極上 • 北海道(4) – 北海之極 禮文島

日本北海道禮文島  澄海岬

禮文島 是日本最北端的小島，位於北海道 北部稚內以西約60km，利尻島的對面，和利尻島一樣盛產昆布和海膽。由於禮文島生長有200種類以上的高山植物，因此又有「花の浮島」之稱。

禮文島 本身是國家公園，島上有多條行山徑，路程由 1hr至8hr，旅客亦可以參加半天巴士團或租車遊覽島上的景點。此外，禮文島北部有日本最北的旅館 「アザラシの見える宿」，絕對值得住上一晚。

極上‧北海道 – Day 5

<<利尻島>>

  

今早06:00起身，第一時間嘆返個海景溫泉浴。

浸完溫泉去食早餐，又係坐昨晚個位。

自助早餐幾好味，尤其是北海道牛奶，非常香滑濃郁，香港賣的北海道牛奶全是A貨。

早餐每人有一大窩昆布湯，夠晒健康。

食完早餐，旅館有專車免費送住客到碼頭。

利尻島碼頭有隻小精靈送船啊，好得意。

09:20乘這艘細船去 禮文島，船程45min，二等艙船票￥800。

今日二等艙非常迫人，啲人都幾臭，所以我走了去船頭坐。

<<禮文島>>

10:15到達 禮文島，今日首先會從碼頭行3km去 桃岩展望台，約需50min。

沿途先要經過 香深港的 嚴島神社。

從這裡開始轉入山路，行約30min便到。

山徑上有很多唔同品種的野花，但數量比想像中少啊。

整段山路又濕又跣，我穿了波鞋，攪到襪都濕透。

上到 桃岩展望台了，風景開揚，獨欠藍天。

右邊那舊便是 桃岩了，遠處海中有一黑點便是 貓岩。

貓岩 都幾似隻貓，不過冇時間行近些望了。

行10min落返馬路，乘11:34 – 11:42班巴士返碼頭(每日只有5班車)。

回到碼頭，首先食午飯，今日小太熊Target了島上排名最高的海膽旁門店「海鮮処かふか」，小太熊話佢啲馬糞海膽係即開即食，巧正架。

「海鮮処かふか」位於2/F，上到去，職員話Full晒了，所有位被旅行團包晒。

晴天Pig Pig，乜叉旅行團咁討厭呀，成日包場，蝗蟲實在不分國籍，遇到只有自嘆黑仔牡運行。

小太熊唔知仲有邊間餐廳有靚海膽食，我們便行來行去逐間餐廳入去問，最後揀了這間小店，排名第二的「炉ばたちどり」，啱啱仲有位。

這小店是吃炭火爐端燒的，但抽風系统極差，油煙濃得像火祝一樣，右邊坐了一團十多個港燦嘈支巴閉......為什麽一大團人一起活動便要霸晒啲位，嚴重影响四周的人，影响四周的環境，那麽令人討厭。所以禾一向對旅行團比較反感。

為了食好嘢，環境差都要照坐。

剎波羅大生啤(￥600) – 味道較清新淡口。

這家「炉 ばたちどり」自稱是海膽飯元祖，一碗看似普普通通的馬糞丼，其實有兩層，猶如海膽三文治 !

二重馬糞海膽丼(￥4500) – 收得很貴但是落足重料，馬糞海膽又大又厚身又夠新鮮，而且分有兩層，第一層有90g，第二層有 40g，完全足夠餸晒碗飯，那種獨有的甘苦味和即開的一樣咁濃，正到冇朋友，一人一碗，食完非常滿足。

