聖誕快樂Merry • Christmas Island(10) – 史上最强鯨鯊Snorkelling@聖誕島

地球上海洋最巨型的魚類 – 無敵大鯨鯊Whale Shark

地球上體型最大的哺乳動物，是活在海洋中的藍鯨，最長可達33m；而鯨鯊則屬於地球上體型最大的魚類，最長可達18m。鯨鯊的性格善良，主要以浮游生物為糧食，如果有緣能在茫茫大海中遇到牠，一定要把握機會和牠交流交流，互相問侯一番。

聖誕快樂Merry•Christmas Island – Day 7

<<聖誕島>>

昨天過得平淡，本以為餘下的時間都會淡淡地過，誰知今日竟然會發生史上最强的Snorkelling，渡過了最精彩的一日，單是一次Snorkelling已值回整個旅程的票價。

今日瞓到07:00，在露台食個福米便出發潛最後一日水。

聖誕島第9潛 – Eidsvold Wreck

Eidsvold Wreck是二次大戰時被日軍擊沉的一艘挪威船，現有一半沉在5~18m水深，另一半則沉在深海，由於日子久遠，可見的船身大部份都已散散哋了。

Norwegian Phosphate Ship – Eidsvold Wreck

櫻花清潔蝦(Banded Cleaning Shrimp)

雞泡魚Black-spotted Pufferfish

秋姑(Goldstripe Goatfish)

這張相中間有隻 珊瑚蟹

將近上水，比我遇見隻巨型海龜在瞓覺，我當然埋去打個招呼啦。

海龜(Turtle)

潛完上水唔夠10分鐘，Hama又發現鯨鯊了，但今次呢條唔係太大，又係匆匆游過，但距離都相當近，近到鏡頭影唔晒成條。

上水後Hama再追住海上羣雀，昅實海面。

又有發現，今次不得了，呢條鯨鯊我估有15m長，正在吸食水面的魚仔，附近有7~8條鯊魚圍着牠，爭食那羣魚仔，勁壯觀呀。由於太多鯊魚，我都唔敢游太近，可以望足3、4分鐘才被鯨鯊發現我們，佢又係唔鐘意人，立即潛入深海。

上水後，Hama話睇個勢今日會有好多鯨鯊，問我哋想繼續睇鯨鯊定潛水，我哋個個都話睇鯨鯊啦。

決定放棄最後一潛後，Hama向另一羣雀駛去。

史上最强Snorkelling@聖誕島

又發現目標，落水。。。。。。

今次我游在最前，離遠又見一條約15m長的海中巨無霸在食魚仔。

我就離遠睇，但有條老外發晒癲衝過去，我當然唔蝕底衝埋一份。

嘩！！呢條大鯨鯊唔討厭人架，見我哋游晒埋去唔走不特止，仲在水面打圈同我哋玩呀。

佢隻眼仔同血盆大口，零距離睇得好清楚，我摸了佢個頭一吓，原來佢啲皮好鞋喎。不過佢應該老啦，冇牙的. . . . . .

佢個大口肯定可以一口吞我落肚，我都幾乎被佢連埋魚仔一齊吸了落肚，再唔走下張相實影到佢個胃了。

同我哋玩左十分鐘左右，佢搖一搖條尾，箭一樣向前游走了。

太好玩了，我哋一行五人向佢離開的方向追過去，點知游了一陣. . . . . . . 見到十幾條又肥又大的鯊魚在水面游來游去食魚仔呀。

Grey Reef Shark鯊魚羣

好可怕，但大家興奮到儍晒，繼續向前游。

又見返剛才的大朋友了，原來佢未飽呀，所以要揾第二羣魚仔食。

我哋再游埋去，嘩！！！痴撚線架，啲鯊魚不斷向我迎面游來，在我左右兩邊和肚下經過，條鯊尾同魚翅差啲掂到我啊！

又過了驚險的十幾分鐘，大鯨鯊要走了，我和另一個鬼妹想追都追佢唔到。

點知隔一陣，佢游返過來同我哋講Bye Bye呀。

好滿足的一次潛水旅程，為這聖誕島最後一潛劃上完美的句號。

今日午餐係咖哩薯仔飯，自己加白酒和可樂。

沖完涼瞓一陣，三點幾行去Tai Jin House釣魚。

從Tai Jin House望返去Flying Fish Cove

Tai Jin House對面的懸崖，在這裡落幾級便有兩個位可釣魚。

由黃昏釣到日落，只釣到兩條魚仔。

小太熊冇乜心機釣，坐响度餵蚊。隔離有兩個本地華人一齊釣，但佢哋都食白果啊。睇返佢哋啲相，有好多藍星斑和燕子星，佢話都係响呢處釣架。

太悶又天灰了，行路返酒店。行過海灘時，發現有隻蟹仔行到落海灘了。

今晚去Rumah Tinggi Tavern and Restaurant食，從酒店行10min便到。

今晚有星星啊

白酒一杯(AUD$ 7)

Kids Chicken Carbonara(AUD$ 15) – 普通

Chicken Caesar Salad(AUD$ 30) – 都係普通

昨晚Golden Bosun Restaurant好味啲平啲，但呢間環境好啲。

---待續---