越南 越Hea(4) – 古城會安(Hội An) 越夜越美麗

越南古城 會安(Hội An)  越夜越美麗

古城會安(Hội An)是昔日的華埠，也有很多日本人和法國人來此經商，現在是越南的世界文化遺產，吸引相當多的旅客，城內大部份商舖也是為遊客而設的，很多酒吧及餐廳沿河而開，不少老外喜歡在這裡Hea爆地由朝坐到晚。會安很多酒店都有免費單車供應給住客，自問唔怕路上有大車而且技術又夠巧的話，單車遊會安是個甚好的選擇。

每晚黄昏開始，古城會安沿河2岸便有大量小販和食店開檔，城內亦會亮起大量燈籠，肯定係越夜越熱鬧，越夜越美麗。

越南 越Hea – Day 3

<<會安>>

繼續上一篇行程。

在酒店休息完後又再次出動，到古城等待會安最美的一刻。

黃昏時分的會安古城，燈籠開始亮起，小艇繼續積極地兜客，而且日落後氣溫變得涼爽了，遊人及原居民亦不斷走到街上。

不單止行人，連單車亦多了不少。

很多婆婆亦出動向遊人售賣願望燈了，每盞售VND10,000。

坐在河邊，看着古城河岸天色慢慢變黑，燈籠亦越來越光。

禾又放了一盞願望燈，希望小太熊永遠開開心心身體健康，唔好比禾啲衰氣影響到。

連小朋友亦要出來賣燈搵食了。

很多人坐在小艇上放燈，一放就幾十盞，浮在河上巧靚啊，佢地真貪心，咁多願望。

岸邊和河上都有人影靚相啊，個肥仔有些似金正肥。

晚上滿街都放滿枱椅，食客都唔少呀。

食客們最喜歡坐在門口，好feel啲掛。

河上有間船餐廳，環境超正但價錢唔貴，都很想上去坐吓。

晚上古城的燈光更加夠色彩。

會安市的 Night Market，賣些無無謂謂唔等駛的雜貨。

Night Market有很多燈籠店，是會安的特色。

夠鐘要食飯了，小太熊中午時上網揀了間位於Nigth Market，葉Sir推介的Local餐廳“Vy's Market Restaurant and Cooking School”，裡面有很多越南中部特色菜。

Vy's Market Restaurant and Cooking School

餐廳裡面很大排檔Feel，而且都幾熱。

內有十多個攤檔製作不同的越南菜，沙嗲、烤魚、濱海、炸魚餅等等地道食品乜都齊。

還有些大餐廳唔會賣的街頭嘔心小食。

蠶蛹沙律(Silk Worm Salad)

水母沙律(Jelly Fish Salad)

辣煮檸檬草青蛙(Spicy Lemongrass Frog)

辣汁煨動物內臟(Braised Offal in Five Spice Sauce)

上面的4款小食小太熊唔準禾食，只可以Order些正經的地道菜。

越南啤酒(VND30,000) ; Sparkling Water(VND20,000)

會安牛肉湯河(VND65,000) – 妖！第一次在越南食到這麽差的河粉，仲要賣咁貴，河粉又粗又硬完全唔得，幸好湯底和牛肉還過得去，否則連禾都唔肯食。

會安五小拚(Hoi An Five Treasures)(VND85,000) – 又係超貴，這碟有齊五款越南中部的特色米糕，賣相款款唔同但其實味道一樣，都係米糕加上肉鬆脆蝦乾葱花等等，質感和味道部只係普普通通。

咖哩蟹(VND165,000) – 只有10兩左右的細水蟹，很少肉但肉是甜的，不過越南佬唔識煮蟹，那些蟹內的黑泥和腸肺等等全部冇清走一齊煮，十分核凸加樣衰。

蒸椰汁布典Steamed Coconut Pudding(VND35,000) – 呢味最好食，椰汁很香濃，伴上蒸米糕一齊食，蒸米糕很煙韌亦有米香，像一件優質的白糖糕走糖。

被葉Sir老點，這餐好不滿，於是找另一間餐廳再食少少嘢。

Fusion Maia Resort推介的會安餐廳“Morning Glory”，去到時人山人海在等位，是會安古城最多客的餐廳，職員話今晚已經客滿，唔再收新客了。

有些失望，唯有去Fusion Maia Resort推介的另一間會安餐廳“Cargo Club”， 位置正正在“Morning Glory” 對面。

Cargo Club少好多人啊，門口剛有張枱，便坐下叫嘢食。

會安名菜 炸雲吞(Fired Wonton with Crab Meat Source)(VND85,000) – 只係雜菜沙律加少少蟹肉放在炸了的雲吞皮上面，冇咩特色亦冇咩特別好食。

芒果沙律(Mango Salad)(VND95,000) – 芒果絲酸酸哋幾醒胃，伴上蝦肉和雞肉，味道一般啦。

食完晚飯，帶着不太滿意的心情行返酒店。

小太熊話掛白燈籠好似送殯喎。

小妹妹們很開心，禾都想好似佢哋咁開心。

晚上的 日本橋十分迷彩。

沿河已經開滿食店了，幾有氣氛。

返到酒店食埋中午買的榴槤，VND150,000只得咁少肉，貴過在香港食金枕頭，不過佢好味啲啦，有些少甘苦夠Creamy但又未算頂級貨，OK啦。

小太熊個胃和肚仔第二日很唔舒服，攪到冇晒心機，唔知係咪個榴槤唔乾淨呢。

---待續---