火熱節拍 馬來雙城(1) – 馬六甲 夏日炎炎 • 飄香榴槤

馬來西亞 馬六甲街頭壁畫

又到了一年一度的馬拉榴槤季節，小太熊又趁週末假期到馬來西亞走一轉食榴槤，今次除了檳城之外，還會到馬六甲的果園走一轉，嚐嚐當地出產的榴槤。馬六甲(Melakah)以前分別被葡萄牙、荷蘭和英國統治過，60年前才脫離殖民統治，成為馬來西亞的部分。古時的馬六甲是東南亞的商貿樞紐港口，當年的中國人和當地馬拉人所生的後代，男被稱為峇峇(Baba)，女的稱為娘惹(Nyony)。馬六甲市近年除了被列入世界文化遺產之外，也被Tripadvisor列為馬來西亞十大最佳目的地之一，好似好巴閉啊。

火熱節拍 馬來雙城 – Day 1

今天要返全日工，放工之後乘地下鐵再轉巴士去機場。終於再攞返張Cathay AE Card，可以入機場食免費晚餐了。

Plaza Premium Lounge – 今次好好彩呀，霸到將二人卡位，可以慢慢嘆慢慢食。

魚蛋粉同埋燒賣豬腸粉等等都好好味道，而且仲有生啤任飲添。

今晚會坐Air Asia ～ 21:25班機往吉隆坡。21:10已經開始Boarding，都相當準時，點知上到飛機之後冇緣故Delay了50min才起飛，22:10終於起飛了。

火熱節拍 馬來雙城 – Day 2

<<吉隆坡>>

雖然遲了很多起飛，但是飛機也很準時降落，01:30已經降落KLIA2，02:10已經過埋海關入境。接着行去Air Asia的出票機print埋明晚到檳城的登機證。今晚小太熊Book了機場酒店，會先休息三個鐘，然後乘最早一班巴士車往馬六甲。

Aerotel Kuala Lumpur Gateway – 位於KLIA 2 Level 2M，出境大堂的下一層。很方便的機場酒店。

雙人房(包早餐)HK$407 – 只可以停留6hrs，過鐘就要補錢。

沖完涼都已經02:50，只可以瞓三個鐘便要起身。

食早餐的地方都唔錯，早餐的選擇亦多，不過今早會在馬六甲大吃特吃，所以我們只飲了一杯茶。

長途巴士售票處在機場大樓的Level 1，買完車票之後便到Platform A01等上車。從機場到馬六甲每位RM 24.3，車程2hr。

Platform A01不知為何被一架往檳城的巴士霸住了個車位，等到06:30開車時間也未見我們的巴士，令乘客們都有點兒緊張。等到06:35才有職員叫我們上對面的一部雙層巴士，最後那巴士06:40開車，08:30準時到達Melaka Sentral。

<<馬六甲>>

到達Melaka Sentral之後，想在長途巴士站內的士站包架的士4hr，點知霸住晒車位班華人司機全部都係壞人，個個都不務正業想吊水魚，最後我要行出巴士站外邊自己找的士。

長途巴士站的對面有個正經的士站，可以在這裏叫車。

包的士每小時RM 35(最少3hr)

09:00準時開車，第一站先到 興果園(Malacca Durian Heng)，16km距離車程25min。

興果園(Malacca Durian Heng) – 其實是一檔街邊的榴槤檔，榴槤都來自馬六甲的果園，貨源供應充足，老細肥仔話佢都有出口馬拉榴槤去香港賣架。

馬拉榴槤最平1kg~RM8都有，巧平啊。

小太熊唔肯試平嘢，我們叫老細㨂了4款今日最靚的貨式。

D101(RM 27)(RM 20/kg ～ 1.36kg) – 外皮亁爽肉質口感軟滑似慕絲帶有粘喉感，奶味濃郁甜度較低，部分位置更略帶米酒清香，每啖也有不同的味道，水準高超的榴槤。雖然最平，但是這個最好食。

