旅居英國 • 動態移民(01) - 魔法古城 約克(York)

英國約克(York) 古城門Micklegate Bar

約克(York)位於英國英格蘭北部，是英國衆多的自治區之一，整個古城區均被城牆圍繞著，烏茲河(River Ouse)把古城分成東西兩岸，古城的景點大部份位於西岸。約克是個歷史悠久的古城，城內盡是古舊的建築物，電影哈利波特很多場景也是在城內取景，因此把這小鎮帶紅了，令很多波特迷專程來朝聖。

旅居英國 • 動態移民 – 序

個個都話要移民，唔通個個都鐘意移民咩？

小太熊都有廿年冇在屋企屈咁耐了，一肚子悶氣谷到上心口，建議話不如退租去英國啦，於是由11月開始計畫這次「旅居英國 動態移民」超級長旅程，計畫買張單程機票在2022年3月中出發，估唔到計劃期間發生好多事，航機經常被無聊取消，老普又開始攪事，腥港又不斷吹風話玩封城，日日玩圍封大廈，不確定性越來越大，最後決定提早二月出發早走早著。

 小太熊借了大量英國的旅遊書，我就負責Draft 行程和交通，小太熊就負責搵住宿。

老普開戰前換了大量英磅(£1兌HK$10.7)，點知冇耐就跌咗十九幾個巴仙，簡直心如刀割。

退租四日之後才出發，暫時無家可歸，要在酒店暫住。

港威酒店(Gateway Hotel) – 雙人房不包括早餐每晚HK$590，望住九龍公園景，價錢像已經回到30年前，住1晚先。

屯門貝爾特酒店(Pentahotel Hong Kong Tuen Mun) – 雙人房不包括早餐每晚HK$420，住2晚，又細又冇位掛衫，仲成日傳來陣陣臭渠味，甚差。

旅居英國 • 動態移民 – Day 01

今日出發好緊張，昨天又驚住所被圍封，又驚航機被溶斷，好彩最後都平安離境進入機場禁區，個心定返晒。

Check in時機場冷清清的。

松露蘑菇安格斯餐($54) – 入到禁區才有胃口食晚餐，好好食，上機前要食豐富啲。

因為之前變數太大唔敢比錢預訂火車、船和酒店，現在入了禁區個人才安心，食完飯便立即上網買英國火車證Two Together Railcard，訂埋重要的交通和酒店等等。

乘卡塔爾航空(單程票每位HK$2320)，貪佢用空機來腥港接人走唔會被溶斷。

小太熊好耐冇影過呢啲相了，上機前打個卡。

全機爆滿迫過以前，個個除晒狗罩食嘢，今次應該中硬廢鹽了，不過小事啦，我又唔係病夫。

19:10準時起飛，23:10 到達多哈等轉機。

旅居英國 • 動態移民 – Day 02

飛機在 多哈時間03:10再起飛，距離目的地好近了。

飛機晚餐勁難食，牛肉冇肉味飯又鬆散，又冇雪糕，早餐好少少，炒蛋有蛋味條腸都Ok。

<<倫敦>>

07:15到達 倫敦希思羅機場(London Heathrow Airport)，今日勁多人排隊入境，07:55～09:20排足85min才能入境。

排隊時買了12:56-14:47從London King’s Cross Station去York的火車票，諗住預鬆少少時間，三個多鐘由機場去到火車站實冇問題啦。

入境手續非常順利，完全冇嘢問。入境後立即買張Oyster Card，入£35用住先，再行去機場地鐵站想坐地鐵到King’s Cross Station。

點知特然見到呢段文字，原來今日有工業行動，Tube(地鐵)全線停駛，大L鑊，英國果然係工業大國，隔幾日就有工業行動。

人生路不熟，又冇巴士直接去King’s Cross Station，坐的士或者Uber要超過£100，仲貴過穿梭機，唯有簡單些坐機場快綫往Paddington Railway Station再作打算。在Paddington Railway Station出閘時被扣了£25，痴線咩咁Q貴，坐Tube只係£5.5，後來發現用Two Together Railcard 在Trainline Apps買票2人只係£15.3(慳返£34.7)，今次真係超級on9。

