聖誕快樂Merry • Christmas Island(11) – 聖誕島的最後一夜 • 奇異歴險旅程

聖誕島魚獲 – 8kg重的Ruby Snapper，鳴謝昨天一同在岸邊釣魚的當地朋友，借佢個Friend今日出海釣到的大魚比我影張相威吓。

聖誕島雖然面積不大，但島上的活動卻多姿多彩，除了潛水、浮潛、觀鳥、業林漫步和欣賞紅蟹大遷徒，深海釣魚也是小島的一個絕佳活動，下次有機會再來的話，一定要自己親手釣一條Ruby Snapper。

聖誕快樂Merry•Christmas Island – Day 8

<<聖誕島>>

昨天過得極精彩，今日冇潛水，只安排了簡單節且，本打算平平淡淡過埋餘下在聖誕島的時間，誰知竟會在晚上有奇遇. . . . . . .

今日安樂醒，早餐有超辣豬骨湯出前一丁、罐頭茄汁豆，罐頭吞拿魚和可樂。

11:00出門口，慢慢行去天然海岩洞The Grotto，需時65min，平路。

沿途路經昨晚的餐廳Rumah Tinggi Tavern and Restaurant

路經另一人氣酒店Mango Tree，外觀都幾靚。

行十幾分鐘便是 華人墳場

今年冇乜雨水，沿路都見到好多紅蟹熱死在路邊。

今日超熱，行到小太熊面燶燶，又鬧我冇車牌呀。

行足65min到這分岔口，再向前行多3min便到The Grotto，但睇條路個樣似一年都冇10個人行。

行到The Grotto，見到一個碧藍的水地和危險的驚告牌，和聽見不斷有一陣陣尖刺得像鬼叫的風聲，見四野無人，都幾心寒。觀察了一陣，發現鬼叫聲來自洞外邊的海風透過這海洞邊一個小孔吹進來，風力磨擦洞邊和水面形成尖刺的鬼叫聲，都算鬼斧神工。一場來到，再觀察一會覺得安全，便沿繩行落水池浸浸，原來池水是半咸淡的。

天然咸淡水岩洞The Grotto

一邊浸一邊體驗這大自然的奇妙

浸足一個鐘，人有些寒了，返屋企。沿路慢慢行返去，再欣賞候鳥。

Common Noddy

Christmas Island Frigatebird(白腹軍艦鳥)

Brown Booby(白腹鰹鳥)

Silver Bosunbird

Emerald Dove

回到酒店休息一會，乘中午16:10最後一班巴士往學校，再睇蟹。今日實在太熱了，而且近來太少雨水，攪到蟹仔數量越來越少。

紅蟹數量雖少，但留心看牠們的動態和吃東西的樣子其實好有趣。

太熱，連椰子蟹都乾死在路上。

太陽落山時，椰子蟹和紅蟹又開始活躍了。

今日紅蟹數量明顯冇前三日多

睇完蟹，行50min返半山食飯，今晚試這間中菜館 – 季節餐廳(Season Palace)。

季節餐廳(Season Palace)在樓上，樓下是超市。

餐廳有冷氣供應

細啤一支(AUD$ 4)

雜菜湯(AUD$ 5)

紫菜魚蛋湯(AUD$ 5)

黑椒魚塊(AUD$ 20)

酸甜雞(AUD$ 20)

全部都不過不失，像食大家樂套餐一樣。食完飯碰到昨天一起釣魚的朋友，佢話佢個Friend今日出海釣了六條巨型Ruby Snapper賣了比餐廳，仲帶我入廚房睇同借我影相添，大家都講廣東話，同聲同氣係Good啲嘅。

食完飯行返出路口截順風車，但截了幾架老外車都唔肯停，而且今晚好少車，不怕危險的小太熊話行落山囉，最多開電筒。

行唔夠五分鐘進入了全黑路段，又冇行人路又多彎位，其實真係好危險唔適合行人。特然間有架私家車順路經過主動停下，阿姐司機叫我們上車(講廣東話的)，嘩！又遇貴人，佢仲話車我們到酒店門口添。小太熊上了車尾，我坐在車頭，正想講聲唔該晒，點知我都未講出口，佢就一論咀講嘢「果段馬路好危險唔可以行人架，警察見到實拉你地，你睇果架就係警車，佢會拉你地，呢間係圖書館，呢度係Flying Fish Cove，呢度係Tai Jin House . . . . . . .」

咪住，阿姐你好似行錯方向，呢度返唔到酒店喎(我心諗)，條路黑成咁又冇街燈又靜好可怕喎。。。。。。好彩阿姐在Tai Jin House轉了個圈便向返酒店方向駛，她還是一邊行一邊一論咀不停講「呢度住了千幾人，華人後生的都去了Sydney讀大學，只有馬拉人又生得多又唔走，呢度係開採Phosphate的工廠，呢處係警局，啲警察日日睇DVD唔駛做架. . . . . . . . . . . . .」架車繼經向酒店方向駛，但是過了酒店都唔停. . . . . .

我大胆開聲問：「過了酒店喎」。阿姐話：「我知，我車你地遊車河嘛」。啊……佢繼續一論咀不停講「呢度係島上最貴樓價的地段………前面有間Casino……..呢度係墳場……」唔係呀麻，夜媽媽條路黑成咁又冇街燈又靜之下介紹今朝經過的墳場？？而且…….Casino摺咗好多年啦喎，唔通，佢想帶我哋去坐時光機返以前??? 小太熊開始好騖……

最後，阿姐帶我哋去到一處海邊，仲夜媽媽教我哋開椰子，夜媽媽睇椰子蟹，真係幾特別的節目。

玩完椰子蟹又上返車，我本來想跟佢坐時光機返以前間Casino，但小太熊話想瞓了，阿姐就好好人車我哋返酒店。由上車開始計足足一個鐘才返到酒店，估唔到聖誕島的最後一夜都有奇遇，真係驚到一身汗。

補充資料 :

1.        從酒店The Sunset行路去天然海岩洞The Grotto需時 65min，平路，沿途好多雀仔。

2.        聖誕島內有公共巴士服務，每日4班車來往The Settlement – Flying Fish Cove (Beach) – Poon Saan(半山) – Drumsite(The School)，單程每位AUD$ 2。最後一班由Flying Fish Cove開往Drumsite的巴士開16:10。

3.        季節餐廳(Season Palace)會在2013年1月結業。

---待續---