天地任我行 – 非一般活動

從前去旅行，資訊有限又冇銀用，最叻都只係攞住本Lonely Planet，用書內簡單的地圖，只要能成功坐車坐船去到特完景點影張到此一遊相，已經好開心，算係成功地達標，一般只有行行企企食個包又一Day，甚少有特色活動，對食同住只有一項要求 ----- 平。時至今日，資訊發達，對旅程的要求亦自然高了，單係到此一遊已滿足唔到小太熊，一定要食得招積、住得特色、玩得夠激，才算是過到自己又過到人的完美旅程。這章「天地任我行」就分享一吓我在世界各地參與過的 非一般活動。

<大洋洲 Oceania>

斐濟 Fiji

Drawaqa Island – 與巨型的野生魔鬼魚MantaRay一起浮潛！！在大海中和3條巨型的野生魔鬼魚一起玩，今次撞正佢哋心情靚，在我身旁不斷打圈游，仲擘大個口比我睇啊。

Kuata Island – 在大海22m水深處餵2.5m長的牛鯊(BullShark)！！牠們的牙齒真係很可怕。

澳洲 Australia

Tweed Head – 自駕船屋於Tweed River流浪4日3晚！！在河上釣魚BBQ唯生，港版人在野。

袋鼠島(Kangaroo Island) – 自駕遊4日3晚！！在袋鼠島自駕，沿途試紅酒，飲咖啡，睇動物，一般人只會當係普通活動，但禾第一次自駕遊呀，梗係非一般啦。

Barossa – 單車漫遊酒莊葡萄園！！騎着單車穿梭Barossa區內的酒莊和葡萄園，沿途試紅酒，非常好玩。

珀斯Mandurah– 自駕船屋於MurrayRiver和一個咸淡水湖泊PeelInlet流浪4日3晚！！在旅程中釣魚、捉蟹、餵塘鵝、觀海豚、觀星和欣賞日出日落，完美的大自然生活。

紐西蘭 New Zealand

Grey Mouth – 黑水漂流(Black Water Rafting) 3hr！！在天然地下河洞歴險，好正。

Franz Josef Glacier小鎮 – 野外騎馬！！上山又過河，好似拍緊萬寶路廣告。

Franz Josef Glacier – 冰川遠足！！可以徒步在冰川上遠足一天，發夢一樣。

皇后鎮 – 12000呎高空跳傘！！Crazy。

<非洲 Africa>

南非South Africa

Duiker Island – 與上千隻野生海獅一起於海中共舞！！

Kagga Kamma Nature Reserve – 在野外全開放式睡房內BBQ，飲香檳，躺在床上睇日落和睇星星！！

肯雅 Kenya

Masai Mara保護區 – Safari睇野生動物！！見唔到大遷徒，但亦見好多動物，更見獵豹開餐中，勁。

摩絡哥 Morocco

撒哈拉沙漠 – 露天睡在沙漠星空下！！

撒哈拉沙漠 – 沙丘頂上睇日出！！

撒哈拉沙漠 – 騎駱駝橫渡沙漠！！

塞舌爾 Seychelles

La Dique – 深海潛水！！異常壯觀的一幕，十幾巨型魔鬼魚(Eagle Ray)游過，難得一見，自1996年學識潛水，潛了120 Dives，還是第一次見。

<亞洲 Asia>

帛琉 Palau

海豚保育中心 – 與海豚一起潛水！！只一千幾百就有這體驗，抵到冇朋友。

帛琉 – 海上的紅樹林玩獨木舟！！見到海龜和豬籠草，好玩。

俄羅斯Russia

俄羅斯 西伯利亞 – 西伯利亞鐵路萬里長征！！從俄羅斯東方的 海參崴(Vladivostok) 乘搭整段西伯利亞鐵路(Trans-Siberian Railway)去到西方的 莫斯科(Moscow)，橫跨歐亞大陸七個時區，全長9288公里，一口氣由頭坐到去到尾的車程需要7日6夜共146小時。

馬來西亞 Malaysia

沙巴 詩巴丹島 – 與海狠羣共舞40min！！在海底遇上海狠羣，與狠共舞足足40min，其間被狠羣打圈圍着，是一生最難忘的經歴。

沙巴 詩巴丹島 – 與百多條巨型壽星公魚(Bumphead Parrotfish)一同潛水！！只係5m水深，已遇到數百條巨型壽星公魚，壯觀。

怡保 – 在巨型天然石灰岩洞耍太極！！一邊耍太極一邊吸收大自然靈氣，延年益壽。

怡保 – 在天然水晶岩洞冥想打座！！吸收宇宙能量，强身健體。

檳城 – 入果園食新鮮從樹上掉下的榴槤！！是世上最好食的榴槤，那種外皮乾爽內肉黏喉的新鮮口感是從未感受過的，而且那種帶輕微甘苦又不太甜的濃烈果味確係極品，大口咬下再慢慢細味，歯甲留香。