行出火車站後市面上非常混亂，很多人在路邊等巴士。

在巴士站發現有Bus No.205可以去到King’s Cross Station，7～10min 一班車，便決定坐巴士，點知等了20min連續失蹤了兩班車，都唔知係咪巴士司機又有咩商業行動，最後決定步行4.5km去King’s Cross Station。

唔好彩落雨添，幸好唔大雨，不過都濕晒了，見沿途很多人拉喼行同一方向，應該和我們同一處境掛。揹著大背囊落住雨，又濕又凍又大汗，內外都濕透了，好彩都係平路，上斜肯定命都冇。

11:15終於行到了火車站了，成身汗又濕又凍好辛苦，搵個位坐低著返多啲衫。

King's Cross Station – 是英國最繁忙的火車站之一，是英國北部城市接連倫敦的火車總站，有地鐵站接駁倫敦所有地區。車站因哈利波特電影而聞名，每日也有大量旅客專程到站內參觀打卡。

哈利波特9¾月台 – 電影 哈利波特的場景，位處King's Cross Station車站內，每年霍格華茲特快列車都會在此月台開出，用頭大力撞埋幅牆便可以穿過牆身進入月台，所以日日都有人排隊爭住扻頭埋牆。

在火車站買了支 2 Pint牛奶(£0.95)和朱古力麥維他消化餅(£1.04)頂頂肚先，今朝乜都未落肚。其實原來車站附近有麥當勞，下次唔會再捱呢啲。

King's Cross Station十分煩忙，火車要在開車前10min才知道月台號碼，所以一出號碼之後便要跑上車，慢慢行就實上唔切車。

<<約克>>

York Railway Station – 火車準時12:56-14:47到達York，終於來到第一個目的地了，相隔23年再重遊舊地，有點兒感動。今日York陽光普照，和London完全相反。

今日係英國的第一晚，小太熊昨天話要打響頭炮，揀間好嘢歎吓喎，我當然贊成啦，唔係打咀炮便可以了。

The Mount Royale Hotel – 距離York古城門Micklegate Bar只有600m，由York古宅改建而成的酒店，內外都古式古鄉，外牆都長滿青綠植物，的確好特別。

行進屋內便是Reception，先在這裡Check in攞房門鎖匙。

酒店內的酒吧很好Feel，因為有個燒柴的火爐暖笠笠。

酒店內的裝飾古老又有心思，感覺回到了古代，唔知呢度有冇果味嘢呢～

小太熊揀了右邊間獨立房間。

The Mount Royale Hotel(雙人房連早餐)每晚£144 – 面積夠大又整潔光猛好舒服，外有大花園，貴得有道理。

衣帽間的面積已經大過腥港啲劏房，有排打掃啦，在英國又真係幾淒涼囉。

今晚浸浴時要小心了，浴缸太大浸浴時真係有點危險。

放下行李在房內飲杯茶歎一陣，趁好太陽往外出走走。

Micklegate Bar – 約克古城南方一座超過800年歷史的主要城門，由酒店出發可以由這裡進入古城。

約克古羅馬城牆(York City Walls) – York自羅馬帝國時代開始就已經建了城牆，現在仍然屬於英國最完整的城牆。我帶小太熊由Micklegate Bar 行上城牆，沿著城牆環繞古城。

烏茲河(River Ouse) – 小河把約克古城一分為二。

過完河之後從城牆走返落古城繼續行街，York古城內滿佈歴史建築，行幾日都唔嫌。

York Magistrates Court – 位於Clifford Street的二級保護建築，古城內滿街都係這類咁高水準的建築物。

肉舖街(Shambles Street) – 窄窄的小巷滿佈外型古怪的小屋和特色商店，是哈利波特電影裡 斜角巷(Diagon Alley)的現實版，霍格華茲必備用品單上的所有東西都能夠在這魔法小巷買到。

小小的巷道已經有人出錢出力地支援 烏克蘭。

The Shop that must not be named - Shambles Street內的名店，裡面有魔法棒賣架，可以買一支變走一啲壞人，令佢哋永遠在世上消失。

