK$1191

在酒店放下行李洗個面，12:00左右沿河行入古城行街。

行到這位置遇到售票處了，被要求買了2張入場票。

但有些老外唔理佢哋掂行掂過，佢哋又冇追去追佢哋買票，這個售票方法好有問題，令人有種强烈做了儍仔的感覺。但往後的21hr內都不斷有人查票，唔買票的話只適合短遊3至5小時的人士。

會安古城激似一條小鄉村，一河兩岸還襯上小船魚網。

不少遊客都喜歡租隻小艇遊船河。

前面是很有名的 日本橋，係以前日本仔建的，要過橋就要一張散票。

日本橋旁邊有榴槤賣，又係1kg – VND100,000，小太熊買了個1.5kg的，味道比昨天那個好好多。

城內甚多小販，連老外都有呀。

會安古城最靚最旺的橋，橋頭當然有售票處啦。

慢慢從橋頭行返出古城，行大約1km左右到小太熊Target了的餐廳The Little Menu Restaurant食飯先，小太熊話呢間餐廳响 會安排名冧爸温架，所以食咗先講。

The Little Menu Restaurant – 點解排第一又係食飯時間都牡客嘅? 有些担心。

可樂一罐(VND25,000)

Cao Lau會安乾麵(VND85,000) – 會安地道麵食，是來會安必吃的一味，粗麵條加上薄切豬肉片，豬肉有肉味，麵質乾爽得來有咬口，配上香草、薄脆和魚露同吃，有嚼勁帶㸃微辣，值得一試的特色菜。

White Rose白玫瑰(VND75,000) – 會安名菜，用米槳造的煙韌粉皮包着香口的扎肉，加上薄脆和酸魚露同吃，幾好食，餃邊皺摺得像朶白玫瑰，值得一試。

BBQ Prawns炭燒蝦肉(VND155,000) – 小太熊以為有前晚那些蝦咁正所以叫，蝦肉爽脆但冇蝦味，失望，早知唔叫。

食完呢餐向北行300m，便到另一間人氣法包店再食。

會安人氣法包店<<Madam Khanh>> – 店子細細但好多人幫襯。

法式三文治(VND20,000) – 法包非常香脆新鮮，內有青瓜生菜和豬肉碎，加埋秘製辣醬汁，辣到禾七孔標汗，非常刺激好味，平靚正，下次再食。

再向北行200m便到另一人氣法包店“Phi banh mi”，雖然已經好飽，但要食埋佢。

法式三文治(VND15,000) – 法包亦係香脆新鮮，餡料大致相同，但今次唔敢加辣醬汁了，明顯冇咁好食，唔試都唔可惜。

食完嘢行返入古城，呢個入口咪冇售票處囉。

古城內的古宅“陳祠” – 進內要收一張散票。

入到去要先坐下聽專人講解“陳祠” 的歴史，和吃件會安綠豆餅(亁爭爭散收收得個甜字)。

專人全程帶着禾忟參觀，有些悶啦。

跟住慢慢在古城行街，都路過些古宅架，但每人只有5張散票唔入了，留返入些靚啲的地方。

會安理鬚店，連埋安納豆都幫襯。

會安西裝禮服，禾就唔敢著了。

遊客喜歡的三輪車，禾就鐘意自己行多啲，又慳錢又自由。

日本橋旁邊的“廣肇會館”，入去參觀吓又收禾一張票。

再入埋古宅“進記”，又冇一張票。

古城內的商店和街上都掛滿燈籠，夜晚全部亮起時巧靚架。

老外們最喜歡坐在河邊的餐廳Hea足一日，乜都唔做齋吹水。

單車漫遊古城都正架，禾忟明天早上至踩。

城內極多街頭小食，但唔啱小太熊的。

這款七彩米糕好靚呀。

路邊的 白玫瑰和涼粉冰。

日本橋 – 有人守在橋頭，過橋要收一張票的，但唔知點解佢睇完禾張票唔收就比禾過橋。

越宴越天灰了，古城亦行得七七八八。

在這間Fusion Café坐底飲杯咖啡，是Fusion Maia Resort開的，環境較好。

越南冰咖啡(VND30,000) – 算係香濃滑的咖啡，但明顯不是越南的頂級貨。

行完街16:00左右返酒店游水，泳池都好靚架。

游完水休息一會，五點幾又行出古城等天黑。

黃昏時分各類小販都出動了，食客們坐下便吃。

日落了，越夜越多遊人。

補充資料 :

1.     峴港洲際酒店InterContinental Danang Sun Peninsula Resort提供每日2班來回會安的免費接駁專車。

2.     峴港Fusion Maia Resort每日有5班免費接駁專車來回會安市。

3.     會安酒店Hotel Royal Hoi An MGallery Collection有免費供應單車給住客。

---待續---