砂勞越 姆姥 – 叢林自駕越野四驅車5hr！！我無牌駕駛，仲要載埋小太熊，在森林內上山澗河，刺激。因手碗唔慣用咁大力，玩完後4日隻右手都冇力簽名。

砂勞越 姆姥 – 深入未經人工修葺的巨型天然岩洞Racer Cave探險2hr！！雖然此不上韓松洞，但亦好驚險，其中有段要游繩上落3-4m高的大石，洞內未經人工修葺一片黑暗，見到大蛇、大蜘蛛. . . . . . . 非常難得的體驗。

Taman Negara National Park – 原始森林河流上玩激流旅程2hr！！這是森林內的主河流，水流唔算大急，河上亦應該冇鱷魚，但玩到中段見一條1m長的巨蜥由樹林跳落河裡，都很驚嚇。

柬埔寨 Cambodia

暹粒 – 慈善活動 送一對活豬給當地貧窮户！！美國駐柬埔寨的慈善團體安排的活動，捐USD $80便可買了一對小豬送给一個農村家庭，慈善團體會教他們養豬，希望小豬10個月後長大了可生豬仔，持續改善他們的生活，自食其力。

中國 China

新彊 – 勇闖無人地帶 庫木塔格沙漠！！實情係誤闖 庫木塔格沙漠，成架車比浮沙食住條軚，完全郁唔到。最後要露營過一晚，司機獨自一人行幾粒鐘出外求救。

雲南 香格里拉 – 自行探訪居於屬都湖伴的藏民！！在屬都湖伴巧遇3位藏婦，幫襯完佢哋騎馬，佢哋就熱情地請我哋入屋飲牛奶、酥油茶和食點心。

香港   Hong Kong

香港 – 跑畢渣打馬拉松全程42km！！第一次完成全馬賽事，只用了4hr34min，對我來說是超額完成了。

韓國 Korea

慶州 – 跑畢慶州櫻花半馬拉松全程21km！！最靚的馬拉松，跑得亦最Hea，跑完仲有力踩單車。

慶州 – 骨窟寺禪修唸佛！！嚴寒氣温下在佛寺過2日1晚，清晨04:00a.m. 便要起身做早課，淨化心靈，身心排毒。

慶州 – 普門湖伴踩單車！！其實啱啱至學識，所以我至覺得好特別。

江原道 阿爾卑斯滑雪場 – 滑雪！！學極都唔掂，失敗。

環遊韓國 – 海浪號列車(Haerang Rail Cruise)！！3天豪華到車環遊韓國 首爾、順天、釜山、慶州、東海和正東津，剛好逆時針方向在韓國行一大運，全程好食又好玩，只是價錢比較貴。

鎮安 – 紅蔘SPA！！欣賞着全羅北道 馬耳山，浸着陣陣蔘香的紅蔘SPA，令人樂而忘返。

印度 India

齋沙默爾Jaisalmer – 沙漠騎駱駝2日！！騎完駱駝晚上在沙漠露天瞓覺，好玩好玩。

印尼 Indonesia

科莫多島 – 接觸野生 科莫多龍！！條科莫多龍2.5m長，野生架，夠激呢！但咁危險下次唔敢了。

泗水 – 騎馬上活火山 婆羅摩火山(Gunung Bromo) ！！曾經紅極一時，香港團必到的景點，但近年已甚少香港團到了。這肯定算係印尼其中一座值得一到的活火山。

峇里島 – 挑戰4級激流！！玩足3hr，有幾激？曾有香港旅客死在這條激流上。

日本 Japan

京都 – 嵯峨嵐山 保津川河玩激流！！睇賣相就激，玩落其實老幼咸宜，但又幾好玩。

沖繩 讀谷村 – 與鯨鯊共舞深潛！！鯨鯊有8m長，被仔用繩綱在大海中養着，我就好玩，佢就慘慘。

九州 – 五星級移動餐廳Orange Restaurant(おれんじ食堂)享用早餐！！這是一列觀光火車餐廳，行走於熊本縣與鹿兒島縣之間沿海風景最佳的肥薩線，全車只有2卡車廂，限定最多43人，服務Number One。能登上這超豪列車享用一頓豐富的早餐，實在非一般。

九州 櫻島 – 踩單車！！櫻島的單車徑十分完善，沿海風景一流，還可以浸浸脚食吓超甜桔仔，相當寫意的活動。 

九州 指宿 – 熱沙浴！！只在鹿兒島指宿才有得玩，整個人埋在天然火山熱砂之中，熱砂維持55℃左右，埋在砂下感覺全身負重，Feel到脚掌的血管Bok Bok跳，只蒸15min已叫救命了，過癮. . . . . 