The York Ghost Merchants – 賣鬼的專門店，長期要排隊排十幾人才能進內。

The Potions Cauldron – 售賣一種神奇魔法飲品，由貌似哈利波特的少年主理，不過價錢太貴唔捨得飲啊。

Golden Fleece – York古城內一間經常鬧鬼的酒吧，不過似係有鬼佬鬧事多啲，位於York Gin隔離。

St. Martins Church – 又係二級保護建築，在古城內行幾步便見一座類似的教堂。

River Ouse河伴的餐廳都好靚，不過一來為了慳錢，二來酒店咁靚都想多點時間留在房內，所以決定買外賣。

行了一陣街未夠17:45便日落了，難得在英國第一晩便見到火紅日落，英國天氣冇傳聞咁差咁啫。

今日好攰，早點回酒店休息，在酒店附近買些外賣返房食。反正今次在York住5日大把時間，明天再慢慢行。

在Fryway’s買了一份炸魚薯條，再去KFC買份炸雞套餐。

夜晚的The Mount Royale Hotel十足十鬼屋一樣，好Feel到呢，估唔到英國的第一晚仲見到少少星星添呀。

酒店的休息室和酒吧一個人都冇，在這裡歏一陣，感受一吓難得的異國寧靜。

返房了，外觀都算陰森了，難得小太熊唔怕…..

南非Shiraz紅酒(£5) – 在COOP買的平價酒，味道普通啦，在英國一般見到的紅酒價錢都係£5～£15左右，唔會太貴又唔會太平，貧富懸殊不像腥港咁嚴重。

Small Haddock & Chips (£7) – 非常大份，炸魚很香脆，薯條因為焗過和加了醋所以淋了些，不過味道整體上唔錯的。

Mighty Bucket (£6.99) – KFC的套餐，炸雞太乾又冇乜肉味，薯條又硬又幼唔好食，下次唔買。

已經攰到不能再攰，原本諗住浸浴都冇浸了，都係Book埋啲車票和酒店，早點休息。

 

 

補充資料 :

1.     卡塔爾航空 香港飛倫敦單程機票每位HK$2320。

2.     £1兌HK$10.66 (HSBC網上兌換)

3.     AXA 365日雙人旅遊保險HK$2816。

4.     英國火車優惠證Two Together Railcard 年費£30，可於一年內以優惠價買火車票，但必須二人同行，可於網上購買並存於手機內，購買時需要提供相片，乘車查票時可能會被要求出示。

5.     英國電話卡Giffgaff可以網上預訂，出發前寄到屋企，再Download 官方Apps，到埗後可以立即開卡用。有1個月£10 (包15GB上網加超平打長途電話和Local call)的Plan十分抵用。

6.     英國所有的無限次火車證都好貴，性價比低，最平火車票應該是用手機Apps : Trainline 或者TrC /TfW ，再以Two Together Railcard優惠購買。兩個Apps的票價可能不一樣，Trainline 有時會收少少Commission，所以每次買票時都要比較兩個Apps。買火車票一般係越早買越平，但又未必一定越早買越巴閉，有時優惠票會很遲才出現，完全冇路捉。

7.     乘火車由倫敦到York，持有Two Together Railcard雙人票價£36.9。

8.     在倫敦乘地鐵或巴士一定要買張Oyster Card，因為逐程車買票貴好多。地鐵繁忙時間由星期一至五07:30-09:00和17:00-19:00，車費會貴大約£0.7。倫敦地鐵經常罷駛，小心。

9.     陶傑話在英國餐廳食飯不可以主動揮手叫職員過來，會被視為不禮貌，只能乖乖坐定定等職員主動上前才落Order，或者用眼睛望住佢哋，等佢哋注意到再自己行過嚟。之後在全英國食過很多餐廳，留意到又真係冇人主動揮手叫職員落Order的，真係佢唔講都唔知。

10.        在英國生活基本上可以完全唔帶現金，99%的消費也可以用信用卡或Applepay附款，包括所有交通工具、餐廳和超級市場。

 

 

---待續---