Kasap(RM 41)(RM 23/kg~1.8kg) – 第一次吃這品種，味道相對地冇咁濃和較少變化，甜度適中質感綿密略帶粘性，都好食的。

竹脚(RM 33)(RM 30/kg～1.1k) – 中甜帶甘苦，味濃新鮮口感夠粘，好食又抵食。

貓山王(RM 75)(RM 58/kg~1.3kg) – 不是頂級貓山王，不論口感和味道也只是普通貓山王貨式，和在香港吃到的差不多，都好食的。

2個人食唔晒4個榴槤，只吃了7成左右，食剩了很多貓山王，這裡又冇真空包裝，只能用膠盒包起佢一陣再食。

的士10:15離開，往26km外的下一站 成果園(Sim Koa Yen)，11:00到埗。

成果園(Sim Koa Yen) – 果園內有好多榴槤樹和大樹菠蘿，日日新鮮掉下來啊。

今日有好多榴槤從樹上掉下來，員工們都忙著分類和運走。

問問老細今日有什麼靚貨，佢介紹了2款我未食過的品種，正啊！成果園 會收每位人客RM 10人頭費，再按每個榴槤收費。

D14(RM 30)(RM 40/kg~750g) – 雖然又細又輕，但是非常多肉，黃肉乾包口感黏如綿，榴槤香樸鼻，中甜不苦亦不帶奶味，味道較為簡單但好食。

甲必利(RM 35)(RM 50/kg~700g) – 果肉純白口感細膩非常多肉，中甜微苦且部分帶有桂花香味，很特別的一種榴槤，第一次食，很值得試。

試了2款新品種榴槤十分滿足，而且真的飽得不能再吃了。離開時埋單，原本一共RM 85的，但老細話收我們特價，RM 50便可以了。嘩！多謝老細啊！

11:50離開 成果園回到馬六甲市，短短24km車程用了70min，因為大塞車呀，13:00才回到 馬六甲市，剛好4hr，車費RM 140。

馬六甲市 – 在市中心的地標落車，太陽兇得像火爐一樣，立即全身濕透。

Christ Church Melaka – 馬六甲必遊的景點，我已經第三次來這裏了。

遊船河活動冇時間玩了，因為今朝的行程比預期慢了少少。

海事博物館(Maritime Museum Melaka) – 今日時間緊迫，只能路過影張相。

由於時間有限，所以打算主力去雞場街食嘢，放棄遊覽其他景點。

中華茶室 – 雞場街內很出名吃海南雞飯的小店，大排長龍，不過今日我們揀了第二間。

和記雞飯粒(Nasi Ayam Hoe Kee) – 同樣是雞場街吃海南雞飯的名店，排長龍等了20min才有位。

店內坐滿了食客，又焗又濕又炎熱。

海南雞飯粒套餐(RM 19.1) – 包括一碟海南雞和10粒飯粒，雞肉就冇乜雞味，飯粒有些少椰子香，整體上味道就麻麻哋；八寶涼茶Herba Tea(RM 1.7) – 糖水少甜，都會幾消暑。

熟悉的咖啡店和壁畫，是雞場街的標記。

大寶小食Jonker 88 – 早幾年幫襯過覺得好食，今次再來發覺差了好多，檔口搬了人舗內，令店內更加濕和焗。

鴛鴦叻吵(RM 10.5) – 味道只是一般，唔值得試，嘥Quota。

貓山王麻薯精樂(RM 15) – 得個名，其實只是和普通賣RM 5的榴槤刨冰差不多，麻薯都算有咬口和有榴槤味，OK的。

接著在老街逛逛，原來現在連馬六甲也滿街壁畫了。

Wild Coriander – 馬六甲的最後一餐選擇在這𥚃吃，小太熊話這小店很出名的。

凍美綠(RM 4.8) ; 凍檸茶(RM 4.8)

Wild Coriander Special (Chicken)(RM 19.8) – 賣相滿分的四色雞飯，味道都好好架，每款飯都有不同香味。

Lorong Jambatan – 又稱 鬼門關，數十年前，橋的一端是碼頭工人的集居地，而對岸就是賭檔、鴉片館和妓院等娛樂場所，碼頭工人很多時在收工後過橋消遣，就像步上奈何橋，散盡積蓄之後便在橋上跳河自盡，所以此橋就被稱為「鬼門關」。