小太熊食完都話正，但佢話「海鮮処かふか」會好味啲添喎。

來到這店應該試埋這店另一鄉土料理「ちゃんちゃん焼き」炭燒魚，是將禮文島產的花鯽魚 , 塗上味噌葱花再炭燒，香噴噴每枱都食，可惜炭爐位已滿座，試唔到。

溫泉館「うすゆきの湯」食完飯行去對面這裡浸溫泉，每位￥600，休息室都幾舒適。

行完山再被油煙焗了成粒鐘，浸個溫泉特別舒服，溫泉只有室內池和這半室外池仔。

浸完溫泉天氣完全好返了，有藍天白雲。

禮文島最高的建築物 禮文酒店，座落碼頭旁邊。

回到碼頭，在這買票，參加14:05-16:30的半天團，每位￥3100，都好貴。

乘這架大巴士出發。這個團只有2個景點，就係「澄海岬」和「スコトン岬」。

澄海岬 – 禮文島國家公園的大景點，是個壯觀的天然峽彎。

附近有很多海鷗，下次帶些蝦條去餵佢哋。

澄海岬 下有一間商店賣小食，牛奶軟雪糕(￥350)幾好味，其餘就冇乜吸引。

在澄海岬停留30min，上車到最後一個景點 禮文島最北端的「スコトン岬」，我們會在那裡離團，因為今晚就住在那裏的旅館「アザラシの見える宿」。

「スコトン岬」極有天涯海角Feel，右邊便是今晚住的旅館「アザラシの見える宿」，是日本最北端的旅館。對面的無人小島叫「トド島」。

沒有旅行圑時，這裡十分寧靜隱世，與15min前是2個世界。

「スコトン岬」有一間商店「島の人 礼文島本店」，售賣大量禮文島的土産，還有海獅肉罐頭，很後悔冇買一罐試吓。

鹽水馬糞海膽200g要￥12000，這裡賣得貴，保鮮期是3日。

昆布軟雪糕(￥360) – 食到有昆布碎，味道清清哋，但被牛奶味完全蓋過，只是食佢夠地道。

「アザラシの見える宿」臨海而建的平房，是一間民宿。

雙人海景房(包早晚餐每晚￥31600) – 房間細小，較殘舊，連厠所都冇，只勝在位置好。

房間窗外的景觀一流。

在房休息一會吃了些茶點，趁天未黑出外走走。今次預算會從旅館行 3.5km去「ゴロタ山」，18:00前回來沖涼食飯。

沿路有座好特別的巴士站。

路上見到唔少野花，難怪自稱係 花之浮島。

沿途都有指路牌，從這路口開始要上斜了。

經過海邊的廢屋，已經被烏鴉佔用了。

路上還有不同品種的野花。

望到「ゴロタ山」的山頂了，好高呀，有排行。

遠望是 ゴロタ岬

「船泊村レフタトマリ」內的神社，位於「ゴロタ山」的山脚。

從這裡 轉入山路便到最後500m上山。

這段路非常大風，而且位處崖邊都幾危險，所以唔行回頭了，反正風景冇咩特別。

行另一段路返旅館，回望這「ゴロタ山」都幾靚。

回到旅館已經成身臭汗，去沖涼了。

「アザラシの見える宿」的浴室較細，是建在海邊的小木屋。

只有男女各一個最多浸 2人的細小浴缸，個景好靚，最好係大部份時間都冇人用，最差係耐不耐個跳製停電冇熱水出，未試過在日本這麽差。

沖到19:00過隔離飯堂食晚飯，今次好好彩，有窗口位，只有 3卡位都分到比我。

晚飯只有6適菜，連白飯都冇，菜式冇昨晚咁好了，只係普通嘢。

四式刺身 – 品質只算中等 ; 漬物三拚 – 有海膽一夜漬，但味道不是頂級，其餘的魚更加一般。

三文魚菜湯鍋和禮文島昆布 – 都係普通。

汁煮禮文產鮮魚 – 賣相唔好但食落相賞鮮甜，估唔到咁好食，魚肉亦很嫩，我食剩條骨。

炸魚柳 – 麥當勞的炸魚好食啲。

食完飯再浸浸浴才瞓覺。

明天一早又要離開 禮文島，展開10天北海道自駕遊。

補充資料 :

1.     ￥100 = HK$7.57 (永恆找換公司)

2.     利尻島的旅館 利尻ホテル　雲丹御殿有免費專車接駁碼頭。

3.     由 利尻島往禮文島的船程45min，二等艙船票￥800。

4.     禮文島的旅館 アザラシの見える宿 有免費專車接駁碼頭。

---待續---