四國 今治 – 踩單車70km橫渡日本 瀨户內海至本州尾道市！！日本的瀨户內海，分隔開本州和四國這2個日本主要大島，1999年日本人在內海的小島之間建造了多條跨海大橋，串連起海中的6個小島(向島、因島、生口島、大三島、伯方島和大島)及本州和四國，同時亦建成一條長達70km的跨海單車道「天空迴廊」，單車道沿途會穿越6個小島，走過漁村、海灘、農舍，沿路亦見到大量橙樹和檸檬樹，也有很多本土特色食物。

四國 四万十市 – 踩單車50km穿梭漫遊四万十川！！四万十川(しまんとがわ)位於日本高知縣西部，全長196公里，是四國第二大河川，有「日本最後的清流」之稱。遊覽 四万十川除了可以選擇乘觀光船，也可以騎單車穿梭漫遊四万十川的特色 – 沉下橋，沿途走進咖啡館和鰻魚店品嚐四万十川的風味。四万十川 亦是四國地區著名的鰻魚生産地，是現時少有仍然能捕捉到天然鰻魚的地區。



北海道 十勝 – 溪流釣魚！！企在十勝川上遊的急流中間釣魚，都幾特別架。釣的是小鱒魚，加些少鹽在魚身放在炭爐上燒，十分香口鮮甜，連骨都吞埋。

北海道 – 自駕遊10日！！在北海道自駕10日，一般人只會當係普通活動，但我第1次自駕遊咁耐呀，又擦花車頭又被影快相，梗係非一般啦。

北海道 富良野 – 單車漫遊3日！！富良野外圍盡是廣闊的田野和草原，單是山林就佔了70 %以上的面積，更有 15 % 是農地，注名景點有Patchwork Road拚布之路(パッチワークの路)之路和Panorama Road廣角之路(パノラマロード)。夏季的富良野更盛開各種鮮花和薰衣草，非常適合踩單車漫遊。

馬爾代夫 Maldives

Angsana Velavaru – 深海斷崖上徙手潛水！！大藍水斷崖上浮潛，多麽寫意啊。

緬甸 Myanmar

Kalaw – 在Kalaw鎮附近的山區騎馬2日！！在緬甸Kalaw鎮騎馬1日到佛寺過夜，體驗當地民風。

尼泊爾 Nepal

哲雲國家公園(Chitwan National Park) – 騎象1.5hr入森林尋找 野生犀牛！！只有尼泊爾可以咁玩，好正架。

哲雲國家公園 – 同大象落河一齊沖涼！！又係只有尼泊爾可以咁玩，絕對難忘。

加德滿都 – 乘熱氣球升至約3000m高睇朱峰日出！！高危活動，最多只可氣6個客加2個控制員，整個過程45min都覺心寒，以前未知驚，現在當然唔會再玩了。

Bhote Kosi River – 2日1夜4級激流旅程！！最激一段5級激流，所有同學要落船，幾個教練要一齊逐隻船爬過去。

泰國 Thailand

布吉島 – Rawai Muay Thai Boxing Camp學泰拳！！上了幾堂，睇得吓架。

布吉島 – 50m高Bungy Jump！！要玩趁後生，仲驚過跳傘架。

喀比 – 岩洞餐廳“The Grotto”食晚飯！！在這麽特別的餐廳食晚飯睇日落，食乜嘢都唔重要了。

喀比 – 攀爬上山再落山谷中隱世湖泊！！在喀比Phranang Beach附近有一湖泊隱藏在山谷之中，要到湖泊必須先攀爬上山，再遊繩落谷底，過程非常驚除刺激。 

喀比 – 騎大象！！大象騎得多，但坐落個象頭果度騎還是第一次，感覺上和大象一起沖涼咁好玩。

攀牙灣 – 獨木舟紅樹林之旅！！攀牙灣的自然環境保護得很好，在這裡划艇穿越岩洞和叢林，是很特別的體驗。 

清邁 – 單車漫遊 清邁古城！！泰國清邁以古城為中心，古城內外都滿佈大大小小的佛寺、Local食店和市場，景點的距離話遠唔遠話近唔近，所以，騎單車穿梭不同景點漫遊這充滿歷史文化的清邁市是很令人驚喜的體驗。