現時沿著河岸已經是各式各樣的餐廳和酒吧，供旅客消遣。

15:45左右要搵車返機場了，想用Grab叫車，30min前明明是RM 176的，現在卻要RM 280，揾笨咩，於是去了雞場街口的士站問價。排第一的華人司機用廣東話開價RM 200，我還價RM 160，諗住佢還我RM 180便立即成交，點知佢亞支亞咗話見我係華人至收我RM 200，第個收RM 250咁話喎，條友咁寸我都費L事同佢傾，於是掉頭便走，去遠些再揾車。這時排第二的馬拉司機用英文問我去邊和價錢，佢話RM 160可以喎，不過佢問一問排第一的寸司機，寸司機又話肯接喎，真係嫲撚飯，開車之後又繼續亞支亞咗，真係變態PK。

回程時有少許塞車，用了100min才去到KLIA2。

未入機場大樓之前，先在大樓外食埋今朝打包了的榴槤先，主打係貓山王，味道仲好過今早啊。

還有些時間，在機場內坐底食少少嘢。

古早味蛋糕套餐(RM 9.9) – 番熱的，不過件蛋糕很有蛋香和很軟熟，杯茶就淡了些。

乘19:45 - 20:50 Air Asia內陸機從吉隆坡往檳城，票價只需HK$77，真係平得離普。

<<檳城>>

飛機準時到達 檳城，在檳城機場和George Town用Grab叫車非常方便，梗有一架在左近而且價錢極平，不像泰國的Grab咁呃錢。從檳城機場去George Town用Grab叫車只需RM 24，的士要RM 45，點會仲有人坐的士吖。

乘這部Grab車直接去到George Town阿德榴槤，司機表示包車RM 30/hr，比公價RM 35/hr平少少，便約了她明天早上包車去榴槤園。

阿德榴槤(Ah Teik Durian Stall) – 在檳城甚有名氣的榴槤檔，由2011年開始幫襯佢，現在這𥚃的榴槤已經賣得相當貴，不過質素較有保證，所以夜媽媽都有唔少人幫襯。

阿德榴槤以前從來唔標價的，可能現正賣得太貴，所以都標返價了。黑刺賣RM 98/kg，真係貴咗啲喎。

今次試試2款未食過的中價品種。

白玉油(RM 66)(RM 45/kg~1.48kg) – 明顯係今日最好食的一個榴槤，味道混雜甘甜微苦輕牛奶酥，口感細膩綿密，檳城榴槤的品質比馬六甲好得多。

林凰嬌(RM 95)(RM 55/kg~1.75kg) – 中甜度且帶輕微花香酒氣，味覺較清新淡然，口感和白玉油差不多，但味道還是前者好些。

2個榴槤收了RM 161，遲多幾年真係怕食唔起了。食完之後沿路行去 汕頭街，看看有什麼小吃。

KOMTAR Tower(光大大廈) – 檳城最高的大廈，第6次來檳城都冇入過去。

只是晚上22:30，但汕頭街已經水靜河飛乜都冇得食了，在那裡用Grab叫車去今晚的酒店Eastern and Oriental Hotel，車費RM 7。

Eastern and Oriental Hotel – 今次舊翼大裝修，連泳池都封埋，只能住新翼。

雙人露台房(包括早餐)每晚HK$902 – 有海景和靚浴缸，相當抵住。

雪櫃內的飲品和水果都免費的。

今天已經相當攰了，快快沖完涼便大覺瞓。

補充資料 :

1.)   Air Asia香港飛吉隆坡(不包括寄行李和餐飲) + 星航 檳城飛香港(包括寄行李和餐飲)，機票每位HK$3189。

2.)   RM 1 = HK$1.92 (永恆找換公司)。

3.)   2人4天保險費共HK$196。

4.) 從KLIA2有長途巴士往馬六甲，最早開06:30，車程約2hr，每位RM 24.3，可以在KLIA2 Level 1買車票。

5.)   馬六甲包的士每小時RM 35，最少包3hr，可以自己在街上截車講價。

6.)   在馬六甲和檳城的市區用Grab叫車又平又方便，但如果要去較遠的郊區便要包的士，因為冇車比你Grab。

7.)   馬六甲市乘的士往KLIA車費RM 160成交(已經包括公路費)。

8.)   Air Asia內陸機從吉隆坡往檳城，單程票價HK$77。

9.)   檳城包Grab車每小M 30，最少包3hr。

10.) 從檳城機場去George Town用Grab叫車，車費RM 24。

---待續---