西伯利亞 萬里長征(11) – 漫步古城 伊爾庫次克(Irkutsk)

俄羅斯 伊爾庫次克 喀山教堂(Kazan Church)

伊爾庫次克(Irkutsk)這西伯利亞的主要城市建於1661年，除了是旅客到訪 貝加爾湖(Lake Baikal)必經的中轉站外，這城市本身也有很多值得遊覽的景點。其中以市內最大的 喀山教堂和 安加拉河(Angara River)河岸最值得遊覽。此外，觀賞這城市街上獨有的有趣木屋也是一件賞心樂事。

西伯利亞 萬里長征 – Day 12

<<Listvyanka (Листвянка)>>

今日瞓到08:30才起床執嘢，早上陽光普照。食完早餐便要離開咁有特色的俄羅斯民宿了。

早餐有麵包和芝士，另有婆婆即製的香腸和一大碟炒薯仔，味道很好但份量太大，又怕食剩太多好似唔俾面婆婆，頂硬上都係吃了七成，真係太大碟了。

09:45食完早餐便外出搵車返 伊爾庫次克，行出大馬路不久便有部無牌的士主動問我，開價RUB 2000，講了一大論，最後RUB 1500成交。

<<伊爾庫次克(Irkutsk)>>

乘這部無牌的士，11:00已經回到 伊爾庫次克火車站。

伊爾庫次克火車站 – 先在這裏放下大行李，再出市中心行街。

大行李寄存服務毎日RUB 150。

跟著在火車站前乘Tram 4A去 喀山教堂，每位RUB 15，上車買票。

今次賣票的亞姨好古惑，只給了我2張舊車票，自己袋了RUB 30，以為我是遊客就唔知佢啲古惑野。

喀山教堂外圍是食物批發市場，我們先在這𥚃買些水果，今晚通宵火車可以食。

喀山教堂 – 伊爾庫次克最靚和最大的教堂，內部裝飾十分華麗。

教堂內有聖水飲，立即隊返幾杯先，今後必定身體健康，仙福永享，壽與天齊。

行完教堂乘4A號電車到Central Market再入些貨今晚食。中途入士多買杯雪糕嘆吓先。

俄羅斯牛奶(RUB 57) – 像飲奶粉，很差；俄羅斯雪糕(RUB 45) – 一貫水準，香滑奶味重，唔錯。

Central Market – 在這裡再買少少水果，小太熊最鐘意食，佢話健康喎。

發現5日前賣RUB 550的罐頭三文魚子，今天在隔離檔只賣RUB 420，立即買返罐先，這款三文魚子最抵食又好味。

再買些無酵餅今晚用來送送三文魚子。

魚乾唔買了，昨天那條還剩一半未食完。

買完貨便漫無目的地到河邊散步，路過Харлампиевский Михайло-Архангельский храм教堂、沙皇亞歷山大三世雕像，最後行到去Yunosti Island，天色越來越差，開始下毛毛雨。

Харлампиевский Михайло-Архангельский храм教堂

沙皇亞歷山大三世雕像

Yunosti Island(остров Юности)

和小太熊無無聊聊坐在公園打了陣機飲支汽水，已經差不多夠鐘要去火車站，於是早少少坐電車走，懚陣啲。

今日會乘16:15開出的001號西伯利亞火車往 克拉斯諾亞爾斯克Krasnoyarsk (Красноярск)，車程17hr，二等房每位RUB 5728。

火車早29min埋站，又上車lur。

今次的Conductor唔再係傳統俄羅斯亞姨，而是很好肉哋的俄羅斯女生。

今次坐的二等車廂，和頭等車廂的分別是多了2張上格床及床單被套要自己鋪。

二等車廂送的水和小食。

16:15準時開車了，又見到西伯利亞孖寶 ～ 草原加電線桿了。

原來今天程車包了餐晚飯，18:00已經送來了。

豬肉飯和雞肉通粉 – 肉又鞋又冇味，都唔識分係咩肉，飯很乾像泥沙咁散，通粉像食紙一樣，好難形容有幾難食。

中午在市場買的 三文魚子醬(RUB 420) – 爆油甘香唔係太咸，好好食，配上無酵餅都唔錯。

食飽飯我又四圍行吓探吓險，順便搵沖涼房的位置。

其他二等車箱的乘客都好靜，個個唔係睇書發呆就係瞓。

接著行進三等車卡時，三等車廂的大媽Conductor正在卡與卡之間的門口處理緊大量床單，佢一見我想進入三等車廂便起身欄截，然後大吹俄文和做手勢叫我回頭，佢大致意思應該係「死契弟，呢度係三等車卡，又冇餐廳又冇嘢賣你過來做咩？走走走唔好攪住亞姐做嘢。」