布吉島 – 天然養生保健酒店Amity Wellness Retreats 5日5晚Amity Raw Cleanse Program！！Amity Wellness Retreats是一間專門為住客提供排毒療程的小型酒店，位於布吉島南部Rawai Beach，只有11間房，最多容納22人。酒店會為每位入住的客人安排不同的饍食排毒療程，包括有全份量素食(Amity Raw Cleanse)，半份量素食加果汁(Amity Intermittent Fasting)，全流質健康飲料(Amity Juice Cleanse)或清水辟穀(Amity Full Fast)等療程，配合每日洗腸、瑜伽、冥想和按摩，達致身心淨化的境界。

菲律賓 Philippines

The Farm – 4日身心排毒療程！！食足12餐素，感覺真係煥然一新，覺得自已條大腸異常亁淨，排出去的東東再沒有嗅味了。

新加坡 Singapore

聖陶沙島 – 吊車浪漫晚餐！！氣氛超强但食物較差我就好鐘意，小太熊就話悶喎。

台灣 Taiwan

奮起湖 – 漫步 阿里山森林鐵路！！因鐵路仍在維修中至可以咁玩，遲吓就冇了。

花蓮 – 踩單車75km遊花蓮縣！！從花蓮站出發，沿着市內的<兩鐵自行車步道>到海邊，再接上<兩潭自行車步道>往壽豐鄉鯉魚潭，環潭一圈後回到起點，從未試過踩咁耐咁長，仲有4km要踩出大馬路，又迷了三次路，激呀。

澳洲 (Australia)

澳洲屬土‧聖誕島(Christmas Island) – 與15m長鯨鯊一起浮潛！！太幸運了，在大海遇上大鯨鯊，佢仲肯和我們玩了十幾分鐘。

澳洲屬土‧聖誕島(Christmas Island) – 與鯊魚零距離浮潛. . . 可怕！！真係絕對驚嚇，唔想再有下次。

澳洲屬土‧聖誕島(Christmas Island) – 與大海龜零距離接觸！！多手。

<北美洲 North America>

丹麥 Denmark

丹麥屬土‧格凌蘭 – 乘小型撞冰貨船橫渡北冰洋！！差點被厚冰圍困，幸好最後過得到。

<歐洲 Europe>

俄羅斯 Russia

莫斯科 –走過紅場10.7km馬拉松！！跑到去紅場，都咪話我懶。

芬蘭 Finland

Inari – 冰湖上玩Snow Mobile！！原來比想像中更好玩架，只1hr40min唔夠喉。

意大利 Italy

米蘭 – 乘國泰頭等機位返香港！！威呢，Seat No.1A呀，懵太都想坐呢張椅。

法國 France

普羅旺斯 – 漫遊世界最大的薰衣草田！！和小太熊一起漫步一望無際的紫色花海，浪漫得過份。

普羅旺斯 – 漫遊世界最大的太陽花田！！實在壯觀到不能形容的太陽花海。

Angers – 黄昏日落時在猛鬼古堡自由行探險！！古堡Château de Brissac位於法國Angers，是法國最大和最猛鬼的古堡，只有3間房出租。我同小太熊在黃昏時份自己响堡內四圍探險，在空房、後樓梯、劇院等地方遊走，好激架。

波爾多 – 紅酒節2014！！法國2年1度的盛事，香港那A貨點都比唔上啦。

普羅旺斯 – 與小太熊一起尋找金城武和陳慧琳在電影中走過的足跡！！當親身去到法國南都的電影埸景時，感覺真係良好。

葡萄牙Portugal

斗羅河(Rio Douro) – 帆船遨航斗羅河3日！！和小太熊一起租了艘帆船，遨航於葡萄牙斗羅河的上遊3日，期間沿河走訪河岸小鎮，住進隱世酒店，寫意人生。

西班牙Spain

伊比薩島(Ibiza) – 狂野派對Pacha Flower Power Party！！Ibiza是Rave Party的起源地，而Pacha Flower Power Party是島上最注名的Rave Party，和小太熊於零晨時份參加這狂野派對，狂野了幾小時。

貝爾加(Berga) – La Patum(煙火節)！！ 西班牙東北部小鎮貝爾加(Berga)每年均有5日舉行大型的 煙火節(La Patum)活動，節慶期間，數千人會人貼人地聚集在細小的廣場“Plaça Sant Pere”內瘋狂地燒煙花，期間持煙花者見人就燒，須要瘋狂走避，非常之狂野刺激，令人畢生難忘。

<天地任我行 – 非一般活動@April 2020>