聖誕快樂Merry • Christmas Island (完) – 走過聖誕島 • 重返吉隆坡

聖誕島上一隻紅蟹經過多日大遷徒，終於從山頂樹林行到海邊，可以濕濕身回吓氣，繼續完成大自然偉大的使命。

聖誕快樂Merry•Christmas Island – Day 9

<<聖誕島>>

原本官方預算今天晨早係今年的紅蟹產卵日，可惜今年雨水遲來了，而且雨量細，令產卵日再順延至 2013年1月6日，所以今日無緣見到千軍萬蟹在海灘產卵的壯觀場面了。

今日原本Book了Lisa 03:30出車睇紅蟹產卵，但泡湯了，改為06:30出車睇未完的「紅蟹大遷徒」，目的地只係和昨晚一樣，因為Lisa向旅遊局問了這裡是最多蟹的地方。

Lisa準時06:30接我們，今天還有另外3個客，和我們一樣Book了紅蟹產卵Tour但泡湯了。

今日紅蟹的數量和昨天差不多

我放了部Video在地下拍攝佢地的動態，佢地就當部機條帶係草咁食。

在千百紅蟹之中出現隻紫蟹仔Little Nipper

因為我們要趕飛機，睇到08:15迫住回程了，回到Flying Fish Cove海邊BBQ。

在Flying Fish Cove看見一隻紅蟹經過多日大遷徒，終於從山頂樹林行到海邊，可以濕濕身回吓氣了。

在Flying Fish Cove一棵樹的樹洞發現隻正在捕蛋的雀仔。

Lisa開始整早餐

有煙肉、魚、多士、果汁、奶和茶任食。

食完要走了，Lisa車我地去機場，仲大方地收少每人AUD$ 20，Thank You！雖然看不到紅蟹產卵，但我仍對這次聖誕島旅程相當滿意。

乘11:35 – 15:00班機回到吉隆坡。

<<吉隆坡>>

落機便帶着大行李飛的去蔡蘭推介，位於Batu Cave的北海飯店。

只係17:30時間尚早，冇乜客。

竹笙螺頭湯(RM 28.8) – 鮮甜，正。

清蒸海蔘斑(900g ~ RM 108) – 魚肉脆嫩有質感鮮味不太出眾，但全身魚皮也像海蔘一樣厚，而且充滿膠質和魚油香，非常有特色，第一次吃這種魚，有機會一定再食。

全身魚皮也像海蔘一樣，足1cm厚，好食過龍躉皮。

蛋白蒸河蝦(350g ~ RM 56) – 北海飯店另一招牌菜，蝦肉味淡冇乜好講，但蝦膏像流沙一樣非常甘香，很特色的一味菜。

食完北海飯店，榴槤精小太熊話要過對面馬路食榴槤。

貓山王(1kg ~ RM 14，這個賣RM 20)，甘苦味濃。

食完又飛的去酒店，遇着黃昏時間，勁難截車，最後只截到架大車Premier Taxi。上車冇耐，特然狂風暴雨，好彩上車上得快。

今晚住近Alor Street的Luxury Serviced Suites@Times Square Berjaya Times。

上房前先去Luxury Serviced Suites 15/F的JOJOBA SPA嘆1.5hr Massage(每位RM 130)

雙人住宅式套房(不包早餐)每晚HK$ 626 – 客廳超大，有落地玻璃，景觀開揚。

有廚房，但冇爐頭。

有廚房，但冇爐頭。

放好行李，去阿羅街再食，當然要食黃亞華燒雞翼啦。

燒雞翼，見到都流口水。

話梅柑桔冰(左)(RM 3.2) – 酸酸甜甜仍然冇得彈；涼茶(右)(RM 1.8) – 冇乜特別。

黃亞華燒雞翼(每隻RM 2.5) – 完全冇跌Watt，依然皮脆肉嫩多肉汁。

仲有Quota，行過隔離間西湖茶餐廳試吓 强仔蠔煎。

叫了一客强仔蠔煎和一客羅白糕，强仔即刻開火炒炒炒。

强仔蠔煎(RM 12) – 有蠔香又有蛋香，唔錯。

强仔炒羅白糕(RM 5) – 曉. . . . . 粉來的，Rubbish，食了三粒就放棄。

返房沖完涼瞓得覺都成01:00了。

聖誕快樂Merry•Christmas Island – Day 10(完)