可能我當時實在太無聊，於是我又而姨哦哦地大吹「哦文」，說：「我有friend响入面喎，探人唔得咩？行吓都得掛. . . . . .」

就這樣大家你一言我一語地雞同鴨講，最後大媽很激氣地放了我入三等車卡，但關門後佢竟然立即Lock住度門，把我關在車卡內，我拍門佢又唔理，好很毒的一招，是考我智慧了，夠創意，我鐘意。

三等車廂內一樣咁靜，有些人還自製了布廉，夠晒私隱。

原來這三等車卡是最後2卡，根本冇餐卡和頭二等卡了，難怪大媽知道我是來攪事，又阻住佢執床單所以咁激氣，但佢現在把2卡三等乘客都鎖住，人地咪去唔到餐卡食飯囉，於是我參觀完之後便等多10min再嘗試拍門，等佢開鎖，不過佢真係唔理。

最後唯有用Google Translate揾最後一卡的Conductor求救，佢明白件事之後便大笑，然後開返門比我走。離開時要跳過一大堆床單，又滋擾到那惡大媽Conductor，佢今次怒啤住我，啤到我跟住唔敢再行入這三等車卡。

 這程17hr的長途火車只有一個大站「濟馬(Зима)」停30min，其餘的小站全部只停1 ~ 2min。

<<濟馬(Зима)>>

19:57到達 濟馬(Зима)站，可以離開月台到附近行20min。

從火車站行5min有座鄰似 碉樓的建築物。

附近還展出了一部舊式的火車頭，款式唔同早前見到的蒸氣火車頭。

上車前Pat Pat痕買了些小食上車嘆。

利士薯片(RUB 76)；雪糕(RUB 55)；大啤酒(RUB 72)

雪糕好正，真係日日食都唔嫌。

食完嘢帶埋RUB 150過隔離有浴室的車卡沖涼，但唔知㸃解那個Conductor只答了我「No shower」。就係咁就牡得沖了，唯有去厠所沫身，所以我幾時都話，俄羅斯人最叻的英文就係「NO」，已經完全表達到，駛咩同你解釋咁多。

西伯利亞 萬里長征 – Day 13

朝早瞓醒覺，日出了，火車上的日出都幾靚架。

<<克拉斯諾亞爾斯克(Krasnoyarsk)>>

火車到達 克拉斯諾亞爾斯克(Krasnoyarsk).......乜咁似 荔景........

火車08:07埋站了，從今日這地區開始可以用Uber叫車，方便好多了，唔駛再和的士司機鬥智鬥力。

克拉斯諾亞爾斯克 火車站

在廣場前Call了Uber，但是可能司機還未用熟這Program，明明來到隔離都兜返出去，攪來攪去最後等了足足20min。

從火車站去酒店Apart-Otel' Iris共3.2km，Uber收RUB 89。

Apart-Otel' Iris – 從大馬路轉入內園便見到這座2層高的平房酒店。

因為太早未能夠Check in，我們先在Reception放下大行李。

由於7月還是 蜱蟲(Ticks)出沒的季節，Lonely Planet話會傳播腦炎好危險架，到郊外時一定要做預防措施，所以第一時間去超級市場買藥先。

  

酒店Apart-Otel' Iris對面有間超級市場，內有蜱蟲噴霧賣。

蜱蟲噴霧(RUB 89) – 有咗佢就唔怕蜱蟲的腦炎菌了。

買完藥在隔離的餐廳Mama Roma食早餐。

Mama Roma – 是樓上酒店的附屬餐廳，散客可以比現金或信用卡。

自助早餐每位RUB 330，食物豐富又好味，超抵食。

食飽慢慢嘆埋杯茶。

今天打算到市郊的Stolby Nature Reserve行半日山，然後去動物園。

10:00在餐廳叫Uber車去，今次架車很快便停在餐廳門口，非常Pro。

補充資料 :

1.)      USD 1 兌 RUB 58.6 (當地銀行現金兌換價)，即太約 HK$1 = RUB 7.48。

2.)      乘的士從Listvyanka回到 伊爾庫次克，車費RUB 1500，車程65min，約72km。

3.)      伊爾庫次克(Irkutsk) 市內有幾條主要電車線No.1, 2和4a穿梭火車站、Central Market、喀山教堂等主要地㸃，Google Map和Maps.me可以找到電車站位置。每程RUB 15，上車後有票務員售票。

4.)      乘001號車次西伯利亞鐵路從 伊爾庫次克(Irkutsk)到 克拉斯諾亞爾斯克(Krasnoyarsk)，車程17hr，二等房每位RUB 5728，包1餐晚飯。

5.)      克拉斯諾亞爾斯克(Krasnoyarsk) 市內可用Uber叫車，比的士平和方便。

---待續---