今日安樂醒，呢間衰房雖然Check-in Check-out麻煩又屈人的士錢，但外觀、位置和景觀真係OK。

永興城茶餐室 – 吉隆坡人氣食店，由酒店行10分鐘便到，呢度人山人海，乜好嘢都有得食。

魚蛋粉(RM 6) – 河粉超滑帶米香，湯底清甜魚蛋又彈牙，一流。

腸粉加三寶(RM 10) – 我啱食但小太熊唔鐘意。

冷熱白咖啡(每杯RM 1.8) – 不及在怡保飲的白咖啡，但已比香港飲的貴價馬來白咖啡好很多。

出爐迷你蛋撻(每件RM 0.7) – 比得上灣仔檀島。

食完永興城茶餐室，揸住一頁陳年飲食男女的介紹，再去Pavillion Kuala Lumpur的Food Court間Mee Jawa食福建蝦麵。

Mee Jawa福建蝦麵(RM 9.5) – 湯底OK有點蝦味，放在香港就唔錯，但在Kuala Lumpur而言只係普通OK，唔值得專程行來試。

時間有限，馬不停蹄，再去 新峰肉骨茶。

新峰原煲肉骨茶(RM 15.5) – 味較淡，骨唔夠香，試一次夠了。

油炸鬼(RM 2) – 碗汁重濃過煲肉骨茶，正。

蘋果雪耳(RM 3.6) – 清潤好飲。

蔘鬚紅棗(RM 4.5) – 真材實料，抵飲。

今年馬拉榴槤滯銷，連新峰肉骨茶都要賣埋榴槤。食完肉骨茶剛有大量榴槤從果園運到，老細介紹我哋食個最靚的「竹脚王」，佢話今朝至樹上跌落泥，肯定正過貓山王。

竹脚王(RM 20 ~ 1kg重) – 老細果然冇吹水，呢個係極品榴槤，那種甘苦濃味的新鮮口感騙不了人的，超值。後悔冇買多三個返香港。

雖然已好飽，但仍盡最後努力過對面間 大樹頭蘇記。

滑蛋炒牛河(RM 11) – 為了這碟連岳少都大讚的牛河，食唔落都要隊半碟。

最後去JOJOBAR SPA做個2.5hr 的SPA Package(2人Package RM 500)，再乘的士去機場，估唔到特然又落大雨，困了在Times Square，迫住用RM 85買了張去機場的士Coupon(商場內賣RM 85，酒店內賣RM 100，自已行出馬路上車只需少於RM 60)，劣。怪不得幾個華人的士司機都話「香港好吖，夠文明，馬拉就唔得啦，始終做唔到文明大國。」

補充資料 :

1.        如果自己冇車，可聯絡導遊Ms Lisa Preston (lisa@indianoceanexperiences.com.au) 安排接送，3hr觀看紅蟹大遷徒Tour每位AUD$ 65包早餐，兩位起。

2.        吉隆坡機場KLIA乘Coupon Taxi去北海飯店RM105，車程90min。

3.        因新加坡最近禁止馬來西亞榴槤入口，令馬來西亞榴槤近日跌了五成價，2012年7月在吉隆坡同一檔買貓山王要1kg ~ RM 28，12月已減到1kg ~ RM 15，其它品程也跌了五成價。

4.        乘Premier Taxi由北海飯店去吉隆坡(Alor Street附近)車費RM 50，車程35min。

5.        Luxury Serviced Suites@Times Square Berjaya Times沒有Reception，Check-in、Check-out和出入都超慢好痲煩，而且在Times Square沒有Meter Taxi，想搭的士要同佢買Coupon，但比市質貴40%，明屈客，唔Like。

6.        吉隆坡永興城茶餐室位於Jalan Imbi和Jalan Barat交界，閃閃書寫錯了地址和位置。

-----聖誕快樂Merry•Christmas Island(完)-----